Zozue 10 - A SƐB-SÕW

A Zozue zɛb'a tʋ̃ɔ́ a Amoritɩ mɩnɛ na-mɩnɛ

¹ A Zerizalɛm tẽw nãà, Adoni-Sedɛkɩ, tɩ wõ na k'aa Zozue zɛb'a de a Aɩ tẽw, sãw ʋ za bɛr, k'ʋʋ tɩ ɩ n a Aɩ tẽw nɩ a ʋ nãà mɛ̃ a lɛ ʋ na tɩ ɩ a Zeriko tẽw nɩ a ʋ nãà a. Ʋ mɩ̀ tɩ wõ na k'aa Gabaɔ̃ tẽw dem maal'ɩ nɩ a Ɩsɩrayɛl nɩbɛ ƴã-ɓaarʋ wõ-taa, ɛ́ kpɩɛr a bɛ sɔgɔ.

² A yele á ŋá bɛ na tɩ wõ a tɩ ƴãw nɩ pʋl-vʋ̃ɔ yaga a Zerizalɛm tẽw pʋɔ, bʋ̃ʋ n'ʋ vɛ̃, a Gabaɔ̃ tɩ ɩ n tẽ-kpɛ̃ɛ, ʋ tɩ ɩ n kpɛ̃ɛ zuo a Aɩ, ɛ́ sɛw a na-mɩnɛ tẽ-bɛrɛ, ɛ́ a ʋ dɛbr za tɩ kpɛ socir.

³ A Zerizalɛm nãà, Adoni-Sedɛkɩ, tɩ tõ na bɛ tɩ yel a Ebrɔ̃ tẽw nãà, Hoham, nɩ a Yarmutɩ tẽw nãà, Pireyam, nɩ a Lakisɩ tẽw nãà, Yafɩa, nɩ a Egɩlon tẽw nãà Deviir:

⁴ «Nyɩ wa sõw mɛ̃ tɩ zɛb tʋ̃ɔ́ a Gabaɔ̃, bʋ̃ʋ n'ʋ vɛ̃, a ʋ tẽw dem maal'ɩ ƴã-ɓaarʋ wõ-taa nɩ a Zozue nɩ a Ɩsɩrayɛl nɩbɛ.»

⁵ À ŋá n'a a Amoritɩ mɩnɛ na-mɩnɛ anũu: a Zerizalɛm nãà, a Ebrɔ̃ nãà, a Yarmutɩ nãà, a Lakisɩ nãà nɩ a Egɩlon nãà tɩ lãw taa cen bɛlɛ nɩ a bɛ sojarɩ za, kɛ́ bɛ tɩ ŋmãa jil a Gabaɔ̃ tẽw ɛ́ zɛb'ɩ ʋ.

⁶ A Gabaɔ̃ tẽw dem tɩ tõ na bɛ tɩ yel a Zozue a Gilgal laɩ pʋɔ: «Ta vɛ̃ a fʋ tõ-tõ-biir sõwfʋ ɛ, wa fɔ̃w wa sõw tɩ, ɛ́ faa tɩ, bʋ̃ʋ n'ʋ vɛ̃, a Amoritɩ mɩnɛ na-mɩnɛ za na kpɩɛr a tan vuo pʋɔ a ɓã n taa a tɩ ƴãw.»

⁷ A Zozue tɩ yi n a Gilgal ɛ́ cen a be, ʋlɛ nɩ a ʋ zɛbr-nɩbɛ na kpɛ socir a nɩ a zɛbr-nɩbɛ za.

⁸ A Sore tɩ yel'ɩ a Zozue à ŋá: «Ta zɔrɛ a bɛ dɛ̃bɩ̃ɛ ɩ, ɩ̃ na de bɛ na ƴãw a fʋ nuru pʋɔ, been kãw za kʋ̃ tʋ̃ɔ́ bà gbɛ́r a fʋ niŋé ɩ.»

⁹ A Zozue nɩ a ʋ zɛbr-nɩbɛ tɩ yi n a Gilgal ɛ́ cen a tɩ̃ɩsɔw za tɩ ùr lo a Amoritɩ mɩnɛ zu.

¹⁰ A Sore tɩ ɩ na a Amoritɩ mɩnɛ lɩɛb zɔ a Ɩsɩrayɛl nɩbɛ niŋé: a Ɩsɩrayɛl nɩbɛ tɩ zɛb'a tʋ̃ɔ́ bɛ pẽlẽpẽlẽ a Gabaɔ̃. Bɛ tɩ diw bɛ nɩ a sɔ́r na dúor a Bɛtɩ-Horon a zu, tɩ pɔb bɛ tɩ sãá nɩ Azeka nɩ Makeda.

¹¹ A Amoritɩ mɩnɛ na tɩ zɔrɛ a Ɩsɩrayɛl nɩbɛ niŋé, wa yi a Bɛtɩ-Horon siwr a, a Sore tɩ ɩ na sa-bi-ku-bɛrɛ yi a salom zu lɔb lɔb bɛ, tɩ ta n a Azeka. A bɛl a sa-bi-ku-bɛrɛ na tɩ kʋ a tɩ zuo nɩ a bɛl a Ɩsɩrayɛl nɩbɛ na tɩ kʋ n a zɛbr-sɔ-kpɛ̃ɛ a.

¹² A ʋlɩ bibir nɛ a Sore na tɩ ƴãw a Amoritɩ mɩnɛ a Ɩsɩrayɛl nɩbɛ nuru pʋɔ a, a Zozue tɩ ƴɛ̀r'ɩ a Sore zie à ŋá, a Ɩsɩrayɛl nɩbɛ za niŋé: «Mʋ̃tɔ̃w i, tɛw àr a Gabaɔ̃ zu, cuw u, àr ɓil a Ayalon bà-fʋɔla zu!»

¹³ A mʋ̃tɔ̃w tɩ tɛw na àr, ɛ́ a cuw àr ɓil, ɛ́ gù a Ɩsɩrayɛl nɩbɛ tɩ tʋ̃ɔ́ a bɛ dɔ̃ dem. Mɛ̃ a lɛ a na sɛb a “Nɩ-mɩŋa Sɛbɛ” pʋɔ a, a mʋ̃tɔ̃w tɩ tɛw na àr a salom sɔwlɩsɔw, ʋ bɛ tɩ pawr a kpɛb ƴãw ɛ, tɩ ta bibi-ɓil.

¹⁴ Bibir bɛ dãw be, ɛ́ mɩ̀ kʋ̃ lɛb be a pùorí ŋmɛ̃ a bibir ŋa a Sore na tɩ sàw nɩsaal nʋɔr a ɩ, bʋ̃ʋ n'ʋ vɛ̃, a Sore tɔr za tɩ lãwnɩ nɩ a Ɩsɩrayɛl zɛbr.

¹⁵ Al pùorí, a Zozue nɩ a Ɩsɩrayɛl nɩbɛ za tɩ lɛb'a cen a bɛ laɩ pʋɔ a Gilgal.

A Zozue kʋ n a na-mɩnɛ anũu bɛl ʋ na tɩ zɛb tʋ̃ɔ́ a

¹⁶ A Amoritɩ mɩnɛ na-mɩnɛ anũu bɛl tɩ zɔ na tɩ kpɛ a Makeda tãw bɔw pʋɔ sɔwlɩ.

¹⁷ Nɩbɛ tɩ nyɛ̃ bɛ na bɛ na sɔwlɩ a tãw bɔw pʋɔ a, cen tɩ manɩ kʋ̀ a Zozue.

¹⁸ A Zozue tɩ yel'ɩ a ʋ nɩbɛ à ŋá: «Nyɩ bili kʋsɛ-bɛrɛ fur a tãw bɔw nʋɔr, ɛ́ ƴãw nɩbɛ àr pɩɛlɩ gù bɛ.

¹⁹ Ɛ́ a nyɩɩm a, nyɩ ta àr ɛ, nyɩ ta tu a nyɩ dɔ̃ dem, nyɩ zɔ ŋmãa bɛ. Nyɩ ta bɛr bɛ kpɛ a bɛ ten pʋɔ ɩ, bʋ̃ʋ n'ʋ vɛ̃, a Sore nyɩ Naaŋmɩn ƴãw bɛ nɩ a nyɩ nuru pʋɔ.»

²⁰ A Zozue nɩ a Ɩsɩrayɛl nɩbɛ tɩ zɛb'a tʋ̃ɔ́ a Amoritɩ mɩnɛ, zɛb tʋ̃ɔ́ pẽlẽpẽlẽ. Nɩbɛ bɛ mɩnɛ kãw tɛwr nɛbɛ tɩ tʋ̃ɔ́ zɔ cɩ̃ɛ, kpɛ a bɛ tẽ-kpɛn kpɛn pʋɔ.

²¹ Al pùorí, a Ɩsɩrayɛl nɩbɛ za tɩ lɛb'a wa n ƴã-ɓaarʋ a laɩ pʋɔ a Zozue zie a Makeda. Nɩr za bɛ lɛb tɩ sàw háarɛ nʋɔr a Ɩsɩrayɛl nɩbɛ zie ɩ.

²² Al pùorí, a Zozue tɩ yel'a: «Nyɩ yuo a tãw bɔw nʋɔr, ír a na-mɩnɛ anũu bɛl wa kʋ̀ m.»

²³ Bɛ tɩ ɩ n a lɛ ʋ na yel a, ír a na-mɩnɛ anũu bɛl cen nɩ a Zozue zie: a Zerizalɛm nãà, a Ebrɔ̃ nãà, a Yarmutɩ nãà, a Lakisɩ nãà nɩ Egɩlon nãà.

²⁴ Bɛ na tɩ ta a Zozue niŋé a, ʋ tɩ bʋɔl'ɩ a Ɩsɩrayɛl nɩbɛ za, ɛ́ yel a sojarɩ nɩ-bɛrɛ na tɩ bɩɛlɛ ʋ a: «Nyɩ taw ta ír a nyɩ gbɛ́ɛ dɔwlɩ a na-mɩnɛ bɛ ŋa nyuru zu.» Bɛ tɩ taw na ta, ír a bɛ gbɛ́ɛ dɔwlɩ a na-mɩnɛ nyuru zu,

²⁵ ɛ́ a Zozue yel bɛ à ŋá: «Nyɩ ta zɔrɛ bom za ɩ, ɛ́ ta bɛr a yele tʋ̃ɔ́ nyɩ ɛ. Nyɩ kpɛmɛ ɛ́ dɩ kanyir, bʋ̃ʋ n'ʋ vɛ̃, à ŋá n'a a Sore na ɩ a nyɩ dɔ̃ dem za nyɩ na na zɛb'ɩ a.»

²⁶ Al pùorí, a Zozue tɩ kʋ n a na-mɩnɛ, ɛ́ ƴãw bɛ yawlɩ a bɛ kũuni tɩrʋ anũu zu, a bɛ kũuni tɩ be n a tɩrʋ zu tɩ ta a zaanʋɔra.

²⁷ A mʋ̃tɔ̃w na wa kpɩɛr a, a Zozue tɩ ƴãw na bɛ yaw a kũuni a tɩrʋ zu, lɔb ƴãw a tãw bɔw ʋl pʋɔ a na-mɩnɛ bɛ ŋa na tɩ sɔwlɩ a. Bɛ tɩ bili nɩ kʋsɛ-bɛrɛ fùr a tãw bɔw nʋɔr, a cãà nɩ be nɩ dɩ̃a.

A Zozue zɛb'a de a saa-pɛrí-dʋrʋ-lowr ten

²⁸ A ʋlɩ bibir tɔr za a, a Zozue tɩ zɛb'a de a Makeda tẽw, ʋ tɩ ƴãw na bɛ kʋ a Makeda tẽw nãà, nɩ a ʋ tẽw nɩbɛ za pàw pɛr. Ʋ bɛ tɩ bɛr nɩr za ʋ cãà vʋʋrɛ ɩ. Ʋ tɩ ɩ n a Makeda tẽw nãà, mɛ̃ a lɛ ʋ na tɩ ɩ a Zeriko tẽw nãà a.

²⁹ A Zozue nɩ a Ɩsɩrayɛl nɩbɛ tɩ yi n a Makeda, ɛ́ cen tɩ zɛb'ɩ Livina tẽw.

³⁰ A Sore mɩ̀ tɩ ƴãw nɩ a Livina nɩ a ʋ nãà a bɛ nuru pʋɔ. Bɛ tɩ kʋ n a Livina tẽw dem za pàw pɛr, bɛ bɛr nɩr za ʋ cãà vʋʋrɛ ɩ. Bɛ tɩ ɩ n a Livina tẽw nãà, mɛ̃ a lɛ bɛ na tɩ ɩ a Zeriko tẽw nãà a.

³¹ A Zozue nɩ a Ɩsɩrayɛl nɩbɛ za tɩ yi n a Livina cen Lakisɩ. Bɛ tɩ ŋmãa na jil a Lakisɩ tẽw, ɛ́ zɛb'ɩ ʋ.

³² A zɛbr bibie ayi sob a, a Sore tɩ ƴãw nɩ a Lakisɩ a Ɩsɩrayɛl nɩbɛ nuru pʋɔ. Bɛ tɩ kʋ n a Lakisɩ tẽw dem za pàw pɛr, bɛ bɛr nɩr za ʋ cãà vʋʋrɛ ɩ, mɛ̃ a lɛ bɛ na tɩ ɩ a Livina tẽw a.

³³ Gezɛɛr tẽw nãà, Horam, tɩ cen na k'ʋʋ tɩ sõw a Lakisɩ, ɛcɛ a Zozue tɩ zɛb'a tʋ̃ɔ́ ʋ, ʋlɛ nɩ a ʋ zɛbr-nɩbɛ za, ɛ́ bɛ bɛr nɩr za ʋ cãà vʋʋrɛ ɩ.

³⁴ A Zozue nɩ a Ɩsɩrayɛl nɩbɛ tɩ yi n a Lakisɩ ɛ́ cen Egɩlon tẽw, tɩ ŋmãa jil ʋ zɛb'ɩ ʋ.

³⁵ Bɛ tɩ zɛb'a de ʋ a bibir nɛ tɔr za, ɛ́ kʋ a nɩbɛ za pàw pɛr, mɛ̃ a lɛ bɛ na ɩ a Lakisɩ tẽw a.

³⁶ A Zozue nɩ a Ɩsɩrayɛl nɩbɛ tɩ yi n a Egɩlon, ɛ́ do a Ebrɔ̃ tɩ zɛb'ɩ ʋ.

³⁷ Bɛ tɩ zɛb'a de a tẽw, ɛ́ kʋ a nãà nɩ a ʋ nɩbɛ za pàw pɛr. Bɛ mɩ̀ tɩ zɛb'a de a tẽ-kpɔwlɩ, ɛ́ kʋ a nɩbɛ. A Zozue tɩ sãw nɩ a tẽw bɛr ʋ za, ɛ́ kʋ a nɩbɛ za pàw pɛr, bɛ bɛr nɩr za ʋ cãà vʋʋrɛ ɩ, mɛ̃ a lɛ ʋ na tɩ ɩ a Egɩlon tẽw a.

³⁸ Al pùorí, a Zozue nɩ a Ɩsɩrayɛl nɩbɛ za tɩ lɛb'ɩ pùor cen a Deviir, tɩ zɛb'ɩ ʋ.

³⁹ Bɛ tɩ zɛb'a de a tẽw nɩ a ʋ nãà lãwnɩ a tẽ-kpɔwlɩ. Bɛ tɩ kʋ n a tẽ-biir za pàw pɛr, bɛ bɛr nɩr za ʋ cãà vʋʋrɛ ɩ. A Zozue tɩ ɩ n a Deviir tẽw nɩ a ʋ nãà, mɛ̃ a lɛ ʋ na tɩ ɩ a Ebrɔ̃ tẽw a, mɛ̃ a lɛ ʋ na tɩ ɩ a Livina tẽw nɩ a ʋ nãà a.

⁴⁰ A Zozue tɩ zɛb'a de a tẽw za: a tan vuo tẽw, a Negɛɛvʋ, a Ba-Peyi, nɩ a Tã-sɩ́ɩr vuo, lãwnɩ a ten á ŋá na-mɩnɛ za. Ʋ bɛ tɩ bɛr nɩr za ʋ cãà vʋʋrɛ ɩ, ʋ tɩ kʋ n bʋ̃-vʋʋra za pàw pɛr, mɛ̃ a lɛ a Sore, a Ɩsɩrayɛl Naaŋmɩn, na tɩ yel a.

⁴¹ A Zozue tɩ zɛb'a tʋ̃ɔ́ bɛ, a na tĩ a Kadɛsɩ-Barneya tɩ ta a Gaza a, nɩ a Gosɛn tẽw za, tɩ sãá nɩ a Gabaɔ̃ tẽw a.

⁴² Gb'a been yõ ƴãw a Zozue na yi a zɛbr a n'a ʋ tɩ zɛb tʋ̃ɔ́ a na-mɩnɛ bɛ ŋa za, ɛ́ de a bɛ ten, bʋ̃ʋ n'ʋ vɛ̃, a Sore, a Ɩsɩrayɛl Naaŋmɩn, tɩ lãw nɩ nɩ a Ɩsɩrayɛl zɛbr.

⁴³ Al pùorí, a Zozue nɩ a Ɩsɩrayɛl nɩbɛ za tɩ lɛb'a cen a laɩ pʋɔ a Gilgal.