Zozue 2 - A SƐB-SÕW

A Zozue tõ n nɩbɛ ayi kɛ́ bɛ tɩ piwri bãw a Zeriko tẽw

¹ A Nun bidɛb, Zozue, tɩ be n a Sitim, ɛ́ tõ dɛbr ayi kɛ́ bɛ cen tɩ sɔwlɩ piwri bãw a tẽw. Ʋ tɩ yel bɛ na: «Nyɩ cen tɩ cɔlɩ jɩ́r a tẽw ŋa nɩ a Zeriko tẽw nyɛ̃.» Bɛ tɩ cen na tɩ kpɛ pɔw-yɛm kãw na dɩ Arahab a yir, gã a be.

² A Zeriko tẽw nãà tɩ wõ na kɛ́ Ɩsɩrayɛl nɩbɛ ta n a tẽ-kpɛ̃ɛ pʋɔ a tɩ̃ɩsɔw a tẽw piwru ƴãw.

³ Lɛ n'a a Zeriko tẽw nãà tɩ tõ bɛ tɩ yel a Arahab: «Ƴãw a nɩbɛ bɛl na wa a fʋ zie a, bɛ yi — a bɛl na kpɛ a fʋ yir pʋɔ a — bʋ̃ʋ n'ʋ vɛ̃, a tẽw za piwru ƴãw n'a bɛ wa.»

⁴ Ɛcɛ a pɔw tɩ tɛr'ɩ a nɩbɛ ayi bɛl cen tɩ sɔwlɩ. Al pùorí ʋ yel à ŋá: «Sɩza n'a, a nɩbɛ bɛ ŋa wa n a ɩ̃ zie, ɛcɛ ɩ̃ bɛ tɩ bãw be bɛ na yi a ɩ.

⁵ A zie na tɩ sɔbr, bɛ pàwr a tẽw dɩ̃dɔr a, a nɩbɛ bɛl yi na. Ɩ̃ bɛ bãw be bɛ na cen a ɩ. Nyɩ ta tu bɛ fɔ̃wlɛ, nyɩ na diw na nyɔw bɛ.»

⁶ Zɩ̃ k'ʋʋ tɩ tɛr bɛ na do n a ʋ gàrʋ́ tɩ sɔwlɩ bɛ a ʋ lɛ̃ dàar ʋ na bin a pʋɔ.

⁷ A nãà nɩbɛ tɩ ta na tu bɛ, tu n a Zurdɛ̃ man-gbɛ́r lowr, a gãwfʋ ziir. A nɩbɛ na tɩ ta tu bɛ a na wa yire wa báarɛ a, bɛ pàw nɩ a pan.

⁸ A Zozue nɩbɛ bɛl a, bɛ bɛ tɩ gúr sɛr ɛ, ɛ́ a Arahab do a bɛ zie a gàrʋ́

⁹ tɩ yel bɛ: «Ɩ̃ bãwnɩ a na a Sore na kʋ̀ nyɩ a tẽw ŋa a. Nyɩ ƴãwnɛ tɩ nɩ dɛ̃bɩ̃ɛ bɛ dɩ vuo ɩ, ɛ́ a tẽw nɩbɛ za màwr a nyɩ niŋé.

¹⁰ Bʋ̃ʋ n'ʋ vɛ̃, tɩ wõ na k'aa Sore tɩ ɩ na a Bàa-kɛkɛɛ kʋ̃ɔ-kpɛ̃ɛ ʋ ko a nyɩ Eziptɩ tẽw yib daar. Tɩ mɩ̀ wõ n a lɛ nyɩ na ɩ a Amoritɩ mɩnɛ na-mɩnɛ ayi a, a Sihon nɩ a Ɔgɩ a Zurdɛ̃ saa-pɛrɩ́ a: nyɩ kʋ bɛ na, ɛ́ sãw a bɛ bome za bɛr.

¹¹ Tɩ wõ n à à ŋá dɛ kpi zɩ̃, ɛ́ nɩr kʋ̃ lɛb sàw bà gbɛ́r a nyɩ niŋé ɩ, bʋ̃ʋ n'ʋ vɛ̃, a Sore nyɩ Naaŋmɩn ɩ n Naaŋmɩn, a saa-zu a salom zu, nɩ a pile ka a tẽw zu.

¹² A na ɩ à ŋá ɩ̃ ɩ vla a nyɩ zie a ƴɛrɛŋa a, nyɩ pɔ n a Sore kɛ́ nyɩ mɩ̀ na ɩ n vla a ɩ̃ yir dem zie. Nyɩ wul mɛ̃ bãwfʋ na bɛ tɛr bʋnʋ a,

¹³ kɛ́ nyɩ na bɛr'ɩ a ɩ̃ sãà, a ɩ̃ mã, a ɩ̃ yɛ-dɛbr nɩ a ɩ̃ yɛbr bɛ vʋʋrɛ lãwnɩ bom za bɛ na so a, kɛ́ nyɩ na faa tɩ nɩ a kũu pʋɔ.»

¹⁴ A nɩbɛ tɩ yel ʋ na: «Fʋ̃ʋ na na kʋ̃ manɩ a tɩ ka waa a, a tɩ nyɔ-vʋʋrʋ na yáa nɩ a fʋ nyɔ-vʋʋrʋ san tɩmɛ bɛ wa ɩ mɛ̃ a lɛ tɩ na yel a. A Sore wa kʋ̀ tɩ a tẽw a lɛn daar a, tɩ na ɩ n a fʋ zie nɩ nɔ̃wfʋ nɩ yel-mɩŋa.»

¹⁵ A Arahab yir tɩ mɛ na nyɔw a dacin na piw a tẽw a, lɛ so ʋ tɩ tʋ̃ɔ́ ɩ a nɩbɛ tu tokoro vʋɔrɩ́ siw nɩ miwr.

¹⁶ Ʋ tɩ yel bɛ na: «Nyɩ cen a tan pʋɔ tɩ sɔwlɩ, a nyɩ diwrbɛ taa wa páwr nyɩ ɛ. Nyɩ be a be bibie ata, ɛ́ gù bɛ tɩ lɛb wa, al pùorí, nyɩ na tʋ̃ɔ́ na tɔlɛ cere.»

¹⁷ A nɩbɛ bɛl tɩ yel ʋ na: «Nyɛ̃ a lɛ tɩ na na tu a pɔb ŋa fʋ na ƴãw tɩ pɔ a ƴãw a:

¹⁸ tɩmɛ wa kpɛ a tẽw pʋɔ a, fʋ na 'lẽ nɩ a miwr-zɩɛ-ɓõɓõ ŋa ƴãw a tokoro vʋɔr ʋl ƴãw fʋ na ƴãw tɩ tu siw a. Fʋ na ɓã n a fʋ sãà nɩ a fʋ mã nɩ a fʋ yɛbr nɩ a fʋ yir nɩbɛ za taa a fʋ zie a yir pʋɔ.

¹⁹ A nyɩ kãw wa gãw a fʋ dɩ̃dɔr yi a, ʋl mɩŋa n'ʋ na so a ʋ kũu, tɩɩm bɛ pʋɔ ɩ, ɛcɛ nɩr za na na lãwnɩ fʋ a fʋ yir pʋɔ a, bɛlɛ wa kʋ ʋ a, tɩɩm na so a sãwna.

²⁰ Ɛcɛ, fʋ̃ʋ wa manɩ a tɩ ka waa a, a pɔb fʋ na ƴãw tɩ pɔ a, a bɛ cãà pʋɔ ɩ.»

²¹ Ʋ tɩ sɔw na: «A tu mɛ̃ a lɛ nyɩ na yel a!» Al pùorí, ʋ tɩ bɛr'ɩ a nɩbɛ ayi bɛl bɛ cere. Bɛ na tɩ cere wa báarɛ a, ʋ 'lẽ nɩ a miwr-zɩɛ-ɓõɓõ ƴãw a tokoro ƴãw.

²² A zi-piwrbɛ tɩ cen nɩ a tan pʋɔ tɩ be a be bibie ata, ɛ́ gù a bɛ diwrbɛ tɩ lɛb wa a Zeriko. A bɛlɩ dem na tɩ diwr bɛ a tɩ bɔ bɛ nɩ a sɔ́r zu ziir za guu.

²³ Lɛ n'a a nɩbɛ ayi bɛl tɩ yi a tan pʋɔ siw. Bɛ tɩ gãw nɩ a Zurdɛ̃ cen a Nun bidɛb Zozue zie tɩ manɩ a lɛ za na ɩ a kʋ̀ ʋ.

²⁴ Bɛ tɩ yel ʋ na: «Sɩza n'a, a Sore de nɩ a tẽw za ƴãw a tɩ nuru pʋɔ. A tẽw nɩbɛ za màwr'ɩ a tɩ niŋé.»