Zozue 6 - A SƐB-SÕW

A Ɩsɩrayɛl nɩbɛ zɛb'a de a Zeriko tẽw

¹ A Zeriko tẽw pamɛ tɩ kpa n a pʋ̃ɔmɩ ɛ́ kpa a yẽw, a Ɩsɩrayɛl nɩbɛ ƴãw. Nɩr bɛ tɩ yire ɩ, nɩr bɛ tɩ kpɩɛr ɛ.

² A Sore tɩ yel'ɩ a Zozue à ŋá: «Nyɛ̃, ɩ̃ ƴãwnɛ nɩ a Zeriko tẽw a fʋ nũú, lãwnɩ a ʋ nãà nɩ a ʋ zɛbr-nɩbɛ na kpɛ socir a.

³ Fʋ̃ʋ nɩ a fʋ zɛbr-nɩbɛ za, nyɩ na mɩ́ cen na viiri koli a tẽw, nyɩ na viiri na koli ʋ gb'a been bibir za, tɩ ta bibie ayʋɔb.

⁴ Bàwr-maalbɛ ayopõi na de nɩ a wõ-taa daga niwn, ɛ́ ŋa za mɩ́ tɛr ɩɩl. A bibie ayopõi sob a, nyɩ na cen na viiri koli a tẽw gb'a ayopõi, ɛ́ a bàwr-maalbɛ pɛblɩ a ɩ́lɛ́.

⁵ Bɛlɛ wa pɛblɩ a ɩɩl kɔwrɩ a, a Ɩsɩrayɛl nɩbɛ za na lɔb'ɩ zɛbr cɛl lawlawlaw, ɛ́ a dacĩ-kpɛ̃ɛ na piw a tẽw a na lo na, lɛ n'a a Ɩsɩrayɛl nɩbɛ za na kpɛ a zɛbr ƴãw, ŋa za mɩ́ tori a ʋ nidaa cere.»

⁶ A Nun bidɛb Zozue tɩ bʋɔl'ɩ a bàwr-maalbɛ wa yel bɛ à ŋá: «Nyɩ tuo a Sore wõ-taa daga a nyɩ bawŋmamɛ zu, ɛ́ bàwr-maalbɛ ayopõi de ʋ niwn nɩ ɩ́lɛ́ ayopõi.»

⁷ Al pùorí, ʋ tɩ yel'ɩ a nɩbɛ à ŋá: «Nyɩ ìr lo a sɔ́r! Nyɩ cen viiri koli a tẽw. A zɛbr-nɩbɛ niw-dierbɛ bɛ tɔl de a wõ-taa daga niwn.»

⁸ A yele za tɩ ɩ na mɛ̃ a lɛ a Zozue na tɩ yel a nɩbɛ a: a bàwr-maalbɛ ayopõi na tɩ tɛr a ɩ́lɛ́ ayopõi a, tɩ tɔl'a ɛ́ pɛblɛ a ɩ́lɛ́ bɛ na tɛr a. A Sore wõ-taa daga tɩ tuur bɛ na.

⁹ A zɛbr-nɩbɛ niw-dierbɛ tɩ de nɩ a bàwr-maalbɛ na pɛblɛ a ɩ́lɛ́ a niwn, ɛ́ a zɛbr-nɩbɛ po-pàwrbɛ tuur a wõ-taa daga. Bɛ tɩ cere na ɛ́ pɛblɛ a ɩ́lɛ́.

¹⁰ Ɛcɛ a Zozue tɩ yel'ɩ a nɩbɛ: «Nyɩ taa lɔbr a zɛbr cɛl ɛ, nyɩ taa ɩrɛ bɛ wone a nyɩ kɔkɔr ɛ, ƴɛ̀r-bir za bɛ yire a nyɩ nʋɔrɩ́ ɛ, ɛ́ tɩ ta a bibir ʋl ɩ̃ na na yel nyɩ: “Nyɩ lɔb a zɛbr cɛl”. A lɛn daar'a nyɩ na lɔb a zɛbr cɛl.»

¹¹ Bɛ tɩ cen na viiri koli a tẽw nɩ a Sore wõ-taa daga gb'a been, al pùorí, bɛ kpɛ a laɩ pʋɔ tɩ gã a tɩ̃ɩsɔw.

¹² A Zozue tɩ ìr'ɩ biɓaar-pipi, ɛ́ a bàwr-maalbɛ tuo a Sore wõ-taa daga.

¹³ A bàwr-maalbɛ ayopõi bɛl na tɩ tɛr a ɩ́lɛ́ ayopõi a tɩ de nɩ a Sore wõ-taa daga niwn, pɛblɛ a bɛ ɩ́lɛ́ cere nɩ. A zɛbr-nɩbɛ niw-dierbɛ tɩ de bɛ nɩ niwn cere, ɛ́ a zɛbr-nɩbɛ po-pàwrbɛ tɩ tuur a Sore wõ-taa daga. Bɛ tɩ pɛblɛ nɩ a ɩ́lɛ́ cere nɩ.

¹⁴ Bɛ tɩ cen na viiri koli a tẽw gb'a been a bibie ayi sob ŋa, ɛ́ lɛb kpɛ a laɩ pʋɔ. À à ŋá n'a bɛ tɩ ɩ bibie ayʋɔb.

¹⁵ A bibie ayopõi sob, a zie na wa wɛlɛ a, bɛ tɩ ìr'a cen viiri koli a tẽw mɛ̃ a lɛ bɛ na mɩ́ ɩ a, gb'a ayopõi. A ʋlɩ bibir yõ n'a bɛ cen viiri koli a tẽw a gb'a ayopõi.

¹⁶ A gb'a ayopõi sob a, a bàwr-maalbɛ tɩ pɛblɩ a ɩ́lɛ́ ɛ́ a Zozue yel a nɩbɛ: «Nyɩ lɔb a zɛbr cɛl! Bʋ̃ʋ n'ʋ vɛ̃, a Sore kʋ̀ nyɩ nɩ a tẽw.

¹⁷ Nyɩ na sãw nɩ a tẽw bɛr, nɩ bom za na be a ʋ pʋɔ a, a Sore ƴãw. A pɔw-yɛm Arahab yõ n'ʋ na vʋʋrɛ, ʋlɛ nɩ a bɛlɩ dem na na lãwnɩ ʋ be a ʋ yir a, bʋ̃ʋ n'ʋ vɛ̃, ʋ sɔwl'ɩ a tɩ nɩbɛ na tɩ cen a tẽw piwru a.

¹⁸ Ɛcɛ a nyɩɩm, nyɩ gù vla! Bom za a na fɛr kɛ́ bɛ sãw bɛr a, nyɩ taa bɔbr ʋ, ɛ́ taa tʋɔr ʋ ɛ, alɛ bɛ ɩ lɛ, nyɩ na ɩ na kpɩɛrʋ páw a Ɩsɩrayɛl laɩ, ɛ́ bɛ sãw ʋ bɛr.

¹⁹ A salm-pla nɩ a salm-zɩɛ za, a kur-zɩɛ nɩ a kure bome za, a za na ɩ n Sore sób. Bɛ na de a na ƴãw a Sore na-bome pʋɔ.»

²⁰ Bɛ tɩ pɛbl'ɩ a ɩ́lɛ́. A Ɩsɩrayɛl nɩbɛ na wa wõ a ɩ́lɛ́ pɛblʋ a, bɛ lɔb'ɩ a zɛbr cɛl lawlawlaw, ɛ́ a dacĩ-kpɛ̃ɛ na piw a tẽw a, lo a pɛr nɛ pʋɔ. Daadaalɛ a Ɩsɩrayɛl nɩbɛ tɩ kpɛ n a tẽw pʋɔ a zɛbr ƴãw, ŋa za tori a ʋ nidaa ɛ́ cere, bɛ tɩ zɛb'a de a tẽw.

²¹ Bɛ tɩ sãw nɩ bom za na be a tẽw pʋɔ a bɛr, a dɛbr nɩ a pɔwbɛ, a pɔlbili nɩ a dɛb-nyamɛ, a nĩi, a píir nɩ a bòn, bɛ kʋ n a za.

A Arahab yir dem nyɛ̃ nɩ a faafʋ

²² A Zozue tɩ yel'ɩ a dɛbr ayi bɛl na tɩ cen tɩ piwri a Zeriko tẽw a: «Nyɩ cen tɩ kpɛ a pɔw-yɛm Arahab yir, tɛr ʋ yi n, ʋlɛ nɩ a ʋ yir dem za, mɛ̃ a lɛ nyɩ na tɩ pɔ yel kʋ̀ ʋ a.»

²³ A pɔ́lɛ́ na tɩ cen tɩ piwri a tẽw a tɩ cen na tɩ kpɛ tɛr a Arahab yi n, lãwnɩ a ʋ sãà, a ʋ mã, a ʋ yɛbr nɩ bom za ʋ na so a. Bɛ tɩ tɛr'ɩ a ʋ dɔwlʋ nɩbɛ za yi n tɩ ƴãw zi-yũo na bɛ ɩ a Ɩsɩrayɛl nɩbɛ laɩ ɩ.

²⁴ A tẽw a, bɛ tɩ nyɩw ʋ na bɛr, lãwnɩ bom za na be a ʋ pʋɔ a, ɛ́ tɩ cɛ a salm-pla, a salm-zɩɛ nɩ a kur-zɩɛ nɩ a kure bome bɛ na de ƴãw a Sore yir na-bome pʋɔ a.

²⁵ A Zozue tɩ bɛr'ɩ a pɔw-yɛm Arahab ʋ vʋʋrɛ, ʋlɛ nɩ a ʋ yir dem nɩ bom za ʋ na so a, ʋ na tɩ sɔwlɩ a zi-piwrbɛ na tɩ cen a Zeriko tẽw piwru a ƴãw. Ʋ kpɛ n a Ɩsɩrayɛl nɩbɛ sɔgɔ, ɛ́ a ʋ bʋʋrɛ cãà kpɩɛr a bɛ sɔgɔ nɩ dɩ̃a.

²⁶ A lɛn daar a, a Zozue tɩ pɔ na yel: «A Sore ŋmɛ-ƴãw, a tuur nɩr ʋl na na bɔbr k'ʋʋ lɛb mɛ a Zeriko tẽw ŋa a. A ʋ bidɛb-dãw-dɔwra n'ʋ ʋ na sʋ̃ɔ́ nɩ a pɛr, ɛ́ a tuure n'ʋ ʋ na ƴãw nɩ a pamɛ.»

²⁷ A Sore tɩ be n a Zozue zie, ɛ́ a Zozue yúor yi a tẽw za pʋɔ.