Zeremi 47 - A SƐB-SÕW

A ƴɛ̀rʋ a Sore na ƴɛ̀r càar'ɩ a Filisɩtɛ̃ mɩnɛ a

¹ A Sore tɩ ƴɛ̀r'ɩ a ʋ ƴɛ̀rʋ kʋ̀ a naaŋmɩn-ƴɛ̀r-manɛ Zeremi, càar'ɩ a Filisɩtɛ̃ mɩnɛ, ɛ́ a Eziptɩ tẽw nãà wa bãw zɛb'ɩ a Gaza tẽw.

² À ŋá n'a a Sore yel: «Kʋ̃ɔnɩ na vʋnɛ a yi n saa-pɛrɩ́-gʋba-lowr waar, a lɩɛbɛ nɩ bàa, a kʋ̃ɔ na damnɛ nɩ fãw a, a paalɛ na pàwr a tẽw nɩ bom za na be a ʋ pʋɔ a: a tẽ-bɛrɛ nɩ a nɩbɛ na kpɩɛr a a. A nɩbɛ kone na zɛlɛ nɩ sõwfʋ, a tẽw nɩbɛ za ŋmɩɛr'ɩ cɛlsɩ.

³ Tɩ wone nɩ a wie na panɛ a tẽsɔw nɩ a nafɩlɛ a, a bɛ zɛbr-torkori damnɛ na, a gbɛ́ɛ ɩrɛ nɩ gɔmɛ bɛ dɩ vuo ɩ. A ɩ n a lɛ, a sãà mɩnɛ kanyir za baarɩ, bɛ bɛ cãà kaarɛ a bɛ bibiir zie ɩ.

⁴ Bʋnʋ ƴãw? Bom za sãw-bɛrʋ bibir na n'ʋ vɩɛ a Filisɩtɛ̃ mɩnɛ zie a ƴãw. Nɩr za bɛ cãà be na sõw a Tɩ́ɩ̀r nɩ a Sɩdɔ̃ tẽ-bɛrɛ ɩ. A Sore sãw nɩ bom za bɛr a Filisɩtɛ̃ mɩnɛ tẽw, a kʋ̃ɔ-kpɛ̃ɛ-sɔgɔ-tẽw Kafɩtɔɔr nɩbɛ bɛ ŋa na cãà vʋʋrɛ a.

⁵ A Gaza a, a nɩbɛ za zuru fɔr'a. A Asɩkalon a, a nɩbɛ za ɩ n gbili. A nyɩɩm na ɩ a nɩ-kɛrɩ jarmam jarmam na cãà vʋʋrɛ a, debor'a nyɩ na wɛr wɛr a nyɩ ƴã-gamɛ tɩ ta n?

⁶ Nyɩ yere na: “'Woi, Sore zɛbr-sɔ-kpɛ̃ɛ ɛ, Fʋ bɛ tɛr na pɩ̃ɛnɩ ɛ? Lɛb kpɛ a fʋ kpar pʋɔ! Gã zoom, ta lɛb dam ɛ.”

⁷ Ɛcɛ, ŋmɩŋmɩn n'a ʋ na tʋ̃ɔ́ pɩ̃ɛnɩ, a Sore wa n'ʋ tone ʋ a Asɩkalon tẽw, nɩ a kʋ̃ɔ-kpɛ̃ɛ kõkowr ƴãw a? Be n'a a Sore yel k'ʋʋ tuore ʋ.»