Zeremi 44 - A SƐB-SÕW

Ƴɛ̀rʋ na ƴɛ̀r kʋ̀ a Zuda tẽw dem na zɔ cen a Eziptɩ tẽw a

¹ A Sore tɩ ƴɛ̀r'ɩ a Zeremi zie. A ƴɛ̀rʋ tɩ càar'ɩ a Zuda nɩbɛ za na tɩ kpɩɛr a Eziptɩ tẽw, a Migɩdɔl, a Dafine, a Mɛmfisɩ tẽ-bɛrɛ pʋɔ, nɩ a Patʋrɔsɩ vuo pʋɔ a. A Zeremi tɩ yel bɛ na:

² «À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: “Nyɩ nyɛ̃ nɩ a kpɩɛrʋ al za ɩ̃ na ɩ a páw a Zerizalɛm nɩ a Zuda tẽ-bɛrɛ a. A dɩ̃a a, a lɩɛb'ɩ deboru, nɩr bɛ lɛb cãà kpɩɛr a pʋɔ ɩ.

³ À á ŋá za ta na, a faa bɛ na maalɩ ƴãw a ɩ̃ suur ìr a zũú. Bʋ̃ʋ n'ʋ vɛ̃, bɛ cen na tɩ maalɩ bagɛ kʋ̀ ŋmɩn-yoru ɛ́ maalɩ a. Ɛcɛ bɛ bɛ bãw a ŋmɩmɛ á ŋá ɩ. Lɛb waar mɩ̀, a nyɩɩm nɩ a nyɩ sãàkʋm-kore mɩ́ bɛ tɩ bãw a ɩ.

⁴ Ɩ̃ ƴãw nɩ nũu tõ a ɩ̃ tõ-tõ-biir na ɩ a ɩ̃ ƴɛ̀r-manbɛ, a nyɩ zie, kɛ́ bɛ yel nyɩ: Nyɩ ta maalɛ a yel-faar á ŋá na bɛ maal'ɩ wob ɩ̃ na bɛ nɔ̃w towtow a ɩ!

⁵ Ɛcɛ nyɩ bɛ bɛr wõ ɩ, nyɩ bɛ cɛlɩ be ɩ. Nyɩ bɛ bɛr a faa nyɩ na tɩ maalɛ a ɩ, ɛ́ nɩ̃ɛ cãà cow maalɛ bagɛ kʋ̀rɛ ŋmɩn-yoru.

⁶ Lɛ n'a a ɩ̃ suur, a ɩ̃ su-yãyaar tɩ ìr mɛ̃ vũu a, dɩ a Zuda tẽ-bɛrɛ nɩ a Zerizalɛm tẽw sɛ́ɛ. A lɩɛb'ɩ ziir nɩr na bɛ cãà kpɩɛr a, mɛ̃ a lɛ bɛ na na tʋ̃ɔ́ nyɛ̃ a dɩ̃a a.”»

⁷ A Zeremi tɩ cãà na yel: «Ƴɛrɛŋa a, à ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: “Bʋ̃ʋ n'ʋ so nyɩ ɩrɛ a kpɩɛr nyɩ tʋɔra sɛw à ŋá? Nyɩ bɔbr'a k'aa Zuda nɩbɛ ta cãà tɛr dɛbr, pɔwbɛ, pɔ́lɛ́ nɩ bi-cãpili bɩɩ? Nyɩ bɔbr'a kɛ́ nyɩ ta cãà tɛr bom za bɩɩ?

⁸ Bʋ̃ʋ n'ʋ vɛ̃, nyɩ damnɛ mɛ̃ nɩ suur nɩ a nyɩ ɩ-ɩrɩ: nyɩ maalɛ nɩ bagɛ kʋ̀rɛ ŋmɩn-yoru a Eziptɩ tẽw pʋɔ ka nyɩ na wa kpɩɛr a. Nyɩ na ɩrɛ na tɩ ƴãw bɛ kʋ nyɩ pàw pɛr, ɛ́ nyɩ lɩɛbɩ ŋmɛ-ƴãw nɩ zʋmɛ bom, a nɩ-bʋʋr-yoru sɔgɔ a tẽ-daa za zu.

⁹ Nyɩ yiir'ɩ a faa al a nyɩ sãàkʋm-kore, a Zuda tẽw na-mɩnɛ nɩ a bɛ pɔwbɛ lãwnɩ a nyɩɩm tɛɛ za nɩ a nyɩ pɔwbɛ na tɩ maalɩ a Zuda tẽw nɩ a Zerizalɛm tẽw sɛ́ɛ pʋɔ a, bɛr bɩɩ?

¹⁰ Wa tɩ tɔ a dɩ̃a a, a bɛ ɩ kpɩɛrʋ nɩr kãw za zie ɩ. Nɩr kãw za bɛ tɛr a ɩ̃ ƴãwfʋ ɛ, nɩr za bɛ tu a wulu nɩ a nɛ-ƴãwnɩ ɩ̃ na kʋ̀ a nyɩɩm nɩ a nyɩ sãàkʋm-kore a ɩ.”»

¹¹ A Zeremi tɩ yel'a ƴãw pʋɔ: «A lɛ zũú a, à ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: “Ɩ̃ na lɩɛb'ɩ a nyɩ ƴãw, k'ɩ̃ɩ maalɩ nyɩ faa, ɩ̃ɩ na kʋ n a Zuda tẽw nɩbɛ za pàw pɛr.

¹² Ɩ̃ na de nɩ a Zuda nɩbɛ na cãà cɛ vʋʋrɛ a, a bɛl na zɔ wa a Eziptɩ tẽw wa kpɩɛr a naayir a, ɛ́ bɛ na kpi n bɛ za. A tẽw ŋa pʋɔ n'a bɛ na kpi a zɛbr-sɔ-kpɛ̃ɛ nɩ a kɔ̃ kũu, a pʋrmɛ nɩ a bɛrɛ. Ʋ̃ʋ, à ŋá n'a bɛ na kpi, ɛ́ bɛlɛ wa ŋmɩɛr ƴãwn, bɛlɛ wa ƴɛ̀rɛ bom na kpɛ faa bɛ maal'ɩ wob, bɩɩ bom na ɩ bʋ̃-ŋmɛ-ƴãwna, bɩɩ bom na ɩrɛ nɩr vĩ a ƴɛ̀rʋ a, bɛlɛ nɛbɛ bɛ na mɩ́ de man nɩ.

¹³ Ɩ̃ na wa n a bɛl na kpɩɛr a Eziptɩ tẽw a ƴãw, mɛ̃ a lɛ ɩ̃ na tɩ wa a Zerizalɛm tẽw dem ƴãw nɩ a zɛbr, nɩ a kɔ̃ nɩ a jɛ̀lmɛ̃ bàalʋ a.

¹⁴ A Zuda tẽw nɩbɛ bɛl na cɛ, ɛ́ zɔ wa kpɩɛr a naayir a Eziptɩ tẽw ka a, nɩr kʋ̃ tʋ̃ɔ́ zɔ a bɛ pʋɔ ɩ, nɩr bɛ cɩ̃ɛnɛ ɩ, nɩr bɛ lɛb waar a Zuda tẽw bɛ na bɔbr kɛ́ bɛ lɛb wa kpɩɛr a ɩ. Bɛ bɛ lɛbr waar ɛ, alɛ bɛ ɩ nɩbɛ blãlɛ tɛwr nãà wa cɩ̃ɛ a ɩ.”»

A bagɛ bɛ na maalɩ kʋ̀ a salom pɔw-nãà a

¹⁵ A dɛbr bɛl za na tɩ bãwnɩ a k'aa bɛ pɔwbɛ maalɛ nɩ bagɛ kʋ̀rɛ ŋmɩn-yoru a, nɩ a pɔwbɛ za na tɩ ɓã taa yãwmɛ yaga za, nɩ a nɩbɛ bɛl za na tɩ wa kpɩɛr a Eziptɩ tẽw, a Patʋrɔsɩ a, tɩ sɔw nɩ a Zeremi à ŋá:

¹⁶ «Fʋ na saa yel k'aa Sore yúor ƴãw n'a fʋ ƴɛ̀rɛ a tɩ zie a, tɩ bɛ bɛrɛ wone a fʋ ƴɛ̀rʋ ɛ.

¹⁷ Tɩ na ɩ n a lɛ za tɩ na yel a. Tɩ na nyɩw nɩ tɩ-suur-zɔ̃-na-nyùur-vla-vla-a, de nɩ divɛ̃ kʋ̀ a ŋmɩn-pɔw Asɩtarte, a salom pɔw-nãà, mɛ̃ a lɛ tɩ na ɩ wa tɔ a ka a, a tɩɩm tɛɛ za, a tɩ sãà mɩnɛ, a tɩ na-mɩnɛ nɩ a tõ-tõ-bi-bɛrɛ, a Zuda tẽ-bɛrɛ pʋɔ nɩ a Zerizalɛm sɛ́ɛ zu a. A lɛn daar a, tɩ tɩ tɛr'ɩ bʋ̃-dɩrɩ a man, ɛ́ tɩ vʋʋrɛ nʋ̃ɔ̀ pʋɔ bɛ bãw kpɩɛrʋ ɛ.

¹⁸ Ɛcɛ, tɩ na wa bɛr bɛ cãà nyɩwr a tɩ-suur-zɔ̃-na-nyùur-vla-vla-a ɛ́ bɛ dier a divɛ̃ de-kʋ̀b kʋ̀rɛ a salom pɔw-nãà a, tɩ bɛ tɛr bom za ɩ, ɛ́ a zɛbr nɩ a kɔ̃ kʋrɛ tɩ.»

¹⁹ A pɔwbɛ tɩ yel'a ƴãw pʋɔ: «Tɩ na mɩ́ nyɩwr a tɩ-suur-zɔ̃-na-nyùur-vla-vla-a, dier'ɩ a divɛ̃ kʋ̀rɛ a salom pɔw-nãà a, a tɩ sɩrbɛ bɛ mɩ́ sàw bɩɩ? Bɛ bãwnɩ a na, kɛ́ tɩ mɩ́ maal'ɩ gatori na ɩ a ʋ bãwfʋ a, kʋ̀ ʋ, nɩ kɛ́ tɩ mɩ́ wa n nɩ divɛ̃ de-kʋ̀b wa kʋ̀ ʋ.»

²⁰ Lɛ n'a a Zeremi tɩ yel a nɩbɛ za zie, a dɛbr nɩ a pɔwbɛ na tɩ kʋ̀ ʋ a sɔwfʋ ŋa a:

²¹ «A bagɛ a nyɩɩm, a nyɩ sãà mɩnɛ, a nyɩ na-mɩnɛ, a nyɩ tõ-tõ-bi-bɛrɛ nɩ a tẽw nɩbɛ za na tɩ maalɛ a Zuda tẽw pʋɔ nɩ a Zerizalɛm tẽw sɛ́ɛ pʋɔ a, a Sore cãà na bãwnɩ a, ʋ bɛ yiiri a yele ɩ.

²² A Sore bɛ tɩ tʋ̃ɔ́ nyɔw ʋ tʋɔra a nyɩ ɩ-faa nɩ a yele nyɩ na maalɩ a bɛ maal'ɩ wob a ƴãw ɛ. Alɛ n'a so a nyɩ tẽw lɩɛbɩ debuo, zie na kpɛ faa bɛ cãà tɛr nɩr a, ɛ́ bɛ mɩ́ ŋmɛ ƴãw man nɩ ʋ a. A nɩbɛ za na tʋ̃ɔ́ na cãà nyɛ̃ a, a dɩ̃a.

²³ Nyɩ na maalɩ bagɛ kʋ̀ ŋmɩn-yoru a, nyɩ na maalɩ yel-bier sãw a Sore a, alɛ n'a so a kpɩɛrʋ á ŋá ta nyɩ. Nyɩ bɛ bɛr wõ ʋ ɛ, bɛ tu a ʋ wulu ɛ, a ʋ nɛ-ƴãwnɩ nɩ a ʋ kpãàfʋ ɛ. A nɩbɛ za na tʋ̃ɔ́ na cãà nyɛ̃ a, a dɩ̃a.»

²⁴ A Zeremi tɩ lɛb'a yel a nɩbɛ za nɩ a pɔwbɛ za zie à ŋá: «Nyɩ bɛr wõ a Sore ƴɛ̀rʋ, a nyɩɩm Zuda tẽw nɩbɛ za na be a Eziptɩ tẽw pʋɔ a.

²⁵ À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: Nyɩɩm nɩ a nyɩ pɔwbɛ a, nyɩ yel'a: “Tɩ yel'a kɛ́ tɩ na nyɩw nɩ tɩ-suur-zɔ̃-na-nyùur-vla-vla-a kʋ̀ a salom pɔw-nãà, de nɩ divɛ̃ kʋ̀ ʋ. Ɛ́ tɩ bɔbr'a kɛ́ tɩ tu a lɛ tɩ na yel a.” Ãa, nyɩ tu a, nyɩ ɩ a lɛ nyɩ na yel a!

²⁶ Ɛcɛ nyɩɩm za, Zuda tẽw dem na kpɩɛr a Eziptɩ tẽw a, nyɩ bɛr wõ vla a lɛ ɩ̃ na yere kʋ̀rɛ nyɩ a! A mãa Sore, ɩ̃ pɔrɛ nɩ nɩ a ɩ̃ yúor na ɩ kpɛ̃ɛ a: A Eziptɩ tẽw za pʋɔ a, Zuda tẽw nɩr kãw za kʋ̃ mɩ́ lɛb por a ɩ̃ yúor, ʋlɛ wa bɔbr k'ʋʋ kõ nʋɔr a lɛn daar a ɩ. Nɩr za kʋ̃ mɩ́ lɛb yel à ŋá ɩ: “Ɩ̃ pɔ n a Sore na vʋʋrɛ a yúor ƴãw...”

²⁷ Ɩ̃ na ìr'ɩ a bɛ ƴãw, a kʋ̃ ɩ a bɛ vla ƴãw ɛ, ɛcɛ a na ɩ n a bɛ faa ƴãw. A Zuda tẽw nɩbɛ bɛl za na be a Eziptɩ tẽw a, zɛbr nɩ kɔ̃ na kʋ bɛ na, tɩ kʋ pàw pɛr.

²⁸ Nɩbɛ blãlɛ tɛwr'a na tʋ̃ɔ́ cɩ̃ɛ a zɛbr pʋɔ, ɛ́ bɛ na yi n a Eziptɩ lɛb wa a Zuda tẽw. A lɛ pʋɔ a, a nɩbɛ bɛl na cɛ yi a Zuda tẽw wa wa kpɩɛr a Eziptɩ tẽw a, na bãw nɩ sob nɛ ƴɛ̀rʋ na tu a: a mãa dem'a bɩɩ a nyɩɩm dem'a a.

²⁹ A mãa, a Sore, ɩ̃ yere na: Ɩ̃ na wa n a nyɩ ƴãw a Eziptɩ tẽw ka. Ɩ̃ na kʋ̀ nyɩ nɩ bãwfʋ. Lɛ n'a nyɩ na nyɛ̃ bãw k'aa ɩ̃ ƴɛ̀rʋ ɩ̃ na ƴɛ̀r a nyɩ malʋ ƴãw a, na sɩrɩ na tu. A bãwfʋ ʋl n'ɩ ŋa:

³⁰ Ɩ̃ na de nɩ a Eziptɩ tẽw nãà, a Faarawɔ̃ Hofɩra, ƴãw a ʋ dɔ̃ dem na bɔbr a ʋ kʋb a nuru pʋɔ, mɛ̃ a lɛ ɩ̃ na tɩ de a Zuda tẽw nãà, Sedesɩasɩ, ƴãw a ʋ dɔ̃ sob, a Babɩlɔn tẽw nãà, Nabikodonozɔɔr, na tɩ bɔbr a ʋ kʋb a, nuru pʋɔ a. A mãa, a Sore, mãa n'ʋ yel.»