Zonasɩ 1 - A SƐB-SÕW

A Zonasɩ bɔbr'a k'ʋʋ zɔ zãá nɩ a Sore

¹ Bibir kãw, a Sore tɩ yel'ɩ a Amitaɩ bidɛb Zonasɩ:

² «Ìr cen a Nɩnɩɩvʋ tẽ-kpɛ̃ɛ pʋɔ tɩ yere ʋ zɛbr'ɩ, bʋ̃ʋ n'ʋ vɛ̃, ɩ̃ pãa bàl'a nɩ a ʋ nɩbɛ ɩ-faar.»

³ Ɛcɛ a Zonasɩ tɩ ìr'a k'ʋʋ zɔ cen Tarsisɩ zãá nɩ a Sore. Lɛ n'a ʋ tɩ cen Zafa tẽw tɩ nyɛ̃ gbor na cɔbrɩ Tarsisɩ cenu baarɩ a. Ʋ tɩ ya n a ʋ zɩma zie, ɛ́ kpɛ a gbor lãwnɩ a gbor-duwrbɛ k'ʋʋ cen a Tarsisɩ, zãá nɩ a Sore.

⁴ Ɛcɛ a Sore tɩ ɩ na sɛsɛb-kpɛ̃ɛ cɛ̀r a kʋ̃ɔ-kpɛ̃ɛ zu. Daadaalɛ a kʋ̃ɔ-kpɛ̃ɛ tɩ damnɛ nɩ nɩ fãw, a gbor ɩrɛ nãà wɛl yaarɩ.

⁵ Dɛ̃bɩ̃ɛ tɩ nyɔw nɩ a gbor-duwrbɛ yaga za. Lɛ n'a ŋa za tɩ bʋɔlɛ a ʋ ŋmɩmɛ k'aa faa ʋ. Al pùorí, bɛ tɩ ír'ɩ a gbor tuor lɔb ƴãw a kʋ̃ɔmɩ́, k'aa gbor ta cãà tɩbrɛ ɩ. A Zonasɩ ʋl a, ʋ tɩ siw nɩ a gbor pɛrɩ́ tɩ gã gúr kʋʋrɛ.

⁶ A gbor-duwrbɛ nɩ-kpɛ̃ɛ tɩ taw na ta a ʋ zie yel ʋ: «Alɛ! Ɛ́ bʋnʋ! Fʋ gúre na a! Ìr bʋɔlɛ a fʋ Naaŋmɩn, kapaw a Naaŋmɩn ŋa na tɛr'ɩ a tɩ tɩ́ɛrʋ ɛ́ kʋ̃ sàw tɩ kpi ɛ.»

⁷ Al pùorí, a gbor-duwrbɛ tɩ yel'a kʋ̀ taa: «Nyɩ wa tɩ lɔb a bie bãw a sob nɛ na n'ʋ so a baw-bio ŋa ta tɩ a.» Bɛ tɩ lɔb'ɩ a bie a lo a Zonasɩ zu.

⁸ Lɛ n'a bɛ tɩ yel ʋ: «Fʋ̃ʋ n'ʋ so a tɩ baw-bio ŋa. Yel a ʋlɩ bom nɛ fʋ na ɩrɛ a ka a kʋ̀ tɩ. Nyɩnɛ n'a fʋ yi? Tẽ-buor'a fʋ yi? Nɩ-bʋʋr-buor nɩr nɛ b?»

⁹ A Zonasɩ tɩ sɔw bɛ na: «Ɩ̃ ɩ n ebre ɛ́ puore a Sore, a salom zu Naaŋmɩn na ír a kʋ̃ɔ-kpɛ̃ɛ nɩ a tẽw a.»

¹⁰ Al pùorí, ʋ tɩ manɩ nɩ a ʋ yele kʋ̀ bɛ. A gbor-duwrbɛ na tɩ wõ k'ʋʋ zɔrɛ na zãánɛ nɩ a Sore a, dɛ̃bɩ̃ɛ tɩ tɛr bɛ na bɛ dɩ vuo ɩ. Lɛ n'a bɛ tɩ sowr'ʋ: «Bʋ̃ʋ n'ʋ so fʋ ɩ à à ŋá?

¹¹ Tɩ ɩ b ŋmɩn a kʋ̃ɔ-kpɛ̃ɛ tʋ̃ɔ́ bɛr tɩ?» Bʋ̃ʋ n'ʋ vɛ̃, a kʋ̃ɔ-kpɛ̃ɛ tɩ lɛb'a bãw damnɛ yaga yaga za.

¹² A Zonasɩ tɩ sɔw bɛ na: «Nyɩ zɛw mɛ̃ lɔb ƴãw a kʋ̃ɔ-kpɛ̃ɛ pʋɔ, ʋʋ na bɛr nyɩ na. Ɩ̃ bãwnɩ a na mãa na n'ʋ so a sɛsɛb-kpɛ̃ɛ ŋa bɛ bɛrɛ nyɩ a.»

¹³ A gbor-duwrbɛ tɩ mɔnɛ nɩ a gbor kɛ́ bɛ tʋ̃ɔ́ ƴãw fãw ta a tẽsɔw-kõw zu. Ɛcɛ a tɩ ɩ n bàlʋ zawla, a kʋ̃ɔ-kpɛ̃ɛ na tɩ lɛb bãw damnɛ a ƴãw.

¹⁴ Lɛ n'a bɛ tɩ kõ bʋɔlɩ a Sore yel: «'Woi! Sore e, ta sàw a tɩ kũu yi a nɩr ŋa zie ɩ. Nɩr mɩ̀ na bɛ sãw tɩ a, ta sàw tɩ so a ʋ kũu ɛ. Bʋ̃ʋ n'ʋ vɛ̃, a fʋ̃ʋ Sore, fʋ̃ʋ n'ʋ tõ a lɛ fʋ na bɔbr a.»

¹⁵ Al pùorí, bɛ tɩ nyɔw nɩ a Zonasɩ zɛw lɔb ƴãw a kʋ̃ɔ-kpɛ̃ɛ pʋɔ, ɛ́ daadaalɛ a kʋ̃ɔ-kpɛ̃ɛ damnʋ baarɩ, ʋ gã zoom.

¹⁶ Lɛ n'a bɛ tɩ zɔrɛ a Sore yaga za. Bɛ tɩ maal'ɩ bàwr kʋ̀ ʋ, ɛ́ kõ nɛ́ɛ a ʋ zie.