Zʋkpaɩ 12 - A SƐB-SÕW

¹ Nɩr na nɔnɛ a wulu a nɔnɛ nɩ a bãwfʋ. Nɩr na bɛ sàwr kɛ́ bɛ yere ʋ a ɩ n dãbol.

² A nɩ-vla yele mɩ́ pɛlɩ nɩ a Sore pʋɔ, ɛcɛ a bɛlɩ dem na mɩ́ tule a bɛ taabɛ a, ʋ mɩ́ ƴãw bɛ nɩ dɔwrʋ.

³ Nɩr kãw za bɛ páwr a ʋ fãw a faa maalʋ pʋɔ ɩ, ɛcɛ bom bɛ ɩrɛ a nɩ-mɩŋa ʋ lore ɩ.

⁴ Pɔw na ɩ pɔw a mɩ́ ɩ n a ʋ sɩr nyʋ̀ʋ́r, ɛcɛ pɔw na bɛ zɔrɛ vĩ a mɩ́ ɩ n kãkarmɛ na dɩrɛ a ʋ sɩr kɔbɛ a.

⁵ A lɛ-na-tu-sɔr-a tɛwr'a a nɩ-mɩn mɩ́ tɩ́ɛrɛ, ɛ́ a nɩ-faar tɩ́ɛrɛ a lɛ na bɛ tori a.

⁶ A nɩ-faar ƴɛ̀rʋ ɩ n bɛrɩ na kʋrɛ a, ɛcɛ a nɩ-dẽdẽ mɩnɛ ƴɛ̀rʋ mɩ́ gù bɛ nɩ a kũu ƴãw.

⁷ A nɩ-faar wa lo a, bɛ bɛ mɩ́ cãà ɩ, ɛcɛ a nɩ-mɩn yir mɩ́ kpɛmɛ na àr.

⁸ Nɩr na tɛr yã a n'ʋ bɛ mɩ́ danɛ, ɛ́ ɩrɛ sob nɛ a tɩ́ɛrʋ na bɛ tori a laar.

⁹ Fʋ̃ʋ ɩ nɩr bɛ na ɩrɛ laar ɛ́ fʋ tɛr tõ-tõ-bie a, a sa na fʋ na ɩrɛ a nɩ-sɩza ɩb ɛ́ bɛ tɛr bʋ̃-dɩra na dɩ a.

¹⁰ A nɩ-mɩŋa mɩ́ bãw nɩ a ʋ dʋn bʋ̃-bɔbrɩ, ɛcɛ a nɩ-faar bɛ bãw nɩbaal-zɔba kãw za ɩ.

¹¹ Sob nɛ na kʋɔr a ʋ púo a mɩ́ páwr'ɩ bʋ̃-dɩrɩ yaga, ɛcɛ sob nɛ na zɔrɛ tuur a yel-foli a bɛ tɛr yã ɩ.

¹² A nɩ-faar mɩ́ jɩ́rɛ nɩ a nɩbɛ a ɩb na bɛ tori a na-bome vɔl-jɩ́rʋ, ɛcɛ a nɩ-mɩn mɩ́ tɛr'ɩ fãw ɛ́ a bɛ yele maalɛ.

¹³ A nɩ-faa mɩ́ lo n a ʋ nʋɔr ƴɛ̀rʋ bɛra pʋɔ, ɛcɛ a nɩ-mɩŋa bɛ bãwnɛ pʋl-vʋ̃ɔ ɩ.

¹⁴ A ƴɛ̀rʋ na tʋ̃ɔ́ na ɩ fʋ páw bom mɛ̃ a lɛ a ton na mɩ́ ɩ fʋ páw sã-ya a.

¹⁵ A dãbol mɩ́ nyɛ̃ nɩ a ʋ ɩb a tori kʋralɛ, ɛcɛ nɩr na mɩ́ bɛr wõ a yã bɛ na wule ʋ a ɩ n yã-bãwnɛ.

¹⁶ A dãbol mɩ́ wul'ɩ a ʋ suur daadaalɛ, ɛcɛ a nɩr na tɛr maal-ɩrɛ a mɩ́ sɔwl'ɩ a ʋ suur.

¹⁷ Sob nɛ na yere yel-mɩŋa a mɩ́ sõw nɩ a mɩnʋ ʋ sãá, ɛcɛ a dãsɩ-ziri sob mɩ́ sõw nɩ a ziri.

¹⁸ Nɩr na bʋ̀nɛ ƴɛ̀rɛ a ƴãwnɛ nɩ bàalʋ mɛ̃ zɛbr-sɔ-kpɛ̃ɛ a, ɛcɛ a yã-bãwnbɛ ƴɛ̀rʋ ɩ n tɩ̃ɩ.

¹⁹ Ƴɛ̀rʋ na ɩ yel-mɩŋa a mɩ́ ɩ ʋ nɩ kʋralɛ, ɛ́ ziri bɛ cɛlɛ ɩ.

²⁰ Ziri n'a mɩ́ paalɩ a bɛlɩ dem na tɩ́ɛrɛ a faa maalʋ a socie, ɛcɛ nʋ̃ɔ̀ n'a mɩ́ paalɩ a bɛlɩ dem na wule a vla maalʋ a.

²¹ Kpɩɛrʋ kãw za bɛ tarɛ a nɩ-mɩn ɛ, ɛcɛ a nɩ-faar mɩ́ páw nɩ kpɩɛrʋ yaga za.

²² A Sore bɛ nɔnɛ a zir-ŋmarbɛ towtow ɛ, ɛcɛ ʋ nɔnɛ nɩ a bɛlɩ dem na mɩ́ yere yel-mɩŋa a.

²³ Nɩr na tɛr maal-ɩrɛ a mɩ́ sɔwlɛ nɩ a ʋ bãwfʋ, ɛcɛ a dãbol mɩ́ wule nɩ a ʋ dãbolu cãamɩ́.

²⁴ Nuru na tone vũu vũu a waar'ɩ nɩ a nɩ-kpɛ̃ɛnʋ dɩb, ɛ́ a ƴã-tuolu ƴãwnɛ gbãgbaalʋ pʋɔ.

²⁵ A niw-sʋba mɩ́ bàl'ɩ a nɩsaal, ɛ́ ƴɛ̀r-vla lɛb kʋ̀ ʋ fãw.

²⁶ A nɩ-mɩŋa mɩ́ ƴãw nɩ a ʋ tɔ a sɔ́r vla zu, ɛcɛ a nɩ-faar ɩb mɩ́ ɩ na bɛ bɔr.

²⁷ Nabawlɛ na kpɛ ƴã-tuo a bɛ tɛr wɛ-nɛn na sɛ̃ ɩ, ɛcɛ nɩsaal na tʋlɛ a tome ƴãw a tɛr'ɩ na-bom.

²⁸ A nyɔ-vʋʋrʋ be n a mɩnʋ sɔ́r zu. Nɩr na tuur a sɔ́r ŋa a bɛ kpiir ɛ.