Zeremi 49 - A SƐB-SÕW

A ƴɛ̀rʋ a Sore na ƴɛ̀r càar'ɩ a Amɔ̃ tẽw dem a

¹ Ƴɛ̀rʋ na càarɩ a Amɔ̃ tẽw dem a. À ŋá n'a a Sore yere: «A Ɩsɩrayɛl bɛ tɛr bidɛbr bɩɩ? Ʋ bɛ tɛr gbã-dɩrbɛ bɩɩ? Bʋ̃ʋ n'ʋ so a ŋmɩn Mɩlkɔm de a Gadɩ tẽw, ɛ́ a ʋ nɩbɛ kpɩɛr a tẽw tẽ-bɛrɛ?»

² Alɛ n'a so a Sore yere: «Bibie waar'a, ɩ̃ na ɩ bɛ wõ zɛbr cɛlsɩ a Araba, a Amɔ̃ tẽw dem tẽ-kpɛ̃ɛ pʋɔ. A tẽ-kpɛ̃ɛ ŋa na lɩɛb'ɩ gbĩgbin-kpalɛ nɩr na bɛ kpɩɛr a, a tẽli-kpɔwlɩ na dɩ n vũu. A lɛn daar a, a Ɩsɩrayɛl na lɛb'a de a ʋlɩ bom nɛ ʋ na tɩ so a.» A Sore n'ʋ yel.

³ Hɛsɩbon tẽw dem i, nyɩ kone kuor kon: «A Aɩ tẽ-kpɛ̃ɛ sãw na!» Araba tẽli-kpɔwlɩ i, nyɩ lɔbr cɛlsɩ bʋɔlɛ nɩ sõwfʋ! Nyɩ su vʋɔrɩ kparɩ, nyɩ yiele nɩbaal-yielu! Nyɩ cɔlɛ gʋɔr a ziir bɛ na mɛ dacine viiri koli a pʋɔ: bɛ íre nɩ a ŋmɩn Mɩlkɔm cere nɩ tẽ-yũo, ʋlɛ n'ɩ a ʋ bàwr-maalbɛ lãwnɩ a ʋ nɩ-bɛrɛ za.

⁴ Araba na ɩ pɔwli-gaara a, fʋ tɩ pɔrɛ nɩ nɩ a fʋ fʋɔla, a fʋ fʋɔla na ɩ váar váar a. Fʋ tɩ ƴãw nɩ a fʋ tɩɛrʋ a fʋ na-bome ƴãw, fʋ tɩ sowre na: «Ãa n'ʋ na sàw zɛb'ɩ mɛ̃?»

⁵ A lɛ pʋɔ a, a Sore, a kpɛnʋ-za-sob, yere na: «Ɩ̃ na ɩ na kɛ̀ pʋl-vʋ̃ɔ wa a nyɩ zie, ʋ na yi n a ziir al za na viiri koli a pʋɔ. Bɛ na diw nɩ nyɩ za, ŋa mɩ́ tori niwn zɔrɛ, ɛ́ nɩr za kʋ̃ be be lɛb ɓã a bɛlɩ dem na zɔrɛ a taa ɩ.

⁶ Ɛcɛ a pùorí a, ɩ̃ na lɛb'a maalɩ a Amɔ̃ tẽw, ʋ lɛb ŋmɛ̃ mɛ̃ a dãwdãw a.» A Sore n'ʋ yel.

Ƴɛ̀rʋ a Sore na ƴɛ̀r càar'ɩ a Edɔm tẽw a

⁷ Ƴɛ̀rʋ na ƴɛ̀r càar'ɩ Edɔm tẽw a. À ŋá n'a a Sore, a kpɛnʋ-za-sob, yere: «A yã-bãwfʋ bɛ cãà a Teman tẽw pʋɔ bɩɩ? A nɩbɛ na tɛr yã a, yã bɔr'a bɩɩ? A yã-bãwfʋ sãw na bɩɩ?

⁸ Dedan tẽw dem i, Nyɩ ƴaw lɩɛbɩ, nyɩ zɔrɛ! Nyɩ sɔwlɩ bɔwrɩ pʋɔ. Bʋ̃ʋ n'ʋ vɛ̃, Ezawu bʋʋrɛ ɛ, a nyɩ loba n'a ɩ̃ ɩ ʋ ta. A daar ɩ̃ na ìr a nyɩ ƴãw a n'ʋ ta.

⁹ A divɛ̃ tɩ-wɔ̃-pɔrbɛ wa wa a fʋ zie a, bɛ kʋ̃ bɛr divɛ̃ tɩ-wɔ̃-cãacul kãw za ɩ. Nyãnyuwr wa wa tɩ̃ɩsɔw a, bɛ na sãw nɩ alɩ bome nɛ za bɛ na na tʋ̃ɔ́ a bɛr.

¹⁰ Mãa n'ʋ na de a nyɩ bome za, Ezawu bʋʋrɛ ɛ. Ɩ̃ na ɩ na bɛ bãw a nyɩ sɔwlʋ ziir, nyɩ kʋ̃ lɛb tʋ̃ɔ́ sɔwlɩ ɛ. A nyɩ bibiir, a nyɩ yɛbr nɩ a nyɩ sɩman dem za na baar'a. Nɩr kʋ̃ be be yel nyɩ:

¹¹ Nyɩ bɛr a nyɩ bi-kpebe, ɩ̃ na guoli bɛ na, ɛ́ a nyɩ pɔw-kɔbɛ na tʋ̃ɔ́ na ƴãw a bɛ tɩɛrʋ a ɩ̃ ƴãw ɛ.»

¹² Nyɛ̃ a lɛ a Sore na yere a: «Nyɩ bɛrɛ wone: A bɛlɩ dem a na bɛ tɩ tɛr sɔ́r kɛ́ bɛ nyũ a ɩ̃ suur koli-nyúura a, a fɛr'a kɛ́ bɛ cãà nyũ ʋ. Ɛ́ a fʋ̃ʋ, Edɔm tẽw, bɛ na bɛr fʋ ʋ? Aɩ, bɛ kʋ̃ bɛr fʋ ɛ: fʋ na nyũ ʋ na, bʋnʋ bɛ ka be ɩ!

¹³ Mãa mɩŋa n'ʋ ɩ̃ pɔrɛ nɩ, a fʋ tẽ-kpɛ̃ɛ, Bɔsɩra, na lɩɛb'ɩ zi-faa faa, deboru. Bɛlɛ wa ŋmɩɛr ƴãwn, bɩɩ bɛlɛ wa bɔbr kɛ́ bɛ ƴãw nɩr vĩ a, ʋlɛ n'ʋ bɛ na mɩ́ de man nɩ. A tẽ-bɛrɛ za na lɩɛb'ɩ deboru gã kʋralɛ.» À à ŋá n'a a Sore yel.

¹⁴ A Sore ɩ na k'ɩ̃ wõ ƴɛ̀rʋ ŋa nɩ-tona kãw na cere nɩ a nɩ-bʋʋrɛ za zie a: «Nyɩ ɓã taa! Nyɩ cen a Edɔm tẽw ƴãw! Nyɩ ìr! Nyɩ nyɔw a zɛbr!»

¹⁵ «Edɔm tẽw i, ɩ̃ na ɩ na fʋ ɩ a pʋrɩ za a nɩ-bʋʋrɛ za pʋɔ, a ʋl a nɩbɛ za na ɩrɛ laar a.

¹⁶ Fʋ tɩ ƴãwnɛ nɩ a nɩbɛ za dɛ̃bɩ̃ɛ, fʋ tɩ tɩɛr'a kɛ́ fʋ zuo nɩ a fʋ taabɛ za, ɛcɛ fʋ tɩ bɛlɛ nɩ fʋ tʋɔra. Fʋ̃ʋ na kpɩɛr a pìe bɔwrɩ pʋɔ a, fʋ̃ʋ na mɩ́ go mɛr a zi-kɛrɩ a, fʋ̃ʋ saa ƴãw a fʋ cow ʋ do man a sidum dem a, ɩ̃ na caabɩ fʋ na bɛr fʋ siw tɩ lo.» À à ŋá n'a a Sore yel.

¹⁷ «A Edɔm tẽw na lɩɛb'ɩ deboru. Nʋɔr na mɩ́ ɓãa nɩ a bɛlɩ dem na mɩ́ tɔlɛ pɩɛlɛ ʋ a. Bɛ na mɩ́ lɔb'ɩ pʋl-vʋ̃ɔ cɛlsɩ bɛlɛ wa nyɛ̃ a yel-sãwnɩ á ŋá za a.

¹⁸ A Sore yere na: A na ɩ na mɛ̃ a lɛ a Sodɔm, a Gomɔɔr, nɩ a tẽ-bɛrɛ na pɩɛlɩ a a, na tɩ dam nyaw taa a. Nɩr za kʋ̃ cãà kpɩɛr a be towtow ɛ, nɩsaal za kʋ̃ lɛb vʋʋrɩ a be ɩ.»

¹⁹ A Sore yere na: «Ɩ̃ na ɩ na mɛ̃ gbẽw na yire Zurdɛ̃ man tuwr pʋɔ cere zie mɔ̃-ɓaar na be kʋralɛ a. Fɔ̃wlɛ, ɩ̃ na ƴãw na a nɩbɛ za ìr a be. Lɛ n'a ɩ̃ na ƴãw a nɩ-kpɛ̃ɛ ɩ̃ na na kaa ír a, a Edɔm tẽw pʋɔ. Bʋ̃ʋ n'ʋ vɛ̃, ãa n'ʋ ŋmɛ̃ mɛ̃ a mãa a? Ãa n'ʋ na tʋ̃ɔ́ sowri mɛ̃ bom? Ɛ́ nɩ-kpɛ̃ɛ buor'ʋ na tʋ̃ɔ́ bà gbɛ́r a ɩ̃ niŋé?»

²⁰ Nyɩ bɛr wõ a lɛ a Sore na tɩɛrɩ a Edɔm tẽw ƴãw a, a lɛ ʋ na cɔbrɩ a Teman tẽw nɩbɛ ƴãw a. A bɛ tɛr à ŋá ɩ, bɛ na vu bɛ na nɩ fãw mɛ̃ dʋn a, a dʋn bili tɛɛ za mɩ̀, a bɛ tɛr à ŋá ɩ. A bɛl ƴãw a, ʋ na sãw nɩ a zàw bɛr.

²¹ A bɛ loba gɔmɛ ɩ na a tẽsɔw dam, ɛ́ a bɛ cɛlsɩ yire tɩ tarɛ a Bàa-kɛkɛɛ kʋ̃ɔ-kpɛ̃ɛ́.

²² A dɔ̃ sob ɩ na mɛ̃ sidum na ƴaw do saa, ɛ́ tɩ yɛ́r a ʋ pɩgɛ laarɛ nɩ a Bɔsɩra tẽw zu-sɔw a. A ʋlɩ bibir nɛ a, a Edɔm tẽw zɛbr-nɩbɛ bɛl na kpɛ socir a, na tɛr'ɩ dɛ̃bɩ̃ɛ, mɛ̃ pɔw na dɔwr a.

Ƴɛ̀rʋ a Sore na ƴɛ̀r càar'ɩ a Damasɩ tẽw a

²³ Ƴɛ̀rʋ na ƴɛ̀r càar'ɩ a Damasɩ tẽw a. «Vĩ nyɔw nɩ a Hamatɩ nɩ a Arpadɩ ten, bʋ̃ʋ n'ʋ vɛ̃, a wõ n yel na bɛ vɩɛl a. A yel ŋa damnɛ a na mɛ̃ a kʋ̃ɔ-kpɛ̃ɛ na damnɛ ɛ́ kʋ̃ tʋ̃ɔ́ gã zoom a.

²⁴ A Damasɩ tẽw dem kanyir baar'a, bɛ cɔbrɛ na kɛ́ bɛ zɔ. Bɛ màwr'ɩ dɛ̃bɩ̃-mawfʋ. Pʋl-vʋ̃ɔ nɩ 'wɔbrʋ tɛr bɛ na mɛ̃ pɔw na dɔwr a.

²⁵ Ŋmɩŋmɩn za n'a bɛ zɔ kɛ́ bɛr a tẽ-kpɛ̃ɛ ŋa a yúor na yi a, a tẽ-kpɛ̃ɛ ŋa na wone nʋ̃ɔ̀ a?

²⁶ A Sore kpɛnʋ-za-sob yere na: Alɛ n'a so a ʋlɩ bibir nɛ, a ʋ pɔ́lɛ́ na lo a nɩbɛ tuor-taa ziir ɛ́ a ʋ sojarɩ kpi bɛ za.

²⁷ Ɩ̃ na nyɩw nɩ a Damasɩ tẽ-kpɛ̃ɛ. Ɛ́ a vũu na dɩ n a Bɛn-Hadadɩ nãà yir.»

Ƴɛ̀rʋ a Sore na ƴɛ̀r càar'ɩ Arabʋ dɔwlʋ a

²⁸ À ŋá n'a a Sore yere a Kedaar tẽw, nɩ a Hasɔɔr naalʋ-ten a Babɩlɔn tẽw nãà, Nabikodonozɔɔr, na tɩ zɛb tʋ̃ɔ́ a, ƴãw: «Nyɩ ìr! Nyɩ cen tɩ zɛb'ɩ a Kedaar tẽw! Nyɩ sãw bom za bɛr a wɛja-kpalɛ nɩbɛ zie!

²⁹ Bɛ de a bɛ pɛnɛ-sɛwr nɩ a bɛ dʋn, a bɛ pɛn-yawlɩ nɩ a bɛ bome za! Bɛ diw a bɛ nyɔ̃wmɩ cen nɩ, ɛ́ lɔb cɛlsɩ a bɛ ƴãw à ŋá: “Pʋl-vʋ̃ɔ n'a a ziir za!”»

³⁰ A Sore yere na: «Hasɔɔr tẽw dem i, nyɩ zɔrɛ, nyɩ zɔrɛ fɔ̃w fɔ̃w! Nyɩ sɔwlɩ bɔwrɩ pʋɔ! Bʋ̃ʋ n'ʋ vɛ̃, a Babɩlɔn tẽw nãà, Nabikodonozɔɔr, tɩɛr'ɩ a lɛ ʋ na na ɩ nyɩ a, ʋ cɔbr'ɩ yel a nyɩ ƴãw.»

³¹ A Sore yere na: «Nyɩ ìr! Nyɩ cen tɩ zɛb'ɩ a nɩ-bʋʋrɛ bɛ ŋa na bɛ tɩɛrɛ bom za a. Bɛ tɩ tɩɛr'a kɛ́ bom bɛ damnɛ bɛ ɩ, bɛ bɛ tɛr pamɛ nɩ dà-jɩ̀rɩ́ ɛ, ɛ́ vʋʋrɛ bɛ yõ zie.

³² A dɔ̃ sob na zu n a bɛ nyɔ̃wmɩ, ɛ́ de a bɛ dʋ̃-yaga yaga a ɩ zɛb-tʋ̃ɔ́fʋ bome. A Sore yere na: Ɩ̃ na diw nɩ a nɩbɛ bɛ ŋa na mɩ́ põ a bɛ tacɩlɛ kɔblʋ a, yaarɩ. Ɩ̃ na ɩ na a kpɩɛrʋ yi a ziir za páw bɛ.

³³ A Hasɔɔr tẽ-kpɛ̃ɛ na lɩɛb'ɩ gbõgbo-cili sɔwlʋ zie, wɛja-kpalɛ na ɩrɛ nɩbaalʋ kʋralɛ a. Nɩr za kʋ̃ lɛb kpɩɛr a be towtow ɛ, nɩsaal za kʋ̃ lɛb yɔ yi be ɩ.»

Ƴɛ̀rʋ a Sore na ƴɛ̀r càar'ɩ Elam tẽw a

³⁴ Ƴɛ̀rʋ a Sore na ƴɛ̀r kʋ̀ a naaŋmɩn-ƴɛ̀r-manɛ Zeremi a càarɩ a Elam tẽw dem a. A tɩ ɩ n a Zuda tẽw nãà Sedesɩasɩ naalʋ-dɩb tib daar.

³⁵ À ŋá n'a a Sore, a kpɛnʋ-za-sob, yere: «Ɩ̃ na kár'ɩ a Elam tẽw dem tamɛ na ɩ a bɛ fãw yib zie a bɛr.

³⁶ A saa-pɛrɩ́-gʋba-lowr nɩ a saa-pɛrɩ́-dʋrʋ-lowr, a saa-pɛrɩ́ nɩ a mʋ̃tɔ̃w-kpɛb-lowr, ɩ̃ bɛrɛ nɩ a sɛsɛb anaar a fure cere a Elam tẽw lowr. Ɩ̃ na diw nɩ a Elam tẽw nɩbɛ yaarɩ a ziir za. A Elam tẽw nɩbɛ na zɔ na kpɛ ten za pʋɔ bɛ tɩ cɛ tẽ-been ɛ.

³⁷ Ɩ̃ na ɩ na a Elam tẽw dem màwr a bɛ dɔ̃ dem niŋé, bɛ màwr a bɛlɩ dem na bɔbr a bɛ kũu a niŋé. A Sore n'ʋ yere: A ɩ̃ su-tʋlʋ kpãkpã pʋɔ a, ɩ̃ na ɩ na a kpɩɛrʋ páw bɛ. Ɩ̃ na ta na tu bɛ nɩ a zɛbr, ɛ́ gù ɩ̃ tɩ kʋ bɛ pàw pɛr.

³⁸ Ɩ̃ na ír'ɩ a nãà nɩ a ʋ tõ-tõ-bi-bɛrɛ bɛr a Elam tẽw pʋɔ, k'ɩ̃ɩ tʋ̃ɔ́ bin a ɩ̃ naalʋ-dà-kɔw a be.» À à ŋá n'a a Sore yel.

³⁹ Ʋ cãà na yere: «Ɛcɛ, bibir kãw a, ɩ̃ na lɛb'a maalɩ a Elam tẽw ƴãw.»