Zʋkpaɩ 23 - A SƐB-SÕW

¹ Fʋ̃ʋ wa lãw zɩ̃ nɩ nɩ-tɩbrʋ a dɩb ƴãw a, fʋ̃ʋ maal ɩrɛ vla a sob nɛ na be a fʋ niŋé a ƴãw.

² Fʋ̃ʋ wa ɩ nɩr na dɩrɛ zuo a, fʋ̃ʋ siwri a fʋ dɩb vʋla.

³ Ta nyɛ̃ a ʋ bʋ̃-dɩ-nʋʋr bɔbr a ɩ, a nãà tʋ̃ɔ́ na ɩ bɛra a fʋ zie.

⁴ Ta bàlɛ fʋ tʋɔra a naalʋ kpɛb ƴãw ɛ, ta cãà tɛr a tɩ́ɛrʋ mɩ̀ ɛ.

⁵ Fʋ bɛ mɩ́ nyɛ̃ ʋ baar ɛ, ʋʋ bɔr, ʋ mɩ́ ƴãw nɩ pɩgɛ ƴaw nɩ mɛ̃ a sɩla na mɩ́ ƴaw do a salom zu a.

⁶ Ta mɩ́ lãw dɩ n nɩr na nyùur'ɩ a ʋ taabɛ a ɩ, ta mɩ́ nyɛ̃ a ʋ bʋ̃-dɩ-nʋʋr bɔbr a ɩ.

⁷ Bʋ̃ʋ n'ʋ vɛ̃, ʋ bɛ mɩ́ ɩ a nɩr ʋl ʋ na sãá a ɩ. Ʋ mɩ́ yel fʋ na: «Dɩrɛ ɛ́ nyúur», ɛcɛ a ʋ pʋɔ bɛ de b ɛ.

⁸ Al pùorí fʋ na ti n a ʋlɩ bom fʋ na dɩ a ƴɛrɛlɛ a bɛr, ɛ́ a mʋʋrʋ fʋ na mʋʋr'ʋ a ɩ zawla.

⁹ Ta ƴɛ̀rɛ a dãbol sob zie ɩ, alɛ bɛ ɩ lɛ, ʋ na ɩ n a fʋ ƴɛ̀rʋ fʋ na ƴɛ̀r'ɩ tɩ́ɛrʋ a la.

¹⁰ Ta de koro za tʋr-bɔwr kʋsɩɛr ƴãw zi-yoru, bɔbr'ɩ kɛ́ fʋ de a bi-kpebe zie ɩ.

¹¹ Bʋ̃ʋ n'ʋ vɛ̃, a bɛ gùre tɛr'ɩ fãw, ʋ na ŋmãa na yi de a bɛ zɛbr.

¹² Lɩɛbɩ a fʋ tɩ́ɛrʋ tu n a wulu bɛ na wule fʋ a, ɛ́ ƴãw a fʋ tobe a nɩbɛ na bãw a ƴɛ̀rʋ a ƴãw.

¹³ Ta bʋ́nɛ nɩ a fʋ bie kpãàfʋ ɛ. Fʋ̃ʋ wa ŋmɛ ʋ a ʋ bɛ kpiir ɛ.

¹⁴ Fʋ̃ʋ nɩ̃ɛ wa ŋmɩɛr ʋ a, fʋ na faa ʋ nɩ a kũu pʋɔ.

Wulu sãà na tɛr a ʋ bie ƴãw a.

¹⁵ Ɩ̃ bie e, a fʋ socir wa tu a yã-bãwfʋ a, a ɩ̃ socir na cɩlɛ na.

¹⁶ Nʋ̃ɔ̀ na kpɛ m'a tɩ tɔ, fʋ̃ʋ wa yere yel-mɩŋa a.

¹⁷ Ta sɔwlɛ nyùur'ɩ a yel-bebe dem ɛ, ɛcɛ mɩ́ tɛr a Sore zɔba bibir za.

¹⁸ A lɛ pʋɔ a, fʋ na tɛr'ɩ nɩdaar, ɛ́ a fʋ tɩ́ɛrʋ kʋ̃ wɛ ɩ.

¹⁹ Fʋ̃ʋ ɩ̃ bie e, bɛrɛ wone a ɩ̃ ƴɛ̀rʋ, ɛ́ fʋ na lɩɛb'ɩ yã-bãwnɛ, fʋ na cere nɩ sɔ́r na ɩ dẽdẽ a zu.

²⁰ Ta tuur a dã-nyúurbɛ nɩ a nɛn-'wɔbrbɛ ɩ.

²¹ Bʋ̃ʋ n'ʋ vɛ̃, a dã-nyúurbɛ nɩ a dɩ-gbogbo dem na bãw nɩ nãw-woro. A bɛ ƴã-tuolu zũú a, kpar-cɩɛrɛ n'a bɛ na suur.

²² Bɛrɛ wone a fʋ sãà na dɔw fʋ a, ɛ́ ta ɩrɛ a fʋ mã laar ʋ na wa kor baar'a ɩ.

²³ Zanɩ a yel-mɩŋa yelu, a tɩ́ɛrʋ tɛrʋ ɛ́ nɔnɛ a wulu na vɩɛl a nɩ a yã. Ɛ́ fʋ̃ʋ wa tɛr a yel-vɩɛlɩ á ŋá baar'a, fʋ̃ʋ taa sãwnɛ a bɛrɛ ɩ.

²⁴ Nɩ-mɩŋa sãà mɩ́ cɩlɛ na ƴawr'ɩ, nɩr na dɔw yã-bãwnɛ a na cɩlɛ na.

²⁵ Ƴãw nʋ̃ɔ̀ ŋa a fʋ sãà nɩ a fʋ mã, ɛ́ a pɔw ʋl na dɔw fʋ a, ʋ cɩlɛ ƴawr'ɩ.

²⁶ Ɩ̃ bie e, ƴãw a fʋ tɩ́ɛrʋ a ɩ̃ ƴãw, ɛ́ tuur a lɛ ɩ̃ na ɩrɛ a nɩ nʋ̃ɔ̀.

²⁷ Bãwnɩ a kɛ́ pɔw-yɛm ɩ na mɛ̃ bɔw-zulu a, ɛ́ a nɩ-yũo pɔw ɩ mɛ̃ bul-fɩɩra a.

²⁸ A pɔwbɛ bɛ ŋa mɩ́ zɩ̃ na gù mɛ̃ nyãnyu-nɩ-kʋrɛ a. Bɛ ɩ na dɛbr yaga lo.

A dã-kuole ŋmɛ̃a

²⁹ Ãa so a «Aa!»? Ãa so a «Bʋ̃ʋ pãa ɩ!»? Ãa so a nɔhaarʋ? Ãa so a ƴɛ̀rɛ-zɛbr'ɩ? Ãa so a zɛb-taa na bɛ tɛr pɛr a? Ãa so a mimie na bɛ maal nyɛrɛ a?

³⁰ A sob nɛ na so a dãa tɛwr nyúur ɛ́ nyawr a dã-kpɛn taa kʋralɛ a so a.

³¹ Ta bɛ́lɛ a divɛ̃ na mʋ̃ɔ, a ŋmɛ̃a za sãá a koli-nyúura pʋɔ, ʋʋ siwr vla vla a fʋ kɔkɔrɩ́ a ɩ.

³² Ʋ mɩ́ wa dʋ̃ na mɛ̃ waab a, ʋ mɩ́ wa cɛ̀ na mɛ̃ dɔpan a.

³³ Fʋ nãà wa nyɛrɛ nɩ bʋ̃-bɩɩr bɩɩr, ɛ́ fʋ na bʋ̀nɛ na ƴɛ̀rɛ.

³⁴ Fʋ nãà wa tɩ́ɛrɛ na kɛ́ fʋ be n kʋ̃ɔ-kpɛ̃ɛ sɔgɔ, gã a gbor-kpɛ̃ɛ pùorí.

³⁵ Fʋ na tɩ́ɛrɛ na: «Bɛ ŋmɛ mɛ̃ na, ɛcɛ a bɛ 'wɔbr mɛ̃ ɩ! Bɛ pɔb mɛ̃ na, ɩ̃ɩ bɛ wõ bom za ɩ. Bom za sàw ɩ̃ lɛb ìr fɔ̃w, lɛb ƴãw bɛ kʋ̀ m ɩ̃ nyũ!»