Zʋkpaɩ 17 - A SƐB-SÕW

¹ Dipɛ̃-kõw ŋmale fʋ na 'wɔbr'ɩ ƴã-ɓaarʋ a, a sa n yir na paalɩ bʋ̃-dɩ-vɩɛlɩ ɛ́ ɩ zɛbr tɛwr a.

² Tõ-tõ-bie na tɛr yã a na lɩɛr'ɩ bie na ƴãwnɛ vĩ a, ʋ na lãw nɩ nɩ a bie ŋa yɛbr bɛ põ a gbã-dɩ-bome.

³ Vũu n'a bɛ mɩ́ ɩ n a salm-zɩɛ nɩ a salm-pla kaa bãw a vɩɛlʋ, ɛcɛ a Sore n'ʋ mɩ́ ɩ a socie kaa bãw a vɩɛlʋ.

⁴ A yel-fa-maalɛ mɩ́ ƴãw nɩ a ʋ tobr a ƴɛ̀r-faar ƴãw, ɛ́ a zir-ŋmarɛ bɛrɛ wone a yel-ziri.

⁵ Nɩr na ɩrɛ nã́w sob laar a tʋʋr'ɩ a ʋ Íre. Nɩr na laar a ʋ tɔ kpɩɛrʋ a na nyɛ̃ nɩ dɔwrʋ.

⁶ A sãàkʋm mɩnɛ dɛpaal-bom'ɩ a bɛ yan, ɛ́ a bibiir vɩɛlʋ n'ɩ a bɛ sãà mɩnɛ.

⁷ Ƴɛ̀r-vla bɛ maal'ɩ k'ʋʋ yi dãbol nʋɔrɩ́ ɛ, bɛ nãà yere ziri na na yi nɩ-kpɛ̃ɛ nʋɔrɩ́ a.

⁸ Nɩbɛ bɛ mɩnɛ mɩ́ tɩɛr'a k'aa bom fʋ na kʋ̀ nɩr a waar'ɩ nɩ zu-nʋ̃ɔ̀ ɛ́ mɩ́ ɩ a yele za maalɩ vla.

⁹ Nɩr na mɩ́ de sãwna bɛr a baar'a na tɛr'ɩ bárɩ, ɛcɛ ʋlɛ wa ƴɛ̀rɛ a sãwna ƴɛ̀rʋ kʋralɛ a, a ʋ bárɩ na zɔ na.

¹⁰ Nɩr na tɛr yã ɛ́ bɛ yel ʋ gb'a-been yõ a ʋ sãwna ƴãw a, a mɩ́ tɔ ʋ na zuo dãbol bɛ na ŋmɛ n dabɔl nɛ́ɛ kʋba (100) a.

¹¹ Faa tɛwr maalʋ n'a a nɩ-faar mɩ́ bɔbr. À ŋá n'a bɛ mɩ́ bʋɔlɩ a kpɩɛrʋ kpɛnʋ ƴãw bɛ tʋɔra.

¹² Fʋ̃ʋ cen tuori wɛ-dʋ̃-faa kãw bɛ na bʋɔlɛ ursɩ a na bɛ tɛr a ʋ bili a, alɛ sa dãbol fʋ na tuori ʋ ɩrɛ a ʋ dãbol-ɩb a.

¹³ Sob nɛ na mɩ́ maalɩ a faa yáa a vla a, kpɩɛrʋ bɛ be na yi zaa a ʋ yir ɛ.

¹⁴ A zɛbr tib ɩ na mɛ̃ kʋ̃ɔ-bɩwra bɛ na yuo bɛr a. A zɛbr na bɛ úr sɛr a, taw yi pùor!

¹⁵ Nɩr na mɩ́ ƴɛ̀r kpɛ sãwna sob nɩ nɩr na mɩ́ yel k'aa nɩ-mɩŋa ɩ n sãwna sob a, a Sore bɛ nɔnɛ bɛ za ayi towtow ɛ.

¹⁶ A libie yel-ɩra n'ɩ bo a dãbol sob nũú? K'ʋʋ tʋ̃ɔ́ páw nɩ yã-bãwfʋ bɩɩ? Ʋ gem'a zuo a al ƴãw!

¹⁷ Bá mɩ́ nɔnɛ nɩ kʋralɛ, ɛcɛ yɛb be n be a kpɩɛrʋ daar ƴãw.

¹⁸ Nɩr na bɛ tɛr yã a yõ n'ʋ mɩ́ ŋmɛ nyãa yel kɛ́ ʋlɛ so a ʋ tɔ san.

¹⁹ Nɩr na nɔnɛ a zɛbr a nɔnɛ nɩ a yel-bier. A pɔ̀lʋ sob wɩɛr'ɩ a ʋ loba zie.

²⁰ Nɩr na tɛr yã-faar a kʋ̃ bãw nʋ̃ɔ̀ ɩ. Nɩr na ƴɛ̀rɛ ƴɛ̀r-faar a, kpɩɛrʋ na lo n a ʋ zu.

²¹ Kpɩɛrʋ n'a, a dãbol dɔwrɛ zie. Nʋ̃ɔ̀ za kʋ̃ tʋ̃ɔ́ tɛr bi-gẽgemi sob sãà ɩ.

²² A su-nʋ̃ɔ̀ mɩ́ sõw nɩ a sanʋ ƴãw, ɛ́ a pʋ-sãwna siwre a fãw.

²³ A nɩ-faa mɩ́ sɔwl'a ɩ kɛ̀ bɛ ŋmɛ ʋ nʋɔr, k'ʋʋ ɩ a yele ta tu mɛ̃ a lɛ a na tɛr sɔ́r k'aa tu a ɩ.

²⁴ Nɩr na tɛr yã a mɩ́ bɔbr'ɩ a yã-bãwfʋ na pɩɛlɩ ʋ a. Ɛcɛ gẽgemi sob mɩ́ jɩ́rɛ nɩ bome nɩr na kʋ̃ tʋ̃ɔ́ páw a.

²⁵ A bi-dãbol mɩ́ ƴãw nɩ a ʋ sãà kpɩɛrʋ pʋɔ, ɛ́ kʋ̀ pʋ-sãwna a ʋ mã-dɔwra.

²⁶ A nɩ-mɩŋa dɔwrʋ ƴãwfʋ bɛ vɩɛl towtow ɛ. A nɩbɛ na ƴãwnɛ bɛ tʋɔra a ŋmɛb bɛ tu sɔ́r ɛ.

²⁷ Nɩr na bãw ʋ tʋɔra nyɔwfʋ a ʋ ƴɛ̀rʋ pʋɔ a ɩ n nɩr na tɛr bãwfʋ a. Nɩr na mɩ́ nyɔw ʋ tʋɔra a ɩ n nɩr na tɛr tɩ́ɛrʋ a.

²⁸ A dãbol tɔr za wa ɩ gbili a, bɛ na tʋ̃ɔ́ na de ʋ k'ʋ ɩ yã-bãwnɛ, ʋlɛ wa pàw a nʋɔr a, bɛ na tɩɛr'a k'ʋʋ tɛr'ɩ yã.