Zozue 23 - A SƐB-SÕW

A Zozue nyɔ-vʋʋrʋ baarʋ daar pʋ-tɩɛrʋ ƴɛ̀r-bie

¹ A tɩ cɛlɩ nɩ yaga a Sore na tɩ kʋ̀ a pɩ̃ɛnʋ a Ɩsɩrayɛl nɩbɛ, faa bɛ a bɛ dɔ̃ dem za na tɩ viiri koli bɛ a nuru pʋɔ a. A Zozue tɩ kor'a tɩ nyãwnɩ ʋ za.

² Ʋ tɩ bʋɔl'ɩ a Ɩsɩrayɛl nɩbɛ za, lãwnɩ a bɛ nɩ-kore, a bɛ nɩ-bɛrɛ, a bɛ ƴɛ̀r-dɩrbɛ nɩ a bɛ sɛ-sɛbrbɛ yel bɛ à ŋá: «Mãa n'ɩ ŋan kor nyãwnɩ ɩ̃ za.

³ A nyɩɩm tɛɛ za a, nyɩ nyɛ̃ nɩ a lɛ a Sore nyɩ Naaŋmɩn na ɩ a ten á ŋá nɩ-bʋʋrɛ a nyɩɩm ƴãw a, bʋ̃ʋ n'ʋ vɛ̃, a Sore nyɩ Naaŋmɩn tɔr za n'ʋ tɩ lãwnɩ nyɩ zɛbr.

⁴ Nyɩ nyɛ̃, ɩ̃ ŋmɛ n gbãw põ a nyɩ dɔwlʋ a nɩ-bʋʋr-yoru ten ɩ̃ na zɛb de a, nɩ a al na cãà cɛ a zɛb-deb a, a al na be a saa-pɛrɩ́ nɩ a mʋ̃tɔ̃w-kpɛb-lowr cara pʋɔ a, a pɛr lɛ k'aa Zurdɛ̃ nɩ a Mediterane kʋ̃ɔ-kpɛ̃ɛ cara pʋɔ a.

⁵ A Sore nyɩ Naaŋmɩn tɔr za na diw bɛ nɩ a nyɩ niŋé, ʋ na mɩ́ ɩ na bɛ lɩɛb zɔ, nyɩmɛ wa pɩɛlɛ a, ɛ́ nyɩ na de nɩ a bɛ tẽw, mɛ̃ a lɛ ʋ na yel a.

⁶ A na ɩ à ŋá a, nyɩ kpɛmɛ yaga, ɛ́ sɩrɩ tuur a lɛ za na sɛb a Moyiir wulu sɛbɛ pʋɔ a, nyɩ tuur a, ɛ́ taa bɛrɛ a towtow ɛ.

⁷ Nyɩ taa kpɩɛr nyawr a nɩ-bʋʋrɛ bɛ ŋa na cãà kpɩɛr a nyɩ sɔgɔ a ɩ. Nyɩ taa puore a bɛ ŋmɩmɛ ɩ, nyɩ taa pore a bɛ ŋmɩmɛ yée a nyɩ pɔɛ pʋɔ ɩ, nyɩ taa gũune a niŋé kɛ́ nyɩ puori a ɩ.

⁸ Nyɩ ƴãw fãw tu a Sore nyɩ Naaŋmɩn mɛ̃ a lɛ nyɩ na ɩ wa tɩ tɔ a dɩ̃a bibir a.

⁹ A Sore ɩ na nyɩ zɛb de tẽ-bɛrɛ bɛrɛ nɩ tẽ-kpɛn kpɛn, ɛ́ wa tɩ tɔ a dɩ̃a bibir a, nɩr za bɛ tʋ̃ɔ́ bà gbɛ́r a nyɩ niŋé ɩ.

¹⁰ A nyɩ nɩ-been na tʋ̃ɔ́ na diw nɩbɛ túr (1 000), bʋ̃ʋ n'ʋ vɛ̃, a Sore nyɩ Naaŋmɩn lãwnɩ nyɩ na zɛbr, mɛ̃ a lɛ ʋ na yel a.

¹¹ A na ɩ à ŋá a, nyɩ gù nyɩ tʋɔra vla: nyɩ nɔnɛ a Sore nyɩ Naaŋmɩn.

¹² Ɛcɛ nyɩmɛ wa zawr'ʋ bɛr, ɛ́ tu a nɩ-bʋʋrɛ bɛ ŋa na cãà be a nyɩ sɔgɔ a pùor a, nyɩmɛ wa kule a bɛ pɔwyaar, nyɩmɛ wa cere a bɛ zie, ɛ́ bɛ waar a nyɩ zie a,

¹³ nyɩɩm bãwnɩ a k'aa Sore nyɩ Naaŋmɩn kʋ̃ cãà ɩrɛ nyɩ zɛbr tʋ̃ɔ́nɛ bɛ ɩ. Bɛ na ɩ n mɩ̃ɛ nɩ bɛra a nyɩ ƴãw, bɛ na ɩ n fʋba fɔbr a nyɩ lõbowe ƴãw, ɛ́ ɩ gʋʋr a nyɩ mimie pʋɔ, ɛ́ gù nyɩ tɩ bɔr a tẽ-vla ŋa zu a Sore nyɩ Naaŋmɩn na kʋ̀ nyɩ a.

¹⁴ Mãa kule na mɛ̃ tẽw zu bom za na tɔlɛ a. Ɛcɛ nyɩɩm a, nyɩ sàw nɩ nyɩ tɩɛrʋ za, nɩ nyɩ sɩ́ɛ za, k'aa ƴɛ̀r-vɩɛlɩ al za a Sore nyɩ Naaŋmɩn na tɩ ƴɛ̀r a nyɩ ƴãw a, been bɛ cɛ bɛ tu a ʋ tub ɛ. A za tu na tɩ ɓɩɩlɩ.

¹⁵ Ũw! Mɛ̃ a lɛ a ƴɛ̀r-vɩɛlɩ al za a Sore nyɩ Naaŋmɩn na tɩ ƴɛ̀r kʋ̀ nyɩ a, na tu a za a, lɛ mɩ̀ n'a a Sore na ɩ a ŋmɛ-ƴãw ƴɛ̀r-bie tu a nyɩ ƴãw, ɛ́ gù ʋ tɩ kʋ nyɩ pàw pɛr, a tẽ-vla ŋa ʋ na kʋ̀ nyɩ a zu.

¹⁶ Nyɩmɛ wa sãw a Sore nyɩ Naaŋmɩn wõ-taa bɛr, wõ-taa ʋ na yel kɛ́ nyɩ maal tɛr a, nyɩmɛ wa sãw ʋ bɛr, ɛ́ maalɛ ŋmɩn-yoru, mɩ́ gũu a niŋé a, a Sore suur na ìr'ɩ a nyɩ ƴãw mɛ̃ vũu a, ɛ́ nyɩ na bɔr'ɩ fɔ̃wlɛ a tẽ-vla ŋa ʋ na kʋ̀ nyɩ a pʋɔ.»