Zʋkpaɩ 31 - A SƐB-SÕW

Mã na wule yã a ʋ bidɛb na ɩ nãà a

¹ Nyɛ̃ a wulu a Masa tẽw nãà, Lemuwɛl, mã na wul ʋ a:

² Ɩ̃ bidɛb i, ɩ̃ pʋɔ bʋ̃-dɔwra a, fʋ̃ʋ ɩ̃ na bɔ nɩ ɩ̃ pʋɔ za a, bɛrɛ wone!

³ Ɩ̃ bidɛb i, ta sàw a pɔwbɛ sãw a fʋ fãw bɛr ɛ. Ta bɛr a bɛl na mɩ́ ɩ a na-mɩnɛ bɛ bɔr a, bɛ so b ɛ.

⁴ Lemuwɛl i, a divɛ̃ bɛ vɩɛl a na-mɩnɛ zie ɩ, bɛlɛ bɛ nɛbɛ sɛw kɛ́ bɛ mɩ́ nyũ a ɩ, ɛ́ a dã-kpɛn bɛ vɩɛl a nɩ-bɛrɛ zie ɩ.

⁵ Bʋ̃ʋ n'ʋ vɛ̃, bɛlɛ wa nyuur a a, bɛ na mɩ́ yiir'ɩ a nɛ́ɛ na ƴãw a bɛr, ɛ́ bɛ kʋ̃ mɩ́ dɩ a ƴɛ̀rʋ a tu mɩnʋ bɛ kʋ̀ a nan dem ɛ.

⁶ Bɛ nɩ̃ɛ mɩ́ kʋ̀ a dã-kpɛn a sob nɛ na na kpi a, ɛ́ kʋ̀ divɛ̃ a sob nɛ na ɩrɛ wʋ̀ʋr a.

⁷ Ʋ na nyũ na yiir'ɩ a ʋ wʋ̀ʋr bɛr, ʋ kʋ̃ cãà tɛr a ʋ kpɩɛrʋ tɩɛrʋ ɛ.

⁸ Ɛcɛ a fʋ̃ʋ a, a fɛr'a kɛ́ fʋ mɩ́ ƴɛ̀r faa a bɛlɩ dem na bɛ tɛr nʋɔr a. A fɛr'a kɛ́ fʋ mɩ́ zɛb faa a bɛlɩ dem bɛ na jɛ bɛr a.

⁹ Mɩ́ háa a fʋ nʋɔr dɩ n a ƴɛ̀rʋ nɩ mɩnʋ, ɛ́ mɩ́ ƴɛ̀r faa a bãbàalbɛ nɩ a nan dem.

A pɔw na ɩ pɔw a

¹⁰ A pɔw na ɩ pɔw a, ãa n'ʋ na nyɛ̃ ʋ? Ʋ tɛr'ɩ yel-ɩra zuo lɛw-vɩɛlɩ vɩɛlɩ.

¹¹ A ʋ sɩr mɩ́ ɓãa nɩ ƴãw bɛr tɩ́ɛrʋ a ʋ ƴãw, ʋ bɛ sãwnɛ a ʋ sɩr tɛra bɛrɛ ɩ.

¹² Ʋ bɛ malɛ a ʋ sɩr towtow ɛ, ʋ mɩ́ ɩrɛ na k'ʋ nyɛrɛ nʋ̃ɔ̀ a ʋ nyɔ-vʋʋrʋ pʋɔ bibi-vɩɛrɩ za.

¹³ Ʋ mɩ́ ƴãw nɩ fãw bɔ píir kɔblʋ nɩ lɛ̃ pɛnɛ, ɛ́ tone nɩ nuru na nɔnɛ tome a.

¹⁴ Ʋ mɩ́ ɩ n a ʋ bʋ̃-dɩrɩ yi zi-zãána wa, mɛ̃ a gbor-bɛrɛ na maalɛ yɛ̀rʋ́ a.

¹⁵ Ʋ mɩ́ ŋmãa nɩ zie ìr, maalɩ a ʋ yir dem bʋ̃-dɩrɩ, ɛ́ põ a ʋ tõ-tõ-bi-pɔwbɛ a bɛ tome.

¹⁶ Ʋ mɩ́ tɛr'ɩ púo tɩ̀ɛrʋ ɛ́ dà ʋ. Ʋ mɩ́ kɔ n divɛ̃ tɩɩr púo nɩ a libie ʋ na mɩ́ páw a.

¹⁷ Ʋ mɩ́ ƴãw nɩ fãw tone, ʋ bɛ zɩnɛ zawla ɩ.

¹⁸ Ʋ mɩ́ nyɛ̃ na k'aa ʋ tome cere nɩ vla, ɛ́ a ʋ fɩ̃tɩlɛ vũu bɛ kpiire a tɩ̃ɩsɔw ɛ.

¹⁹ A ʋ nuru mɩ́ vile nɩ a píir kɔblʋ fomie, ɛ́ a ʋ nobie wóbr a bʋ̃-suuri.

²⁰ Ʋ mɩ́ sõwne nɩ a bãbàalbɛ, ɛ́ kʋ̀rɛ bome a nan dem.

²¹ Ʋ bɛ zɔrɛ ƴawr a ʋ yir dem ƴãw ɛ, bʋ̃ʋ n'ʋ vɛ̃, bɛ za mɩ́ su na dɔwlɩ taa.

²² Ʋ mɩ́ maal'ɩ gan-vaarɩ, ɛ́ a ʋ bʋ̃-suuri ɩ lɛ̃ pɛn-vɩɛlɩ vɩɛlɩ zɩɩr zɩɩr.

²³ A ʋ sɩr ɩ n nɩ-yúor bɛ na ƴãwnɛ a. Ʋ mɩ́ pʋɔ nɩ a tẽ-kpɛ̃ɛ nɩ-kore lãw pʋɔ.

²⁴ A pɔw ŋa mɩ́ sɩɛr'ɩ bʋ̃-suuri a kʋɔrʋ ƴãw, nɩ kpàgɛ ʋ na mɩ́ kʋɔrɩ kʋ̀ a yɛ-yɛrɛ na tɔlɛ a.

²⁵ A fãw nɩ a ƴãwfʋ n'a ɩ a ʋ pɩ̃ɛmɛ, ɛ́ ʋlɛ wa tɩ́ɛrɛ a nɩdaar a, ʋ mɩ́ bɛr'ɩ tɩɛrʋ.

²⁶ Ʋ mɩ́ ƴɛ̀rɛ na nɩ yã-bãwfʋ, ʋ mɩ́ wule nɩ a yã nɩ nɔ̃wfʋ.

²⁷ Ʋ mɩ́ jɩ́rɛ nɩ bom za na ɩrɛ a ʋ yir pʋɔ a, ɛ́ bɛ mɩ́ sàw na cʋɔbɩ nuru zɩ̃ nɩ ɛ.

²⁸ A ʋ bibiir mɩ́ mʋʋrɛ ʋ nɩ a nɩbɛ za niŋé, ɛ́ a ʋ sɩr íre a ʋ yúor.

²⁹ Ʋ mɩ́ yere na: «Pɔwbɛ na ɩ pɔwbɛ a yãwmɛ na, ɛcɛ a fʋ̃ʋ a, fʋ gãw nɩ bɛ za.»

³⁰ A vɩɛlʋ ɩ n bɛlʋ, a pɔ̀lʋ bɛ cɛlɛ ɩ, pɔw na zɔrɛ a Sore a n'ʋ sɛwnɩ a danʋ.

³¹ Bɛ kʋ̀ ʋ a ʋ tome sã-ya. Bɛ danɛ ʋ a ʋ tome ƴãw a nɩ-yaga tuor-taa ziir!