Zʋkpaɩ 2 - A SƐB-SÕW

A Yã-bãwfʋ ɩ n na-bom na sɔwlɩ a

¹ Ɩ̃ bie e, sàwr a ɩ̃ ƴɛ̀rʋ, tuur a ɩ̃ nɛ-ƴãwnɩ.

² Bɛrɛ wone a yã-bãwfʋ wulu vla, ƴãw fãw bɔbr kɛ́ fʋ bãw a pɛr.

³ Sɩza, zɛlɛ a yã k'ʋʋ sõw fʋ, bʋɔlɛ a tɩ́ɛrʋ a fʋ sõwfʋ ƴãw.

⁴ Bɔbr a mɛ̃ a libir a, mɛ̃ na-bom na sɔwlɩ a.

⁵ Lɛ n'a fʋ na bãw a Sore zɔba, lɛ n'a fʋ na tʋ̃ɔ́ bãw a Naaŋmɩn.

⁶ Bʋ̃ʋ n'ʋ vɛ̃, a Sore n'ʋ mɩ́ tɩr a yã-bãwfʋ, ʋl zie n'a a bãwfʋ nɩ a tɩ́ɛrʋ yire.

⁷ Ʋ mɩ́ sõw nɩ a nɩsaal-dẽdẽ mɩnɛ. Ʋ ɩ na mɛ̃ zɛbr-kur-pãgala a, a bɛlɩ dem na ɩrɛ vla a zie.

⁸ Ʋ mɩ́ sõw nɩ a bɛlɩ dem a ɩb na tu sɔ́r a, ʋ mɩ́ gù n a bɛlɩ dem na tuur ʋ bɛ lɛbr pùor a.

⁹ Fʋ̃ʋ wa bɛrɛ wone mɛ̃ a, fʋ na bãw na k'aa mɩnʋ, a ɩb na sɛw taa nɩ a, nɩ a ɩb na tori a, alɛ n'ɩ a nʋ̃ɔ̀ sɔ́r.

¹⁰ A yã-bãwfʋ na kpɛ n a fʋ socir pʋɔ ɛ́ a bãwfʋ ƴãw fʋ a nʋ̃ɔ̀.

¹¹ A maal-ɩb na piw fʋ na tɛr, ɛ́ a yã gù b.

¹² A kʋ̃ sàw fʋ maalɩ faa ɩ, a na ɩ na fʋ zãá nɩ a zir-ŋmarbɛ

¹³ nɩ a bɛlɩ dem na bɛrɛ a sɔr-dẽdẽ, ɛ́ tuur a sɛ́ɛ na liw a.

¹⁴ A faa maalʋ mɩ́ ɩrɛ nɩ a nɩbɛ bɛ ŋa nʋ̃ɔ̀, bɛ mɩ́ cɩlɛ nɩ a bɛ ɩ-faar maalʋ pʋɔ.

¹⁵ Bɛ bɛ tɛr yel-mɩŋa ɩ ɛ́ a bɛ nyɔ-vʋʋrʋ bɛ tori ɛ.

¹⁶ À ŋá n'a fʋ na taw zãá nɩ a nɩ-yũo pɔw, nɩ pɔw fʋ na bɛ bãw a nɔ-kãá.

¹⁷ Ʋ zawr'ɩ a ʋ pɔ̀lʋ daarɩ́ sɛn bɛr ɛ́ zawrɩ a ʋ Naaŋmɩn wõ-taa bɛr.

¹⁸ A ʋ cenu wɩɛr'ɩ ʋ nɩ a kũu zie ɛ́ a ʋ ɩ-ɩrɩ ɩ k'ʋ siwr a nyãakpɩmɛ tẽw.

¹⁹ Sob nɛ za na cere a ʋ yir a bɛ lɛbr waar ɛ, ʋ bɛ mɩ́ lɛb nyɛ̃ a nyɔ-vʋʋrʋ sɔ́r ɛ.

²⁰ A na ɩ lɛ a, de a nɩ-vɩɛlɩ sɔ́r, cɔwrɛ a bɛlɩ dem na ɩrɛ vla a.

²¹ Bʋ̃ʋ n'ʋ vɛ̃, a nɩ-dẽdẽ mɩnɛ na kpɩɛr'ɩ a tẽw ŋa pʋɔ, a nɩ-vɩɛlɩ nɛbɛ na zɩ̃ a ʋ pʋɔ.

²² Ɛcɛ, bɛ na ír'ɩ a nɩ-faar bɛr a tẽw pʋɔ, ɛ́ diw a nɩsaal-libelibe bɛr.