1 Johannes 5 - Etestamende Epe Moludhimba

Eitavelo ndyaa ton̯a ouye

¹ Auhe nguma itavele okutya Jesus oye e li Messias, wa yumukwa muKalunga, nanguu hole omuyumuki, ma kala ae hole wo omuyumukwa waKalunga.

² Iya nyahoka tu tji i okutya tu hole odhondele dhaKalunga, andaa tu hole Kalunga, novitumino vye tu vi takametha.

³ Iya ohole yokuhole Kalunga hooyondji okutya tu takamethe ovitumino vye. Iya ovitumino vye havidheu.

⁴ Iya auhe ngwaa yumukwa muKalunga, ma ton̯a ouye. Iya eitavelo lyetu olyo li li outon̯i wokuton̯a ouye.

⁵ Aan̯i nguma ton̯a ouye, andaa haye ngoka nguma itavele okutya Jesus oye e li OmunwaKalunga?

Oumbangi ouhunga naJesus

⁶ Jesus Kristus we ya momeva nomombindhi. Hamomeva vala aeika, iya omomeva nomombindhi. Ombepo oyo mai hipulula, mena lyokutya Ombepo oyo i li otjatjili.

⁷ Iya pe na odhombangi ndatu:

⁸ Ombepo nomeva nombindhi mavi popi tjimo.

⁹ Andaa matu tambula oumbangi wovantu, oumbangi waKalunga ounene, mena lyokutya oumbangi hembu owaKalunga, mena lyokutya mau hipulula ouhunga nOmuna.

¹⁰ Nguma itavele mOmunwaKalunga u na oumbangi muye. Nguha itavelele muKalunga, wa ninga Kalunga onkembi, mena lyokutya ye ka itavelele oumbangi, Kalunga hiaa hipulula ouhunga nOmuna.

¹¹ Iya oumbangi hoowombu: Kalunga we tu pa omwenyo waapehe, omwenyo hembu waapehe u li mOmuna.

¹² Nguu na Omuna, u na omwenyo, nguhe na OmunwaKalunga, ke na tja omwenyo.

Omwenyo waapehe

¹³ Me mu sonekele ovipuka hembi, n̯e mbamwa itavela mena lyOmunwaKalunga, mu iwe okutya mu na omwenyo waapehe.

¹⁴ Iya eliun̯iko lyetu nditu na lyo muye hoolyondi okutya atjihe himatu mu kumbu kehalo lye, me tu tee.

¹⁵ Iya andaa tu tji i okutya me tu tee, atjihe himatu kumbu, tu tji i wo okutya hitwa kumbu, matu tji pewa.

¹⁶ Andaa wa mono omukwen̯i ama lundha, elundho ndihali thi olyokut̯a, kumba kuKalunga, Kalunga omuntu ngoka me mu pa omwenyo, iya otjo ma ningile mbahava lundha oulundhi wokut̯a. Pe na oulundhi mbumau ulu okutwala met̯o. Iya ame hí tile soka ngatjo mu kumbila.

¹⁷ Atjihe hihatji vyuukile oulundhi, iya ku na oulundhi umo mbuhau twala met̯o.

¹⁸ Tu tji i okutya auhe ngwaa yumukwa muKalunga ka twikile okulundha, iya ngwaa yumukwa muKalunga, OmunwaKalunga me mu amene, omunauvi kee mu t̯in̯i.

¹⁹ Tu tji i okutya nt̯e tuvaKalunga, nouye auhe owometumino lyomunauvi.

²⁰ Nt̯e tu tji i okutya OmunwaKalunga we ya, he tu pa etyeeko, opo tu iwe Kalunga katjatjili. Nt̯e tu li muye nguu li owatjatjili, mOmuna Jesus Kristus. Oye e li Kalunga katjatjili, nomwenyo waapehe.

²¹ Vanwandje, lungamenen̯i ovikalunga.