Zeremi 50 - A SƐB-SÕW

A Babɩlɔn tẽw loba nɩ a Ɩsɩrayɛl nɩbɛ na lɛb so bɛ tʋɔra a

¹ Nyɛ̃ a ƴɛ̀rʋ a Sore na ƴãw a naaŋmɩn-ƴɛ̀r-manɛ Zeremi ƴɛ̀r càar'ɩ a Babɩlɔn tẽ-kpɛ̃ɛ nɩ a Babɩlɔn tẽw za a.

² «Nyɩ yel a yel ŋa kʋ̀ a nɩ-bʋʋrɛ za, nyɩ bà bãwfʋ bom ɩ kɛ̀ bɛ bãw ʋ, nyɩ ɩ bɛ bãw ʋ, nyɩ taa sɔwlɛ bom za ɩ. Nyɩ yel: Bɛ zɛb'a de a Babɩlɔn tẽw, vĩ nyɔw nɩ a ʋ ŋmɩmɛ dasuli, a ʋ tɩbɛ kanyir za baar'a. Vĩ nyɔw nɩ a Bɛl, a ŋmɩn Maardukɩ kanyir za baar'a.

³ Bʋ̃ʋ n'ʋ vɛ̃, nɩ-bʋʋrɛ kãw yi n saa-pɛrɩ́-gʋba-lowr waar a ʋ ƴãw, bɛ na wa ɩ na a ʋ tẽw lɩɛbɩ wɛja-kpalɛ na ɩrɛ nɩbaalʋ a, nɩr za kʋ̃ lɛb kpɩɛr a ʋ pʋɔ towtow ɛ, a nɩsaalbɛ za nɩ a dʋn za na zɔ na, bɛ za na bɔr a.

⁴ A Sore yere na: a lɛn daar a, a Ɩsɩrayɛl nɩbɛ nɩ a Zuda nɩbɛ na lãw na waar, bɛ na kone na cere nɩ, bɔbr'ɩ mɛ̃, a mãa, bɛ Naaŋmɩn.

⁵ Bɛ na sowr'a bãw a sɔ́r na cere a Sɩyɔ̃ a, ɛ́ bɛ na lɩɛb'ɩ a niŋe cɔw a ʋ lowr. Bɛ na wa na wa lãw nɩ mɛ̃, wõ-taa na be kʋralɛ a pʋɔ, wõ-taa bɛ na kʋ̃ yiiri bɛr towtow a pʋɔ.

⁶ A ɩ̃ nɩbɛ tɩ ɩ na mɛ̃ píir na bɔr a, a cɩ̃ɩnbɛ tɩ bɔr a na bɛr, a cɔlɛ gʋɔr a tan pʋɔ, mɩ́ yi a tã-bɛrɛ zu tɩ sãá a tãli zu, ɛ́ yiiri a zàw bɛr.

⁷ A bɛlɩ dem za na mɩ́ tɩ tuori a a, mɩ́ tɩ vɔl a na, ɛ́ a dɔ̃ dem mɩ́ tɩ yere: “Tɩ bɛ tɛr sãwna ɩ. Bʋ̃ʋ n'ʋ vɛ̃, a nɩbɛ bɛ ŋa sãw nɩ a Sore na ɩ a bɛ taw-lanʋ zie, ɛ́ a bɛ sãàkʋm-kore tɩ ƴãw a bɛ tɩɛrʋ a ʋ ƴãw a.”»

⁸ Nyɩ yi zaa a Babɩlɔn tẽw pʋɔ, nyɩ yi a tẽw ŋa pʋɔ, nyɩ ɩ mɛ̃ bʋrɩ na de dʋn niwn a.

⁹ Bʋ̃ʋ n'ʋ vɛ̃, ɩ̃ na ɩ na tẽ-bɛrɛ na ɓã taa a, ìr, ɩ̃ɩ ƴãw a cen tɩ zɛb'ɩ a Babɩlɔn tẽw. A nɩbɛ bɛ ŋa na yi n saa-pɛrɩ́-gʋba-lowr wa, wa pɩɛrɩ a zɛbr pɩɛrʋ a ʋ ƴãw, zɛb de ʋ. A bɛ pime bɛ nyɩrɛ bom ɛ, mɛ̃ gãdaa na bɛ lɛbr waar nũ-zawl a.

¹⁰ A Sore yere na: Bɛ na za n a Babɩlɔn tẽw bome, ɛ́ a bɛlɩ dem za na na za a tẽw a, na de nɩ na-bome sɛw lɛ za bɛ na bɔbr a, cen nɩ.

¹¹ Nyɩ cɩlɛ, nyɩ cɩlɛ ƴawr'ɩ, nyɩɩm na sãw a ɩ̃ zi-sóra bɛr a! Nyɩ ƴawr dúor saa mɛ̃ náli-pɔlɛ mɔ̃-ɓaar pʋɔ a! Nyɩ kone mɛ̃ wur-daar a!

¹² Vĩ-kpɛ̃ɛ nyɔw nɩ a nyɩ tẽ-dɔwra, vĩ ɩrɛ nɩ a sob nɛ na dɔw nyɩ a. Ʋ lɩɛb'ɩ a ten za po-pàwrɛ, wɛja-kpalɛ, tẽsɔw-kõw nɩ dɩlãpʋɔ n'ʋ.

¹³ A Sore suur zũú a, nɩr bɛ cãà kpɩɛr ʋ ɛ, wɛja-kpalɛ na ɩrɛ nɩbaalʋ a n'ʋ. Nʋɔr mɩ́ ɓãa nɩ a bɛlɩ dem za na mɩ́ tɔlɛ pɩɛlɛ a Babɩlɔn a. Bɛ mɩ́ ŋmɛ n pʋl-vʋ̃ɔ cɛlsɩ bɛ na mɩ́ nyɛ̃ a ʋ sãwna sɛw à à ŋá a.

¹⁴ Nyɩɩm za, tam-tɛbrbɛ ɛ, nyɩ wa pɩɛrɩ zɛbr pɩɛrʋ jil koli a Babɩlɔn tẽw. Nyɩ tɛbr ʋ! Nyɩ ta gbɔb a pime tɛr ɛ! Bʋ̃ʋ n'ʋ vɛ̃, ʋ maal'ɩ yel-bier sãw a Sore.

¹⁵ Nyɩ lɔb a zɛbr cɛlsɩ jil koli nɩ ʋ, ʋ zɛw nɩ a nuru wul k'ʋʋ bɛ cãà zɛbr ɛ. A ʋ yir-cõcowli ŋmɛr'a, a ʋ dacine lo na. A Sore n'ʋ yarɛ a san, a lɛ pʋɔ a, nyɩ yáa a san a Babɩlɔn zu. Nyɩ ɩ ʋ mɛ̃ a lɛ ʋ na tɩ ɩ a ʋ taabɛ a.

¹⁶ Nyɩ ír a bʋ̀r-bʋ̀rbɛ nɩ a bʋ̃-dierbɛ za bɛr a Babɩlɔn tẽw pʋɔ. A zɛbr na zɛbr bɛ tɛr'ɩ mimi-baalʋ a pʋɔ a, ŋa za ʋ mɩ́ lɛb ta a ʋ nɩbɛ zie, ŋa za ʋ mɩ́ lɛb zɔ kul a ʋ tẽw.

¹⁷ A Ɩsɩrayɛl tɩ ɩ na mɛ̃ pɛrʋ na bɔr kɛ̀ gben diwr a. A dãw-niwn sob na tĩ 'wɔb ʋ a n'ɩ a Asiiri tẽw nãà. Al pùorí, a Babɩlɔn tẽw nãà, Nabikodonozɔɔr, wa kar ʋ a kɔbɛ.

¹⁸ A lɛ pʋɔ a, à ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: «Ɩ̃ na ìr'ɩ a Babɩlɔn tẽw nɩ a ʋ nãà ƴãw, mɛ̃ a lɛ ɩ̃ na tɩ ìr a Asiiri tẽw nãà ƴãw a.»

¹⁹ Ɩ̃ na tɛr'ɩ a Ɩsɩrayɛl lɛb wa n a ʋ zi-sóra pʋɔ, ʋʋ na páw nɩ a bʋ̃-dɩrɩ a Karmɛl tãw zu nɩ a Basan tã-sɛr zu. Ʋ kʋ̃ mɩ́ bɔ bom gú a Efarayim tãw zu nɩ a Galaadɩ tẽw pʋɔ ɩ.

²⁰ A mãa, a Sore, mãa n'ʋ yere: A lɛn daar a, bɛ na bɔ n a Ɩsɩrayɛl sãwna, ɛ́ kʋ̃ nyɛ̃ ʋ ɛ. Bɛ na bɔ n a Zuda yel-bebe, ɛ́ kʋ̃ nyɛ̃ a ɩ. Bʋ̃ʋ n'ʋ vɛ̃, ɩ̃ na dɩ n suur kʋ̀ a bɛlɩ dem ɩ̃ na na bɛr bɛ cãà vʋʋrɛ a.

²¹ A Sore yere nɩ a Babɩlɔn tẽw dɔ̃ sob: «Ŋmãa a zɛbr nɩ a kʋ̃ɔ-tuo tẽw. Ŋmãa nɩ ʋ a zɛbr, ɛ́ mɩ̀ ŋmãa nɩ a Pekɔdɩ tẽw dem a zɛbr! Kʋ kʋ bɛ, kʋ kʋ bɛ tɩ kʋ pàw pɛr. Ɩ a lɛ za ɩ̃ na yel kɛ́ fʋ ɩ a.

²² Zɛbr gɔmɛ tɛwr'a a tẽw pʋɔ. Nyɛ̃ yel-sãwna na bɛ dɩ vuo a!

²³ Ŋmɩŋmɩn za n'a? A Babɩlɔn tẽw tɩ ɩ n a 'hama na tɩ ŋmɩɛr a tẽ-daa za ŋmɛrɛ a. Ɛcɛ, ʋlɛ n'ʋ ŋmɛr, ŋmɛr yaarɩ. Ŋmɩŋmɩn za n'a? A nɩ-bʋʋrɛ sɔgɔ a, a Babɩlɔn tẽw lɩɛb'ɩ wɛja-kpalɛ na ɩrɛ nɩbaalʋ a!

²⁴ Babɩlɔn tẽw i, ɩ̃ ƴãw fʋ nɩ bɛra, ɛ́ fʋ̃ʋ n'ɩ ŋan lo a bɛra pʋɔ, ɛ́ bɛ bãwnɩ a ɩ. Bʋ̃ʋ n'ʋ vɛ̃, a mãa Sore n'ʋ fʋ ŋmãa nɩ a zɛbr.»

²⁵ A Sore yuo nɩ a ʋ zɛbr bome dĩo, ɛ́ na wul a ʋ suur nɩ a ʋ zɛbr bome ʋ na ír a. A Babɩlɔn tẽw a, tome gã nɩ a Sore, a Naaŋmɩn kpɛnʋ-za-sob ƴãw.

²⁶ Nyɩ yi ziir za wa a tẽ-kpɛ̃ɛ ŋa pʋɔ! Nyɩ yuori a ʋ boge, nyɩ wob a ʋ na-bome ɓã ɓã taa, ɛ́ sãw ʋ bɛr! Bom za taa cɩ́ɛr ɛ.

²⁷ Nyɩ kʋ a bɛ soja-vɩɛlɩ vɩɛlɩ za, nyɩ tɛr bɛ cen nɩ a kʋb zie! Nyɛ̃ kpɩɛrʋ na ta bɛ a, bʋ̃ʋ n'ʋ vɛ̃, a bibir vɩɛ na a Sore na na ìr a bɛ ƴãw a.

²⁸ Nyɩ wone! Nɩbɛ n'a yi a Babɩlɔn tẽw zɔrɛ, nɩbɛ na cɩ̃ɛ a be a nɛbɛ waar wa yere a Sɩyɔ̃ tẽw pʋɔ: «A Sore tɩ Naaŋmɩn yáa nɩ a san kʋ̀ fʋ, ʋ yáa ʋ nɩ a ʋ yir-sõw ƴãw.»

²⁹ Nyɩ bʋɔlɩ a tam-tɛbrbɛ za ɓã taa, nyɩ ɩ bɛ cen a Babɩlɔn tẽw dem ƴãw. Nyɩ maalɩ laɩ jil koli ʋ, nyɩ ta bɛr ʋ cɩ̃ɛ ɩ, nyɩ ya ʋ manɩ a ʋ tome. A lɛ ʋ na ɩ a ʋ taabɛ a, nyɩ mɩ̀ ɩ ʋ a lɛ. Ʋ ɩ n pɔ̀l-ɩb a Sore zie, a Ɩsɩrayɛl Naaŋmɩn na ɩ sõw a zie.

³⁰ «Alɛ n'a so, a ʋlɩ bibir nɛ a, a ʋ soja-pɔlɛ na lo n a ʋ nɩbɛ tuor-taa ziir, ɛ́ a ʋ zɛbr-nɩbɛ kpi bɛ za.» À à ŋá n'a a Sore yel.

³¹ «Pɔ̀lʋ sob Babɩlɔn i, mãa nɩ fʋ̃ʋ nɛbɛ! A Sore Naaŋmɩn, a kpɛnʋ-za-sob'ʋ yere. A fʋ bibir vɩɛ na, a daar ʋl ɩ̃ na na sowri fʋ bom a ta na.

³² A pɔ̀lʋ sob na kaw na lo, nɩr bɛ ka be na nyɔw ʋ, ʋ ìr ɛ. Ɩ̃ ƴãwnɛ nɩ vũu a ʋ tẽ-bɛrɛ, ʋ na dɩ n bom za na jil koli a a.»

³³ À ŋá n'a a Sore, a kpɛnʋ-za-sob, yere: «Bɛ ɩrɛ nɩ po-to-fãw ɩb a Ɩsɩrayɛl nɩbɛ zie, ɛ́ lɛ mɩ̀ n'a a Zuda nɩbɛ zie. A bɛlɩ dem na tɩ diw bɛ cen nɩ a, tɛr bɛ na nɩ fãw. Bɛ bɛ sàwr na lɛb bɛr bɛ ɩ.

³⁴ A mãa, a bɛ faarɛ, ɩ̃ tɛr'ɩ fãw, mãa n'ɩ a Sore, a kpɛnʋ-za-sob. Ɩ̃ na faa bɛ na nɩ fãw, ɩ a ƴã-ɓaarʋ lɛb be a tẽw zu, ɛ́ a Babɩlɔn tẽw dem màwr.»

A Sore tɩɛr'a k'ʋʋ sãw a Babɩlɔn tẽw bɛr

³⁵ A Sore yere na: «Zɛbr, a lo a Babɩlɔn tẽw pʋɔ, a lo a bɛlɩ dem na kpɩɛr a Babɩlɔn tẽw pʋɔ a zu, a ʋ tõ-tõ-bi-bɛrɛ nɩ a ʋ yã-bãwnbɛ zu!

³⁶ Zɛbr, a lo a bɛ bàwr-bʋwrbɛ zu, ɩ bɛ bʋnɩ ƴɛ̀rɛ! Zɛbr, a lo a ʋ sojarɩ zu, ɩ a bɛ kanyir baarɩ!

³⁷ Zɛbr, a lo a bɛ wie nɩ a bɛ zɛbr-torkori zu, a lo a nɩbɛ na jɛr-taa ɛ́ zɛbr a ʋ ƴãw a zu! Bɛ lɩɛbɩ pɔwbɛ na bɛ tɛr fãw a! Zɛbr, a lo a bɛ na-bome zu, bɛ zá a.

³⁸ Zɛbr, a lo a ʋ mamɛ zu, ɩ a ko! Bʋ̃ʋ n'ʋ vɛ̃, tɩbɛ tẽw n'ʋ, a bʋ̃-faar faar á ŋá ɩ na, a bɛlɩ dem na puore a a yã yi.

³⁹ Alɛ n'a so, a nyãanyũ-gaarɩ na lãw nɩ a jɩbʋrɩ kpɩɛr a Babɩlɔn tẽw pʋɔ, a Kʋlãdisowli na kpɩɛr'ɩ a be. Nɩr kʋ̃ lɛb kpɛ a be towtow ɛ, a tẽ-kpɛ̃ɛ ŋa na gã nɩ zawla yome yome za.

⁴⁰ A Sore yere na: Ɩ̃ na sãw ʋ na bɛr, mɛ̃ a lɛ ɩ̃ na tɩ sãw a Sodɔm, a Gomɔɔr nɩ a tẽli-kpɔwlɩ bɛr a. Nɩr kʋ̃ cãà kpɩɛr a be ɩ, nɩsaal kãw za kʋ̃ lɛb vʋʋrɩ a be ɩ.

⁴¹ Nɩ-bʋʋrɛ kãw yi n a saa-pɛrɩ́-gʋba-lowr waar, nɩ-bʋʋr-yaga nɩ na-mɩnɛ na tɛr fãw a yi n a tẽw baarʋ zie, lo a sɔ́r waar.

⁴² A bɛ zɛbr-nɩbɛ tɛrɩ tamɛ nɩ kafine, bɛ kpɛ n po-tuo ɛ́ bɛ zɔrɛ nɩbaalʋ ɛ. A gɔmɛ bɛ na ɩrɛ a, ɩ na mɛ̃ a kʋ̃ɔ-kpɛ̃ɛ gɔmɛ a. Bɛ zɔm'ɩ wie, bɛ pɩɛrɩ na tu taa vla vla kɛ́ bɛ zɛb'ɩ fʋ, Babɩlɔn i.

⁴³ A Babɩlɔn tẽw nãà wõ n a yel ŋa, kpãkpamɛ yʋɔrɛ ʋ, pʋl-vʋ̃ɔ nyɔw ʋ na, 'wɔbrʋ 'wɔbr ʋ na mɛ̃ pɔw na dɔwr a.

⁴⁴ A Sore yere na: Ɩ̃ na ɩ na mɛ̃ gbẽw na yire Zurdɛ̃ man tuwr pʋɔ cere zie mɔ̃-ɓaar na be kʋralɛ a. Fɔ̃wlɛ, ɩ̃ na ƴãw na a nɩbɛ za ìr a be. Lɛ n'a ɩ̃ na ƴãw a nɩ-kpɛ̃ɛ ɩ̃ na na kaa ír a, a Edɔm tẽw pʋɔ. Bʋ̃ʋ n'ʋ vɛ̃, ãa n'ʋ ŋmɛ̃ a mãa? Ãa n'ʋ na tʋ̃ɔ́ sowri mɛ̃ bom? Ɛ́ nɩ-kpɛ̃ɛ buor'ʋ na tʋ̃ɔ́ bà gbɛ́r a ɩ̃ niŋé?»

⁴⁵ Nyɩ bɛr wõ a lɛ a Sore na tɩɛrɩ a Edɔm tẽw ƴãw a, a lɛ ʋ na cɔbrɩ a Teman tẽw nɩbɛ ƴãw a. A bɛ tɛr à ŋá ɩ, bɛ na vu bɛ na nɩ fãw mɛ̃ dʋn a, a dʋn bili tɛɛ za mɩ̀, a bɛ tɛr à ŋá ɩ. A bɛl ƴãw a, ʋ na sãw nɩ a zàw bɛr.

⁴⁶ A yel na wa yi kɛ́ bɛ de nɩ a Babɩlɔn tẽw a, a tẽsɔw damnɛ na, cɛlsɩ ŋmɩɛr'ɩ a ten za pʋɔ.