Zeremi 43 - A SƐB-SÕW

Bɛ fɛr'ɩ a Zeremi cen nɩ a Eziptɩ tẽw

¹ A ƴɛ̀rʋ al za bɛ na lɛb yel a ka a, a Zeremi tɩ yel a na kʋ̀ a nɩbɛ za na tɩ be a be a baarɩ. A ƴɛ̀rʋ a Sore bɛ Naaŋmɩn na tɩ ƴãw ʋ yel kʋ̀ bɛ a n'a.

² Lɛ n'a Hosaya bidɛb, Azarɩa, Karea bidɛb, Yohanan nɩ a nɩbɛ bɛl za na ɩrɛ pɔ̀lʋ a, tɩ yel a Zeremi: «Zir-ŋmarɛ nɛ b! A Sore tɩ Naaŋmɩn bɛ tõ fʋ a tɩ zie, kɛ́ fʋ wa yel tɩ à ŋá ɩ: “Nyɩ taa wa cere a Eziptɩ tẽw tɩ kpɩɛr naayir ɛ.”

³ Ɛcɛ a Neriya bidɛb, Barukɩ, ʋlɛ n'ʋ dɔ̀nɛ fʋ ƴãwn a tɩ ƴãw, ʋ bɔbr'a k'ʋʋ de tɩ ƴãw a Babɩlɔn tẽw dem nuru pʋɔ, kɛ̀ bɛ kʋ tɩ, bɩɩ diw tɩ cen nɩ a Babɩlɔn tẽw.»

⁴ À ŋá n'a a Karea bidɛb, Yohanan, a zɛbr-nɩbɛ nɩ-bɛrɛ bɛ mɩnɛ, nɩ a nɩbɛ na tɩ bɩɛlɛ bɛ a, tɩ zawrɩ na bɛr wõ a lɛ a Sore na yel a, ɛ́ tɩ zawrɩ na kpɩɛr a Zuda tẽw pʋɔ.

⁵ Lɛ n'a a Yohanan nɩ a zɛbr-nɩbɛ nɩ-bɛrɛ tɩ tɛr a nɩbɛ bɛl na cãà vʋʋrɛ, ɛ́ kpɩɛr a Zuda tẽw pʋɔ a, cen nɩ. A tɩ ɩ n a bɛlɩ dem bɛ na tɩ dãw diw yaarɩ a ziir za a tẽ-kpɔwlɩ pʋɔ, ɛ́ bɛ lɛb wa kpɩɛr a Zuda tẽw pʋɔ a:

⁶ dɛbr, pɔwbɛ, bibiir, a nãà pɔwyaar, a nɩbɛ bɛl za a soja-zi-gùrbɛ nɩ-kpɛ̃ɛ, Nebuzaradan, na tɩ kʋ̀ a Gedalɩasɩ, na ɩ Ahikam bidɛb nɩ Safan yãw, ʋ kaarɛ a. Bɛ mɩ̀ tɩ tɛr'ɩ a naaŋmɩn-ƴɛ̀r-manɛ Zeremi nɩ a Neriya bidɛb, Barukɩ, cen nɩ.

⁷ Bɛ tɩ zawr'ɩ a lɛ a Sore na yel kʋ̀ bɛ a, ɛ́ cen Eziptɩ tɩ ta Dafine.

A Zeremi yere nɩ a Eziptɩ tẽw zɛb-deb yele

⁸ A Dafine be a, a Sore tɩ ƴɛ̀r'ɩ a Zeremi zie yel à ŋá:

⁹ «De kʋsɛ-bɛrɛ, ũù a gbòró ʋl na pɩɛlɩ a Faarawɔ̃ yir dɩ̃dɔr a tanɛ pʋɔ, a Dafine. Ɩ a lɛ a Zuda tẽw dem niŋé.

¹⁰ Al pùorí, fʋ na yel bɛ nɩ à ŋá: “Nyɛ̃ a lɛ a Sore, a kpɛnʋ-za-sob, a Ɩsɩrayɛl Naaŋmɩn, na yere a: Ɩ̃ na tõ na bɛ tɩ tɛr a ɩ̃ tõ-tõ-bie, Nabikodonozɔɔr, a Babɩlɔn tẽw nãà, wa n. Ɩ̃ na wa zɩɩl'ɩ a ʋ naalʋ-dà-kɔw a kʋsɛbɛ à ŋá fʋ na ũù a zu. A be n'a ʋ na maalɩ a ʋ naalʋ pɛn-sɛw.

¹¹ Ʋlɛ wa ta a, ʋ na zɛb'a tʋ̃ɔ́ a Eziptɩ tẽw. Ʋ na kʋ n a bɛlɩ dem a na fɛr kɛ́ bɛ kpi a, a bɛlɩ dem a na fɛr kɛ́ bɛ diw cen nɩ a, ʋ na diw bɛ na cen nɩ, a bɛlɩ dem a na fɛr kɛ́ bɛ kpi a zɛbr-sɔ-kpɛ̃ɛ kũu a, ʋ na kʋ bɛ na nɩ a zɛbr-sɔ-kpɛ̃ɛ.

¹² Ʋ na nyɩw nɩ a Eziptɩ tẽw ŋmɩmɛ yie bɛr. Ʋ na nyɩw nɩ a ŋmɩmɛ á ŋá bɛr bɩɩ wob a kul'ɩ. Ʋ na ƴãw nɩ fãw de a Eziptɩ tẽw na-bome za, mɛ̃ bʋ̃-cɩ̃ɩnɛ na ƴãw fãw vɩɛrɩ nyɔw a ʋ kparɩ cibe a. Al pùorí, ʋ na lɛb'a kul'ɩ ƴã-ɓaarʋ.

¹³ A Eziptɩ tẽw a, ʋ na ŋmɛ n a Heliopolisɩ kʋsɛbɛ kpul-teli kar, ɛ́ nyɩw a Eziptɩ tẽw ŋmɩmɛ yie bɛr.”»