Zonasɩ 3 - A SƐB-SÕW

A Zonasɩ hiere nɩ a Naaŋmɩn ƴɛ̀rʋ a Nɩnɩɩvʋ tẽw

¹ A Sore tɩ lɛb'a ƴɛ̀r a Zonasɩ zie a gb'a ayi sob, yel à ŋá:

² «Ìr cen a Nɩnɩɩvʋ tẽ-kpɛ̃ɛ pʋɔ, tɩ hieri a ƴɛ̀rʋ ɩ̃ na kʋ̀ b a kʋ̀ ʋ.»

³ Ƴɛrɛŋa ʋl a, a Zonasɩ tɩ ìr'a cen a Nɩnɩɩvʋ mɛ̃ a lɛ a Sore na yel a. Zɩ̃ kɛ́ a Nɩnɩɩvʋ tẽw tɩ bɛrmɛ na bɛ dɩ vuo ɩ. Bɛ mɩ́ cen nɩ bibi-ɓile ata ɛ́ bãw ta a ʋ tɛwfʋ zie.

⁴ A Zonasɩ tɩ tĩ na cen bibi-ɓil a tẽw pʋɔ hiere yere: «Ka nɩ bibie lɩz'a ayi a, a Nɩnɩɩvʋ tẽw na sãw nɩ ʋ za.»

⁵ A Nɩnɩɩvʋ tẽw dem tɩ sàw na de a Naaŋmɩn ƴɛ̀rʋ. Bɛ tɩ hier'a yel kɛ́ ŋa za mɩ́ tɛr mʋta-tuo ɛ́ su vʋɔrɩ kparɩ, a nɩ-bɛrɛ tɩ tɔ a bibiir.

⁶ A Nɩnɩɩvʋ tẽw nãà na tɩ wõ a yel ŋa a, ʋ ìr'ɩ a ʋ naalʋ-dà-kɔw zu, yàa a ʋ nãà-kparʋ bɛr, ɛ́ su vʋɔra zɩ̃ nɩ tãpɛlʋ pʋɔ.

⁷ Al pùorí, ʋ tɩ ƴãw na bɛ hieri yel à ŋá: «A nãà nɩ a ʋ tõ-tõ-biir nʋɔr'ɩ ŋa: a nɩsaalbɛ nɩ a dʋn, a nĩi nɩ a pìir bɛ tɛr sɔ́r na dɩ bʋ̃-kãw za bɩɩ nyũ kʋ̃ɔ ɩ.

⁸ A nɩsaalbɛ nɩ a dʋn, bɛ su vʋɔrɩ kparɩ, bɛ kone kpɛ̃w za cɔwr a Naaŋmɩn, ɛ́ ŋa za mɩ́ lɛb bɛr a ɩ-faar nɩ a po-to-fãw-ɩb al ʋ na ɩ sãw a.

⁹ Ãa bãw? A mɩnɛ kãw, a Naaŋmɩn na lɩɛb'ɩ a lɛ ʋ na tɩɛr k'ʋʋ ɩ a bɛr, ʋ na bɛr'ɩ a ʋ su-tʋlʋ-kpãkpã, ɛ́ ɩ tɩ ta kpi ɛ.»

¹⁰ A Naaŋmɩn tɩ nyɛ̃ nɩ a Nɩnɩɩvʋ tẽw dem ɩ-ɩrɩ: ʋ tɩ nyɛ̃ na bɛ na bɛr a bɛ ɩ-faar a. Lɛ n'a ʋ tɩ lɛb bɛr a lɛ ʋ na tɩ tɩ́ɛrɛ k'ʋʋ ɩ a, ɛ́ bɛ dɔwrɩ bɛ nɩ a dɔwrʋ ʋ na tɩ yel k'ʋʋ na dɔwr'ɩ bɛ na a ɩ.