Zeremi 40 - A SƐB-SÕW

A Zeremi cen na tɩ kpɩɛr Misɩpa

¹ A soja-zi-gùrbɛ nɩ-kpɛ̃ɛ, Nebuzaradan, na tɩ bɛr a Zeremi ʋ yi a Arama tẽw cen a pùorí n'a a Sore tɩ ƴɛ̀r a Zeremi zie. A Zeremi bɛ na tɩ 'lẽ nɩ bãzɔlɛ a, tɩ be n a Zerizalɛm nɩ a Zuda nɩbɛ bɛl bɛ na na diw cen nɩ a Babɩlɔn a pʋɔ. A lɛn daar'a a soja-zi-gùrbɛ nɩ-kpɛ̃ɛ tɩ ír ʋ a nɩbɛ bɛl pʋɔ.

² A soja-zi-gùrbɛ nɩ-kpɛ̃ɛ tɩ tɛr'ɩ a Zeremi taw yi n pùor yel ʋ: «A Sore fʋ Naaŋmɩn tɩ ƴɛ̀r'ɩ a kpɩɛrʋ ŋa ƴɛ̀rʋ càar'ɩ a Zerizalɛm.

³ A Sore ɩ na a kpɩɛrʋ ta, ʋ tu n a lɛ za ʋ na tɩ yel a. Bʋ̃ʋ n'ʋ vɛ̃, nyɩ sãw nɩ a Sore, nyɩ bɛ bɛr wõ a ʋ ƴɛ̀rʋ ɛ, alɛ n'a so à á ŋá za ta nyɩ.

⁴ Ɛcɛ, ƴɛrɛŋa a, a dɩ̃a tɔr za a, ɩ̃ na ír'ɩ a fʋ bamɛ bɛr fʋ. Fʋ̃ʋ wa bɔbr kɛ́ fʋ tu m cen a Babɩlɔn a, fʋ̃ʋ wa, ɩ̃ɩ na tɩ kaarɛ nɩ a fʋ zie. Ɛcɛ fʋ̃ʋ bɛ wa bɔbr a, ta wa ɩ. A tẽw za be n a fʋ niŋé, cen zie nɛ za na pɛlɩ a fʋ pʋɔ ɛ́ fʋ bɔbr a cenu a.»

⁵ A Zeremi na bɛ tɩ lɛbr cere a, a Nebuzaradan tɩ yel'a ƴãw pʋɔ: «Lɛb cen a Ahikam bidɛb, Gedalɩasɩ na ɩ Safan yãw a zie. A Babɩlɔn tẽw nãà ƴãw na ʋ ɩ a na-kpɛ̃ɛ-lɩɛrɛ, a Zuda tẽ-bɛrɛ ƴãw. Cen tɩ kpɩɛr a ʋ zie a fʋ nɩbɛ pʋɔ, bɩɩ cen zie nɛ za fʋ bɔbr kɛ́ fʋ cen a.» Al pùorí, a soja-zi-gùrbɛ nɩ-kpɛ̃ɛ tɩ kʋ̀ n bʋ̃-dɩrɩ a Zeremi a sɔ́r loba ƴãw. Ʋ tɩ kʋ̀ ʋ nɩ bʋ̃-kʋ̀ra, ɛ́ bɛr ʋ k'ʋ cen.

⁶ Lɛ n'a a Zeremi tɩ cen a Misɩpa a Gedalɩasɩ zie, ɛ́ tɩ lãwnɩ ʋ kpɩɛr a nɩbɛ na tɩ cãà be a tẽw pʋɔ a sɔgɔ.

A Zuda tẽw dem ɓã n taa a Gedalɩasɩ zie

⁷ A zɛbr-nɩbɛ nɩ-bɛrɛ nɩ a bɛ zɛbr-nɩbɛ na tɩ be a kura pʋɔ a, tɩ wõ na k'aa Babɩlɔn tẽw nãà, tɩ ƴãw na Ahikam bidɛb, Gedalɩasɩ, ɩ a tẽw na-kpɛ̃ɛ-lɩɛrɛ. Ʋ de nɩ a nan dem, dɛbr, pɔwbɛ nɩ bibiir kʋ̀ ʋ, a bɛl bɛ na bɛ tɩ diw cen nɩ a Babɩlɔn a.

⁸ A Zɛbr-nɩbɛ nɩ-bɛrɛ bɛ ŋa, nɩ a bɛ nɩbɛ tɩ wa na wa páw a Gedalɩasɩ a Misɩpa: Netanɩahu bidɛb, Yisɩmayɛl, Karea bidɛbr, Yohanan nɩ Yonatan, Tanhumɛtɩ bidɛb, Seraya, Netofa tẽw Ofaɩ bidɛbr, nɩ Maaka bidɛb, Yezanɩahu tɩ nɛbɛ.

⁹ A Ahikam bidɛb, Gedalɩasɩ na ɩ a Safan yãw a, tɩ pɔ na yel a zɛbr-nɩbɛ nɩ-bɛrɛ nɩ a zɛbr-nɩbɛ zie à ŋá: «Nyɩ ta zɔrɛ dɛ̃bɩ̃ɛ ɩ, nyɩ sàw a Babɩlɔn tẽw dem nɩ-kpɛ̃ɛnʋ. Nyɩ kpɩɛr a tẽw pʋɔ, ɛ́ tone a Babɩlɔn tẽw nãà tome, ɛ́ a na vɩɛl'ɩ a nyɩ zie.

¹⁰ A mãa a, ɩ be n a Misɩpa ka, k'ɩ̃ɩ tʋ̃ɔ́ mɩ́ ƴɛ̀r a Babɩlɔn tẽw dem na mɩ́ waar a tɩ zie a, a nyɩ yúor ƴãw. Ɛcɛ a nyɩɩm a, nyɩ dier a divɛ̃ tɩɩr wɔmɛ, a tɩ-wɔmɛ nɩ a kãá. Nyɩ mɩ́ maal bin a nyɩ bʋ̃-dieri, ɛ́ kpɩɛr a tẽ-bɛrɛ al nyɩ na be a pʋɔ.»

¹¹ Lɛ mɩ̀ n'a, a Zuda tẽw nɩbɛ na tɩ be a Mowab, a Amɔ̃, a Edɔm ten pʋɔ nɩ a ziir za a, tɩ wõ na k'aa Babɩlɔn tẽw nãà tɩ bɛr'ɩ nɩbɛ ŋmãa a Zuda tẽw, ɛ́ ƴãw Ahikam bidɛb, Gedalɩasɩ, na ɩ Safan yãw a, ʋ kaarɛ a bɛ zie.

¹² Lɛ n'a bɛ tɩ yi a ziir al za bɛ na tɩ diw bɛ yaarɩ a lɛb wa. Bɛ na wa ta a Zuda tẽw pʋɔ, a Gedalɩasɩ zie a Misɩpa a, bɛ tɩ de nɩ bʋ̃-dieri yaga, a divɛ̃ nɩ a tɩ-wɔmɛ.

A Gedalɩasɩ kʋb yele

¹³ Bɛ na wa tɩ ta a Gedalɩasɩ zie, a Misɩpa a, a Karea bidɛb, Yohanan, nɩ a zɛbr-nɩbɛ nɩ-bɛrɛ bɛl na tɩ cãà be a kura pʋɔ a,

¹⁴ tɩ yel ʋ na: «Fʋ bɛ bãw k'aa Amɔ̃ tẽw nãà, Baalisɩ, ƴãw na kɛ́ Netanɩa bidɛb, Yisɩmayɛl, kʋ b ɛ?» Ɛcɛ, a Ahikam bidɛb, Gedalɩasɩ, bɛ tɩ sàw a bɛ ƴɛ̀rʋ ɛ.

¹⁵ Ɛcɛ, a Yohanan tɩ wa na wa sɔwlɩ páw a Ahikam bidɛb, Gedalɩasɩ, a Misɩpa, yel ʋ: «Kʋ̀ m sɔ́r ɩ̃ cen tɩ kʋ a Netanɩa bidɛb, Yisɩmayɛl, ɛ́ nɩr za ta bãwnɩ a ɩ. Fʋ sɩrɩ na bɔbr k'ʋʋ kʋ b bɩɩ? Ʋlɛ wa kʋ b a, a Zuda tẽw dem na ɓã taa a fʋ zie a na lɛb'a zɔ yaarɩ, ɛ́ a ʋlɩ bom nɛ na cãà cɛ a Zuda naalʋ-tẽw a na bɔr a.»

¹⁶ Ɛcɛ a Gedalɩasɩ tɩ sɔw nɩ a Yohanan: «Taa ɩrɛ a lɛ ɩ! A lɛ fʋ na yere a Yisɩmayɛl ƴãw a bɛ ɩ sɩza ɩ.»