Zeremi 6 - A SƐB-SÕW

Dɔwr-kpɛ̃ɛ jɩɛrɛ nɩ a Zerizalɛm

¹ Bɛ̃zamɛ dɔwlʋ nɩbɛ ɛ, nyɩ yi a Zerizalɛm tẽw pʋɔ, nyɩ cen tɩ bɔ sɔwlʋ zie zi-yoru. Nyɩ pɛblɩ a ɩɩl a Tekowa tẽw pʋɔ, nyɩ zɛw bãwfʋ a Bɛtɩ-kerɛm, bʋ̃ʋ n'ʋ vɛ̃, faa yi n a saa-pɛrɩ́-gʋba-lowr jɩɛrɛ nyɩ, Ʋ na ɩ n kpɩɛrʋ kpɛ̃ɛ.

² A Sɩyɔ̃ na vɩɛl vɩɛl a, n'ɩ ŋa sãw ʋ za.

³ Nɩbɛ waar'ɩ a ʋ zie mɛ̃ dʋ̃-cɩ̃ɩnbɛ nɩ a bɛ dʋn a. A ʋ ƴãw n'a bɛ maalɛ a bɛ pɛnɛ-sɛwr jile kole ʋ. Ŋa za mɩ́ so nɩ a ʋ zie.

⁴ Bɛ cɩɩrɛ na yere: «Nyɩ ír! Nyɩ cɔbrɩ a zɛbr! Nyɩ ɩ tɩ zɛb'ɩ a Zerizalɛm mʋ̃tɔ̃-tuo! We ãi! A mʋ̃tɔ̃w gɔ̃wnɛ na, a zaanʋɔra ɓaarʋ lɩɛbɛ na.

⁵ Nyɩ ɩ tɩ zɛb'ɩ ʋ tɩ̃ɩsɔw! Tɩ ŋmɛr a ʋ yir-vɩɛlɩ vɩɛlɩ bɛr!»

⁶ À ŋá n'a a Sore, a kpɛnʋ-za-sob, yere: «Nyɩ cɛ tɩɩr lɔb, nyɩ maalɩ gbĩgbin a Zerizalɛm zɛb-deb ƴãw.» Po-to-fãw-ɩb tɛwr'a be a ʋ pʋɔ, a sãá n'a.

⁷ Ʋ mɩ́ ɩ na a ʋ faalʋ tɛbr yire mɛ̃ bul-nʋɔr na mɩ́ ɩ a ʋ kʋ̃ɔ a tɛbr yire a. A ʋ zie a, po-to-fãw-ɩb nɩ sãw-bɛrʋ tɛwr ƴɛ̀rʋ n'a bɛ ƴɛ̀rɛ. Wʋ̀ʋr nɩ ɩ-k'a-kpɛ tɛwr'a ɩ̃ nyɛrɛ kʋralɛ.

⁸ «Zerizalɛm i, sàw de a wulu! Alɛ bɛ ɩ lɛ, ɩ̃ kʋ̃ cãà lãw nɩ fʋ ɛ, ɩ̃ɩ na ɩ na fʋ lɩɛbɩ tẽ-kpalɛ, tẽw nɩr na bɛ kpɩɛr a.»

A nɩbɛ zawr'ɩ a bɛr-wob

⁹ À ŋá n'a a Sore, a kpɛnʋ-za-sob, yere: «Nyɩ yiiri a Ɩsɩrayɛl nɩbɛ bɛl na cãà cɛ vʋʋrɛ a, mɛ̃ a lɛ bɛ na mɩ́ yiiri divɛ̃ tɩɩr púo a. A nyɩ nuru, a tu yi a wuli zu gb'aa yaga, mɛ̃ a lɛ a divɛ̃ tɩɩr púo sob na mɩ́ ɩ a divɛ̃ tɩ-wɔmɛ deb daar a.»

Zeremi

¹⁰ Anʋ zie n'a a fɛr k'ɩ̃ɩ ƴɛ̀r? Ã-mɩnɛ nɛbɛ a fɛr k'ɩ̃ɩ yel a yel kʋ̀ bɛ bɛr wõ m? A bɛ tobe kpar'a kʋ̃ tʋ̃ɔ́ cɛlɛ be ɩ. A Sore ƴɛ̀rʋ a, bɛ tobr bɛ ka ʋ ƴãw ɛ, bɛ bɛ bɔbr ʋ ɛ.

¹¹ A Sore suur paalɩ mɛ̃ na, ɩ̃ kʋ̃ tʋ̃ɔ́ cãà nyɔw ʋ tɛr ɛ. «Lɩɛb ʋ ƴãw a bibiir a sɛ́ɛ zu nɩ a pɔlbili za zu. Bɛ na nyɔw nɩ bɛ za cen nɩ, dɛbr nɩ pɔwbɛ, nɩbɛ na kòr nɩ nɩbɛ na kòr tɩ kòr a.

A Sore

¹² A bɛ yie lɩɛb'ɩ nɩ-yoru dem, a bɛ pɔwbɛ nɩ a bɛ póru mɩ̀ a lɛ. A Sore yere na: Ɩ̃ na ìr'ɩ a tẽw ŋa nɩbɛ za ƴãw.

¹³ Bʋ̃ʋ n'ʋ vɛ̃, a na tĩ a pʋrmɛ tɩ tɔ a bɛrɛ a, bɛ za bɔbr'ɩ a bɛ tɔnɛ. A naaŋmɩn-ƴɛ̀r-manbɛ tɩ tɔ a bàwr-maalbɛ a, bɛ za tɛr'ɩ libelibe yã.

¹⁴ Bɛ de nɩ dɩ̃ɛnʋ ƴãw a ɩ̃ nɩbɛ kpɩɛrʋ ƴãw, mɩ́ yel kɛ́ a yele za cere nɩ vla, a yele za cere nɩ vla! Ɛ́ bom za bɛ cere ɩ.

¹⁵ Vĩ ɩrɛ bɛ na bɛ na ɩ a ɩ-faar na bɛ maal'ɩ wob a a? Towtow! Bɛ bɛ bãw k'aa tɩ sɛw na kɛ́ bɛ sàw a bɛ sãwna ɩ. A Sore yere na: Alɛ n'a so bɛ na lo mɛ̃ a nɩbɛ za a, bɛ na lo n tẽw a lɛn daar ɩ̃ nãà wa ír a.

¹⁶ À ŋá n'a a Sore yere: Nyɩ tɛw àr a sɔ́r nyɩ na lo a zu ɛ́ tɩɛrɩ nyɛ̃, nyɩ sowri a koro sɛ́ɛ yele kaa: Nyɩ bɔ a sɔr-vla ɛ́ tuur ʋ. Lɛ n'a nyɩ na nyɛ̃ a pɩ̃ɛnʋ a nyɩɩm mɩŋa ƴãw. Ɛcɛ bɛ sɔw na: “Tɩ bɛ tuur ʋ ɛ.”

¹⁷ Ɩ̃ ƴãw nɩ zi-gùrbɛ kɛ́ bɛ tʋ̃ɔ́ mɩ́ yel à ŋá kʋ̀ bɛ: Nyɩmɛ wa wõ a ɩɩl a, nyɩɩm cɛlɛ be! Ɛcɛ bɛ yel'a: “Tɩ kʋ̃ cɛlɛ be ɩ.”

¹⁸ A lɛ pʋɔ a, nɩ-bʋʋr-yoru nɩbɛ ɛ, nyɩ bɛrɛ wone. Nyɩ za, nyɩ bãw a ʋlɩ bom nɛ na na ta bɛ a.

¹⁹ Tẽ-daa za nɩbɛ ɛ, nyɩ bɛrɛ wone: A mãa a, ɩ̃ na ɩ na a faa páw a nɩbɛ bɛ ŋa. A lɛ bɛl mɩŋa na tɩɛrɩ a yele bin a bʋ̃-páwra n'ʋ. Ɩ̃ ƴɛ̀r'ɩ a bɛ zie bɛ bɛ cɛlɩ be ɩ, bɛ zawr'ɩ a ɩ̃ wulu bɛr.

²⁰ Bʋ̃ʋ n'ʋ ɩ̃ ɩrɛ nɩ a Saba tẽw tɩ-suur-zɔ̃-na-nyùur-vla-vla-a? nɩ a tẽ-zãána bàa-kɛkɛr na nyuur vla a? A bɛ nyɩw-a-za-bagɛ a, ɩ̃ bɛ bɔbr a ɩ, a bɛ bàwr-maal-bome bɛ nʋmɛ a ɩ̃ zie ɩ.

²¹ A lɛ pʋɔ a, à ŋá n'a a Sore yere: Ɩ̃ na ƴãw nɩ bom a nɩbɛ bɛ ŋa niŋé, na na ɩ bɛ ŋmɛ gbɛ́r a ʋ ƴãw lo a. Bɛ za na lãw na kpi: a sãà mɩnɛ, a bɛ bibiir, a bɛ sɩman dem nɩ a bɛ bárɩ.»

A dɔ̃ sob yire nɩ a saa-pɛrɩ́-gʋba-lowr waar A Sore

²² À ŋá n'a a Sore yere: «Nɩbɛ yi n a saa-pɛrɩ́-gʋba-lowr tẽw kãw waar, nɩ-bʋʋr-yoru na yãwmɛ a yi n a tẽw baarʋ zie lo a sɔ́r waar.

²³ A ʋ zɛbr-nɩbɛ zɛw nɩ tamɛ nɩ kafin-ŋmali, bɛ kpɛ n po-tuo ɛ́ bɛ zɔrɛ nɩbaalʋ ɛ. A gɔmɛ bɛ na ɩrɛ a, ɩ na mɛ̃ a kʋ̃ɔ-kpɛ̃ɛ kʋ̃ɔ na damnɛ a. Bɛ zɔm'ɩ wie, bɛ pɩɛr'ɩ nɩ vla vla kɛ́ bɛ zɛb'ɩ fʋ, Sɩyɔ̃ tẽw i!»

A nɩbɛ

²⁴ Tɩ na wa wõ a yele á ŋá a, a tɩ kpãkpamɛ kpi na, a pʋl-vʋ̃ɔ nyɔw tɩ na ɛ́ 'wɔbrʋ 'wɔbr tɩ, mɛ̃ pɔw a dɔwfʋ na ta a.

²⁵ Nyɩ taa yire a wɩ̀ɛ pʋɔ ɩ, nyɩ taa cere a sɛ́ɛ zu ɛ, bʋ̃ʋ n'ʋ vɛ̃, a dɔ̃ sob be n a be kʋrɛ. A dɛ̃bɩ̃ɛ n'a a ziir za.

A Sore

²⁶ «Ɩ̃ nɩ-bʋʋrɛ ɛ, nyɩ su vʋɔrɩ kparɩ, nyɩ bile a tanɛ pʋɔ! Nyɩ tĩ a kuor maalʋ mɛ̃ bidɛb-been ƴãw a. Nyɩ kõ lãwnɩ tʋlʋtʋlʋ, bʋ̃ʋ n'ʋ vɛ̃, a dɔ̃ sob na sãwnɛ bom za a, na ùr'a ta a nyɩ ƴãw.»

A Naaŋmɩn nɩ-bʋʋrɛ ɩ n nɩ-gaarɩ Sore

²⁷ «Zeremi i, ɩ̃ ƴãw na kɛ́ fʋ jieli a ɩ̃ nɩbɛ bãw bɛ ŋmɛ̃a. A na fɛr'a fʋ bãw ɛ́ jieli a bɛ ɩb, mɛ̃ tõ-tõ-bie na jiele kur-bʋʋrɛ bʋʋrɛ a.»

Zeremi

²⁸ Bɛ za ɩ n nɩ-gaarɩ na kpawlɩ socie a, gɛgɛrɩ nɛbɛ. Bɛ kpɛmɛ na mɛ̃ a kur-zɩɛ bɩɩ mɛ̃ a kure a. Bʋ̃-sãwnbɛ nɛbɛ bɛ za.

²⁹ A zuwre zuwr'a. A vũu tɩ sɛw na k'ʋʋ ɩ a kur-mɔrmɔr nyɩl. Ɛcɛ zawlalɛ n'a a sãa-kpɩɛrɛ bàlɛ ʋ tʋɔra bɔbr k'ʋʋ ɩ a salm-pla dɛwr yi: a dɛwr bɛ yire ɩ.

³⁰ Bɛ bʋɔlɛ nɩ a nɩbɛ bɛ ŋa kɛ́: “Salm-pla bɛ na na lɔb bɛr a”, bʋ̃ʋ n'ʋ vɛ̃, a Sore lɔb bɛ na bɛr.