Zeremi 42 - A SƐB-SÕW

A Zeremi wule nɩ a zɛbr-nɩbɛ nɩ-bɛrɛ yã, kɛ́ bɛ taa cere a Eziptɩ tẽw ɛ

¹ Lɛ n'a a zɛbr-nɩbɛ nɩ-bɛrɛ za, baa zuo a za, a Karea bidɛb, Yohanan, nɩ a Hosaya bidɛb, Azarɩa, nɩ a bɛlɩ dem za na tɩ be be a, a pʋrmɛ nɩ a bɛrɛ, tɩ taw pɩɛlɩ

² a naaŋmɩn-ƴɛ̀r-manɛ Zeremi, ɛ́ yel ʋ à ŋá: «Yãayãa, sàw a tɩ zɛlʋ! Puori a Sore fʋ Naaŋmɩn kʋ̀ a tɩɩm na cãà vʋʋrɛ a. Bʋ̃ʋ n'ʋ vɛ̃, tɩ tɩ yãwmɛ na, ɛcɛ tɩ bɛ lɛb cãà yãwmɛ ɩ, mɛ̃ a lɛ fʋ na nyɛ̃ a.

³ Zɛlɩ a Sore fʋ Naaŋmɩn, ʋ wul tɩ a sɔ́r ʋl tɩ na na tu, nɩ bom nɛ tɩ na na ɩ a.»

⁴ A naaŋmɩn-ƴɛ̀r-manɛ Zeremi tɩ sɔw bɛ na: «Ɩ̃ wõ a na! Ɩ̃ na puor'ɩ a Sore tɩ Naaŋmɩn mɛ̃ a lɛ nyɩ na zɛlɩ a. Al pùorí, ɩ̃ na ɩ na nyɩ bãw a Sore sɔwfʋ, ɩ̃ kʋ̃ sɔwlɩ nyɩ bom za ɩ.»

⁵ Bɛ tɩ sɔw nɩ a Zeremi à ŋá: «Tɩ na tu n a lɛ tɔr za a Sore fʋ Naaŋmɩn nãà wa yel kɛ́ fʋ yel kʋ̀ tɩ a. A Sore, ʋ ɩ a dãsɩ-yel-mɩŋa sob bɛ na bɛ bʋ́nɛ nɩ a, a tɩ ƴãw!

⁶ Tɩ tone fʋ na kɛ́ fʋ tɩ sowri a Sore tɩ Naaŋmɩn. Tɩ na ɩ n a lɛ ʋ na na yel kʋ̀ tɩ a, a nʋmɛ nɩ a tɩ zie bɩɩ a bɛ nʋmɛ a tɩ zie a. Lɛ n'a bom za na ɩ vla a tɩ zie, tɩ na na bɛr wõ a Sore tɩ Naaŋmɩn a ƴãw.»

⁷ Bibie pie pùorí a, a Sore tɩ ƴɛ̀r'ɩ a Zeremi zie.

⁸ Lɛ n'a a Zeremi tɩ bʋɔlɩ a Karea bidɛb, Yohanan, nɩ a zɛbr-nɩbɛ nɩ-bɛrɛ na tɩ lãw nɩ ʋ a, nɩ a nɩbɛ za, a pʋrmɛ nɩ a bɛrɛ.

⁹ Ʋ tɩ yel bɛ na: «À ŋá n'a a Sore, a Ɩsɩrayɛl Naaŋmɩn, yere, a ʋl zie nyɩ na tõ m k'ɩ̃ɩ tɩ páw ʋ nɩ a nyɩ yãayãa zɛlʋ puoru a:

¹⁰ “Nyɩmɛ wa sàw na cãà kpɩɛr a tẽw ŋa pʋɔ a, ɩ̃ na lɛb'a mɛ nyɩ, ɩ̃ kʋ̃ lɛb sãw nyɩ bɛr towtow ɛ. Ɩ̃ na sɛl nyɩ na, ɛ́ kʋ̃ lɛb vʋ̃ɔ nyɩ bɛr towtow ɛ. A faa ɩ̃ na maalɩ nyɩ a na ɩ mɛ̃ nɩ kpɩɛrʋ.

¹¹ Nyɩ ta cãà zɔrɛ a Babɩlɔn tẽw nãà dɛ̃bɩ̃ɛ ɩ. A mãa, a Sore, ɩ̃ yere na kʋ̀rɛ nyɩ: Nyɩ ta cãà zɔrɛ ʋ ɛ, bʋ̃ʋ n'ʋ vɛ̃, ɩ̃ be n a nyɩ zie k'ɩ̃ɩ faa nyɩ, ɛ́ ír nyɩ a ʋ nuru pʋɔ.

¹² Ɩ̃ na ɩ na ʋ zɔ a nyɩ nɩbaalʋ: Ʋ na zɔ n a nyɩ nɩbaalʋ, ɛ́ bɛr nyɩ a nyɩ tẽw pʋɔ.”»

¹³ A Zeremi tɩ cow na yel: «Kapaw, nyɩ na zawr'a na bɛr wõ a Sore nyɩ Naaŋmɩn ƴɛ̀rʋ ɛ́ yel: “Aɩ, tɩ bɛ bere a ka ɩ.

¹⁴ Tɩ na nɩ̃ɛ na cen Eziptɩ tẽw. A be a, tɩ kʋ̃ lɛb nyɛ̃ zɛbr nɩ mimir ɛ, tɩ kʋ̃ lɛb wõ a zɛbr wɩ́ɛ pɛblʋ ɛ, tɩ kʋ̃ lɛb bɔ bʋ̃-dɩra gù ɛ, a be n'a tɩ bɔbr kɛ́ tɩ kpɩɛr.”

¹⁵ A lɛ pʋɔ, a nyɩɩm Zuda nɩbɛ na cɛ vʋʋrɛ a, nyɩ bɛr wõ a Sore ƴɛ̀rʋ! À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: “Nyɩmɛ wa sɩrɩ yel kɛ́ nyɩ na cen nɩ a Eziptɩ tẽw a, nyɩmɛ wa cen tɩ kpɛ a naayir a be a,

¹⁶ a zɛbr dɛ̃bɩ̃ɛ nyɩ na zɔrɛ a na páw nyɩ nɩ a be, a Eziptɩ tẽw. A kɔ̃ na ƴãwnɛ nyɩ tɩɛrʋ a, na diw na bɩɛrɩ nyɩ tɩ sãá a be, ɛ́ a be n'a nyɩ na tɩ kpi.

¹⁷ A bɛlɩ dem za nãà wa lo a sɔ́r kɛ́ bɛ cen a Eziptɩ tɩ kpɛ naayir a, bɛ na kpi n a zɛbr, a kɔ̃ nɩ a jɛ̀lmɛ̃ bàalʋ kũu. A bɛ kãw za kʋ̃ cɩ̃ɛ a faa ɩ̃ na na ɩ ʋ lo a bɛ zu a pʋɔ ɩ.”»

¹⁸ A Zeremi tɩ cãà na yel: «À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: “Mɛ̃ a lɛ a ɩ̃ su-tʋlʋ na tɩ ìr a Zerizalɛm nɩbɛ ƴãw a, lɛ mɩ̀ n'a ɩ̃ na bɛr a ɩ̃ su-tʋlʋ ʋ ìr a nyɩ ƴãw, nyɩmɛ wa cen a Eziptɩ tẽw a. Lɛ n'a bɛlɛ wa ŋmɩɛr ƴãwn, bɛlɛ wa ƴɛ̀rɛ bom na kpɛ faa bɛ maal'ɩ wob, bɩɩ bom na ɩ bʋ̃-ŋmɛ-ƴãwna ƴɛ̀rʋ, bɩɩ bɛlɛ wa bɔbr kɛ́ bɛ ƴãw nɩr vĩ a, nyɩmɛ nɛbɛ bɛ na mɩ́ de man nɩ. Ɛ́ nyɩ kʋ̃ lɛb nyɛ̃ a tẽw ŋa towtow ɛ.”»

¹⁹ A Zeremi tɩ yel'a ƴãw pʋɔ: «Nyɩɩm Zuda nɩbɛ na cãà cɛ vʋʋrɛ a, a Sore yere na kʋ̀rɛ nyɩ: Nyɩ taa cere a Eziptɩ tẽw ɛ! Nyɩ bãwnɩ a vla ɩ̃ na bɛ yere a yel ŋa kʋ̀rɛ nyɩ lãwnɩ dɩ̃ɛnʋ a.

²⁰ Nyɩ tɩ ƴãw mɛ̃ na k'ɩ̃ɩ sowri a Sore nyɩ Naaŋmɩn kaa. Nyɩ tɩ yel mɛ̃ na: “Puori a Sore tɩ Naaŋmɩn a tɩ ƴãw. Yel a lɛ tɔr za ʋ na na yel kʋ̀ b a kʋ̀ tɩ, ɛ́ tɩ na tu na.” A lɛn daar a, nyɩ bɛ tɩ tɩɛrɩ ɛ ɛ́ ƴɛ̀r, ƴãw nyɩ tʋɔra kũu pʋɔ.

²¹ Dɩ̃a a, ɩ̃ yel'ɩ a Sore tɩ Naaŋmɩn sɔwfʋ kʋ̀ nyɩ. Ɛcɛ nyɩ bɛ bɛrɛ wone bom kãw za a Sore na tõ m k'ɩ̃ɩ yel kʋ̀ nyɩ a ɩ.

²² A na ɩ lɛ a, nyɩ bãwnɩ a kɛ́ nyɩ na kpi n zɛbr, kɔ̃ nɩ jɛ̀lmɛ̃ bàalʋ kũu a tẽw ʋl pʋɔ nyɩ na bɔbr kɛ́ nyɩ cen tɩ kpɛ naayir a!»