Zozue 7 - A SƐB-SÕW

A Akan sãwna nɩ a dɔwrʋ ʋ na páw a

¹ A Ɩsɩrayɛl nɩbɛ tɩ ɩ n ɩ-faa kãw càar'ɩ a bome a Sore na tɩ yel kɛ́ bɛ taa dier a: Zuda dɔwlʋ nɩr kãw, Karmi bidɛb, Akan, tɩ de nɩ a bome a mɩnɛ na tɩ ciir deb a. A Karmi tɩ ɩ n Zavidi bidɛb, ɛ́ ɩ Zera yãw. Lɛ n'a a Sore suur tɩ ìr a Ɩsɩrayɛl nɩbɛ ƴãw.

² A Zozue tɩ be n a Zeriko ɛ́ tõ nɩbɛ Aɩ na be a Betɛl saa-pɛrɩ́, ɛ́ pɩɛlɩ a Bɛtɩ-Awɛn a. Ʋ tɩ yel bɛ na: «Nyɩ cen tɩ piwri a tẽw.» A nɩbɛ bɛl tɩ cen na tɩ piwri a Aɩ,

³ ɛ́ lɛb wa a Zozue zie wa yel ʋ: «Zawla lɛ n'a a zɛbr-nɩbɛ za na cen a Aɩ ƴãw. Nɩbɛ túr-ayi (2 000) bɩɩ túr-ata (3 000) na man a. A tẽw nɩbɛ bɛ saalɩ fʋ na bàlɛ a tɩ zɛbr-nɩbɛ za ɩ.»

⁴ Lɛ n'a, nɩbɛ na na ta túr-ata (3 000) a tɩ cen a Aɩ ƴãw, ɛcɛ bɛ tɩ lɩɛb'a zɔ a Aɩ nɩbɛ niŋé.

⁵ A Aɩ nɩbɛ tɩ kʋ bɛ na ta nɩbɛ lɩz'a ayi ŋmãa nũu dɔwlɩ nɩ-been, ɛ́ diw bɛ ŋmaarɛ a tẽw dɩ̃dɔr nʋɔr tɩ sãá nɩ a Sevarim, baa kʋ bɛ a siwfʋ zie. Lɛ n'a a Ɩsɩrayɛl nɩbɛ kanyir za tɩ baarɩ ɛ́ pʋ̀lá vʋ̃ɔ bɛ.

⁶ Lɛ n'a a Zozue nɩ a Ɩsɩrayɛl nɩbɛ nɩ-kore tɩ taw a bɛ bʋ̃-suuri cɩɛrɩ, ɛ́ 'wɔ̃w tanɛ ƴãw a bɛ zurú, ɛ́ lo vɔblɩ muru a Sore wõ-taa daga niŋé tɩ ta n zaanʋɔra.

⁷ A Zozue tɩ yel'a: «Aa! Sore Naaŋmɩn i, bʋ̃ʋ ƴãw n'a fʋ ɩ tɩ gãw a Zurdɛ̃? Fʋ wa de tɩ kʋ̀ a Amoritɩ mɩnɛ, ɛ́ ɩ tɩ kpi ƴãw n'a bɩɩ? Tɩmɛ nɩ̃ɛ tɩ cãà be a man gãwn ŋa a, alɛ bɛ sa ɩ?

⁸ Ɩ̃ zɛlɛ fʋ na, Sore e, ɩ̃ yel kɛ́ bʋnʋ, ƴɛrɛŋa a Ɩsɩrayɛl nɩbɛ na lɩɛb zɔ a bɛ dɔ̃ dem niŋé a?

⁹ A Kanãa tẽw dem nɩ a nɩbɛ za na kpɩɛr a tẽw a na wõ a na, bɛ na wõ n taa a tɩ ƴãw, ɛ́ kʋ tɩ pàw pɛr. A lɛ pʋɔ a, ŋmɩŋmɩn n'a fʋ na ɩ bɛ bãw kɛ́ fʋ ɩ n kpɛ̃ɛ?»

¹⁰ A Sore tɩ yel'ɩ a Zozue: «Ìr! Bʋ̃ʋ n'ʋ so fʋ lo vɔblɩ muru?

¹¹ A Ɩsɩrayɛl nɩbɛ maal'ɩ yel-bier. Sɩza, bɛ sãw nɩ a wõ-taa ɩ̃ na tɩ ƴãw kʋ̀ bɛ a bɛr. Bɛ de nɩ a bome na ciir a, mɔ̃ mɩ̀ bɛ zu n a mɩnɛ de a ƴãw a bɛ mɩŋa bʋ̃-sori pʋɔ sɔwlɩ.

¹² A na ɩ à ŋá a, a Ɩsɩrayɛl nɩbɛ kʋ̃ lɛb tʋ̃ɔ́ bà gbɛ́r a bɛ dɔ̃ dem niŋé ɩ, bɛ na mɩ́ lɩɛb'a zɔ, bʋ̃ʋ n'ʋ vɛ̃, bɛ ɩ n nɩbɛ bɛ na na kʋ pàw pɛr a. Nyɩmɛ bɛ wa sãw a bome ɩ̃ na yel kɛ́ nyɩ taa dier a bɛr a nyɩ sɔgɔ a, ɩ̃ kʋ̃ cãà be a nyɩ zie ɩ.

¹³ Ƴɛrɛŋa a, ìr cen tɩ maalɩ a Ɩsɩrayɛl bʋʋrɛ bɛ ɩ son. Fʋ na tɩ yel'a: Nyɩ so a nyɩ dɛwr bɛr a bio ƴãw, bʋ̃ʋ n'ʋ vɛ̃, à ŋá n'a a mãa Sore, a Ɩsɩrayɛl Naaŋmɩn yere: Nyɩ tɛr'ɩ bome ɩ̃ na yel kɛ́ nyɩ taa dier a. Lɛn daar za nyɩ na kʋ̃ ír a bome á ŋá bɛr a nyɩ sɔgɔ a, nyɩ kʋ̃ lɛb tʋ̃ɔ́ bà gbɛ́r a nyɩ dɔ̃ dem niŋé ɩ.

¹⁴ Bio biɓaara a, nyɩ na taw na pɩɛlɩ a ɩ̃ zie, dɔwlʋ dɔwlʋ. A dɔwlʋ ʋl ɩ̃ na na wul a na taw na pɩɛlɩ yie dɔwlʋ dɔwlʋ, ɛ́ a yir dɔwlʋ ʋl ɩ̃ na na wul a na taw na pɩɛlɩ yie yie, ɛ́ a yir ʋl ɩ̃ na na wul a a ʋ nɩbɛ na taw na pɩɛlɩ been been.

¹⁵ Lɛ n'a ɩ̃ na wul a bʋ̃-ciir-tɛrɛ a nyɩ pʋɔ. Bɛ na lɔb'ʋ na ƴãw vũumí lãwnɩ a ʋ bʋ̃-tɛrɩ za, ʋ na sãw a ɩ̃ wõ-taa bɛr, ɛ́ maalɩ ɩ-faa a Ɩsɩrayɛl tẽw pʋɔ a ƴãw.»

¹⁶ A bio daarɩ́ biɓaar-pipi, a Zozue tɩ ìr a ƴãw a Ɩsɩrayɛl nɩbɛ taw pɩɛlɩ dɔwlʋ dɔwlʋ. Zuda dɔwlʋ zu n'a a bãwfʋ tɩ lo.

¹⁷ Lɛ n'a ʋ tɩ ƴãw a Zuda dɔwlʋ taw pɩɛlɩ, a bãwfʋ lo a Zera yir zu. Ʋ tɩ ɩ na a Zera yir dɔwlʋ taw pɩɛlɩ yie yie, a bãwfʋ lo a Zavidi yir zu.

¹⁸ Al pùorí ʋ ɩ a Zavidi yir dem taw pɩɛlɩ been been, a bãwfʋ lo a Karmi bidɛb Akan na ɩ a Zuda dɔwlʋ nɩr a zu. Zavidi na ɩ Zera bidɛb a n'ʋ tɩ dɔw a Karmi.

¹⁹ A Zozue tɩ yel'ɩ a Akan: «Ɩ̃ bie e, zɛw a Sore, a Ɩsɩrayɛl Naaŋmɩn yúor, danɩ ʋ, ɛ́ yel a yel-mɩŋa kʋ̀ m. Wo a lɛ za fʋ na ɩ a, ta sɔwlɩ mɛ̃ bom ɛ.»

²⁰ A Akan tɩ sɔw na yel a Zozue: «Yel-mɩŋa n'a, mãa n'ʋ maalɩ yel-bier sãw a Sore, a Ɩsɩrayɛl Naaŋmɩn, nyɛ̃ a lɛ ɩ̃ na ɩ a:

²¹ A bome tɩ na zɛb de a pʋɔ a, ɩ̃ tɩ nyɛ̃ nɩ Mezopotami tẽw kpar-kpɛ̃ɛ kãw na vɩɛl bɛ tɛr ʋ tɔ a, nɩ salm-pla libie kɔbr ayi nɩ salm-zɩɛ gbil na tɩbrɛ cɛ blã na ta kilo põ-zɛ̃-taa a. A vʋla tɩ faar'a na kʋ m, ɩ̃ de a, alɛ n'ɩ á ŋá ɩ̃ na tuw ũù a ɩ̃ pɛn-sɛw sɔwlɩsɔw a, a libie be n a pile.»

²² A Zozue tɩ tõ n nɩbɛ bɛ zɔ cen a Akan pɛn-sɛw pʋɔ tɩ nyɛ̃ a bome a sɩrɩ sɔwlɩ a ʋ pɛn-sɛw pʋɔ, ɛ́ a libie be a pile.

²³ Bɛ tɩ yaw nɩ a bome a pɛn-sɛw sɔwlɩsɔw wa n wa kʋ̀ a Zozue nɩ a Ɩsɩrayɛl nɩbɛ za. Bɛ tɩ bin a nɩ a Sore niŋé.

²⁴ A Zozue nɩ a Ɩsɩrayɛl nɩbɛ za tɩ tɛr'ɩ a Akan cen nɩ a Akɔɔr bà-fʋɔla pʋɔ. Bɛ tɩ tɛr ʋ na lãwnɩ a salm-pla, a kpar-kpɛ̃ɛ, a salm-zɩɛ gbil, nɩ a ʋ bidɛbr nɩ a ʋ pɔwyaar, a ʋ nĩi, a ʋ bòn, a ʋ bʋʋr nɩ a ʋ píir, a ʋ pɛn-sɛw nɩ bom za ʋ na so a.

²⁵ A Zozue tɩ yel'ɩ a Akan: «Fʋ̃ʋ n'ʋ so a tɩ kpɩɛrʋ! Ƴɛrɛŋa a, a Sore n'ʋ na ɩ a kpɛ b.» Lɛ n'a a Ɩsɩrayɛl nɩbɛ za tɩ lɔb'ɩ ʋ kʋsɛbɛ kʋ. Lɛ n'a bɛ mɩ̀ tɩ kʋ a ʋ yir dem za, ɛ́ nyɩw a ʋ bome za bɛr.

²⁶ Bɛ tɩ wob'ɩ kʋsɛbɛ gbõ pàw ʋ, a cãà na nɩ dɩ̃a. Alɛ so a zie nɛ yúor dɩ kɛ́ Akɔɔr bà-fʋɔla wa tɩ tɔ a dɩ̃a. Lɛ n'a a Sore suur tɩ ɓãá.