1 Johannes 3 - Etestamende Epe Moludhimba

Odhondele dhaKalunga

¹ Talen̯i ohole mpai lithike, Tate ndjee tu pa, hitu ithanwa odhondele dhaKalunga, iya nt̯e otjo tu li. Iya ouye kau tu i, mena lyokutya kau i Kalunga.

² Vahivilikwa, iya napano tudhondele dhaKalunga, atjaa katjiya hololoka okutya matu ka kala vi. Tu tji i okutya Kristus hima ka hololoka, matu ka kala ngaye, mena lyokutya matu ke mu mona ngahi e li.

³ Iya auhe nguu na eliun̯iko hendi okuliun̯ika muye, nge likohole, ngaye hiaa kohoka.

⁴ Auhe nguma lundha, ma yono wo oveta, mena lyokutya okulundha okuyona oveta.

⁵ Mu tji i okutya Kristus we ya okwiitha po odhonkali, muye kamu na oulundhi.

⁶ Auhe nguma kala muye, kaa lundha. Auhe nguma lundha, ke mu mwene, ye ke mu i.

⁷ Vanwandje, hámu pukithwa komuntu noumo. Nguma undapa ouvyuuki omuvyuuki, ngaKristus hiee li omuvyuuki.

⁸ Nguma lundha owomudiapoli, mena lyokutya omudiapoli wa lundha okudha peutilo. Iya OmunwaKalunga we ya a han̯aune po ovilinga vyomudiapoli.

⁹ Auhe ngoka ngwaa yumukwa muKalunga ka lundha, mena lyokutya ombuto yaKalunga i li muye. Iya kaa ulu okulundha, mena lyokutya wa yumukwa muKalunga.

¹⁰ Iya mpoka opo mapa moneka odhondele dhaKalunga nodhondele dhomudiapoli. Nguhama undapa ouvyuuki, nanguhe hole wo omukwawo, hawaKalunga.

Kalen̯i amu lihole

¹¹ Iya mena lyokutya hendji oyo i li ondaka ndjimwa tyaa okudha peutilo okutya nt̯e twa thele okukala atu lihole,

¹² ahamatu ngala Kain, ngwaa ama komunauvi, ha dhipaa omunitje. Iya we mu dhipaela tji? We mu dhipaela mena lyokutya ovilinga vye vya li ovivi, ovyomunitje vya li ovivyuuki.

¹³ Vakwetu, ouye andaa u mu yele, hámu kumwa.

¹⁴ Nt̯e tu tji i okutya twa dha met̯o, twe ya momwenyo, mena lyokutya tu hole ovakwetu. Nguhe hole omukwawo, ma kala met̯o.

¹⁵ Auhe ngoka nguu yele omukwawo, oye e li omudhipai. N̯e mu tji i okutya omudhipai ke na tja omwenyo waapehe.

¹⁶ Iya nyahoka ohole twe i iwa, Jesus hiee tu yandjela omwenyo we, nant̯e wo twa thele okuyandjela ovakwetu omienyo vyetu.

¹⁷ Andaa pe na nguu na emona lyouye hembu, ye u lwete omukwawo nguu li moluhepo, ye ha kukutike omutima we, ohole yaKalunga mai kala mo vi muye?

¹⁸ Vanwandje, hátu kala atu lihole vala nelaka, iya ngatu kale atu lihole movilinga nomotjatjili!

Eliun̯iko kotjipala tjaKalunga

¹⁹ Iya nyahoka matu ka iwa okutya tu li motjatjili, nomitima vyetu kotjipala tjaKalunga mavi tendelekwa.

²⁰ Iya andaa omitima vyetu mavi tu pa ombedhi, okutya tu tji i okutya Kalunga oye e li omunene ngwaa pon̯a omitima vyetu, ye nguu iwa ovipuka avihe.

²¹ Vahivilikwa, iya andaa omitima vyetu kaavi tu pa ombedhi, okutya tu na eliun̯iko kotjipala tjaKalunga.

²² Atjihe himatu pula, matu tji pewa kuye, mena lyokutya tu takametha ovitumino vye, nt̯e tu undapa hitje mu thevelwa.

²³ Hehi otjo tji li otjitumino tje okutya nt̯e tu itavele ena lyOmuna Jesus Kristus, tu kale atu lihole ngahi e tu pa otjitumino.

²⁴ Nguma takametha ovitumino vye, ma kala muKalunga, naKalunga ma kala muye. Iya nyahoka tu tji i okutya Kalunga ma kala munt̯e, tu tji i mena lyOmbepo ndjoka ndjee tu pa.