Zowɛl 1 - A SƐB-SÕW

¹ A Sore ƴɛ̀rʋ ʋ na ƴɛ̀r kʋ̀ a Petuwɛl bidɛb Zowɛl a n'ɩ à á ŋá.

A sãsowe na wa a, nɩ a wɛr na nyɔw a

² Nyɩ bɛrɛ wone, nyɩɩm nɩ-kore e, nyɩ za nyɩ yuo a nyɩ tobe, nyɩɩm na kpɩɛr a Zuda tẽw pʋɔ a! Yel ŋa tɔ ɩ n a nyɩ daar bɩɩ a nyɩ sãàkʋm-kore daar ɩ?

³ Nyɩ manɩ a yel ŋa kʋ̀ a nyɩ bibiir, a nyɩ bibiir mɩ̀ man ʋ kʋ̀ a bɛ bibiir, a bɛ bibiir mɩ̀ man ʋ kʋ̀ a nɩbɛ nãà wa dɔw tu a.

⁴ A bʋ̃-kʋ́ɔrɩ al a tãatuli na bɛr a, sãsowe 'wɔb a na, a al a sãsowe na bɛr a, zãzule 'wɔb a na, a al a zãzule na bɛr a, sãsow-nãa-nʋrɩ 'wɔb a na.

⁵ Dã-kuolbɛ ɛ, nyɩ ìr kone, nyɩɩm divɛ̃ nyúurbɛ za a, nyɩ tuo nuru zũú kone nɩ: a divɛ̃ tɩ-wɔmɛ na bɛ ka be a, nyɩ kʋ̃ lɛm divɛ̃-paala ɩ.

⁶ Sãsowe yɛ́r'a pàw a tɩ tẽw. A tɛr'ɩ fãw ɛ́ yãwmɛ bɛ tɛr nʋɔr ɛ, a nyɩ́mɛ a, gbẽw nyɩmɛ n'a, ɛ́ a kokamɛ ɩ gbẽw-nyãw kokamɛ.

⁷ A ɩ na a tɩ divɛ̃ tɩɩr póru lɩɛbɩ wɛja-kpalɛ, a pʋrwʋr'ɩ a tɩ kãkã-tɩɩr bɛr. A pɛnɩ pɛnɩ a na, ɛ́ cɛ̀ a lɔb, a wuli pɛlɩ gã.

⁸ Nyɩ tuo nuru zũú kone nɩ, mɛ̃ pɔwsɩrale na su ko-tuolu bome kone nɩ a ʋ sɩr ʋ na kul paalʋ ʋ kpi a.

⁹ Bɛ bɛ cãà waar'ɩ kukur de-kʋ̀b bome nɩ divɛ̃ de-kʋ̀b bome a Sore Ŋmɩn-yir-kpɛ̃ɛ pʋɔ ɩ. Alɛ so a bàwr-maalbɛ be wahala pʋɔ, bɛl na tone a Sore tome a.

¹⁰ A póru sãw nɩ a za, a tẽsɔw tɛr'ɩ pʋ-sãwna. Ble bɛ cãà be ɩ, divɛ̃-paala bɛ cãà be ɩ, kãá-bir za bɛ cãà be ɩ.

¹¹ A ka-kʋ́ɔrbɛ bɛ bãw lɛ n za n'a na ɩ, a divɛ̃ tɩɩr po-kʋ́ɔrbɛ kone nɩ a bɛ loba, a ble nɩ a ɔɔzʋ za sãw na, a bʋ̃-kʋ́ɔrɩ za wɛ na.

¹² A divɛ̃ tɩɩr púo ko na gã, a kãkã-tɩɩr var'a àr. Girenadɩ tɩɩr, kpãkparmɛ tɩɩr nɩ pɔm tɩɩr, a tɩ-wɔnɩ za ko na. Nʋ̃ɔ̀ za baar'ɩ a nɩsaalbɛ zie.

Nyɩ tɛr mʋta-tuo nɩ yãayãa zɛlʋ a Sore zie

¹³ Nyɩ su ko-tuolu bome ɛ́ tuo nuru zũú kone nɩ, nyɩɩm bàwr-maalbɛ na so a bàwr-maal-kuur tome a. Nyɩ tɛr pʋ-sãwna tɩ vɩɛ nɩ zie, nyɩɩm tɩ Naaŋmɩn tõ-tõ-biir i, bʋ̃ʋ n'ʋ vɛ̃, bɛ bɛ cãà waar'ɩ kukur de-kʋ̀b bome nɩ divɛ̃ de-kʋ̀b bome a Sore Ŋmɩn-yir-kpɛ̃ɛ pʋɔ ɩ.

¹⁴ Nyɩ ƴãw mʋta-tuo be be, nyɩ tɛr kpaa-ta-sõw, nyɩ bʋɔlɩ a nɩ-kore nɩ a tẽw nɩbɛ za ɓã taa a Sore tɩ Naaŋmɩn yir pʋɔ, ɛ́ zɛlɛ ʋ yãayãa.

A Sore bibir

¹⁵ 'Woi! Nyɛ̃ bibir na ŋmɛ̃ a! A Sore bibir pɩɛl'a. A zie sãwfʋ a Naaŋmɩn kpɛnʋ-za-sob na yel a, lãw nɩ nɩ a bibir ŋa waar.

¹⁶ A tɩ mimié bɛ n'a a bʋ̃-dɩrɩ bɔr, ɛ́ a nʋ̃ɔ̀ nɩ a cɩlʋ bɔr a tɩ Naaŋmɩn yir pʋɔ ɩ?

¹⁷ A bʋ̃-bie ko na gã a tã-dɛgɛ pile. Ble bɛ cãà be ɩ, alɛ so a bowe ɩ bow-zawlɛ, ɛ́ a bʋ̃-bini binu ziir sãw gã.

¹⁸ Wone dʋn na kone a! A nĩi yaarɛ na gʋɔr a ziir za, bʋ̃ʋ n'ʋ vɛ̃, mʋ̃ɔ bɛ cãà be a na 'wɔb ɛ. A píir tɛɛ za mɩ̀ ɩrɛ nɩ wʋ̀ʋr.

A naaŋmɩn-ƴɛ̀r-manɛ puoru

¹⁹ Sore e, fʋ̃ʋ n'ʋ ɩ̃ ŋmɩɛr a cɛlsɩ cɔwr! A vũu dɩrɛ nɩ a dʋn mʋ̃ɔ 'wɔbrʋ zie a dɩlãpʋɔ pʋɔ, a vũu-zɛlɛ báarɛ nɩ a póru tɩɩr za.

²⁰ A wɛ-dʋn tɛɛ za kone na cɔwr fʋ, bʋ̃ʋ n'ʋ vɛ̃, a bà-diru ko na, ɛ́ a vũu dɩrɛ a dʋn mʋ̃ɔ 'wɔbrʋ zie a dɩlãpʋɔ pʋɔ.