Zʋkpaɩ 19 - A SƐB-SÕW

¹ Fʋ̃ʋ ɩ nã́w sob ɛ́ cere dẽdẽ a, alɛ sa fʋ na ɩ dãbol nɩ zir-ŋmarɛ a.

² A bom bɛ bãwfʋ bɛ vɩɛl ɛ. A paw-fɔ̃w waar'ɩ nɩ sãwna maalʋ.

³ Nɩsaal kãw dãbolu mɩ́ ɩ na k'ʋ tuli a ʋ sɔ́r. Al pùorí, ʋ nyɛ̃ nɩ a Sore suur.

⁴ A naalʋ mɩ́ ɩ na a bárɩ nʋɔr dɔwlɛ cere, ɛcɛ nã́w sob bɛ mɩ́ cãà tɛr a ʋ bá-been ɛ.

⁵ A dãsɩ-ziri sob kʋ̃ vɛ̃ bɛ nyɛ̃ dɔwrʋ ɛ, ɛ́ a zir-ŋmarɛ bɛ cɩ̃ɛnɛ ɩ.

⁶ Nɩ-yaga mɩ́ càar'a mʋʋrɛ a nɩ-sɩza, ɛ́ nɩbɛ za nɔnɛ sob nɛ na kʋ̀rɛ bome a nɩbɛ a.

⁷ A nã́w sob yɛbr tɛɛ za bɛ mɩ́ nɔnɛ ʋ ɛ, ɛ̀ bɛ nãà yere a ʋ bárɩ na mɩ́ taw zãá nɩ ʋ a. Ʋlɛ wa bɔbr k'ʋʋ ƴɛ̀r a bɛ zie a, bɛ bɛ mɩ́ ka be ɩ.

⁸ Nɩr na zanɛ a tɩ́ɛrʋ tɛrʋ a bɔbr'ɩ a ʋ tʋɔra vla. Nɩr na mɩ́ ƴãw fãw bãw bom pɛr a, a na mɩ́ ɩ ʋ nɩ vla.

⁹ A dãsɩ-ziri sob kʋ̃ vɛ̃ bɛ nyɛ̃ dɔwrʋ ɛ, ɛ́ a zir-ŋmarɛ na bɔr'a.

¹⁰ Dãbol bɛ ɩrɛ na-ɩb ɛ, gbãgbaa bɛ sɛw k'ʋʋ dɩrɛ naalʋ nɩ-bɛrɛ zu ɛ.

¹¹ Nɩr na bãw yã a mɩ́ nyɔw nɩ a ʋ suur, ɛ́ a ʋ yúor bom'ɩ ʋ na mɩ́ de a sãwna bɛr a baarɩ a.

¹² A nãà suur ɩ na mɛ̃ gbẽw ùoru a, ɛcɛ a ʋ nɔ̃wfʋ ɩb ɩ na mɛ̃ ɓɩɛlʋ na mɩ́ siw mʋ̃ɔ zu a.

¹³ Bi-dãbol ɩ n a ʋ sãà kpɩɛrʋ. Pɔw zɛbr ɩ na mɛ̃ sɩlãsʋɔr kʋ̃ɔ na cire bɛ tɛr ŋmãafʋ a.

¹⁴ Yir nɩ bʋ̃-tɛrɩ ɩ n gbã-dɩ-bom a fʋ sãà mɩnɛ na na tʋ̃ɔ́ lʋɔrɩ kʋ̀ b a, ɛcɛ pɔw na bãw yã a ɩ n a Sore bʋ̃-kʋ̀ra.

¹⁵ A ƴã-tuolu mɩ́ ƴãw nɩ gʋ̃ɔ, ɛ́ kɔ̃ mɩ́ tɛr a nɩr na ɩrɛ salala a.

¹⁶ Nɩr na tuur a nɛ-ƴãwnɩ a mɩ́ gù n a ʋ nyɔ-vʋʋrʋ, sob nɛ na bɛ cɛlɛ a ʋ ɩ-ɩrɩ zie a na kpi na.

¹⁷ Nɩr na kʋ̀ nã́w sob bom a pɛ̃w nɩ a Sore, ɛ́ a Sore na lɛb'a kʋ̀ ʋ.

¹⁸ Kpãànɛ a fʋ bibiir a na cãà tɛr a bɛ sõwfʋ a. Ɛcɛ a fʋ suur pʋɔ a, ta ŋmɛ bɛ bɛ tɩ kpi ɛ.

¹⁹ Nɩr na nyɛ̃ su-faa faa a sɛw na kɛ́ bɛ ŋmãa san kʋ̀ ʋ ʋ ya. Fʋ̃ʋ bɛ wa ŋmãa a san a, fʋ sõwne ʋ na ʋ na lɛb tĩ.

²⁰ Bɛrɛ wone a yã bɛ na wule fʋ a, sàwr a kpãàfʋ, ɛ́ fʋ nãà wa lɩɛb'ɩ yã-bãwnɛ.

²¹ A nɩsaal mɩ́ tɩɛr'ɩ yel-yaga maalʋ, ɛcɛ a Sore yõ tɩ́ɛrʋ n'ʋ mɩ́ maalɩ.

²² A bom nɛ bɛ na mɩ́ gùre a nɩsaal zie a n'ɩ a nɔ̃wfʋ, ɛ́ nã́w sob sa n zir-ŋmarɛ.

²³ A Sore zɔba tɩrɛ nɩ nyɔ-vʋʋrʋ, nyɔ-vʋʋrʋ pʋɔ fʋ na kʋ̃ bɔ bom gù, ɛ́ kpɩɛrʋ bɛ páwr fʋ a.

²⁴ A ƴã-tuo sob mɩ́ tõ n a nũu a bʋ̃-dɩrɩ laa pʋɔ, ɛ́ bɛ mɩ́ lɛb ír ʋ cen nɩ a nʋɔrɩ́ ɛ.

²⁵ Ŋmɛ a nɩ-ɩ-laarɛ, ɛcɛ a nɩr na bɛ bãw bom a na zanɩ nɩ yã. Bɛlɛ wa yere nɩr na tɛr yã a, ʋ mɩ́ bãw nɩ a ʋlɩ bom nɛ bɛ na bɔbr kɛ́ bɛ wul ʋ a.

²⁶ Nɩr na ɩrɛ po-to-fãw-ɩb a ʋ sãà zie ɛ́ diwr a ʋ mã a ɩ n bi-faa na ƴãwnɛ vĩ a.

²⁷ Ɩ̃ bie e, fʋ̃ʋ bɛ wa cãà sàwr a kpãàfʋ a, fʋ kʋ̃ lɛb zanɩ bom kãw za ɩ.

²⁸ Dãsɩɛ sob na bɛ tɛr pɛr a mɩ́ ɩrɛ nɩ a yel na tu sɔ́r a laar. A nɩ-faar nʋɔr nɔnɛ nɩ a yel-faa maalʋ.

²⁹ A kpãàfʋ be n a nɩ-ɩ-laarbɛ ƴãw, ɛ́ a ŋmɩɛrʋ be a dãbol zikur ƴãw.