Zozue 11 - A SƐB-SÕW

A zɛbr na zɛb a Meerom a

¹ A Hasɔɔr tẽw nãà, Yavin, na tɩ wõ k'aa Zozue zɛb'a tʋ̃ɔ́ a, ʋ tɩ tõ n nɩbɛ a Madon tẽw nãà Yovavʋ, nɩ a Simiron tẽw nãà, nɩ a Akisafʋ tẽw nãà zie.

² Ʋ mɩ̀ tɩ tõ n nɩbɛ a na-mɩnɛ bɛl na be a saa-pɛrɩ́-gʋba-lowr tan vuo pʋɔ a zie, nɩ a bɛl na be a Zurdɛ̃ fʋɔla pʋɔ, a Zenezarɛtɩ kʋ̃ɔ-kpɛ̃ɛ saa-pɛrí-dʋrʋ-lowr a zie, nɩ a bɛl na be a Ba-Peyi a zie, nɩ a bɛl na be a Door zi-tɩ̃tal pʋɔ a mʋ̃tɔ̃w-kpɛb-lowr a zie.

³ A Kanãa tẽw dem tɩ be n a saa-pɛrɩ́ nɩ a mʋ̃tɔ̃w-kpɛb-lowr, a Amoritɩ mɩnɛ, a Hititɩ mɩnɛ, a Perizitɩ mɩnɛ nɩ a Zebi tẽw dem tɩ be n a tan vuo lowr, ɛ́ a Hivitɩ mɩnɛ be a Misɩpa lowr, a Hɛrmɔ̃ tãw sɩɛmɩ́.

⁴ A na-mɩnɛ za tɩ yi na lo a sɔ́r, bɛlɛ nɩ a bɛ sojarɩ na yãwmɛ sɛw kʋ̃ɔ-kpɛ̃ɛ nʋɔr biire a, nɩ wie nɩ zɛbr-torkori na yãwmɛ bɛ dɩ vuo a.

⁵ A na-mɩnɛ bɛ ŋa za tɩ wõ n taa kɛ́ bɛ tuori taa, ɛ́ cen tɩ lãw laɩ been, a Meerom bul-nɛ́ɛ pɛr, zɛb'ɩ a Ɩsɩrayɛl.

⁶ A Sore tɩ yel'ɩ a Zozue à ŋá: «Ta zɔrɛ bɛ ɩ, bʋ̃ʋ n'ʋ vɛ̃, a bio a tɛm ŋa tɔr za, bɛ na ɩ n kũuni ɩ̃ ƴãw a Ɩsɩrayɛl nuru pʋɔ. Fʋ na ŋma n a bɛ wie pɛrɩ́ gbɛlõkori jiile, ɛ́ nyɩw a bɛ zɛbr-torkori bɛr.»

⁷ A Zozue nɩ a ʋ sojarɩ za tɩ ùr'a lo a bɛ dɔ̃ dem zu, a Meerom bul-nɛ́ɛ pɛr.

⁸ A Sore tɩ ƴãw bɛ nɩ a Ɩsɩrayɛl nɩbɛ nuru pʋɔ, bɛ zɛb tʋ̃ɔ́ bɛ, ɛ́ diw bɛ yi n a saa-pɛrɩ́-gʋba-lowr tɩ sãá nɩ a tẽ-kpɛ̃ɛ Sɩdɔ̃ nɩ a Misirefɔtɩ-Mayim, ɛ́ tɩ sãá nɩ a Misɩpe fʋɔla a saa-pɛrɩ́. Bɛ tɩ tʋ̃ɔ́ bɛ nɩ pẽlẽpẽlẽ, ɛ́ bɛ bɛr nɩr za ʋ cãà vʋʋrɛ ɩ.

⁹ A Zozue tɩ ɩ na mɛ̃ a lɛ a Sore na yel a: ʋ tɩ ŋma n a bɛ wie pɛrɩ́ gbɛlõkori jiile, ɛ́ nyɩw a bɛ zɛbr-torkori bɛr.

A Zozue zɛb'a de a Hasɔɔr tẽw

¹⁰ A lɛn daar, a Zozue tɩ zɛb'a de a Hasɔɔr tẽw, ɛ́ kʋ a ʋ nãà. A Hasɔɔr tɩ dãw n'ɩ a saa-pɛrɩ́-gʋba-lowr naalʋ-ten á ŋá za tẽ-kpɛ̃ɛ za.

¹¹ Bɛ tɩ kʋ n a Hasɔɔr nɩbɛ za pàw pɛr, bʋ̃-vʋʋra za bɛ tɩ cɛ ɩ, ɛ́ nyɩw a tẽw bɛr.

¹² A Zozue tɩ zɛb'a tʋ̃ɔ́ a na-mɩnɛ na tɩ lãw taa a ʋ ƴãw a, ɛ́ de a bɛ ten. Ʋ tɩ kʋ n a na-mɩnɛ nɩ a ten nɩbɛ pàw pɛr, mɛ̃ a lɛ a Sore tõ-tõ-bie Moyiir na tɩ yel a.

¹³ Ɛcɛ a ten al na tɩ be a tãli zu a, a Ɩsɩrayɛl nɩbɛ bɛ tɩ nyɩw been kãw za bɛr ɛ, a bɛ ɩ a Hasɔɔr yõ a Zozue na tɩ ƴãw bɛ nyɩw bɛr a ɩ.

¹⁴ A ten á ŋá bome nɩ a dʋn a, a Ɩsɩrayɛl nɩbɛ tɩ de a na, a ɩ zɛb-tʋ̃ɔ́fʋ bome, ɛcɛ bɛ tɩ kʋ n a nɩbɛ pàw pɛr, bɛ bɛ tɩ cɛ bʋ̃-vʋʋra bɛr ɛ.

¹⁵ A lɛ a Sore na tɩ yel kʋ̀ a ʋ tõ-tõ-bie Moyiir a, lɛ n'a a Moyiir mɩ̀ yel kʋ̀ a Zozue, ɛ́ lɛ tɔr za n'a a Zozue ɩ: ʋ bɛ tɩ zawrɩ bom kãw za a Sore na tɩ yel kʋ̀ a Moyiir a bɛr ɛ.

A Zozue baa na zɛb de a Kanãa tẽw

¹⁶ À à ŋá n'a a Zozue tɩ zɛb de a tẽw za: a tan vuo, a Negɛɛvʋ za, a Gosɛn tẽw za, a Ba-Peyi, a Zurdɛ̃ fʋɔla, nɩ a saa-pɛrɩ́-gʋba-lowr tan vuo, nɩ a zi-tɩ̃talɛ.

¹⁷ A na tĩ a Tã-kpalɛ na àr a Seyiir lowr a, tɩ ta n a Baal-Gadɩ na be a Libã fʋɔla pʋɔ, a Hɛrmɔ̃ tãw sɩ̃ɛ́ a, ʋ tɩ zɛb'a tʋ̃ɔ́ a bɛ na-mɩnɛ za, zɛb tʋ̃ɔ́ bɛ, ɛ́ kʋ bɛ.

¹⁸ A zɛbr a Zozue na tɩ zɛb'ɩ a na-mɩnɛ bɛ ŋa za a tɩ kɔwr'ɩ yaga.

¹⁹ Tẽ-been kãw za bɛ tɩ maalɩ ƴã-ɓaarʋ wõ-taa nɩ a Ɩsɩrayɛl nɩbɛ, a bɛ ɩ a Hivitɩ mɩnɛ na kpɩɛr a Gabaɔ̃ a ɩ. Zɛbr'a bɛ tɩ zɛb de a ten al za na cɛ a.

²⁰ Bʋ̃ʋ n'ʋ vɛ̃, a Sore tɩ ɩ na a tẽw nɩbɛ za kpãa tobr zɛbr'ɩ a Ɩsɩrayɛl nɩbɛ, k'aa Ɩsɩrayɛl nɩbɛ ta zɔ bɛ nɩbaalʋ ɛ, ɛ́ kʋ bɛ pàw pɛr, mɛ̃ a lɛ a Sore tɔr za na tɩ yel kʋ̀ a Moyiir a.

²¹ A lɛn daar, a Zozue tɩ cen na tɩ zɛb'ɩ a Anakɩ bʋʋrɛ na tɩ kpɩɛr a tan vuo pʋɔ, a Ebrɔ̃, a Deviir, a Anavʋ, nɩ a Zuda nɩ a Ɩsɩrayɛl ten tan vuo pʋɔ a. Ʋ tɩ kʋ bɛ na pàw pɛr, ɛ́ sãw a bɛ ten bɛr a za.

²² Anakɩ bʋʋrɛ bɛ tɩ cãà cɛ be a Ɩsɩrayɛl nɩbɛ tẽw pʋɔ ɩ. Gaza nɩ Gatɩ nɩ Asɩdɔdɩ ten tɛwr pʋɔ n'a bɛ tɩ cãà.

²³ A Zozue tɩ zɛb'a de a tẽw za, a tu a lɛ za a Sore na tɩ yel kʋ̀ a Moyiir a, ɛ́ de ʋ põ kʋ̀ a Ɩsɩrayɛl dɔwlʋ, ʋ ɩ a bɛ sób. Lɛ n'a a Ɩsɩrayɛl nɩbɛ tɩ pɩ̃ɛnɩ nɩ a zɛbr.