Zozue 22 - A SƐB-SÕW

A dɔwlʋ al na be a Zurdɛ̃ saa-pɛrɩ́ a

¹ Lɛ n'a a Zozue tɩ bʋɔlɩ a Urubɛn dɔwlʋ nɩbɛ nɩ a Gadɩ dɔwlʋ nɩbɛ nɩ a Manase dɔwlʋ ŋmãa nɩbɛ,

² wa yel bɛ à ŋá: «Nyɩ tu n a lɛ za a Sore tõ-tõ-bie Moyiir na tɩ yel kʋ̀ nyɩ a, ɛ́ nyɩ bɛr'a wõ a ɩ̃ ƴɛ̀rʋ za.

³ Dɩtaarɩtaarɩ za wa tɩ tɔ a dɩ̃a a, nyɩ bɛ bɛr a nyɩ yɛbr ɛ, ɛ́ à à ŋá n'a nyɩ tu a Sore nyɩ Naaŋmɩn nʋɔr ʋ na ƴãw a.

⁴ Ƴɛrɛŋa a Sore nyɩ Naaŋmɩn na kʋ̀ pɩ̃ɛnʋ a nyɩ yɛbr, mɛ̃ a lɛ ʋ na tɩ yel kʋ̀ bɛ a, nyɩ na tʋ̃ɔ́ na lɛb kul a nyɩ yie pʋɔ, a tẽw ʋl nyɩ na so a pʋɔ, a ʋl a Sore tõ-tõ-bie Moyiir na kʋ̀ nyɩ a Zurdɛ̃ saa-pɛrɩ́ a.

⁵ Ɛcɛ, nyɩ dɛ tɩ ƴãw fãw tuur a wulu a Sore nyɩ Naaŋmɩn tõ-tõ-bie Moyiir na kʋ̀ nyɩ a: nyɩ nɔnɛ a Sore nyɩ Naaŋmɩn, nyɩ maalɛ a ʋ pʋ-tɩɛrʋ, nyɩ tuur a ʋ nɛ-ƴãwnɩ, nyɩ sàw de ʋ nɩ nyɩ pʋɔ za, nyɩ maalɛ ʋ nɩ a nyɩ tɩɛrʋ za, nɩ a nyɩ sɩ́ɛ za.»

⁶ A Zozue tɩ ƴɛ̀r'ɩ nɔ-vla kʋ̀ bɛ, ɛ́ bɛr bɛ bɛ kule.

⁷ A Moyiir tɩ kʋ̀ n zie a Basan pʋɔ, a Manase dɔwlʋ ŋmãa kãw. Ɛ́ a dɔwlʋ ŋmãa ʋl na cɛ a, a Zozue tɩ kʋ̀ ʋ nɩ zie, nɩ a ʋ yɛbr, a Zurdɛ̃ mʋ̃tɔ̃w-kpɛb-lowr. A Zozue na tɩ bɛr bɛ bɛ lɛbr kule a, ʋ mɩ̀ tɩ ƴɛ̀r'ɩ nɔ-vla kʋ̀ bɛ.

⁸ Ʋ tɩ yel bɛ na: «Nyɩ tɛr na-bome yaga nɩ dʋn na bɛ dɩ vuo a, lãwnɩ salm-pla nɩ salm-zɩɛ nɩ kur-zɩɛ nɩ kure nɩ fɔbr yaga lɛb kul'ɩ. Nyɩ tɩ ɩ nyɩɩm nɩ a nyɩ yɛbr põ a bome nyɩ na zɛb de a nyɩ dɔ̃ dem zie a.»

A bàwr-maal-kuur bɛ na mɛ a Zurdɛ̃ nʋɔr a

⁹ À ŋá n'a a Urubɛn dɔwlʋ nɩbɛ nɩ a Gadɩ dɔwlʋ nɩbɛ nɩ a Manase dɔwlʋ ŋmãa nɩbɛ tɩ lɛb kul. Bɛ tɩ bɛr'ɩ a Ɩsɩrayɛl nɩbɛ a Silo, a Kanãa tẽw, ɛ́ cen a Galaadɩ na ɩ a tẽw a Sore na tɩ ƴãw a Moyiir kʋ̀ bɛ bɛ so a.

¹⁰ Bɛ na tɩ ta a Zurdɛ̃ nʋɔr ɛ́ cãà be a Kanãa tẽw a, bɛ tɩ mɛ n bàwr-maal-kuur na ɩ kpɛ̃ɛ sãá a, pɩɛlɩ a man.

¹¹ A Ɩsɩrayɛl nɩbɛ tɩ wõ na bɛ yere à ŋá: «A Urubɛn dɔwlʋ nɩbɛ nɩ a Gadɩ dɔwlʋ nɩbɛ nɩ a Manase dɔwlʋ ŋmãa nɩbɛ mɛ n bàwr-maal-kuur pɩɛlɩ a Zurdɛ̃ a tɩ gãwn ka a Kanãa tẽw pʋɔ.»

¹² A Ɩsɩrayɛl nɩbɛ na dɛ wa wone a lɛ pɛ a, bɛ tɩ ɓã n taa bɛ za, a Silo, kɛ́ bɛ cen tɩ zɛb'ɩ a Ɩsɩrayɛl dɔwlʋ al na be a Zurdɛ̃ saa-pɛrɩ́ a.

¹³ A Ɩsɩrayɛl nɩbɛ tɩ tõ n a bàwr-maalɛ Eleazaar bidɛb Pɩnasɩ a Galaadɩ tẽw, a Urubɛn dɔwlʋ nɩbɛ, a Gadɩ dɔwlʋ nɩbɛ, nɩ a Manase dɔwlʋ ŋmãa nɩbɛ zie.

¹⁴ A nɩ-bʋʋrɛ nɩ-bɛrɛ pie tɩ bɩɛlɛ nɩ a Pɩnasɩ, dɔwlʋ za pʋɔ nɩ-been, bɛ za tɩ ɩ n yie dem a Ɩsɩrayɛl dɔwlʋ pʋɔ.

¹⁵ Bɛ tɩ cen nɩ a Galaadɩ tẽw, a Urubɛn dɔwlʋ nɩbɛ, a Gadɩ dɔwlʋ nɩbɛ nɩ a Manase dɔwlʋ ŋmãa nɩbɛ zie, tɩ ƴɛ̀r a bɛ zie à ŋá:

¹⁶ À ŋá n'a a Sore lãw za ƴɛ̀rɛ: «Bʋ̃ʋ n'ʋ so nyɩ maalɩ a ɩ-faa ŋa tɔ càar'ɩ a Ɩsɩrayɛl Naaŋmɩn? Bʋ̃ʋ n'ʋ so nyɩ bɛ sàwr a Sore nʋɔr a dɩ̃a, ɛ́ mɛ nyɩ mɩŋa bàwr-maal-kuur lɩɛbɩ nɩ-gaarɩ a Sore zie?

¹⁷ A Pewɔɔr sãwna bɛ man tɩ ɛ? Nɩ dɩ̃a, tɩ cãà bɛ so a dɛwr bɛr baarɩ sɛr ɛ, a dɔwrʋ na saa lo a Sore lãw nɩbɛ zu a.

¹⁸ Ɛ́ nyɩɩm ìr dɩ̃a tawr zãánɛ nɩ a Sore! Nyɩ ìr'ɩ dɩ̃a zawrɛ a Sore bɛrɛ, bio a, a ʋ suur na ìr'ɩ a Ɩsɩrayɛl lãw nɩbɛ za zu!

¹⁹ Nyɩmɛ wa nyɛ̃ a zie nyɩ na so ʋ bɛ sɛw taa nɩ a Sore a, nyɩɩm gãw wa a tẽw ʋ na so a pʋɔ, a be a ʋ zi-sõw na be a. Nyɩ wa de ziir a tɩ sɔgɔ so a, ɛcɛ nyɩ ta gaarɩ a Sore zie ɩ, nyɩ ta mɛ bàwr-maal-ku-yũo mɩ̀ gaarɩ a tɩ zie ɩ, nyɩ ta mɛ bàwr-maal-ku-yũo pɩɛlɩ a Sore tɩ Naaŋmɩn dem ɛ.

²⁰ A Zera bʋʋrɛ Akan na tɩ ɩ sãw yaga za, a bʋ̃-ciiri ʋ na de a ƴãw a, a Ɩsɩrayɛl lãw za zu bɛ n'a a Sore suur tɩ lo ɩ? Ʋ yõ bɛ n'ʋ tɩ kpi a ʋ sãwna kũu ɛ!»

²¹ A Urubɛn dɔwlʋ nɩbɛ, a Gadɩ dɔwlʋ nɩbɛ nɩ a Manase dɔwlʋ ŋmãa nɩbɛ tɩ sɔw nɩ a Ɩsɩrayɛl nɩbɛ dɔwlʋ yie nɩ-bɛrɛ:

²² «A ŋmɩmɛ za Naaŋmɩn, a Sore, a ŋmɩmɛ za Naaŋmɩn, a Sore, bãwnɩ a na, ɛ́ a Ɩsɩrayɛl mɩ̀ na bãw na! Alɛ wa ɩ gaarʋ n'a tɩ gaarɩ a Sore zie a, alɛ wa ɩ sãwna n'a tɩ sãw a Sore yaga za a, ʋ ta bɛr tɩ tɩ vʋʋrɩ cɛlɩ ɛ!

²³ Tɩmɛ wa mɛ bàwr-maal-kuur kɛ́ tɩ gaarɩ a Sore zie a, alɛ wa ɩ nyɩw-a-za-bàwr nɩ de-kʋ̀b bome ƴãw n'a a, alɛ wa ɩ ƴã-ɓaarʋ bàwr maalʋ ƴãw n'a a, a Sore ʋ dɔwrɩ tɩ a al ƴãw!

²⁴ Ɛcɛ lɛ bɛ n'a ɩ! Dɛ̃bɩ̃ɛ n'a so tɩ ɩ à à ŋá, tɩ tɩɛr'ɩ tɩ pʋɔ yel k'aa mɩnɛ kãw bio a, a nyɩ bibiir na yel'ɩ a tɩ bibiir: “Bʋ̃ʋ n'ʋ nyɩɩm nɩ a Sore, a Ɩsɩrayɛl Naaŋmɩn lãw mɔ̃?

²⁵ Urubɛn nɩbɛ nɩ Gadɩ nɩbɛ ɛ, a tɩɩm nɩ a nyɩɩm cará a, a Sore tɔr za ƴãw nɩ tʋr-bɔw na ɩ a Zurdɛ̃ a. Nyɩ bɛ dɩ san a Sore zie ɩ!” À à ŋá a, a nyɩ bibiir na bɛlɩ nɩ a tɩ bibiir ƴãw bɛ bɛ cãà ƴãwnɛ a Sore ɩ.

²⁶ Lɛ so tɩ tɩɛrɩ tɩ pʋɔ à ŋá: “A fɛr'a kɛ́ tɩ mɛ a bàwr-maal-kuur ŋa, ʋʋ ta ɩ nyɩw-a-za-bàwr nɩ bàwr kãw za ƴãw ɩ,

²⁷ ɛcɛ, ʋ ɩ dãsɩɛ bom, tɩɩm nɩ a nyɩɩm nɩ a tɩ bʋ̃-dɔwrɩ cará, a na fɛr kɛ́ tɩ maalɛ a Sore nɩ a tɩ nyɩw-a-za-bagɛ nɩ a tɩ ƴã-ɓaarʋ bagɛ, kɛ̀ bio a nyɩ bibiir taa yere a tɩ dem kɛ́: Nyɩ bɛ dɩ a Sore san ɛ.”

²⁸ Tɩ tɩ tɩɛr'ɩ tɩ pʋɔ à ŋá: “Bio bɛlɛ wa ƴɛ̀rɛ à ŋá tɩɩm nɩ a tɩ bʋ̃-dɔwrɩ zie a, tɩ na yel a: Nyɩ nyɛ̃, a tɩ sãàkʋm-kore mɛ n a bàwr-maal-kuur ŋa, ʋ ŋmɛ̃ mɛ̃ a Sore bàwr-maal-kuur tɔr za a. Ɛcɛ, bɛ bɛ mɛ ʋ nyɩw-a-za-bagɛ nɩ bagɛ a mɩnɛ kãw za ƴãw ɩ, bɛ mɛ ʋ na k'ʋʋ ɩ dãsɩɛ bom tɩɩm nɩ a nyɩɩm cara pʋɔ!”

²⁹ Faalʋ na bɛ maal'ɩ wob a nãá n'ʋ, tɩ na na gaarɩ a Sore ƴãw, bɛ cãà tu ʋ ɛ́ mɛ bàwr-maal-kuur nyɩw-a-za-bagɛ nɩ de-kʋ̀b bome nɩ a bagɛ a mɩnɛ kãw ƴãw ɛ́ bɛr a Sore tɩ Naaŋmɩn bàwr-maal-kuur na be a ʋ zi-sõw pʋɔ a!»

³⁰ A bàwr-maalɛ Pɩnasɩ nɩ a Ɩsɩrayɛl bʋʋrɛ nɩ-bɛrɛ nɩ a yie nɩ-bɛrɛ na tɩ wõ a ƴɛ̀r-bie á ŋá a Urubɛn dɔwlʋ nɩbɛ, a Gadɩ dɔwlʋ nɩbɛ nɩ a Manase dɔwlʋ ŋmãa nɩbɛ na tɩ ƴɛ̀r a, a tɩ sɛw bɛ na.

³¹ A bàwr-maalɛ Eleazaar bidɛb Pɩnasɩ tɩ yel bɛ na: «Ƴɛrɛŋa a, tɩ bãwnɩ a na k'aa Sore be n a tɩ zie, nyɩ na bɛ sãw a Sore, mɛ̃ a lɛ tɩ na tɩ zɔrɛ a dɛ̃bɩ̃ɛ a. À ŋá n'a nyɩ faa a Ɩsɩrayɛl nɩbɛ a Sore dɔwrʋ ƴãw.»

³² Al pùorí, a bàwr-maalɛ Eleazaar bidɛb, Pɩnasɩ, nɩ a nɩbɛ nɩ-bɛrɛ, tɩ bɛr'ɩ a Urubɛn dɔwlʋ nɩbɛ nɩ a Gadɩ dɔwlʋ nɩbɛ, ɛ́ yi a Galaadɩ tẽw lɛb wa a Kanãa tẽw, a Ɩsɩrayɛl nɩbɛ zie, wa manɩ a lɛ na ɩ a kʋ̀ bɛ.

³³ A Ɩsɩrayɛl nɩbɛ pʋʋr tɩ pɛlɩ na, bɛ danɩ a Naaŋmɩn. Bɛ tɩ lɩɛb'ɩ a zɛbr bɛr, bɛ na tɩ yel kɛ́ bɛ zɛb sãw a tẽw a Urubɛn nɩ a Gadɩ nɩbɛ na kpɩɛr a bɛr a.

³⁴ Lɛ n'a a Urubɛn nɩbɛ nɩ a Gadɩ nɩbɛ tɩ yel à ŋá: «A bàwr-maal-kuur ŋa dɩ n dãsɩɛ a tɩ za zie k'aa Sore ɩ n Naaŋmɩn!» Bɛ tɩ por'ɩ a bàwr-maal-kuur yúor kɛ́: “Dãsɩɛ bom.”