Zʋkpaɩ 6 - A SƐB-SÕW

Yã na wul càar'ɩ a nɩ-yoru samɛ a

¹ Ɩ̃ bie e, a ɩ mɛ̃ fʋ ŋmɛ n nyãa yel kɛ́ fʋ̃ʋ so a fʋ bá san na ya,

² fʋ ƴɛ̀r'a a fʋ ƴɛ̀rʋ nyɔw fʋ, ɛ́ fʋ lo a ƴɛ̀rʋ fʋ na ƴɛ̀r a bɛra pʋɔ.

³ A lɛ pʋɔ a, fʋ lo n a san-sowre nuru pʋɔ, ɛ́ a fɛr'a kɛ́ fʋ faa fʋ tʋɔra. Cen tɩ páw ʋ, zɛlɩ ʋ yãayãa, sɔbr ʋ niwn.

⁴ Ta yel kɛ́ fʋ pɩ̃ɛnɩ ɛ, ta ũù mimir ɛ, ɛ́ gù a yele tɩ maalɩ.

⁵ Faa fʋ tʋɔra a bɛra ŋa pʋɔ mɛ̃ wal-daa a, mɛ̃ lile a bɛra sob nuru pʋɔ a.

A ƴã-tuo sob nɩ a nyɩra yele

⁶ Ƴã-tuo sob i, nyɛ̃ a nyɩra a! Jɩ́r a lɛ ʋ na ɩrɛ a kaa, ɛ́ fʋ na lɩɛb'ɩ yã-bãwnɛ.

⁷ Ʋ bɛ tɛr nɩr na piwre ʋ a ɩ, bɛ tɛr tõ-tõ-biir nɩ-kpɛ̃ɛ ɩ, bɛ tɛr tome zu-sob ɛ.

⁸ Ɛcɛ, a ũon a, ʋ mɩ́ bɔ n a bʋ̃-dɩrɩ ɓã-taa. A bʋ̃-dieri daar a, ʋ mɩ́ cɔbr'ɩ a bʋ̃-dɩrɩ maal bin.

⁹ Ɛ́ a fʋ̃ʋ, ƴã-tuo sob i, debor'a fʋ na gã tɩ ta? Debor'a fʋ na ìr a fʋ gʋ̃ɔ pʋɔ?

¹⁰ Gʋ̃ɔ blã, zánʋ blã, gã dɔl blã weri a nuru,

¹¹ ɛ́ a nã́w n'a ta ùr fʋ mɛ̃ nyãnyuwe a, ɛ́ a kɔ̃ ta fʋ mɛ̃ nɩ-farɛ a.

A zir-ŋmarɛ ŋmɛ̃a

¹² A nɩr na mɩ́ ŋmarɛ a ziri a ɩ n nɩ-bɛ-tɛr-bir, ɩ-fa-maalɛ.

¹³ Ʋ mɩ́ kpɩmnɛ nɩ a mimir bɛ̀lɛ nɩ a ʋ taabɛ, ʋ mɩ́ tʋɔr'ɩ a gbɛ́ɛ kabrɛ nɩ, ʋ mɩ́ manɛ na wule nɩ a nobie.

¹⁴ A faa tɛwr'a ʋ nɔnɛ. Kʋralɛ n'a ʋ mɩ́ cɔbrɛ a yel-faa, ʋ mɩ́ ɩrɛ na a nɩbɛ zɛbr taa.

¹⁵ Alɛ n'a so a ʋ loba na ùr ʋ, ʋ na sãw nɩ a pɛr nɛ pʋɔ ɛ́ a bɛ tɛr tɩ̃ɩ ɛ.

A yele al a Sore na hɩ̃ɛn a

^16-19 Yele ayʋɔb be n be a Sore hɩ̃ɛn, bɛ mɩ́ bɔbr k'ʋʋ nyɛ̃ a ɩ: a pɔ̀l-jɩ́rʋ, a nʋɔr na ŋmarɛ ziri a, a nuru na kʋrɛ a nɩbɛ na bɛ tɛr sãwna a, a socir na cɔbrɛ yel-faar maalʋ a, a gbɛ́ɛ na zɔrɛ tɩ maalɛ a yel-faar a, a dãsɩɛ sob na ŋmarɛ ziri a. Ɛcɛ a yele ayopõi sob mɩ́ be n be a Sore na hɩ̃ɛn a: ʋlɛ n'ɩ a nɩr na ƴãwnɛ yɛbr tãá a.

Gùre fʋ tʋɔra a pɩ̃ɔ-yele ƴãw

²⁰ Ɩ̃ bie e, sàwr a fʋ sãà nʋɔr, taa zawrɛ a fʋ mã wulu bɛrɛ ɩ.

²¹ Ƴãw a a fʋ socir pʋɔ kʋralɛ, ƴãw a a fʋ kɔkɔrɩ́ mɛ̃ pɩ̃ɛmɛ a.

²² A na mɩ́ wule fʋ nɩ a sɔ́r a fʋ cenu nɩ a fʋ lɛb-waa pʋɔ, a na mɩ́ gù b'ɩ a fʋ gaa zie, ɛ́ fʋ̃ʋ wa ìr a, a na mɩ́ ƴɛ̀rɛ nɩ fʋ na.

²³ Bʋ̃ʋ n'ʋ vɛ̃, a nɔ-ƴãwna ɩ na mɛ̃ fɩ̃tɩlɛ a, ɛ́ a wulu ɩ mɛ̃ cãà a. A kpãàfʋ nɩ a yelu n'a mɩ́ ɩ kɛ̀ tɩ àr a nyɔ-vʋʋrʋ sɔ́r zu.

²⁴ A na gù b'ɩ a pɔw na bɛ ɩrɛ vla a ƴãw, a pɔw fʋ na bɛ bãw a nɔ-kãá ƴãw.

²⁵ Taa bɔbr a pɔw ŋa tɔ a ʋ vɩɛlʋ zũú ɛ, taa sàwr a ʋ jɩ́rʋ tʋ̃ɔ́ fʋ ɛ.

²⁶ Bʋ̃ʋ n'ʋ vɛ̃, a pɔw-yɛm a, bʋ̃-dɩrɩ blãlɛ n'a ʋ mɩ́ bɔbr, ɛcɛ a pɔw na tɛr sɩr a, a fʋ nyɔ-vʋʋrʋ za n'ʋ ʋ mɩ́ de.

²⁷ Nɩr na tʋ̃ɔ́ na ƴãw vũu a ʋ bʋ̃-zʋbɛ pʋɔ, ɛ́ a kparʋ za bɛ dɩ ɛ?

²⁸ Nɩr na tʋ̃ɔ́ na do vũ-bie zu, ɛ́ a bɛ ɓor ʋ a gbɛ́ɛ ɩ?

²⁹ À ŋá n'a a mɩ̀ ŋmɛ̃ nɩr na tawr pɩɛlɛ a ʋ tɔ pɔw a zie. Sob nɛ na tʋɔr ʋ a kʋ̃ vɛ̃ bɛ nyɛ̃ dɔwrʋ ɛ.

³⁰ Nyãnyuwe kɔ̃ na kpɩɛr ʋ zu k'ʋʋ dɩ paalɩ nyagɛ a, bɛ bɛ mɩ́ ɩrɛ ʋ laar ɛ.

³¹ Ɛcɛ bɛlɛ wa nyɔw ʋ a, ʋ na ya n gb'a ayopõi dɔwlɩ, ʋ na tɩr'ɩ a ʋ bʋ̃-tɛrɩ za.

³² Nɩr na gã nɩ pɔw-tɛr-sɩr a bɛ tɛr yã ɩ. Ʋ na ɩrɛ à à ŋá a, a ʋl mɩŋa nyɔ-vʋʋrʋ n'ʋ ʋ sãwnɛ.

³³ Ʋ na nyɛ̃ nɩ ŋmɩɛrʋ nɩ yo-sãw, ɛ́ a ʋ vĩ kʋ̃ tɛr baarʋ ɛ.

³⁴ Bʋ̃ʋ n'ʋ vɛ̃, a nyuur na ƴãw nɩ su-yãyaar a pɔw sɩr, ʋʋ kʋ̃ zɔ nɩbaalʋ a san yaafʋ ƴãw ɛ.

³⁵ Ʋ kʋ̃ sàw de libir a yele á ŋá maalʋ ƴãw ɛ. Bɛlɛ saa na kʋ̀ ʋ bʋ̃-kʋ̀rɩ yaga za a, ʋ kʋ̃ lɩɛbɩ a ʋ tɩ́ɛrʋ ɛ.