Zozue 18 - A SƐB-SÕW

Bɛ ŋmɛ n gbãw põ a tẽw a dɔwlʋ ŋmãa al na cɛ a

¹ A Ɩsɩrayɛl nɩbɛ lãw za tɩ ɓã n taa a Silo, ɛ́ maalɩ a tuor-taa pɛn-sɛw a be. Bɛ tɩ so nɩ a tẽw baarɩ.

² Dɔwlʋ ayopõi n'a tɩ cɛ a Ɩsɩrayɛl nɩbɛ dɔwlʋ pʋɔ na cãà bɛ páw zie sɛr ʋ ɩ a bɛ sób a.

³ A Zozue tɩ yel'ɩ a Ɩsɩrayɛl nɩbɛ à ŋá: «Debor'a nyɩ na gù tɩ ta, ɛ́ wa bãw cen tɩ de a tẽw, a Sore, a nyɩ sãàkʋm-kore Naaŋmɩn, na kʋ̀ nyɩ a?

⁴ Nyɩ ír nɩbɛ ata, dɔwlʋ za pʋɔ, ɩ̃ɩ na tõ bɛ na bɛ tɩ cɔlɩ a tẽw, jɩ́r a bɛ dɔwlʋ ziir vla tɩ tɔ, ɛ́ lɛb wa wa manɩ kʋ̀ m.

⁵ Bɛ na põ nɩ a tẽw ziir ayopõi: a Zuda bʋʋrɛ na be n a bɛ tẽw pʋɔ a saa-pɛrɩ́-dʋrʋ-lowr, ɛ́ a Zuzɛb bʋʋrɛ be a bɛ dem pʋɔ, a saa-pɛrɩ́-gʋba-lowr.

⁶ A na ɩ à ŋá a, a nyɩɩm a, nyɩ manɩ a lɛ a tẽw na ŋmɛ̃ a, tu n a ziir ayopõi á ŋá, wa n wa wul mɛ̃ a ka. Ɩ̃ na lɔb'ɩ a bie kʋ̀ nyɩ, a Sore tɩ Naaŋmɩn niŋé.

⁷ Ɛcɛ a levitɩ mɩnɛ kʋ̃ páw zie a nyɩ sɔgɔ ɩ, bʋ̃ʋ n'ʋ vɛ̃, a zie bɛ na na so a na ɩ n a Sore bàwr-maalɛ tome bɛ na tone a. A Gadɩ dɔwlʋ nɩ a Urubɛn dɔwlʋ, nɩ a Manase dɔwlʋ ŋmãa a, bɛl páw nɩ ziir bɛ na so a, a Sore tõ-tõ-bie Moyiir na kʋ̀ bɛ a saa-pɛrɩ́, a Zurdɛ̃ gãwn a.»

⁸ A nɩbɛ bɛl bɛ na tɩ kaa ír kɛ́ bɛ tɩ cɔlɩ a tẽw a tɩ cɔbrɩ nɩ a cenu. Bɛ na bɛ tɩ cen sɛr a, a Zozue tɩ yel bɛ na: «Nyɩ cen tɩ cɔlɩ a tẽw, nyɩ maal jɩ́r ʋ kaa, ɛ́ lɛb wa manɩ a lɛ nyɩ na nyɛ̃ a kʋ̀ m. Ɛ́ a Silo ka a, ɩ̃ na wa lɔb'ɩ a bie a Sore niŋé, mɩ́ ír dɔwlʋ ŋa zie kʋ̀ ʋ.»

⁹ A nɩbɛ bɛl tɩ cen na tɩ cɔlɩ a tẽw za. Bɛ tɩ manɩ nɩ a lɛ a ziir ayopõi bɛ na põ a tẽw a na ɩ a ƴãw sɛbɛ zu, lãwnɩ a tẽ-bɛrɛ. Al pùorí bɛ lɛb cen a Zozue zie a laɩ pʋɔ a Silo.

¹⁰ A Zozue tɩ lɔb'ɩ a bie, a Sore niŋé a Silo, põ a tẽw kʋ̀ a Ɩsɩrayɛl nɩbɛ, ŋa za mɩ́ páw a ʋ dem.

A Bɛ̃zamɛ zie

¹¹ A zi-dãw-niwn sob a bie na tɩ wul a tɩ n'ɩ a Bɛ̃zamɛ dɔwlʋ yie zie. A bɛ zie tɩ be n a Zuda dɔwlʋ zie, nɩ a Zuzɛb dɔwlʋ zie cara pʋɔ.

¹² A bɛ tʋr-bɔw, a saa-pɛrɩ́-gʋba-lowr, tɩ yi n a Zurdɛ̃ ɛ́ do a Zeriko saa-pɛrɩ́-gʋba-lowr, ɛ́ cãà cere a tan vuo lowr a mʋ̃tɔ̃w-kpɛb-lowr, ɛ́ tɩ ta a Bɛtɩ-Awɛn wɛja-kpalɛ.

¹³ Ʋ tɩ yi n a be, ɛ́ tu Luuzɩ lowr, lanɩ a Luuzɩ saa-pɛrɩ́-dʋrʋ-lowr bɛ mɩ̀ na bʋɔlɛ Betɛl a, ɛ́ tɔl a tãw na be a Bɛtɩ-Horon-le-Ba, a saa-pɛrɩ́-dʋrʋ-lowr, siw a Atɩrɔtɩ-Adaar.

¹⁴ A tãw ŋa mʋ̃tɔ̃w-kpɛb-lowr a, a tʋr-bɔw tɩ lɩɛb'a: ʋ tɩ lɩɛb'a tu a saa-pɛrɩ́-dʋrʋ-lowr, cen tɩ ta a Kɩrɩyatɩ-Baal bɛ mɩ̀ na bʋɔlɛ kɛ́ Kɩrɩyatɩ-Yeyarim na ɩ Zuda dɔwlʋ sób a. A Ziir á ŋá n'a a mʋ̃tɔ̃w-kpɛb-lowr tʋr-bɔw tɩ tu tɔl.

¹⁵ A saa-pɛrɩ́-dʋrʋ-lowr tʋr-bɔw tɩ yi n a Kɩrɩyatɩ-Yeyarim, cen a saa-pɛrɩ́-dʋrʋ-lowr, ɛ́ tɩ ta a Nɛfɩtowa bul-nɛ́ɛ zie.

¹⁶ Ʋ tɩ yi n a be, ɛ́ siw a Hinom fʋɔla tãw sɩɛmɩ́, a Erefayitɩ mɩnɛ fʋɔla saa-pɛrɩ́-gʋba-lowr. Ʋ tɩ lanɛ nɩ a Hinom fʋɔla, a Zebizitɩ mɩnɛ tãw sɩ̃ɛ́, a saa-pɛrɩ́-dʋrʋ-lowr, ɛ́ siw tɩ tɔ a Ɛɩn-Orogɛl.

¹⁷ A be a, ʋ tɩ lɩɛb'ɩ a saa-pɛrɩ́-gʋba-lowr, tu a Ɛɩn-Semɛsɩ lowr, nɩ a Gelilɔtɩ na tori a Adumim dob zie a. Ʋ tɩ yi n a be, ɛ́ siw a Urubɛn bidɛb, Bohan, Kʋsɩɛr ƴãw.

¹⁸ Al pùorí, ʋ tu a Zurdɛ̃ fʋɔla tãw saa-pɛrɩ́-gʋba-lowr, tɔl a Zurdɛ̃ fʋɔla pʋɔ.

¹⁹ Ʋ tɩ cow na tɩ yi a Bɛtɩ-Hogɩla saa-pɛrɩ́-gʋba-lowr, tɩ ta a kʋ̃ɔ-kpɛ̃ɛ-Kũu nyʋɔrɩ́, a saa-pɛrɩ́-gʋba-lowr, a be a Zurdɛ̃ na zɔrɛ kpɩɛr a kʋ̃ɔ-kpɛ̃ɛ-Kũu pʋɔ a. A saa-pɛrɩ́-dʋrʋ-lowr tʋr-bɔw n'ɩ à ŋà.

²⁰ A saa-pɛrɩ́ tʋr-bɔw tɩ n'ɩ a Zurdɛ̃. A Bɛ̃zamɛ dɔwlʋ yie zie bɛ na tɩ so a, tʋr-bɔwrɩ tɩ n'ɩ à á ŋá, a lõbowe za.

²¹ A tẽ-bɛrɛ a Bɛ̃zamɛ dɔwlʋ yie na tɩ so a, tɩ n'ɩ Zeriko, Bɛtɩ-Hogɩla, Emɛkɩ-Kesisɩ,

²² Bɛtɩ-Araba, Semarayim, Betɛl,

²³ Avim, Paara, Ofɩra,

²⁴ Kefaar-Amona, Ofini, Geva: tẽ-bɛrɛ pie nɩ ayi nɩ a tẽli-kpɔwlɩ.

²⁵ Tẽ-bɛrɛ á ŋá mɩ̀ tɩ pʋɔ na: Gabaɔ̃, Arama, Beerɔtɩ,

²⁶ Misɩpe, Kefɩɩra, Mosa,

²⁷ Erekɛm, Yirpeyɛl, Tareyala,

²⁸ Sela, Elɛfʋ, Zebizitɩ mɩnɛ tẽw, a pɛr lɛ k'aa Zerizalɛm, Givea nɩ Kɩrɩyatɩ-Yeyarim: tẽ-bɛrɛ pie nɩ anaar nɩ a tẽli-kpɔwlɩ. À á ŋá za n'a tɩ ɩ a Bɛ̃zamɛ dɔwlʋ yie zie bɛ na so a.