Zʋkpaɩ 27 - A SƐB-SÕW

¹ Ta mʋʋrɛ fʋ tʋɔra a bio ƴãw ɛ, bʋ̃ʋ n'ʋ vɛ̃, fʋ bɛ bãw bom nɛ na na ɩ a dɩ̃a a ɩ.

² Bɛr sãan danɛ fʋ. Bɛr sãan ʋ danɩ fʋ, a ta ɩ a fʋ̃ʋ mɩŋa ɩ!

³ Kʋsɩɛr tɩbrɛ na, biire mɩ̀ tɩbrɛ, ɛcɛ a dãbol suur tɩbrɛ na zuo lɛ.

⁴ A po-to-fãw-ɩb kpɛ n faa bɛ dɩ vuo ɩ, a suur ɩ na mɛ̃ bàa na paalɩ kʋ̃ɔ yi nɛ́ɛ a, ɛcɛ ãa n'ʋ na tʋ̃ɔ́ bà gbɛ́r a nyuur niŋé?

⁵ Yelu fʋ na yel nɩr cãàmɩ́ a sa n báalʋ na bɛ sãá a.

⁶ Bá na yel a fʋ sãwna a, a wule nɩ a ʋ nɔ̃wfʋ, ɛcɛ a dɔ̃ sob na nyɔw fʋ weri a ɩ n bɛ̀lɛ.

⁷ Nɩr na tɩw a mɩ́ zawr'ɩ a sɩwr tɔr za bɛr, ɛcɛ kɔ̃ sob bɛ bãw bʋ̃-tuo ɩ.

⁸ A lile na mɩ́ bʋnɩ ƴaw viire zãá nɩ a ʋ cow a, lɛ n'a a nɩr na mɩ́ bʋnɩ cɔlɛ zãá nɩ a ʋ tẽw a ŋmɛ̃.

⁹ A kãá nɩ a parfɛ̃ mɩ́ ɩ na a socir tɛr nʋ̃ɔ̀, ɛ́ nʋ̃ɔ̀ bá na ƴãwnɛ fʋ a, sa a yã-wulu fʋ na wule a fʋ̃ʋ mɩŋa a.

¹⁰ Taa zawrɛ a fʋ bá nɩ a fʋ sãà bá bɛrɛ ɩ. Alɛ wa fɛrɛ fʋ a, taa cere a fʋ yɛb zie ɩ. Sɩman sob kãw mɩ́ wa sa n yɛb-zãána.

¹¹ Ɩ̃ bie e, ɩrɛ bibi-yã-bãwnɛ ɩb, nʋ̃ɔ̀ na kpɩɛr mɛ̃ na, ɛ́ nɩr wa yere mɛ̃ a, ɩ̃ na tʋ̃ɔ́ na sɔw kʋ̀ ʋ.

¹² A kpɩɛrʋ wa waar a, a nɩr na bãw maal-ɩb a mɩ́ sɔwl'a. Ɛcɛ a bɛlɩ dem na bɛ bãw bom a mɩ́ cãà na lo a bɛ sɔ́r, tɩ páw a tuo.

¹³ Nɩr wa ŋmɛ nyãa yel kɛ́ fʋ pɛ̃w libir nɩr fʋ na bɛ bãw a, de a ʋ bʋ̃-suura ʋ ɩ a san bãwfʋ bom. Tɛr a bãwfʋ bom ŋa, bʋ̃ʋ n'ʋ vɛ̃, ʋ sàw na kɛ́ fʋ pɛ̃w libir nɩr fʋ na bɛ bãw a.

¹⁴ Nɩr wa puore a ʋ tɔ sob ɩrɛ nɩ gɔmɛ a biɓaar-pipi a, a ʋ puoru na ɩ na mɛ̃ zʋm'ʋ a.

¹⁵ Sɩlãsʋɔr saa na waar a kʋ̃ɔ cire kʋralɛ a nɩ pɔw-nɔ-haarʋ sob ɩ n been.

¹⁶ Nɩr na bɔbr k'ʋʋ ɩ a kʋ̃ɔ a tɛw a ɩ na mɛ̃ ʋ bɔbr'a k'ʋʋ nyɔw sɛsɛb bɩɩ kãá-kʋ̃ɔ nɩ nũu a.

¹⁷ Kure n'ʋ mɩ́ saalɩ a kure, lɛ mɩ̀ n'a, a nɩbɛ na cere tʋɔr taa a pʋɔ n'a a yã mɩ́ yuo.

¹⁸ Nɩr na kaarɛ a ʋ kãkã-tɩɛ zie a na dɩ n a wɔmɛ. Nɩr na kaarɛ a ʋ zu-sob zie a na nyɛ̃ nɩ ƴãwfʋ.

¹⁹ Mɛ̃ a lɛ a tɩ niwn na mɩ́ sãá a kʋ̃ɔ pʋɔ a, lɛ n'a a nɩr tɩ́ɛrʋ mɩ̀ mɩ́ sãá a ʋ niwn ƴãw.

²⁰ A kpɩmɛ tẽw nɩ a bɔw-zulu bɛ tɛr sɛwfʋ ɛ, lɛ mɩ̀ n'a a nɩsaal mimie mɩ̀ kʋ̃ tʋ̃ɔ́ tɩw ɛ.

²¹ Vũu n'a mɩ́ wul a salm-zɩɛ nɩ a salm-pla vɩɛlʋ. A nɩsaal vɩɛlʋ yi n a yúor ʋ na páwr a zie.

²² Fʋ̃ʋ saa tɔ a dãbol nɩ tùlú, mɛ̃ a lɛ bɛ na mɩ́ tɔ a bʋ̃-bie a tʋɔr pʋɔ a, a ʋ dãbolu kʋ̃ yi ɛ.

²³ Bãw a fʋ píir been been vla, kaarɛ a fʋ dʋn zie.

²⁴ Bʋ̃ʋ n'ʋ vɛ̃, a naalʋ bɛ bere be kʋralɛ ɩ, ɛ́ nãà-kpawʋɔ bɛ ɩ dɔw-lɩɛr-taa bom ɛ!

²⁵ Ŋma a póru pʋɔ mʋ̃ɔ, ɛ́ a lɛn daar a mʋ̃ɔ na tɔmnɛ a, wob a mɔ̃-kon a tãw zu.

²⁶ Tɛr píir mɩ́ su a píir kɔblʋ kparɩ, tɛr bʋrɩ tʋ̃ɔ́ dà púo.

²⁷ A bʋʋr bʋ̀rʋ, a ʋr a fʋ zie fʋ guole nɩ fʋ tʋɔra, fʋ guole nɩ a fʋ yir dem, nɩ a fʋ tõ-tõ-bi-pɔwbɛ.