Zeremi 46 - A SƐB-SÕW

A ZEREMI LƐB'A YERE A NƖ-BƲƲR-YORU 46—51

¹ A ƴɛ̀rʋ a Sore na ƴɛ̀r kʋ̀ a naaŋmɩn-ƴɛ̀r-manɛ Zeremi a nɩ-bʋʋr-yoru ƴãw a n'ɩ à á ŋá.

A Babɩlɔn tẽw nãà zɛb'a tʋ̃ɔ́ a Eziptɩ tẽw dem Karkemisɩ

² Ƴɛ̀rʋ na càarɩ a Eziptɩ tẽw nɩ a Eziptɩ tẽw nãà, Faarawɔ̃ Neko, zɛbr-nɩbɛ a. A Eziptɩ tẽw nãà tɩ be n a Efaratɩ man nʋɔr a Karkemisɩ, a lɛn daar a Babɩlɔn tẽw nãà, Nabikodonozɔɔr, na tɩ zɛb tʋ̃ɔ́ ʋ a. A tɩ ɩ n a Zozɩasɩ bidɛb, Yoyakim, na ɩ a Zuda tẽw nãà a, naalʋ-dɩb, yome anaar sob.

³ A zɛbr-nɩbɛ nɩ-bɛrɛ yere na: «Nyɩ cɔbrɩ a zɛbr-kur-pãgalɩ, a bɛrɛ nɩ a pʋrmɛ! Nyɩ cen a zɛbr ƴãw!

⁴ Nyɩ caw a wie! Nyɩ cen, soja-wi-zɔmnbɛ ɛ! Nyɩ vɔblɩ a nyɩ zɛbr kpawɔ-kpowr! Nyɩ pɩɛrɩ! Nyɩ kàr a nyɩ kafine a nyɩwrɛ, nyɩ su a nyɩ zɛbr-nyãa-kpali!»

⁵ A Sore yere na: Ɛ́ bʋnʋ yaa? Bʋ̃ʋ n'ʋ ɩ̃ nyɛ̃ a? A bɛ kanyir baar'a, bɛ tɩ̃wnɩ nɩ pùor. Bɛ zɛb'a tʋ̃ɔ́ a bɛ soja-gãdaar, a zɔ-ŋmɛ-taa n'a, nɩr bɛ lɩɛbɛ kaar ɛ, a pʋl-vʋ̃ɔ n'a a ziir za.

⁶ A sob nɛ na zɔrɛ zuo bɛ za a kʋ̃ tʋ̃ɔ́ zɔ cɩ̃ɛ ɩ, a soja-gãdaar pʋɔ gãdaa kʋ̃ tʋ̃ɔ́ faa ʋ tʋɔra ɩ. A saa-pɛrɩ́-gʋba-lowr be a, a Efaratɩ man nʋɔr, bɛ dẽdere na lore.

⁷ Ãa n'ʋ ŋmɛ̃ mɛ̃ a Nɩl man na paalɩ yi nɛ́ɛ a, mɛ̃ a man ŋa a kʋ̃ɔ na ìre a?

⁸ A Eziptɩ tẽw n'ʋ. Ʋ tɩ yere na: «Mɛ̃ a Nɩl man na paalɩ yi nɛ́ɛ a, mɛ̃ a ʋ kʋ̃ɔnɩ na paalɛ dúor a, ɩ̃ na paal'a páw a tẽ-daa, sãw a tẽ-bɛrɛ nɩ a nɩbɛ na kpɩɛr a pʋɔ bɛr.

⁹ Wie e, nyɩ ƴaw kpɛ a zɛbr pʋɔ! Zɛbr-torkori i, nyɩ ŋmʋrɛ! Gãdaar i, nyɩ kpɛ a zɛbr pʋɔ: Kusɩ nɩ a Putɩ tẽw dem na tɛr a zɛbr-kur-pãgalɩ a, nɩ Ludɩ tẽw dem na tɛr a tamɛ a!»

¹⁰ Ɛcɛ a Sore, a kpɛnʋ-za-sob zie a, a bibir ŋa ɩ n san-yaafʋ bibir. Ʋ na yáa nɩ a san a ʋ dɔ̃ dem zu. A zɛbr-sɔ-kpɛ̃ɛ dɩrɛ bɛ na, ʋ dɩrɛ na tɩwr, a bɛ zɩ̃ɩ kuole ʋ na. A ɩ na mɛ̃ bàwr'ʋ a Sore, a kpɛnʋ-za-sob, ƴãw a saa-pɛrɩ́-gʋba-lowr, a Efaratɩ man nʋɔr a.

¹¹ Eziptɩ tẽw na ɩrɛ nɩbaalʋ a, do Galaadɩ tẽw tɩ bɔ tɩ̃ɩ-kãá a fʋ natɩɛ sanʋ ƴãw. Ɛcɛ a tɩ̃ɩnɩ yaga deb bɛ tɛr pɛr ɛ, a fʋ natɩr kʋ̃ sanɩ ɛ.

¹² A nɩ-bʋʋrɛ wõ n a fʋ vĩ, bʋ̃ʋ n'ʋ vɛ̃, a fʋ kon yi n a ziir za. A gãdaa zɔ na ŋmɛ gãdaa, bɛ dẽderi tɩ lo a bɛ za ayi.

A Nabikodonozɔɔr kpɛ na so a Eziptɩ tẽw

¹³ A Sore tɩ ƴɛ̀r'ɩ a naaŋmɩn-ƴɛ̀r-manɛ Zeremi zie, a lɛn daar a Babɩlɔn tẽw nãà, Nabikodonozɔɔr, na tɩ wa k'ʋʋ wa zɛb'ɩ a Eziptɩ tẽw a:

¹⁴ «Nyɩ yel a yel a Eziptɩ tẽw pʋɔ, nyɩ ɩ bɛ bãw ʋ a Migɩdɔl, a Mɛmfisɩ nɩ a Dafine tẽ-bɛrɛ pʋɔ. Nyɩ yel bɛ: “Nyɩ ìr! Nyɩ cɔbrɩ a zɛbr ƴãw!” A zɛbr kʋ n a bɛlɩ dem na viiri koli nyɩ a baarɩ!

¹⁵ Ɛ́ bʋnʋ yaa! A Apisɩ zɔrɛ na! A fʋ nadɛr bɛ bàrɛ gbɛ́r ɛ! A Sore dáa ʋ na.

¹⁶ Ʋ dãdawlɛ nɩ faa faa. A nɩbɛ mɩ̀ lore na dɔwlɛ taa. Bɛ yere na kʋ̀rɛ taa: “Nyɩ ìr! Tɩ lɛb kul a tɩ tẽw, zãá nɩ a zɛbr ŋa na bɛ tɛr nɩbaalʋ a!”

¹⁷ A Eziptɩ tẽw nãà, Faarawɔ̃ ƴãw a, nyɩ kʋ̀ ʋ a yo-kpɔwla ŋa: “Gɔmɛ yaga zawlalɛ!”

¹⁸ A nãà a yúor na dɩ kɛ́: “Sore kpɛnʋ-za-sob” a, yere nɩ à ŋá: “Mãa bɛ wa vʋʋrɛ a na, alɛ bɛ ɩ lɛ, a dɔ̃ sob na wa na. A bɛ tɛr bʋnʋ, mɛ̃ a Tabɔɔr tãw a ɩ, a bɛ tɛr bʋnʋ, mɛ̃ a Karmɛl tãw na do gãw a kʋ̃ɔ-kpɛ̃ɛ a ɩ.”

¹⁹ Eziptɩ tẽw dem i, nyɩ cɔbrɩ a nyɩ tuor a tẽ-yũo cenu ƴãw. A Mɛmfisɩ tẽ-kpɛ̃ɛ na lɩɛb'ɩ zie na kpɛ faa yaga a. Ʋ na sãw nɩ ʋ za, nɩr za kʋ̃ lɛb kpɩɛr ʋ ɛ.

²⁰ A Eziptɩ tẽw ɩ na mɛ̃ na-sɩra na vɩɛl a! Ɛcɛ, nakpon na yi saa-pɛrɩ́-gʋba-lowr a, wa na wa dɔm a ʋ zu.

²¹ A Eziptɩ tẽw a, bɛ tɩ kaarɛ nɩ a soja-libi-bɔbrbɛ zie vla za. Ɛcɛ a bɛl mɩ̀ a, bɛ lɩɛbɛ nɩ pùor, bɛ lãw na zɔrɛ. Kãw za bɛ bàrɛ gbɛ́r, a kpɩɛrʋ bibir na vɩɛrɛ a bɛ zu, a lɛn daar ɩ̃ na ìre a bɛ ƴãw a ɩ.

²² A Eziptɩ tẽw zɛbr-nɩbɛ mʋɔlɛ na tɔlɛ mɛ̃ waab a, a lɛn daar a bɛ dɔ̃ dem na waar'ɩ fãw a bɛ ƴãw, tɛr lɛ́ɛ mɛ̃ tɩ-cɩɛrbɛ a.

²³ A Sore yere na: Bɛ sáwr'ɩ a ʋ tuw, a ʋ tuw-zũgulu na bɛ tɛr kpɛb a. Bʋ̃ʋ n'ʋ vɛ̃, bɛ yãwmɛ na zuo sãsoge, nɩr kʋ̃ tʋ̃ɔ́ bɛ sɔr ɛ.

²⁴ Vĩ nyɔw nɩ a Eziptɩ tẽw: Bɛ de ʋ na ƴãw a saa-pɛrɩ́-gʋba-lowr tẽw dem nuru pʋɔ.»

²⁵ A Sore, a kpɛnʋ-za-sob, a Ɩsɩrayɛl Naaŋmɩn, yere na: «Ɩ̃ na wa n a Tɛb tẽ-kpɛ̃ɛ ŋmɩn Amɔ̃ ƴãw, a Eziptɩ tẽw, a ʋ ŋmɩmɛ nɩ a ʋ na-mɩnɛ ƴãw, a Faarawɔ̃ nɩ a bɛlɩ dem na ƴãw a bɛ tɩɛrʋ a ʋ ƴãw a, ƴãw.

²⁶ Ɩ̃ na de bɛ na ƴãw a bɛlɩ dem na bɔbr a bɛ kʋb a nuru pʋɔ: a Babɩlɔn tẽw nãà, Nabikodonozɔɔr, nɩ a ʋ sojarɩ. Ɛcɛ, a pùorí a, nɩbɛ na lɛb'a wa, wa kpɩɛr a Eziptɩ tẽw pʋɔ mɛ̃ a dãwdãw a.» A Sore n'ʋ yel.

A Sore na faa nɩ a Ɩsɩrayɛl

²⁷ «Fʋ̃ʋ Ɩsɩrayɛl, ɩ̃ tõ-tõ-bie e, ta zɔrɛ dɛ̃bɩ̃ɛ ɩ. Ta ɩ kɛ́ dɛ̃bɩ̃ɛ tɛr fʋ yaga za ɩ, fʋ̃ʋ na ɩ a Zakɔb bʋʋrɛ a. Ɩ̃ na faa fʋ nɩ a tẽ-zãánɩ á ŋá pʋɔ, ɛ́ faa a fʋ bʋʋrɛ a ten al pʋɔ bɛ na diw bɛ cen nɩ a. Ɩsɩrayɛl i, fʋ na lɛb'a wa, wa vʋʋrɛ zoom, ɛ́ bɛ bãw damnʋ ɛ. Ɛ́ nɩr za kʋ̃ be be lɛb dam fʋ ɛ.

²⁸ Fʋ̃ʋ Ɩsɩrayɛl, ɩ̃ tõ-tõ-bie e, ta zɔrɛ dɛ̃bɩ̃ɛ ɩ, ɩ̃ lãw nɩ fʋ na k'ɩ̃ɩ tʋ̃ɔ́ faa fʋ, a Sore n'ʋ yel. Ɩ̃ na kʋ n a nɩ-bʋʋr-yoru bɛl pʋɔ ɩ̃ na diw fʋ cen nɩ a, pàw pɛr. Ɛcɛ, fʋ̃ʋ a, ɩ̃ kʋ̃ kʋ fʋ pàw pɛr ɛ. Sɩza n'a, ɩ̃ kpãa fʋ na mɛ̃ a lɛ a na sɛw a. Bʋ̃ʋ n'ʋ vɛ̃, ɩ̃ k'ʋʋ tʋ̃ɔ́ ɩrɛ a fʋ zie mɛ̃ fʋ bɛ tɛr sãwna a ɩ!»