Zozue 1 - A SƐB-SÕW

A Zozue lɩɛr'ɩ a Moyiir

¹ A Sore tõ-tõ-bie Moyiir kũu pùorí a, a Sore tɩ yel'ɩ a Moyiir sõwne, Zozue, na ɩ Nun bidɛb a:

² «A ɩ̃ tõ-tõ-bie Moyiir kpi na. Ƴɛrɛŋa a, ìr gãw a Zurdɛ̃ ŋa, fʋ̃ʋ nɩ a nɩ-bʋʋrɛ bɛ ŋa za, kpɛ a tẽw ʋl ɩ̃ na kʋ̀rɛ a Ɩsɩrayɛl nɩbɛ a pʋɔ.

³ Ɩ̃ kʋ̀rɛ nyɩ nɩ zie za nyɩ nãà wa nɛbr gbɛ́r a, mɛ̃ a lɛ ɩ̃ na tɩ yel kʋ̀ a Moyiir a.

⁴ A saa-pɛrɩ́-dʋrʋ-lowr tɩ tɔ a saa-pɛrɩ́-gʋba-lowr a, a nyɩ tẽw na yi n a wɛja-kpalɛ tɩ tɔ a Libã tan. A saa-pɛrɩ́ tɩ tɔ a mʋ̃tɔ̃w-kpɛb-lowr a, ʋ na yi n a man-kpɛ̃ɛ, a Efaratɩ, tɩ tɔ a Mediterane kʋ̃ɔ-kpɛ̃ɛ, lãwnɩ a Hititɩ mɩnɛ tẽw.

⁵ A fʋ cãafʋ daar za a, nɩr za kʋ̃ tʋ̃ɔ́ bà gbɛ́r a fʋ niŋé ɩ, bʋ̃ʋ n'ʋ vɛ̃, ɩ̃ na be n a fʋ zie mɛ̃ a lɛ ɩ̃ na tɩ be a Moyiir zie a. Ɩ̃ kʋ̃ tɩɛ fʋ bɛr towtow ɛ, ɩ̃ kʋ̃ zawrɩ fʋ bɛr towtow ɛ́ bɛ sõw fʋ ɛ.

⁶ Kpɛmɛ ɛ́ dɩ kanyir, bʋ̃ʋ n'ʋ vɛ̃, fʋ̃ʋ n'ʋ na de a tẽw kʋ̀ a nɩ-bʋʋrɛ bɛ ŋa bɛ so ʋ, a tẽw ŋa ɩ̃ na pɔ yel k'ɩ̃ɩ na kʋ̀ n a bɛ sãàkʋm-kore a.

⁷ Dɛ́ kpɛmɛ ɛ́ dɩ kanyir yaga. Ƴãw fãw tuur a wulu a ɩ̃ tõ-tõ-bie Moyiir na lʋɔrɩ kʋ̀ b a: taa zawrɛ ʋ bɛrɛ towtow ɛ, lɛ n'a bom za na mɩ́ tu b.

⁸ A wulu sɛbɛ ŋa ƴɛ̀r-bie kʋ̃ yi zaa a fʋ nʋɔrɩ́ ɛ. Tɛr a tɩ́ɛrɛ mʋ̃tɔ̃w nɩ tɩ̃ɩsɔw za, kɛ́ fʋ tʋ̃ɔ́ ƴãw fãw ɩrɛ mɛ̃ a lɛ na sɛb a wulu sɛbɛ pʋɔ a, lɛ n'a a fʋ yele za na mɩ́ tu vla vla za.

⁹ Ɩ̃ bɛ yel kʋ̀ b kɛ́ fʋ kpɛmɛ ɛ́ dɩ kanyir e? Ta màwr ɛ, ta zɔrɛ dɛ̃bɩ̃ɛ ɩ, bʋ̃ʋ n'ʋ vɛ̃, a mãa Sore fʋ Naaŋmɩn, ɩ̃ na be n a fʋ zie, be za fʋ na cere a.»

A Zozue cɔbrɛ nɩ a Zurdɛ̃ gãwfʋ

¹⁰ Lɛ n'a a Zozue tɩ yel a nɩbɛ nɩ-bɛrɛ:

¹¹ «Nyɩ cɔlɩ a laɩ yel a Ɩsɩrayɛl nɩbɛ à ŋá: “Nyɩ cɔbrɩ bʋ̃-dɩrɩ, bʋ̃ʋ n'ʋ vɛ̃, ka nɩ bibie ata a, nyɩ na gãw nɩ a Zurdɛ̃ ŋa, kpɛ so a tẽw a Sore nyɩ Naaŋmɩn na kʋ̀rɛ nyɩ kɛ́ nyɩ so a.”»

¹² Al pùorí, a Zozue tɩ yel'ɩ à ŋá kʋ̀ a Urubɛn, a Gadɩ nɩ a Manase dɔwlʋ ŋmãa nɩbɛ:

¹³ «Nyɩ cãà bãwnɩ a lɛ a Sore tõ-tõ-bie Moyiir na yel kʋ̀ nyɩ a: “A Sore nyɩ Naaŋmɩn kʋ̀rɛ nyɩ nɩ a pɩ̃ɛnʋ a tẽw ʋl ʋ na kʋ̀rɛ nyɩ a Zurdɛ̃ saa-pɛrɩ́ a pʋɔ”.

¹⁴ A nyɩ pɔwbɛ, a nyɩ bibiir nɩ a nyɩ dʋn na be n a vuo ŋa pʋɔ a Moyiir na tɛr nyɩ wa n a. Ɛcɛ a nyɩɩm dɛbr za na na tʋ̃ɔ́ a zɛbr zɛb a, nyɩ na de nɩ a nyɩ zɛbr bome, de nɩ a nyɩ yɛbr niwn gãw a man. Nyɩ na sõw bɛ na

¹⁵ tɩ ta n a lɛn daar a Sore na na kʋ̀ bɛ a pɩ̃ɛnʋ mɛ̃ a lɛ ʋ na kʋ̀ nyɩ a, ɛ̀ bɛ mɩ̀ so a tẽw ʋl a Sore nyɩ Naaŋmɩn na kʋ̀rɛ bɛ a. Al pùorí nyɩ na lɛb'a cen a tẽw nyɩ na so a pʋɔ, ɛ́ nyɩ na so nɩ a tẽw, a ʋl a Sore tõ-tõ-bie Moyiir na kʋ̀ nyɩ nyɩ so a Zurdɛ̃ saa-pɛrɩ́ gãwn a.»

¹⁶ Bɛ tɩ sɔw nɩ a Zozue: «Bom nɛ za fʋ na yere kʋ̀rɛ tɩ a, tɩ na ɩ na, ɛ́ zie nɛ za fʋ na na tõ tɩ a, tɩ na cen na.

¹⁷ Tɩ na sàw nɩ a fʋ nʋɔr yel za ƴãw, mɛ̃ a lɛ tɔr za tɩ na tɩ sàw a Moyiir nʋɔr a. Sɩza, a Sore fʋ Naaŋmɩn na be n a fʋ zie mɛ̃ a lɛ ʋ na tɩ be a Moyiir zie a.

¹⁸ Nɩr za wa gaarɛ bɛ sàwr a lɛ za fʋ na yere kʋ̀rɛ tɩ a, bɛ na kʋ ʋ na. Fʋ̃ʋ ƴãw a, kpɛmɛ ɛ́ dɩ kanyir!»