Zeremi 9 - A SƐB-SÕW

A Zuda naalʋ-tẽw nɩbɛ sãw nɩ bɛ za

¹ Bʋ̃ʋ pãa ɩ ɩ̃ bɛ tɛr gaa zie a wɛja-kpalɛ pʋɔ mɛ̃ a sɔr-tɔlbɛ a? Ɩ̃ nãá tɩ bɛr'ɩ a ɩ̃ nɩbɛ, ɛ́ tɩ cen zãá nɩ bɛ. Bʋ̃ʋ n'ʋ vɛ̃, bɛ za ɩ n pɩ̃ɔ-yel-maalbɛ, nɩ-mɩlbɛ bʋʋrɛ nɛbɛ.

² A Sore yere na: «A bɛ zɛl ɩ na mɛ̃ tam bɛ na dúori a. A yel-mɩŋa zũú bɛ n'a bɛ so a tẽw ɛ, ɛcɛ a ziri zũú n'a. Bɛ mɩ́ maal'ɩ a faa tɩ lʋ̃ɔ nɩ faa, ɛ́ a mãa a, bɛ bɛ bãw mɛ̃ ɩ.

³ Ŋa za ʋ mɩ́ gù ʋ tʋɔra a ʋ bá ƴãw, ɛ́ nɩr taa ƴãwnɛ a ʋ tɩɛrʋ a ʋ yɛb ƴãw ɛ. Bʋ̃ʋ n'ʋ vɛ̃, yɛb za mɩ́ bãw nɩ lɛ ʋ na na nɛb fʋ a, ɛ́ bá za ɩ gɛgɛra gɛrɛ fʋ.

⁴ Ŋa za mɩ́ bɛ̀lɛ nɩ a ʋ tɔ, nɩr za bɛ yere yel-mɩŋa ɩ, bɛ za ŋma n a ziri mili. Bɛ maal'ɩ a faa zuo, kʋ̃ tʋ̃ɔ́ lɛb wa a ɩ̃ zie ɩ.

⁵ Bɛ mɩ́ ɩ n po-to-fãw-ɩb tɩ lʋ̃ɔ nɩ po-to-fãw-ɩb, ŋma ziri tɩ lʋ̃ɔ nɩ ziri. Bɛ zawr'a na bãw mɛ̃. A mãa, a Sore, mãa n'ʋ yel.»

⁶ A na ɩ à ŋá a, à ŋá n'a a Sore, a kpɛnʋ-za-sob yere: «Vũu n'a ɩ̃ na ír'ɩ a bɛ dɛwr bɛr, ɩ̃ɩ na nyɛ̃ nɩ a lɛ bɛ na ŋmɛ̃ a. Bʋ̃ʋ n'ʋ ɩ̃ na lɛb tʋ̃ɔ́ ɩ a ɩ̃ nɩbɛ yel-faar ƴãw?

⁷ A nɩbɛ bɛ ŋa zɛl ɩ na mɛ̃ pĩi-zɛl na kʋrɛ a. Ziri n'a yire a bɛ nɛ̃ɛ́. Nʋɔr'ʋ bɛ mɩ́ ƴɛ̀rɛ nɩ ƴã-ɓaarʋ ƴɛ̀r-bie kʋ̀rɛ a bɛ tɔ, ɛcɛ a bɛ pʋ̃ɔmɩ za bɛ ƴãwnɛ ʋ bɛra.

⁸ A Sore yere na: A bɛ fɛr k'ɩ̃ɩ dɔwrɩ a nɩbɛ bɛ ŋa bɩɩ? A bɛ sɛw k'ɩ̃ɩ yáa a san a nɩ-bʋʋr-ŋa-tɔ zie bɩɩ?»

A kon nɩ a lãw-mʋɔlɛ daar

⁹ Ɩ̃ kone na ƴɛ̀rɛ nɩ a tan zu, ɩ̃ kone nɩ lãw-mʋɔlɛ a dʋn mʋ̃ɔ 'wɔbrʋ ziir ƴãw. Bʋ̃ʋ n'ʋ vɛ̃, a za dɩ n vũu, nɩr za bɛ cãà tɔlɛ a be ɩ. Bɛ bɛ cãà wone a dʋn kon a be ɩ. A lili nɩ a dʋn za zɔ na zãá, bom za bɛ cãà be ɩ.

¹⁰ A Sore yere na: «Ɩ̃ na ɩ na a Zerizalɛm lɩɛbɩ kʋsɛbɛ na gbõ taa a, gbõgbo-cili gaa zie, ɛ́ ɩ a Zuda tẽ-bɛrɛ a lɩɛbɩ zie bom za na bɛ cãà be a, zie nɩr za na bɛ cãà kpɩɛr a.»

¹¹ Nɩr ɩ n yã-bãwnɛ a sɛw ʋ na bãw a yele á ŋá pɛr ɩ? A Sore wa ƴɛ̀r a ʋ zie a, ʋ̃ʋ ɩ bɛ bãw bʋ̃ʋ n'ʋ so a tẽw sãw, bʋ̃ʋ n'ʋ so ʋ dɩ a vũu mɛ̃ wɛja-kpalɛ a, ɛ́ ɩ zie nɩr za na bɛ tuur tɔlɛ a?

¹² A Sore cãà na yere: «Bɛ na zawrɩ a wulu ɩ̃ na tɩ kʋ̀ bɛ a bɛr a n'a so. Bɛ zawr'a na bɛr wõ ɛ́ tu a lɛ za ɩ̃ na tɩ yere kʋ̀rɛ bɛ a.

¹³ Bɛ tu n a bɛl mɩŋa tɩɛrʋ tɛwr pùor, nɩ a Báàl mɩnɛ puoru pùor a bɛ sãà mɩnɛ na tɩ mili nɩ bɛ a.

¹⁴ A na ɩ à ŋá a, à ŋá n'a a mãa, a Sore, a kpɛnʋ-za-sob, a Ɩsɩrayɛl Naaŋmɩn, yere: Ɩ̃ na ɩ na a nɩbɛ bɛ ŋa 'wɔb tɩ-va-tuo, ɛ́ nyũ kʋ̃ɔ na tɛr lɔw a.

¹⁵ Ɩ̃ na diw bɛ na yaarɩ nɩ-bʋʋr-yoru sɔgɔ, a bɛl nɩ a bɛ sãà mɩnɛ na bɛ bãw a. Ɩ̃ na ɩ na a zɛbr ta tu bɛ tɩ kʋ bɛ pàw pɛr.»

¹⁶ À ŋá n'a a Sore, a kpɛnʋ-za-sob yere. «Nyɩ bãwnɩ a pɔw-kõ-konbɛ bʋɔlʋ, nyɩ ƴãw bɛ wa! Nyɩ tõ bɛ tɩ bʋɔlɩ a bɛl na bãw kon vla vla a bɛ wa!

A nɩbɛ

¹⁷ Kɛ́ bɛ wa fɔ̃w za wa kõ lãw-mʋɔlɛ a tɩ ƴãw! K'aa tɩ mimie ɩ mʋta-kʋ̃ɔ cɔb! K'aa tɩ mimi-gamɛ bùr a za!»

A Zeremi

¹⁸ Lãw-mʋɔlɛ kone na yire a Sɩyɔ̃ tẽw lowr: «'Woi, bɛ sãw tɩ na bɛr, vĩ kʋrɛ tɩ na! A fɛr'a kɛ́ tɩ yi ɛ́ bɛr a tẽw, bʋ̃ʋ n'ʋ vɛ̃, bɛ dá n a tɩ yie lɔb.»

¹⁹ Pɔwbɛ ɛ, nyɩ bɛr wõ a Sore ƴɛ̀rʋ! Nyɩ yuo a nyɩ tobe wõ a lɛ ʋ na yere a. Nyɩ zanɩ nɩ a nyɩ pɔwyaar a lãw-mʋɔlɛ ŋa, ŋa za mɩ́ zanɩ nɩ a ʋ tɔ a lãw-mʋɔlɛ ŋa kon:

²⁰ «A kũu dúor'ɩ a tɩ tokori-vɛɛ ƴãw kpɩɛr, ʋ kpɩɛr'ɩ a tɩ yir-vɩɛlɩ vɩɛlɩ pʋɔ. Ʋ ŋmɩɛr'ɩ a tɩ bibiir kʋrɛ a sɛ́ɛ zu, ɛ́ ŋmɩɛr a pɔlbili kʋrɛ a tuor-taa ziir.»

A Sore

²¹ «A fʋ̃ʋ Zeremi a, cãà lɛb yel a lɛ a mãa, a Sore, na yere a: “A kũuni na gã gã nɩ a tẽsɔw mɛ̃ pʋɔrʋ na gã póru pʋɔ a, mɛ̃ ka-zuru na gã a ka-ŋmarɛ pùorí, ɛ́ nɩr za bɛ wobr a a.”»

A Sore bãwfʋ n'ɩ a yã-bãwfʋ sɩza

²² À ŋá n'a a Sore yere: «A yã-bãwnɛ, ʋ ta pɔrɛ nɩ a ʋ yã-bãwfʋ ɛ! A fãw sob, ʋ ta zɛwr ʋ tʋɔra nɩ a ʋ fãw ɛ! A nãà, ʋ ta zɛwr ʋ tʋɔra nɩ a ʋ naalʋ ɛ!

²³ Nɩr wa bɔbr k'ʋʋ pɔrɛ a, ʋ pɔrɛ ʋ na tɛr yã a sɛw ʋ na tʋ̃ɔ́ bãw mɛ̃ a. Bʋ̃ʋ n'ʋ vɛ̃, a mãa, a Sore a, ɩ̃ tone na k'ɩ̃ɩ ƴãw a nɔ̃wfʋ, a lɛ-na-tu-sɔr-a nɩ a mɩnʋ a tẽw zu. Sɩza, à á ŋá n'a mɩ́ pɛlɩ a ɩ̃ pʋɔ.» A Sore n'ʋ yel.

A yʋ̀ɔr ŋmãafʋ bɛ íre nɩr bɛrɛ dɔwrʋ pʋɔ ɩ

²⁴ A Sore yere na: Bibir na vɩɛ na ɩ̃ na ìr a bɛlɩ dem na ŋma a yɛɛ tɛwr a ƴãw,

²⁵ a Eziptɩ, a Zuda, a Edɔm, a Amɔ̃ nɩ a Mowab ten dem ƴãw, nɩ a bɛlɩ dem na mɩ́ põ a bɛ tacɩ-kɔblʋ ɛ́ kpɩɛr a wɛja-kpalɛ pʋɔ a ƴãw. Bʋ̃ʋ n'ʋ vɛ̃, a nɩ-bʋʋrɛ bɛ ŋa bɛ sɩrɩ ŋma a yɛɛ sɩza ɩ, ɛ́ a Ɩsɩrayɛl tẽw nɩbɛ tɛɛ za bɛ ŋma a yɛɛ a Sore ƴãw ɛ.