Zozue 12 - A SƐB-SÕW

A na-mɩnɛ a Ɩsɩrayɛl nɩbɛ na zɛb tʋ̃ɔ́ a

¹ A Ɩsɩrayɛl nɩbɛ tɩ zɛb'a tʋ̃ɔ́ na-mɩnɛ ayi a Zurdɛ̃ saa-pɛrɩ́, ɛ́ zɛb de a bɛ ten na tɩ yi a Arnon fʋɔla tɩ ta a Hɛrmɔ̃ tãgɛ̃́ a, a Zurdɛ̃ fʋɔla saa-pɛrɩ́ tɩ pʋɔ na.

² A na-dãw-niwn sob tɩ n'ɩ a Amoritɩ mɩnɛ nãà, Sihon, na tɩ kpɩɛr a Hɛsɩbon a. Ʋ tɩ dɩrɛ nɩ naalʋ a Arnon fʋɔla põ-zɛ̃-taa zu na tĩ a Arowɛɛr a, nɩ a Galaadɩ tẽw põ-zɛ̃-taa zu, tɩ sãá nɩ a Yabɔkɩ fʋɔla na ɩ bɛlɛ nɩ a Amɔ̃ tẽw dem tʋr-bɔw a.

³ Ʋlɛ mɩ̀ tɩ so a Zurdɛ̃ fʋɔla saa-pɛrɩ́, a na tĩ a Zenezarɛtɩ kʋ̃ɔ-kpɛ̃ɛ a saa-pɛrɩ́-gʋba-lowr ɛ́ tɩ tɔ a kʋ̃ɔ-kpɛ̃ɛ-kũu na pɩɛlɩ Bɛtɩ-Yesimɔtɩ a, nɩ a vuo ʋl na be a Pisiga tãw sɩɛmɩ́, a saa-pɛrɩ́-dʋrʋ-lowr a.

⁴ A na-mɩnɛ ayi sob tɩ n'ɩ a Basan tẽw nãà, Ɔgɩ, Erefayitɩ bʋʋrɛ pɛ-baara kãw tɩ n'ʋ. Ʋ tɩ dɩrɛ nɩ naalʋ a Basan, ɛ́ kpɩɛr a Asɩtarɔtɩ bɩɩ a Edɩrɛyɩ.

⁵ Ʋlɛ tɩ so a Hɛrmɔ̃ tãw, a Salka nɩ a Basan tẽw za, tɩ tɔ n a Gesuur tẽw dem nɩ a Maaka bʋʋrɛ tʋr-bɔw. Ʋlɛ mɩ̀ tɩ cãà so a Galaadɩ põ-zɛ̃-taa, tɩ tɔ a Hɛsɩbon nãà Sihon naalʋ-tẽw.

⁶ A Sore tõ-tõ-bie Moyiir nɩ a Ɩsɩrayɛl nɩbɛ tɩ zɛb'a tʋ̃ɔ́ a na-mɩnɛ ayi bɛ ŋa, ɛ́ a Sore tõ-tõ-bie Moyiir de a bɛ ten kʋ̀ a Urubɛn dɔwlʋ nɩbɛ nɩ a Gadɩ dɔwlʋ nɩbɛ nɩ a Manase dɔwlʋ ŋmãa nɩbɛ.

⁷ Al pùorí, a Zozue nɩ a Ɩsɩrayɛl nɩbɛ tɩ zɛb'a tʋ̃ɔ́ a na-mɩnɛ na kpɩɛr a Zurdɛ̃ mʋ̃tɔ̃w-kpɛb-lowr a, a bɛ ten tɩ yi n a Baal-Gadɩ a Libã fʋɔla pʋɔ, a saa-pɛrɩ́-gʋba-lowr, ɛ́ tɩ sãá a Tã-kpalɛ na pɩɛl a Seyiir a, a saa-pɛrɩ́-dʋrʋ-lowr. A Zozue tɩ de nɩ a ten á ŋá põ kʋ̀ a Ɩsɩrayɛl dɔwlʋ nɩbɛ.

⁸ Alɛ tɩ n'ɩ a tan vuo, a Ba-Peyi, a Zurdɛ̃ fʋɔla, a Tã-sɩ́ɩr vuo, a wɛja-kpalɛ nɩ a Negɛɛvʋ. Hititɩ, Amoritɩ, Kanãa tẽw dem, Perizitɩ, Hivitɩ nɩ Zebizitɩ mɩnɛ nɛbɛ tɩ kpɩɛr a ten á ŋá.

⁹ A na-mɩnɛ bɛl bɛ na zɛb tʋ̃ɔ́ a, tɩ ɩ n ten á ŋá na-mɩnɛ: Zeriko, Aɩ na pɩɛlɩ a Betɛl a,

¹⁰ Zerizalɛm, Ebrɔ̃,

¹¹ Yarmutɩ, Lakisɩ,

¹² Egɩlon, Gezɛɛr,

¹³ Deviir, Gedɛɛr,

¹⁴ Hɔrma, Aradɩ,

¹⁵ Livina, Adulam,

¹⁶ Makeda, Betɛl,

¹⁷ Tapuwa, Hefɛɛr,

¹⁸ Afɛkɩ, Lasaron,

¹⁹ Madon, Hasɔɔr,

²⁰ Simiron-Meron, Akisafʋ,

²¹ Taanakɩ, Megido,

²² Kedɛsɩ, Yokineam na be Karmɛl a,

²³ Door, a kʋ̃ɔ-kpɛ̃ɛ nʋɔr, Goyim na be a Galile a,

²⁴ nɩ Tɩrsa. Bɛ ɓã taa ɩ na-mɩnɛ lɩzɛr'ɩ pie nɩ been.