Zeremi 35 - A SƐB-SÕW

A Zeremi nɩ a Erekaavʋ dɔwlʋ

¹ A lɛn daar a Zozɩasɩ bidɛb, Yoyakim, na tɩ ɩ a Zuda tẽw nãà a, a Sore tɩ ƴɛ̀r'ɩ a Zeremi zie à ŋá:

² «Cen tɩ páw a Erekaavʋ dɔwlʋ nɩbɛ, ƴɛ̀r a bɛ zie, ɛ́ tɛr bɛ wa n a Ŋmɩn-yir-kpɛ̃ɛ dĩo kãw pʋɔ, wa kʋ̀ bɛ divɛ̃ kɛ́ bɛ nyũ.»

³ Lɛ n'a a Zeremi tɩ cen tɩ páw Yirmeyahu bidɛb, Yaazanɩa, mɩ̀ na ɩ Havasɩnɩa yãw a, lãwnɩ a ʋ yɛbr nɩ a bɛ bibiir, a pɛr lɛ k'aa Erekaavʋ dɔwlʋ nɩbɛ za.

⁴ Ʋ tɩ tɛr bɛ na cen nɩ a Ŋmɩn-yir-kpɛ̃ɛ́, a Naaŋmɩn nɩr Yigidalɩahu bidɛb, Hanan, po-tuurbɛ dĩó. A dĩo ŋa tɩ ɓɛrɩ nɩ a nɩ-bɛrɛ dĩo, ɛ́ be a Salum bidɛb, Maaseyahu, a bàwr-maalɛ ʋl na piwre a Ŋmɩn-yir-kpɛ̃ɛ dɩ̃dɔr a, dĩo saa-zu.

⁵ A Zeremi tɩ bin nɩ duwli na paalɩ divɛ̃ a, nɩ a koli-nyúuri a Erekaavʋ dɔwlʋ nɩbɛ niŋé, ɛ́ yel bɛ: «Nyɩ nyũ divɛ̃ blã!»

⁶ Ɛcɛ, bɛ tɩ sɔw na: «Tɩ bɛ nyúur divɛ̃ ɩ. Bʋ̃ʋ n'ʋ vɛ̃, a tɩ sãàkʋm-kʋra Erekaavʋ bidɛb, Yonadavʋ, tɩ yel'ɩ à ŋá kʋ̀ tɩ: “Nyɩ bɛ nyuur divɛ̃ towtow ɛ, a nyɩɩm nɩ a nyɩ bibiir.

⁷ Nyɩ bɛ ŋmarɛ yie ɩ, nyɩ bɛ kʋɔr a tẽsɔw ɛ, nyɩ bɛ sɛlɛ divɛ̃ tɩɩr púo ɩ, nyɩ bɛ tɛrɛ ʋ ɛ. Ɛcɛ nyɩ na kpɩɛr'ɩ pɛnɛ-sɛwr pʋɔ a nyɩ cãafʋ daar za. À ŋá n'a nyɩ na tʋ̃ɔ́ vʋʋrɩ cɛlɩ a tẽw ŋa na bɛ ɩ nyɩ sãà tẽw a pʋɔ.”

⁸ Tɩ sàw nɩ a wulu al za a tɩ sãàkʋm-kʋra, Yonadavʋ, na tɩ kʋ̀ tɩ a. Tɩ bɛ nyúur divɛ̃ towtow ɛ, a tɩɩm tɛɛ za, a tɩ pɔwbɛ, a tɩ bidɛbr nɩ a tɩ pɔwyaar.

⁹ Tɩ bɛ ŋmarɛ yie kpɩɛr ɛ, tɩ bɛ tɛr divɛ̃ tɩɩr púo nɩ po-kʋ̀ɔra kãw ɛ.

¹⁰ Ɛcɛ pɛnɛ-sɛwr pʋɔ n'a tɩ kpɩɛr. À ŋá n'a tɩ maal tɛr ɛ́ sàw a lɛ za a tɩ sãàkʋm-kʋra, Yonadavʋ, na yel kʋ̀ tɩ a.

¹¹ Ɛcɛ a lɛn daar a Nabikodonozɔɔr na wa ŋmãa nɩ a tẽw zɛbr a n'a, tɩ tɩɛrɩ tɩ pʋɔ: alɛ sa kɛ́ tɩ kpɛ a Zerizalɛm tẽw pʋɔ, a Babɩlɔn tẽw nɩ a Siiri tẽw zɛbr-nɩbɛ ta páw tɩ ɛ. À à ŋá n'a tɩ kpɩɛr a Zerizalɛm a ƴɛrɛŋa.»

¹² A lɛ n'a a Sore tɩ lɛb ƴɛ̀r a Zeremi zie à ŋá:

¹³ «Ƴɛrɛŋa a, ƴɛ̀r a Zuda tẽw nɩ a Zerizalɛm tẽw dem zie. Cen tɩ yel bɛ: Nyɩ nyɛ̃ a lɛ a Sore, a kpɛnʋ-za-sob, a Ɩsɩrayɛl Naaŋmɩn, na yere a: Nyɩ pãa kʋ̃ nanɩ de a ɩ̃ wulu, ɛ́ bɛr wõ a lɛ ɩ̃ na yere a ɩ? A Sore n'ʋ yere.

¹⁴ A Erekaavʋ bidɛb, Yonadavʋ, tɩ ƴãw nɩ nʋɔr kʋ̀ a ʋ bibiir kɛ́ bɛ taa nyúur divɛ̃ ɩ. A Erekaavʋ dɔwlʋ nɩbɛ tɩ sàw na tu a ƴɛ̀rʋ ŋa. Bɛ bɛ nyũ divɛ̃ wa tɔ a dɩ̃a ɩ, bʋ̃ʋ n'ʋ vɛ̃, bɛ sàw nɩ a bɛ sãàkʋm-kʋra nʋɔr. Ɛ́ a mãa Sore, kʋralɛ n'a ɩ̃ kpaalɛ nyɩ, ɛcɛ nyɩ bɛ bɛr wõ m ɛ.

¹⁵ Ɩ̃ ƴãw nɩ nũu tõ a ɩ̃ tõ-tõ-biir na ɩ a naaŋmɩn-ƴɛ̀r-manbɛ a, a nyɩ zie, kɛ́ bɛ wa yel nyɩ: “A nyɩ kãw za, ʋ bɛr a ʋ ɩb na bɛ vɩɛl a. Nyɩ ɩrɛ ɩb na sɛw taa nɩ a, nyɩ ta tuur ŋmɩn-yoru maalɛ a ɩ. A lɛ pʋɔ a, nyɩ na kpɩɛr'ɩ a tẽw ɩ̃ na kʋ̀ nyɩ, a nyɩɩm nɩ a nyɩ sãàkʋm-kore a.” Ɛcɛ nyɩ bɛ cɛlɩ be ɩ, nyɩ bɛ bɛr wõ m ɛ.

¹⁶ A Erekaavʋ dɔwlʋ nɩbɛ bɛl a, bɛ tu n a lɛ a bɛ sãàkʋm-kʋra, Yonadavʋ, na tɩ yel kʋ̀ bɛ a. Ɛcɛ a nyɩɩm, a Zuda nɩbɛ a, nyɩ bɛ bɛr wõ m ɛ.»

¹⁷ A Zeremi tɩ yel'a ƴãw pʋɔ: «A lɛ zũú a, à ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: “Zuda tẽw nɩ Zerizalɛm tẽw dem i, ɩ̃ na ɩ na a kpɩɛrʋ al ɩ̃ na ƴɛ̀r càar'ɩ nyɩ a, a páw nyɩ. Bʋ̃ʋ n'ʋ vɛ̃, ɩ̃ ƴɛ̀r'ɩ a nyɩ zie, ɛ́ nyɩ bɛ bɛr wõ ɩ. Ɩ̃ bʋɔlɩ nyɩ na, ɛ́ nyɩ bɛ sàw ɛ.”»

¹⁸ Al pùorí, a Zeremi tɩ yel'ɩ a Erekaavʋ dɔwlʋ nɩbɛ: «Nyɩ sàw nɩ a nyɩ sãàkʋm-kʋra, Yonadavʋ, nʋɔr ʋ na ƴãw kʋ̀ nyɩ a, nyɩ tu n a lɛ za ʋ na yel kʋ̀ nyɩ a vla vla.

¹⁹ A na ɩ à ŋá a, à ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: a Erekaavʋ bidɛb, Yonadavʋ, yir pʋɔ a, nɩr na mɩ́ be n be kʋralɛ àr a ɩ̃ niŋé bibie za.»