Zozue 21 - A SƐB-SÕW

A levitɩ mɩnɛ tẽ-bɛrɛ

¹ A levitɩ mɩnɛ yie nɩ-bɛrɛ tɩ cen na tɩ páw a bàwr-maalɛ Eleazaar, nɩ a Nun bidɛb Zozue, nɩ a Ɩsɩrayɛl dɔwlʋ yie nɩ-bɛrɛ,

² a Silo, a Kanãa tẽw, yel bɛ à ŋá: «A Sore tɩ ƴãw na a Moyiir yel kɛ́ bɛ kʋ̀ tɩ tẽ-bɛrɛ tɩ na na kpɩɛr a, nɩ a dʋn mʋ̃ɔ 'wɔbrʋ ziir na pɩɛl a a, a tɩ dʋn ƴãw.»

³ Lɛ n'a a Ɩsɩrayɛl nɩbɛ tɩ kaa ír tẽ-bɛrɛ nɩ a dʋn mʋ̃ɔ 'wɔbrʋ ziir, a ziir bɛ na so a pʋɔ kʋ̀ a levitɩ mɩnɛ, mɛ̃ a lɛ a Sore na tɩ yel a.

⁴ A Kehatɩ bʋʋrɛ levitɩ mɩnɛ nɛbɛ a bie de niwn wul. A bɛ pʋɔ a, bɛ tɩ ŋmɛ n a gbãw, a bàwr-maalɛ Aarɔ̃ bʋʋrɛ páw tẽ-bɛrɛ pie nɩ ata, a Zuda nɩ Sɩmɩ̃ɔ nɩ a Bɛ̃zamɛ dɔwlʋ ziir pʋɔ.

⁵ A Kehatɩ bʋʋrɛ ŋmãa bɛl na tɩ cɛ a tɩ páw nɩ tẽ-bɛrɛ pie, a Efarayim nɩ a Dan nɩ Manase dɔwlʋ ŋmãa ziir pʋɔ.

⁶ A Gɛrson bʋʋrɛ tɩ páw nɩ tẽ-bɛrɛ pie nɩ ata a Basan, a Ɩsakaar nɩ a Asɛɛr nɩ a Nɛfɩtali nɩ a Manase dɔwlʋ ŋmãa ziir pʋɔ.

⁷ A Merari bʋʋrɛ tɩ páw nɩ tẽ-bɛrɛ pie nɩ ayi, a Urubɛn nɩ a Gadɩ nɩ a Zabulɔ̃ dɔwlʋ ziir pʋɔ.

⁸ Gbãw n'ʋ a Ɩsɩrayɛl nɩbɛ tɩ ŋmɛ, ír a tẽ-bɛrɛ á ŋá nɩ a dʋn mʋ̃ɔ 'wɔbrʋ ziir kʋ̀ a levitɩ mɩnɛ, mɛ̃ a lɛ a Sore na tɩ ƴãw a Moyiir yel a.

⁹ Zuda nɩ Sɩmɩ̃ɔ tẽ-bɛrɛ á ŋá bɛ na na bʋɔlɩ a yée a n'a bɛ tɩ kʋ̀

¹⁰ a Aarɔ̃ bʋʋrɛ Kehatɩ yir dem, na ɩ Levi biir a. Bʋ̃ʋ n'ʋ vɛ̃, bɛlɛ nɛbɛ a bie tɩ de niwn wul.

¹¹ Bɛ tɩ kʋ̀ bɛ nɩ Kɩrɩyatɩ-Arba, a Ebrɔ̃ na be a Zuda tan vuo pʋɔ a n'ʋ, nɩ a ʋ dʋn mʋ̃ɔ 'wɔbrʋ ziir. A Arba tɩ ɩ n a Anakɩ sãà.

¹² Ɛcɛ a tẽ-kpɛ̃ɛ póru nɩ a tẽli a, bɛ tɩ kʋ̀ a nɩ a Yefune bidɛb Kalɛb.

¹³ Tẽ-bɛrɛ á ŋá n'a bɛ tɩ kʋ̀ a bàwr-maalɛ Aarɔ̃ bʋʋrɛ: Ebrɔ̃ na ɩ a naayir zɔ-kpɛb zie tẽ-kpɛ̃ɛ kãw a, nɩ a ʋ dʋn mʋ̃ɔ 'wɔbrʋ ziir, Livina nɩ a ʋ dʋn mʋ̃ɔ 'wɔbrʋ ziir,

¹⁴ Yatiir nɩ a ʋ dʋn mʋ̃ɔ 'wɔbrʋ ziir, Ɛsɩtemoa nɩ a ʋ dʋn mʋ̃ɔ 'wɔbrʋ ziir,

¹⁵ Holon nɩ a ʋ dʋn mʋ̃ɔ 'wɔbrʋ ziir, Deviir nɩ a ʋ dʋn mʋ̃ɔ 'wɔbrʋ ziir,

¹⁶ Asan nɩ a ʋ dʋn mʋ̃ɔ 'wɔbrʋ ziir, Yuta nɩ a ʋ dʋn mʋ̃ɔ 'wɔbrʋ ziir, Bɛtɩ-Semɛsɩ nɩ a ʋ dʋn mʋ̃ɔ 'wɔbrʋ ziir: a ɓã taa ɩ tẽ-bɛrɛ piwaɩ bɛ na de a dɔwlʋ ayi á ŋá zie a.

¹⁷ Tẽ-bɛrɛ á ŋá n'a bɛ de a Bɛ̃zamɛ dɔwlʋ ziir pʋɔ: Gabaɔ̃ nɩ a ʋ dʋn mʋ̃ɔ 'wɔbrʋ ziir, Geva nɩ a ʋ dʋn mʋ̃ɔ 'wɔbrʋ ziir,

¹⁸ Anatɔtɩ nɩ a ʋ dʋn mʋ̃ɔ 'wɔbrʋ ziir, Almon nɩ a ʋ dʋn mʋ̃ɔ 'wɔbrʋ ziir: a ɓã taa ɩ tẽ-bɛrɛ anaar nɩ a dʋn mʋ̃ɔ 'wɔbrʋ ziir.

¹⁹ A bàwr-maalbɛ na ɩ a Aarɔ̃ bʋʋrɛ a tẽ-bɛrɛ za ɓã n taa ɩ tẽ-bɛrɛ pie nɩ ata nɩ a dʋn mʋ̃ɔ 'wɔbrʋ ziir.

²⁰ Bɛ tɩ ŋmɛ n a gbãw ír tẽ-bɛrɛ na be a Efarayim dɔwlʋ zie pʋɔ a kʋ̀ a Kehatɩ bʋʋrɛ yie ŋmãa al na cɛ a.

²¹ Tẽ-bɛrɛ á ŋá n'a bɛ tɩ kʋ̀ bɛ: Sɩsɛm na ɩ a naayir zɔ-kpɛb zie tẽ-kpɛ̃ɛ kãw a, nɩ a ʋ dʋn mʋ̃ɔ 'wɔbrʋ ziir, a Efarayim tan vuo pʋɔ, Gezɛɛr nɩ a ʋ dʋn mʋ̃ɔ 'wɔbrʋ ziir,

²² Kivisayim nɩ a ʋ dʋn mʋ̃ɔ 'wɔbrʋ ziir, Bɛtɩ-Horon nɩ a ʋ dʋn mʋ̃ɔ 'wɔbrʋ ziir: a ɓã taa ɩ tẽ-bɛrɛ anaar.

²³ A Dan dɔwlʋ zie pʋɔ a, bɛ tɩ páw nɩ Ɛlteke nɩ a ʋ dʋn mʋ̃ɔ 'wɔbrʋ ziir, Gibeton nɩ a ʋ dʋn mʋ̃ɔ 'wɔbrʋ ziir,

²⁴ Ayalon nɩ a ʋ dʋn mʋ̃ɔ 'wɔbrʋ ziir, Gatɩ-Irimon nɩ a ʋ dʋn mʋ̃ɔ 'wɔbrʋ ziir: a ɓã taa ɩ tẽ-bɛrɛ anaar.

²⁵ A Manase dɔwlʋ ŋmãa zie pʋɔ a, bɛ tɩ páw nɩ tẽ-bɛrɛ ayi: Taanakɩ nɩ a ʋ dʋn mʋ̃ɔ 'wɔbrʋ ziir, nɩ Yivileam nɩ a ʋ dʋn mʋ̃ɔ 'wɔbrʋ ziir.

²⁶ A Kehatɩ bʋʋrɛ yie ŋmãa al na cɛ a tẽ-bɛrɛ za tɩ ɓã n taa ɩ tẽ-bɛrɛ pie nɩ a dʋn mʋ̃ɔ 'wɔbrʋ ziir.

²⁷ Tẽ-bɛrɛ ayi á ŋá n'a bɛ tɩ kʋ̀ a Gɛrson bʋʋrɛ levitɩ mɩnɛ yie: Golan na be a Basan pʋɔ a na ɩ a naayir zɔ-kpɛb zie tẽ-kpɛ̃ɛ kãw a, nɩ a ʋ dʋn mʋ̃ɔ 'wɔbrʋ ziir, Besitera nɩ a ʋ dʋn mʋ̃ɔ 'wɔbrʋ ziir.

²⁸ Ɩsakaar dɔwlʋ pʋɔ: Kisiyon nɩ a ʋ dʋn mʋ̃ɔ 'wɔbrʋ ziir, Daveratɩ nɩ a ʋ dʋn mʋ̃ɔ 'wɔbrʋ ziir,

²⁹ Yarmutɩ nɩ a ʋ dʋn mʋ̃ɔ 'wɔbrʋ ziir, Ɛɩn-Ganim nɩ a ʋ dʋn mʋ̃ɔ 'wɔbrʋ ziir: a ɓã taa ɩ tẽ-bɛrɛ anaar.

³⁰ A Asɛɛr dɔwlʋ pʋɔ: Mɩseal nɩ a ʋ dʋn mʋ̃ɔ 'wɔbrʋ ziir, Avidon nɩ a ʋ dʋn mʋ̃ɔ 'wɔbrʋ ziir,

³¹ Hɛlkatɩ nɩ a ʋ dʋn mʋ̃ɔ 'wɔbrʋ ziir, Erehovʋ nɩ a ʋ dʋn mʋ̃ɔ 'wɔbrʋ ziir: a ɓã taa ɩ tẽ-bɛrɛ anaar.

³² Tẽ-bɛrɛ á ŋá n'a bɛ tɩ páw a Nɛfɩtali dɔwlʋ zie pʋɔ: Kedɛsɩ na be a Galile pʋɔ, ɛ́ ɩ a naayir zɔ-kpɛb zie tẽ-kpɛ̃ɛ kãw a, nɩ a ʋ dʋn mʋ̃ɔ 'wɔbrʋ ziir, Hamɔtɩ-Door nɩ a ʋ dʋn mʋ̃ɔ 'wɔbrʋ ziir, Kartan nɩ a ʋ dʋn mʋ̃ɔ 'wɔbrʋ ziir: a ɓã taa ɩ tẽ-bɛrɛ ata.

³³ A Gɛrson dɔwlʋ tẽ-bɛrɛ za tɩ ɓã n taa ɩ tẽ-bɛrɛ pie nɩ ata nɩ a dʋn mʋ̃ɔ 'wɔbrʋ ziir.

³⁴ Tẽ-bɛrɛ á ŋá n'a bɛ kʋ̀ a Merari dɔwlʋ levitɩ mɩnɛ yie ŋmãa al na cɛ a, a Zabulɔ̃ dɔwlʋ zie pʋɔ: Yokineam nɩ a ʋ dʋn mʋ̃ɔ 'wɔbrʋ ziir, Kaarta nɩ a ʋ dʋn mʋ̃ɔ 'wɔbrʋ ziir,

³⁵ Irimona nɩ a ʋ dʋn mʋ̃ɔ 'wɔbrʋ ziir, Nahalal nɩ a ʋ dʋn mʋ̃ɔ 'wɔbrʋ ziir: a ɓã taa ɩ tẽ-bɛrɛ anaar.

³⁶ A Urubɛn dɔwlʋ zie pʋɔ a, a Zurdɛ̃ saa-pɛrɩ́ na tori a Zeriko a, bɛ mɩ̀ tɩ páw nɩ tẽ-bɛrɛ anaar nɩ a dʋn mʋ̃ɔ 'wɔbrʋ ziir: Besɛɛr nɩ a ʋ dʋn mʋ̃ɔ 'wɔbrʋ ziir a wɛja-kpalɛ vuo pʋɔ, na ɩ a naayir zɔ-kpɛb zie tẽ-kpɛ̃ɛ kãw a, Yahasɩ nɩ a ʋ dʋn mʋ̃ɔ 'wɔbrʋ ziir,

³⁷ Kedemɔtɩ nɩ a ʋ dʋn mʋ̃ɔ 'wɔbrʋ ziir, Mefaatɩ nɩ a ʋ dʋn mʋ̃ɔ 'wɔbrʋ ziir: a ɓã taa ɩ tẽ-bɛrɛ anaar.

³⁸ A Gadɩ dɔwlʋ zie pʋɔ a, tẽ-bɛrɛ á ŋá nɩ a dʋn mʋ̃ɔ-'wɔbr ziir'a bɛ tɩ páw: Aramɔtɩ na be a Galaadɩ, ɛ́ ɩ a naayir zɔ-kpɛb zie tẽ-kpɛ̃ɛ kãw a, nɩ a ʋ dʋn mʋ̃ɔ 'wɔbrʋ ziir, Mahanayim nɩ a ʋ dʋn mʋ̃ɔ 'wɔbrʋ ziir,

³⁹ Hɛsɩbon nɩ a ʋ dʋn mʋ̃ɔ 'wɔbrʋ ziir, Yazɛɛr nɩ a ʋ dʋn mʋ̃ɔ 'wɔbrʋ ziir: a ɓã taa ɩ tẽ-bɛrɛ anaar.

⁴⁰ A na ɩ à ŋá a, tẽ-bɛrɛ pie nɩ ayi n'a bɛ ŋmɛ a gbãw ír kʋ̀ a levitɩ yie al na ɩ a Merari bʋʋrɛ a.

⁴¹ A tẽ-bɛrɛ za a levitɩ bʋʋrɛ na tɩ páw a Ɩsɩrayɛl nɩbɛ ziir pʋɔ a, tɩ ɓã n taa ɩ tẽ-bɛrɛ lɩz'a ayi nɩ ani, nɩ a dʋn mʋ̃ɔ 'wɔbrʋ ziir.

⁴² Bɛ tɩ kʋ̀ bɛ nɩ a tẽ-bɛrɛ á ŋá za, lãwnɩ a dʋn mʋ̃ɔ 'wɔbrʋ ziir na tɩ viiri koli a a.

⁴³ A Sore tɩ kʋ̀ n a Ɩsɩrayɛl nɩbɛ a tẽw ʋl za ʋ na tɩ pɔ yel k'ʋʋ na kʋ̀ n a bɛ sãàkʋm-kore a. Bɛ tɩ de ʋ na kpɩɛr.

⁴⁴ A Sore tɩ kʋ̀ bɛ nɩ pɩ̃ɛnʋ a ziir za, mɛ̃ a lɛ ʋ na tɩ yel kʋ̀ a bɛ sãàkʋm-kore a. Ʋ tɩ ɩ na bɛ zɛb tʋ̃ɔ́ a bɛ dɔ̃ dem za, kãw za bɛ tɩ tʋ̃ɔ́ bà gbɛ́r a bɛ niŋé ɩ.

⁴⁵ A ƴɛ̀r-vɩɛlɩ al za a Sore na tɩ ƴɛ̀r a Ɩsɩrayɛl nɩbɛ ƴãw a, a za tɩ tu na, been kãw za bɛ tɩ cɛ bɛ tu ɛ.