Zʋkpaɩ 14 - A SƐB-SÕW

¹ Pɔw-yã-bãwnɛ mɩ́ mɛ n a ʋ yir, ɛcɛ pɔw-dãbol na tʋ̃ɔ́ na wɛl ʋ.

² Nɩr nyɔ-vʋʋrʋ na tori a mɩ́ ƴãwnɛ nɩ a Sore. Ɛcɛ sob nɛ na tuur sɔr-gõlõgõlõ a mɩ́ ɩrɛ nɩ a Sore laar.

³ A dãbol sob ƴɛ̀rʋ mɩ́ ɩ n pɔ̀lʋ tɛwr, ɛcɛ a yã-bãwnbɛ ƴɛ̀rʋ mɩ́ gùre bɛ na.

⁴ Be na-kʋɔrɩ na bɛ ka be a, a bowr mɩ́ gã nɩ zawla. Na-kpɛn waar'ɩ nɩ tɔnɛ yaga.

⁵ Dãsɩɛ sob na yere yel-mɩŋa a bɛ ŋmarɛ ziri ɛ, ɛcɛ ziri tɛwr'a a dãsɩ-ziri sob mɩ́ ŋmarɛ.

⁶ Nɩr a tobr na bɛ ka bom za ƴãw a na tʋ̃ɔ́ na bɔbr a yã-bãwfʋ: ʋ bɛ nyɛrɛ ʋ ɛ. Ɛcɛ nɩr na tɛr a yã a mɩ́ páw nɩ a bãwfʋ fɔ̃wlɛ.

⁷ Ta pɩɛlɛ a dãbol sob ɛ, bʋ̃ʋ n'ʋ vɛ̃, fʋ kʋ̃ páw bãwfʋ kãw za a ʋ ƴɛ̀rʋ pʋɔ ɩ.

⁸ Nɩr na bãw a maal-ɩb a mɩ́ piwre nɩ a ʋ ɩ-ɩrɩ, ʋ na ɩ yã-bãwnɛ a ƴãw. Ɛcɛ a dãbole mɩ́ bɔrɛ nɩ a bɛ dãbolu zũú.

⁹ A sãwna maal-ƴãwfʋ bɛ tɛr pɛr a dãbole zie ɩ, Ɛcɛ a nɩ-dẽdẽ mɩnɛ mɩ́ wõ n taa.

¹⁰ Nɩr'ʋ mɩ́ bãw a ʋl mɩŋa pʋ-sãwna, ɛ́ nɩr za kʋ̃ tʋ̃ɔ́ lãw nɩ ʋ a ʋ nʋ̃ɔ̀ pʋɔ ɩ.

¹¹ Bɛ na ŋmɛr'ɩ a nɩ-faar yir bɛr, ɛcɛ a nɩ-dẽdẽ mɩnɛ yir na mɩɛr'a yɛlɛ.

¹² Nɩr na tʋ̃ɔ́ na tɩ́ɛrɛ k'aa ʋ ɩb vɩɛl'a, ɛcɛ alɛ ɩrɛ mɛ̃ bom'ʋ a, a wɩɛr'ɩ ʋ nɩ a kũu pʋɔ.

¹³ Nɩr na tʋ̃ɔ́ na laar ɛ́ tɛr kpɩɛrʋ, ɛ́ a kpɩɛrʋ tɛr wa lɩɛrɩ a nʋ̃ɔ̀.

¹⁴ Nɩr na bʋnɩ vʋʋrɛ a na páw nɩ a alɩ bome nɛ na sɛwnɩ ʋ a, ɛcɛ sob nɛ na ɩrɛ vla a na páw nɩ àrʋ zie na vɩɛl zuo a.

¹⁵ Nɩr na bɛ bãw bom za a mɩ́ sàw nɩ a lɛ za bɛ na yere kʋ̀rɛ ʋ a, ɛcɛ nɩr na bãw maal-ɩb a bãw nɩ a ʋ gbɛ́ɛ binu zie.

¹⁶ A yã-bãwnɛ zɔrɛ nɩ a faa ɛ́ mɩ́ nɩɩrɛ ʋ. Ɛcɛ a dãbol sob mɩ́ manɛ kɛ́ bom bɛ damnɛ ʋ ɛ, ɛ́ nyɛrɛ suur.

¹⁷ Nɩr na bɛ mɩ́ yaa kɛ́ nyɛ̃ suur a mɩ́ tõ n gẽgẽ-tome, ɛ́ bɛ bɛ mɩ́ nɔnɛ nɩr na bɛ̀lɛ a ʋ taabɛ a ɩ.

¹⁸ A bɛlɩ dem na bɛ bãw bom za a bom n'ɩ a gẽgemi, ɛ́ a bãwfʋ n'ɩ a nɩbɛ na tɛr tɩ́ɛrʋ a dɛpaal-bom.

¹⁹ A nɩ-faar na siwr'ɩ bɛ tʋɔra a nɩ-vɩɛlɩ niŋé, ɛ́ a bɛlɩ dem na bɛ ɩrɛ vla a kpáwrɛ a nɩ-mɩn dɩ̃dɛɛ.

²⁰ A nã́w sob tɔ tɔr za bɛ mɩ́ nɔ̃w ʋ towtow ɛ, ɛ́ a nãà bárɩ yaga tɔ.

²¹ Nɩr na ɩrɛ a ʋ tɔ laar a maalɛ nɩ yel-bier, ɛcɛ zu-nʋ̃ɔ̀ sob'ɩ sob nɛ na zɔrɛ a nan dem nɩbaalʋ a.

²² A bɛlɩ dem na tɛr tɩɛr-faar a mɩ́ bɔrɛ nɩ a sɔ́r, ɛcɛ nɔ̃wfʋ nɩ pùor-bɛ-lɛbrʋ n'a a bɛlɩ dem na tɛr tɩɛr-vɩɛlɩ a mɩ́ páw.

²³ Nɩr na tone kpɛ̃w kpɛ̃w a mɩ́ páw nɩ tɔnɛ yaga, ɛcɛ nã́w tɛwr'a a ƴɛ̀r-yaga waar'ɩ.

²⁴ A naalʋ n'ɩ a yã-bãwnbɛ bʋ̃-páwra, ɛcɛ a dãbole bɛ yire zaarɛ a bɛ dãbolu pʋɔ towtow ɛ.

²⁵ Dãsɩɛ sob na yere yel-mɩŋa a mɩ́ faa nɩ nɩbɛ nyɔ-vʋʋrʋ, ɛcɛ zir-ŋmarɛ ƴãwnɛ nɩ tulu pʋɔ.

²⁶ A Sore zɔba mɩ́ ɩ na fʋ bɛr tɩ̀ɛrʋ, bʋ̃ʋ n'ʋ vɛ̃, ʋ gùre nɩ a ʋ bibiir.

²⁷ A Sore zɔba ɩ n nyɔ-vʋʋrʋ bul-nʋɔr. Ʋ mɩ́ ɩ na fʋ nɩɩrɩ a kũu bɛrɩ bɛr.

²⁸ Nãà yúor'ɩ nɩ-yaga ʋ na tɛr a. Ɛcɛ tẽw bɛ wa tɛr nɩbɛ a, a waar'ɩ nɩ a nɩ-kpɛ̃ɛ loba.

²⁹ Su-nyɔwra sob ɩ n nɩr na tɛr yã yaga a, ɛcɛ sob nɛ na bɛ mɩ́ yaa kɛ́ nyɛ̃ suur a mɩ́ wul'ɩ a ʋ dãbolu.

³⁰ A tɩɛrʋ na bɛ bãw damnʋ a waar'ɩ nɩ ƴã-ɓaarʋ, ɛcɛ a nyuur ɩ n kãkarmɛ na mɩ́ dɩrɛ a kɔbɛ a.

³¹ Nɩr na dɔwrɛ a bãbàalbɛ a tʋʋr'ɩ a bɛ Íre, ɛcɛ nɩr na zɔrɛ a bɛ nɩbaalʋ a zɛwr'ɩ a bɛ Íre yúor.

³² A nɩ-faa ɩ-faar'a mɩ́ kʋ ʋ, ɛcɛ a nɩ-mɩŋa mɩ́ bɛr'ɩ tɩ̀ɛrʋ a ʋ kũu daar tɔr za.

³³ Sob nɛ na tɛr tɩ́ɛrʋ a tɛr'ɩ yã-bãwfʋ, ɛcɛ fʋ na tʋ̃ɔ́ na nyɛ̃ a yã-bãwfʋ a dãbole sɔgɔ bɩɩ?

³⁴ A mɩnʋ mɩ́ ɩ n a tẽw yúor ʋ yi, ɛcɛ a yel-bier mɩ́ ɩ n a nɩ-bʋʋrɛ vĩ.

³⁵ A nãà mɩ́ nɔnɛ nɩ tõ-tõ-bie na tɛr yã a, ɛcɛ a ʋ suur mɩ́ ír'ɩ a ʋlɩ sob na ƴãwnɛ ʋ vĩ a zu.