Zowɛl 2 - A SƐB-SÕW

A Sore bibir pɩɛl'a

¹ Nyɩ pɛblɩ wɩ́ɛ a Sɩyɔ̃ tẽw, nyɩ lɔb cɛl a Naaŋmɩn tã-sõw zu. A tẽw dem za, bɛ màwr, a Sore bibir tarɛ na, ʋ pɩɛl'a.

² Liw-varkpara bibir'ʋ, zũzuwe nɩ zũzuw-sɛblɛ bibir'ʋ. Sãsowe na yãwmɛ ɛ́ kpɛmɛ a, waar'a, a yɛ́r'a pàw a tan mɛ̃ a zi-wɛl-paala cãà a. Nɩr bɛ dãw nyɛ̃ a ɩ, ɛ́ nɩr kʋ̃ lɛb nyɛ̃ a ɩ a pùorí towtow ɛ.

³ A sãsowe niŋé a, vũu nyɔw na dɩrɛ, ɛ́ a sãsowe pùorí a ɩ vũu-zɛlɛ na dɩrɛ pelempelem a. A na bɛ tɩ tɔl sɛr a, a tẽw tɩ ɩ na mɛ̃ Edɛn tẽw zaadɛ̃ a, ɛ́ a na wa tɔl baarɩ a, ʋ ɩ n wɛja-kpalɛ faa faa. A bɛ jɩɩrɩ bom za bɛr ɛ.

⁴ A ɩ na mɛ̃ wie a, mɛ̃ wi-zɔmnbɛ na gárɛ nɩ a bɛ wie a.

⁵ A ɩ na mɛ̃ zɛbr-torkori na vàrɛ lʋɔrɛ a tan ɩrɛ gɔmɛ a, mɛ̃ vũu na dɩrɛ mɔ̃-kon a ɩrɛ gɔmɛ a, mɛ̃ nɩ-bʋʋrɛ na kpɛmɛ ɛ́ pɩɛrɩ a zɛbr ƴãw a.

⁶ A sãsowe á ŋá niŋé a, pʋl-vʋ̃ɔ nyɔw nɩ a nɩbɛ, a bɛ za zugamɛ bɩrɛ.

⁷ A zɔrɛ na mɛ̃ gãdaar a, a nyɔw nɩ a tẽw dacine dúor mɛ̃ zɛbr-nɩbɛ a, ŋa za mɩ́ tori nɩ niwn cere, a bɛ bɩ̀ɛrɛ ɩ.

⁸ Kãw za bɛ daarɛ a ʋ tɔ ɩ, ŋa za na mɩ́ tu a ʋ sɔ́r cere a ƴãw. Bɛ tɛbr'a, ɛ́ a zɔrɛ ɛ́ bɛ bʋ́rɛ yaarɛ ɩ.

⁹ A bʋwl'ɩ a tẽw pʋɔ, a zɔrɛ nɩ a tẽw dacine zu, a dúor'a kpɩɛr a yie pʋɔ, mɩ́ tu a tokoro vɛɛ ƴãw kpɛ mɛ̃ nyãnyuwr a.

¹⁰ Alɛ wa tarɛ a, a tẽsɔw mɩ́ dam'a, ɛ́ a salom ɩ mɛ̃ ʋ lore na a, a mʋ̃tɔ̃w nɩ a cuw bɛ mɩ́ cãà caalɛ ɩ, ɛ́ a ŋmar-bie bɛ cãà nyɩwrɛ ɩ.

¹¹ A Sore be n a ʋ zɛbr-nɩbɛ niŋé ɛ́ ŋmɛrɛ kɔkɛɛ. A ʋ zɛbr-nɩbɛ ʋ na mɩ́ ƴɛ̀r, bɛ tu a lɛ ʋ na yel a yãwmɛ na ɛ́ tɛr fãw bɛ dɩ vuo ɩ. A Sore bibir ɩ n kpɛ̃ɛ, ʋ tɛr'ɩ pʋl-vʋ̃ɔ-yaga, ãa n'ʋ na tʋ̃ɔ́ ʋ?

A Sore zie lɛb-waa daar'ɩ à à ŋá

¹² A Sore yere na: «Vuo cãà nɩ be a ɩ̃ zie lɛb-waa ƴãw a ƴɛrɛŋa. Nyɩ lɛb wa a ɩ̃ zie nɩ a nyɩ pʋɔ za: nyɩ tɛr mʋta-tuo, nyɩ kone cire mʋta-kʋ̃ɔ, nyɩ tuo nuru zũú kone nɩ.

¹³ A nyɩ kparɩ bɛ n'a nyɩ na taw cɩɛrɩ ɛ, a nyɩ socie n'a a fɛr kɛ́ nyɩ lɩɛbɩ.» Nyɩ lɛb wa a Sore nyɩ Naaŋmɩn zie: nɩ-vla n'ʋ ɛ́ zɔrɛ nɩbaalʋ, a ʋ suur bɛ pawr ɛ, ɛ́ ʋ ɩ nɔ̃wfʋ tɛwr, a nɩr dɔwrʋ mɩ́ ɩ ʋ nɩ kpɩɛrʋ.

¹⁴ Ãa bãw? Kapaw ʋ nãà lɛb'a bɛr a lɛ ʋ na tɩ tɩɛrɛ k'ʋʋ ɩ a, ɛ́ maalɩ nyɩ yaga za. Lɛ n'a nyɩ na wa n kukur de-kʋ̀b nɩ divɛ̃ de-kʋ̀b bome wa kʋ̀ ʋ.

A mʋta-tuo tɛrʋ nɩ a Naaŋmɩn yãayãa zɛlʋ daar'ɩ à à ŋá

¹⁵ Nyɩ pɛblɩ wɩ́ɛ a Sɩyɔ̃ tẽw pʋɔ, nyɩ ƴãw mʋta-tuo be be, nyɩ tɛr kpaa-ta-sõw.

¹⁶ Nyɩ bʋɔlɩ a nɩbɛ za ɓã taa, nyɩ tɛr kpaa-ta-sõw. Nyɩ bʋɔlɩ a nɩ-kore ɓã taa, nyɩ bʋɔlɩ a bibiir ɓã taa, tɩ lãwnɩ a bɛl na cãà ƴɛnɛ a. A dɛb-sãan ʋ yi a ʋ dĩó, ɛ́ a pɔw-sãan yi a ʋ di-gana pʋɔ.

¹⁷ A bàwr-maalbɛ na tone a Sore a, bɛ kone a Ŋmɩn-yir-kpɛ̃ɛ pʋɔ, a zawle nɩ a bàwr-maal-kuur cará. Bɛ lɔbr nuru zɛlɛ nɩ a Naaŋmɩn à ŋá: «Sore e, zɔ a fʋ nɩ-bʋʋrɛ nɩbaalʋ, ta ɩ a fʋ nɩbɛ nyɛ̃ vĩ ɛ, ta sàw nɩ-bʋʋr-yoru wa ɩrɛ tɩ laar yere nɩ: “Nyɩnɛ n'a a bɛ Naaŋmɩn be?”»

A Sore sɔw nɩ a ʋ nɩ-bʋʋrɛ zɛlʋ puoru

¹⁸ A Sore nɔnɛ nɩ a ʋ tẽw, ʋ zɔ n a ʋ nɩbɛ nɩbaalʋ,

¹⁹ ɛ́ sɔw a bɛ puoru à ŋá: «Ɩ̃ na lɛb'a kʋ̀ nyɩ a ble, a divɛ̃ nɩ a kãá. Nyɩ na tɩ tɩw a na. Ɩ̃ kʋ̃ lɛb sàw towtow nyɩ ɩ nɩ-ɩ-laarɩ a nɩ-bʋʋr-yoru sɔgɔ ɩ.

²⁰ A nyɩ dɔ̃ dem na yi a Saa-pɛrɩ́-gʋba-lowr waar a, ɩ̃ na diw bɛ na bɛr, ɩ̃ na diw bɛ na bɛr tẽ-kpalɛ kon pʋɔ bɛ zãá, ɩ̃ na diw nɩ a bɛ zɛbr-nɩbɛ na de niwn a ƴãw Kʋ̃ɔ-kpɛ̃ɛ-kũu pʋɔ, ɛ́ diw a pùor dem ƴãw a Mediterane kʋ̃ɔ-kpɛ̃ɛ pʋɔ. A bɛ kũuni na nyuur'ɩ faa faa pàw a zie za. A Sore maal'ɩ yel-bɛrɛ.

²¹ Fʋ̃ʋ tẽw i, ta zɔrɛ dɛ̃bɩ̃ɛ ɩ! A fʋ nʋ̃ɔ̀, ʋ pur yaarɩ, a Sore na maalɛ yel-bɛrɛ a ƴãw.

²² Nyɩɩm wɛ-dʋn ɩ, nyɩ ta zɔrɛ dɛ̃bɩ̃ɛ ɩ! A dɩlãpʋɔ mʋ̃ɔ lɛb'a sɔb tĩtĩ, a tɩɩr wɔnɛ na, a kãkã-tɩɩr nɩ a divɛ̃ tɩɩr wɔ̃ n zorkporo.

²³ Nyɩɩm Sɩyɔ̃ tẽw dem i, nyɩ cɩlɛ ƴawr'ɩ a Sore nyɩ Naaŋmɩn ƴãw. Ʋ kʋ̀rɛ nyɩ nɩ a kpãcãan saa, a nyɩ faafʋ ƴãw. Ʋ mɩ́ ɩ n a kpãcãan saa nɩ a sɩ̃ɛ-kpɛ-paala saa a wa, a wa mɛ̃ a dãwdãw a.

²⁴ A bowe paal'ɩ ble, a dʋw-bɛrɛ paal'ɩ divɛ̃ nɩ kãá cire.

²⁵ A Sore yere na: Ɩ̃ lɛb'a kʋ̀rɛ nyɩ a yome al za bʋ̃-kʋ́ɔrɩ a tãatuli, a sãsowe, a zãzule nɩ a sãsow-nãa-nʋrɩ na 'wɔb a, al na ɩ a ɩ̃ zɛbr-nɩ-yaga ɩ̃ na tõ a nyɩ ƴãw a.

²⁶ Nyɩ na mɩ́ dɩ na tɩw, nyɩ na danɛ mɛ̃ na, a mãa Sore nyɩ Naaŋmɩn na maalɛ nɔ-ɓãa-yele a nyɩ ƴãw a. A ɩ̃ nɩbɛ bɛ be za na lɛb nyɛ̃ vĩ towtow ɛ.

²⁷ Lɛ n'a nyɩ na bãw k'ɩ̃ɩ be n a nyɩ sɔgɔ, Ɩsɩrayɛl nɩbɛ ɛ, k'aa Sore nyɩ Naaŋmɩn a, mãa n'ʋ, kãw za bɛ lɛb be be ƴãw pʋɔ ɩ. A ɩ̃ nɩbɛ bɛ be za na lɛb nyɛ̃ vĩ towtow ɛ.»