1 Ovakorinto 1 - Etestamende Epe Moludhimba

¹ Omukanda hembu mau dhi kwaame Paulus, ngumba ithanwa kehalo lyaKalunga, omuyapostoli waKristus Jesus, wo mau dhi wo nokomukwetu Sostenes.

² Me sonekele eongalo lyaKalunga lyomoKorinto, mbava ningwa ovadhilikwa kuKristus Jesus, mbava ithanwa va ile ovadhilikwa pamo novantu avehe mbava ithana ena lyaMuhona wetu Jesus Kristus akuhe, nguu li Muhona wawo, ye nguu li Muhona wetu.

³ Et̯ilonkenda nouwa waKalunga Tate nowaMuhona Jesus Kristus ngau kale nan̯e.

Ompandu

⁴ Ame apehe ndji yandja ompandu kuKalunga kandje mena lyen̯i, mena lyet̯ilonkenda lyaKalunga ndyee mu pa muKristus Jesus.

⁵ Iya mwa ningwa ovahona movipuka avihe, himu li muKristus, modhondaka adhihe nomokwiiwa akuhe,

⁶ ngahi tji li etumwalaka ndimali popi ouhunga naKristus lya kolekwa mun̯e,

⁷ opo hámu hepa otjali tjopambepo nokanunu, himamu kevelele Muhona wetu Jesus Kristus hima ka hololoka.

⁸ Kalunga me mu pameke katee kehulilo, opo hámu kala nombedhi metango lyaMuhona wetu Jesus Kristus.

⁹ Kalunga omuliun̯ikwa, oye e mu ithana mu kale noukumo nOmuna Jesus Kristus, Muhona wetu.

Okuliyapauka meongalo

¹⁰ Vakwetu, ame me mu pukulula, mena lyaMuhona wetu Jesus Kristus okutya kalen̯i nomalipulo amo movipuka avihe mbimamu popi, mokati ken̯i hámu kala okuliyapauka, iya likuten̯i kumo, mu kale nondunge imo nomalipulo amo.

¹¹ Ovakwetu owokoyooKloe va ntjeela nawa ouhunga nan̯e okutya mokati ken̯i mu na omalutangu.

¹² Nge tye hinyahi: Ovantu kava popi tjimo. Umo ma tyaa: “Ame ndjiwaPaulus” ne “Ame ndjiwaApollos” ne “Ame ndjiwaKefas,” iya umo uke ma tyaa: “Ame ndjiwaKristus.”

¹³ Kristus wa yapaulwa? Ne ngwaa t̯a komutjaakano mena lyen̯i, oPaulus? Ne mwa tjatjelwa mena lyaPaulus?

¹⁴ Ame me pandula Kalunga, mena lyokutya hí na tja noumo owomun̯e ngumba tjatja, kakele kaKrispus naGaius.

¹⁵ Kape na tja noumo owomun̯e nguma tya wa tjatjelwa mena lyandje.

¹⁶ Iinga, mba tjatja wo owoyaStefanas, híme thipaluka, andaa pe na uke umo ngumba tjatja.

¹⁷ Kristus ka ntumine ndji ka tjatje, iya wa ntuma ndji ka teethe ondaka ombwa, ahame ka teetha kounongo wountu. Ounongo wountu mau ningi et̯o lyaKristus lyokomutjaakano li kale ahali na otjilinga.

Kristus oye e li odhonkono nounongo waKalunga

¹⁸ Ondaka ndjimai popi ouhunga net̯o lyaKristus komutjaakano kumbamava keka, i ngala owoova, iya kunt̯e mbamatu hupithwa, oyo i li odhonkono dhaKalunga.

¹⁹ Iya kwa sonekwa okutyaa: “Ame me han̯auna po ounongo wovanongo, odhondunge dhovanadhondunge me dhi itha po.”

²⁰ Omunongo u li pi? Omulongiveta u li pi? Nguu tji i okutetha ombata u li pi? Ounongo wouye hembu Kalunga ke u pidhidhikile, u ile owoova.

²¹ Iya ounongo waKalunga kau itavelele, ouye u iwe Kalunga kounongo wawo. Kalunga wa tokola okuhupitha mbava itavela hiaa undapetha eteetho lyetu ndii tiwa owoova.

²² Ovajuda va pula omatangan̯eko, Ovagreka va taendha ounongo,

²³ iya nt̯e tu teetha Kristus ngwaa papelwa komutjaakano, nguu li otjiputalethi kOvajuda nowoova kovapaani.

²⁴ Iya Ovajuda nOvagreka mbava ithanwa kuKalunga, matu ve teethele Kristus, nguu li odhonkono nounongo waKalunga.

²⁵ Iya owoova waKalunga u na ounongo okupon̯a owovantu, noungone waKalunga wa kola okupon̯a owovantu.

²⁶ Vakwetu, talen̯i okutya mwa vadhwa amu li vi, Kalunga hiee mu ithana. Okupopya mountu havengi mbava li ovanongo, havengi mbava li ovanadhonkono, havengi mbava ingonekwa.

²⁷ Iya ovipuka mbyoka vyomouye mbii ngala owoova Kalunga ovyo a holowola, opo a t̯ithe ohon̯i ovanongo. Iya ovipuka mbyoka vyomouye mbii ngala ovingone Kalunga ovyo a holowola, opo a t̯ithe ohon̯i mbyaa kola.

²⁸ Iya ovipuka mbyoka vyomouye mbii ngala va lyatelwa pohi nambyoka mbyaa tombwa Kalunga ovyo a hololowola, opo a han̯aune po soka ouye himau tala okutya tji na otjilinga,

²⁹ opo hápa kala omuntu noumo ngume litanga kotjipala tjaKalunga.

³⁰ Iya mena lyaKalunga mwa ila owomuKristus Jesus. Kalunga wa ninga Kristus a ile ounongo wetu. We tu ninga ovavyuuki, tu kale ovadhilikwa, muKristus he tu yowola kodhonkali.

³¹ Iya ngahi kwa sonekwa hikwa tiwaa: “Ngume litanga, nge litangele Muhona.”