Zeremi 39 - A SƐB-SÕW

¹ A Zuda tẽw nãà, Sedesɩasɩ, naalʋ-dɩb yome piwaɩ sob, a cuwr pie sob daar a, a Babɩlɔn tẽw nãà, Nabikodonozɔɔr, tɩ wa n nɩ a ʋ zɛbr-nɩbɛ za wa zɛb'ɩ a Zerizalɛm.

² A Sedesɩasɩ naalʋ-dɩb yome pie nɩ been sob, a cuwr piwaɩ sob daar a, a Babɩlɔn tẽw dem tɩ ŋmɛ n a tẽ-kpɛ̃ɛ dacin puo.

³ Lɛ n'a a Babɩlɔn tẽw nãà zɛbr-nɩbɛ nɩ-bɛrɛ tɩ kpɛ a Zerizalɛm, cen tɩ zɩ̃ a tẽ-kpɛ̃ɛ sɔwlɩsɔw dɩ̃dɔr ƴãw. A be a, Nɛrgal-Sarɛsɛɛr na ɩ a zɛbr-nɩbɛ nɩ-kpɛ̃ɛ a, Sin-Magiir, Nebu-Sarsekim na ɩ a nãà tõ-tõ-biir nɩ-kpɛ̃ɛ a, nɩ a Babɩlɔn tẽw nãà zɛbr-nɩbɛ nɩ-bɛrɛ za nɛbɛ tɩ be be.

⁴ A Zuda tẽw nãà, Sedesɩasɩ, nɩ a ʋ zɛbr-nɩbɛ na dɛ wa nyɛ̃ bɛ a, bɛ zɔ na. A zie na wa sɔb a, bɛ tu n a nãà zaadɛ̃ pʋɔ nɩ a dɩ̃dɔr na be a dacĩ-bɛrɛ ayi cara pʋɔ a, yi a tẽw pʋɔ. Al pùorí bɛ de a sɔ́r na cere a Zurdɛ̃ fʋɔlá a.

⁵ Ɛcɛ a Babɩlɔn tẽw zɛbr-nɩbɛ tɩ ta na tu bɛ. Bɛ tɩ páw nɩ a Sedesɩasɩ a Zeriko tɩ̃talɩ́. A sojarɩ tɩ nyɔw ʋ na, ɛ́ tɛr ʋ cen nɩ Irivɩla na be a Hamatɩ tẽw pʋɔ a, tɩ kʋ̀ a Babɩlɔn tẽw nãà Nabikodonozɔɔr, ʋ dɩ n ʋ ƴɛ̀rʋ.

⁶ A Irivɩla be a, a Babɩlɔn tẽw nãà tɩ ƴãw na bɛ ŋmaarɩ a Sedesɩasɩ bidɛbr kɔkɛɛ a bɛ sãà, Sedesɩasɩ, mimirí. A Babɩlɔn tẽw nãà mɩ̀ tɩ ƴãw na bɛ ŋmaarɩ a Zuda tẽw nɩ-yée kɔkɛɛ.

⁷ Al pùorí, ʋ ƴãw bɛ cɔ̀r a Sedesɩasɩ mimie kpol, ɛ́ 'lẽ ʋ nɩ kur-zɩɛ bãzɔlɛ ayi na ɓɛrɩ taa a, cen nɩ a Babɩlɔn tẽw.

⁸ A Babɩlɔn tẽw zɛbr-nɩbɛ tɩ nyɩw nɩ a nãà yir nɩ a nɩbɛ yie bɛr, ɛ́ dá a Zerizalɛm tẽw dacine lɔb.

⁹ Al pùorí, a soja-zi-gùrbɛ nɩ-kpɛ̃ɛ, Nebuzaradan, tɩ tɛr'ɩ a bɛlɩ dem na tɩ cɛ be a tẽ-kpɛ̃ɛ pʋɔ a, cen nɩ a Babɩlɔn. Ʋ mɩ̀ tɩ ƴãw na bɛ ír a bɛlɩ dem na tɩ de bɛ tʋɔra kʋ̀ a Babɩlɔn tẽw nãà a, ɛ́ mɩ̀ tɩ ír a nuru-tõ-bãwnbɛ na cɛ a cen nɩ.

¹⁰ Ɛcɛ ʋ tɩ bɛr'ɩ a nɩbɛ pʋɔ nan dem ŋmãa a Zuda tẽw pʋɔ, a bɛlɩ dem na bɛ tɩ tɛr bom za a, ɛ́ tɩ kʋ̀ bɛ divɛ̃ tɩɩr póru nɩ póru a mɩnɛ.

A Zeremi so nɩ ʋ tʋɔra

¹¹ A Zeremi ƴãw a, a Babɩlɔn tẽw nãà, Nabikodonozɔɔr, tɩ yel'ɩ à ŋá kʋ̀ a soja-zi-gùrbɛ nɩ-kpɛ̃ɛ, Nebuzaradan:

¹² «Cen tɩ tɛr ʋ, kaarɛ a ʋ zie, nɩr za taa wa ɩrɛ ʋ faa ɩ, ɛ́ mɩ́ kʋ̀ ʋ a alɩ bome nɛ ʋ na na zɛlɩ a.»

¹³ A soja-zi-gùrbɛ nɩ-kpɛ̃ɛ, Nebuzaradan, a nãà tõ-tõ-biir nɩ-kpɛ̃ɛ, Nebusazɩban, a zɛbr-nɩbɛ nɩ-kpɛ̃ɛ, Nɛrgal-Sarɛsɛɛr, nɩ a nãà zɛbr-nɩbɛ nɩ-bɛrɛ za,

¹⁴ tɩ tõ na kɛ́ bɛ tɩ tɛr a Zeremi a soja-zi-gùrbɛ davʋra pʋɔ, wa n wa kʋ̀ Ahikam bidɛb, Gedalɩasɩ na ɩ Safan yãw a. A Gedalɩasɩ tɩ kʋ̀ n sɔ́r a Zeremi, ʋ lɛb kul a ʋ yir. À ŋá n'a a Zeremi tɩ kpɩɛr a nɩbɛ sɔgɔ.

A Evɛdɩ-Mɛlɛkɩ faafʋ ƴɛ̀rʋ a Sore na ƴɛ̀r a

¹⁵ A lɛn daar bɛ na tɩ cãà pàw a Zeremi a soja-zi-gùrbɛ davʋra pʋɔ a, a Sore tɩ ƴɛ̀r'ɩ a ʋ zie à ŋá:

¹⁶ «Cen tɩ yel a Etiopi tẽw nɩr, Evɛdɩ-Mɛlɛkɩ à ŋá: “À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: Vla ƴɛ̀rʋ bɛ n'a ɩ̃ tɩ yel kʋ̀ a tẽ-kpɛ̃ɛ ŋa nɩbɛ ɩ, faa ƴɛ̀rʋ n'a. A na ɩ à ŋá a, ɩ̃ na ɩ n a lɛ ɩ̃ na yel a, ɛ́ fʋ kʋ̃ yaa kɛ́ nyɛ̃ ʋ ɛ.

¹⁷ A lɛn daar a, ɩ̃ na faa fʋ na— a mãa, a Sore, mãa n'ʋ yel— ɛ́ fʋ kʋ̃ lo a bɛlɩ dem na ƴãwnɛ fʋ dɛ̃bɩ̃ɛ a nuru pʋɔ ɩ.

¹⁸ Ɩ̃ na faa fʋ na, bʋnʋ bɛ ka be ɩ, fʋ bɛ kpiir a zɛbr-sɔ-kpɛ̃ɛ kũu ɛ, fʋ na cãà na vʋʋrɛ. Fʋ na nyɛ̃ na fʋ na tɛr zu-nʋ̃ɔ̀, fʋ na ƴãw a fʋ tɩɛrʋ a ɩ̃ ƴãw a. À à ŋá n'a a Sore yel.”»