Zeremi 34 - A SƐB-SÕW

A yele al na gùre a nãà Sedesɩasɩ a

¹ A Babɩlɔn tẽw nãà, Nabikodonozɔɔr, tɩ zɛbr'ɩ nɩ a Zerizalɛm nɩ a Zuda tẽw tẽ-bɛrɛ. A ʋ zɛbr-nɩbɛ za, nɩ a tẽw zu naalʋ-ten za sojarɩ, nɩ a nɩ-bʋʋrɛ bɛl za ʋ na so a sojarɩ, tɩ lãw nɩ ʋ na. Lɛ n'a a Sore tɩ ƴɛ̀r a Zeremi zie à ŋá:

² «À ŋá n'a a Sore, a Ɩsɩrayɛl Naaŋmɩn, yere: Cen tɩ páw a Zuda tẽw nãà, Sedesɩasɩ, yel ʋ: à ŋá n'a a Sore yere: Ɩ̃ na ƴãw nɩ a tẽ-kpɛ̃ɛ ŋa a Babɩlɔn tẽw nãà nuru pʋɔ, ʋ nyɩw ʋ bɛr.

³ Ɛ́ a fʋ̃ʋ a, fʋ bɛ cɩ̃ɛnɛ a ʋ zie ɩ. Bɛ na nyɔw fʋ na tɩ kʋ̀ ʋ. Fʋ̃ʋ nɩ a Babɩlɔn tẽw nãà na tori nɩ taa, ʋ ƴɛ̀r a fʋ zie fʋ sɔw. Al pùorí, fʋ na cen nɩ a Babɩlɔn.

⁴ Ɛcɛ, Zuda tẽw nãà, Sedesɩasɩ i, fʋ̃ʋ wa bɛrɛ wone a lɛ ɩ̃ na yere kʋ̀rɛ fʋ a, fʋ kʋ̃ kpi zɛbr-sɔ-kpɛ̃ɛ kũu ɛ. A mãa Sore, mãa n'ʋ yere kʋ̀rɛ fʋ.

⁵ Fʋ na kpi na nɩ ƴã-ɓaarʋ. Bɛ na nyɩw nɩ a parfɛ̃ a fʋ ƴãw, mɛ̃ a lɛ bɛ na tɩ nyɩw a, a fʋ sãà mɩnɛ ƴãw a, a bɛl na de niwn dɩ a naalʋ a fʋ ƴãw a. Bɛ na kõ n à ŋá a fʋ ƴãw: “'Woi! A nãà kpi na wɛ!” A mãa Sore, mãa n'ʋ yere kʋ̀rɛ fʋ.»

⁶ A naaŋmɩn-ƴɛ̀r-manɛ Zeremi tɩ ƴɛ̀r'ɩ a ƴɛ̀rʋ á ŋá za a Zuda tẽw nãà, Sedesɩasɩ, niŋé, a Zerizalɛm.

⁷ A lɛn daar a, a Babɩlɔn tẽw nãà zɛbr-nɩbɛ tɩ zɛbr'ɩ nɩ a Zerizalɛm nɩ a Zuda tẽw tẽ-bɛrɛ Lakisɩ nɩ Azeka na tɩ cãà ba gbɛ́ɛ a. Bʋ̃ʋ n'ʋ vɛ̃, a Zuda tẽ-bɛrɛ pʋɔ a, a tẽ-bɛrɛ á ŋá n'a tɩ cãà be be ɩ a ziir bɛ na cɔbrɩ a kpɛmɛ a zɛbr ƴãw a.

A gbãgbaar bɛ na tɩ bɛr bɛ so bɛ tʋɔra, ɛ́ bɛ lɛb de a yele

⁸ A Sore tɩ lɛb'a ƴɛ̀r a ʋ ƴɛ̀rʋ kʋ̀ a Zeremi, yele á ŋá pùorí: a nãà Sedesɩasɩ tɩ maal'ɩ wõ-taa nɩ a Zerizalɛm nɩbɛ, kɛ́ bɛ yel k'aa gbãgbaar so nɩ bɛ tʋɔra.

⁹ Ŋa za na mɩ́ lɛb'a bɛr a ʋ gbãgbaar na ɩ Ebre bʋʋrɛ a, a dɛbr nɩ a pɔwbɛ, bɛ lɛb so bɛ tʋɔra. Nɩr bɛ sɛw k'ʋʋ lɛb ɩ a ʋ yɛb na ɩ a Zuda tẽw nɩr a, ʋ tone gbãgba-tome ɩ.

¹⁰ Lɛ n'a a tẽw nɩ-bɛrɛ nɩ a nɩbɛ za na tɩ maalɩ a wõ-taa ŋa a, tɩ sàw kɛ́ bɛ bɛr a gbãgbaar, a dɛbr nɩ a pɔwbɛ, bɛ so bɛ tʋɔra, ɛ́ ta lɛb cãà ɩ bɛ tone mɛ̃ gbãgbaar a ɩ. Ŋa za tɩ sàw nɩ a wõ-taa ŋa, ɛ́ lɛb bɛr a ʋ gbãgbaar bɛ so bɛ tʋɔra.

¹¹ Ɛcɛ, a pùorí, bɛ tɩ lɩɛb'ɩ a bɛ tɩɛrʋ, lɛb de a dɛbr nɩ a pɔwbɛ bɛ na tɩ bɛr bɛ so bɛ tʋɔra a, ɛ́ tɩ fɛr bɛ ƴãw bɛ lɛb lɩɛbɩ a gbãgbaar.

¹² A lɛ n'a a Sore tɩ ƴɛ̀r a Zeremi zie à ŋá:

¹³ «À ŋá n'a a Sore, a Ɩsɩrayɛl Naaŋmɩn, yere: Ɩ̃ mɩ̀ tɩ maal'ɩ wõ-taa nɩ a nyɩ sãàkʋm-kore, a lɛn daar ɩ̃ na tɩ ɩ bɛ yi a Eziptɩ tẽw pʋɔ, a be bɛ na tɩ ɩ gbãgbaar a.

¹⁴ Ɩ̃ tɩ yel bɛ na: Alɛ wa maalɩ yome ayopõi a, a nyɩ kãw za na mɩ́ lɛb'a bɛr a ʋ yɛb na ɩ a Ebre bʋʋrɛ, ɛ́ wa kʋɔrɩ ʋ tʋɔra a ʋ zie a, ʋ so ʋ tʋɔra. Ʋ na mɩ́ ɩ n a fʋ gbãgbaa yome ayʋɔb, al pùorí, fʋ lɛb bɛr ʋ, ʋ so ʋ tʋɔra. Ɛcɛ a nyɩ sãàkʋm-kore bɛ tɩ bɛr wõ ɩ, bɛ bɛ tɩ cɛlɩ be ɩ.

¹⁵ A vuo ŋa pʋɔ a, a nyɩɩm a, nyɩ lɩɛb'ɩ a nyɩ ɩb, ɛ́ ɩ a lɛ na tori a, a ɩ̃ zie. Bʋ̃ʋ n'ʋ vɛ̃, ŋa za mɩ́ tɩ yel'a k'ʋʋ na bɛr'ɩ a ʋ tɔ ʋ so ʋ tʋɔra, nyɩ mɔ̃ mɩ̀ tɩ ɩ na mãa nɩ nyɩɩm wõ taa a yir ŋa ɩ̃ na so a pʋɔ.

¹⁶ Ɛcɛ, nyɩ lɩɛb'ɩ a nyɩ tɩɛrʋ, ɛ́ bɛ bʋɔlɩ mɛ̃ nɩr ɛ. Ŋa za mɩ́ lɛb'a de a gbãgbaar, a dɛbr nɩ a pɔwbɛ, ʋ na tɩ bɛr bɛ so bɛ tʋɔra a, ɛ́ fɛrɛ bɛ kɛ́ bɛ lɛb tone mɛ̃ gbãgbaar a.»

¹⁷ A Zeremi tɩ yel'a ƴãw pʋɔ: «A na ɩ à ŋá a, à ŋá n'a a Sore yere: A nyɩ kãw za n'ʋ a tɩ fɛr k'ʋʋ yel ʋ na lɛb bɛr a ʋ gbãgbaa na ɩ Ebre nɩr a, a ʋ yɛb, a ʋ tɔ, ʋ so ʋ tʋɔra a. Ɛcɛ nyɩ bɛ sàw a ɩ̃ nʋɔr ɛ. Alɛ n'a so, a mãa, a Sore, ɩ̃ yere à ŋá: Ɩ̃ na bɛr'ɩ zɛbr, jɛ̀lmɛ̃ bàalʋ nɩ kɔ̃ a wa a nyɩ ƴãw. A lɛ pʋɔ a, a tẽ-daa naalʋ-ten za na mɩ́ màwr'ɩ dɛ̃bɩ̃-mawfʋ bɛlɛ wa nyɛ̃ nyɩ a.

^18-19 A Zuda nɩ a Zerizalɛm tẽw nɩ-bɛrɛ, a tõ-tõ-bi-bɛrɛ, a bàwr-maalbɛ nɩ a tẽw nɩbɛ za na so bɛ tʋɔra a, tɩ maal'ɩ mɛ̃ nɩ wõ-taa. Bɛ tɩ vár'ɩ a bàwr nadele ziir ayi, ɛ́ tɩ tɔl a dʋ̃w na vár a ziir ayi a cara pʋɔ. Ɛcɛ a nɩbɛ bɛ ŋa bɛ tu a wõ-taa ŋa ɩ, bɛ bɛ tu a lɛ bɛ na yel a ɩ. A lɛ pʋɔ a, ɩ̃ na ɩ bɛ na mɛ̃ a nadele bɛ na vár a ziir ayi a.

²⁰ Ɩ̃ na de bɛ na ƴãw a bɛ dɔ̃ dem nuru pʋɔ, a bɛl na bɔbr a bɛ kʋb a. A bɛ ƴã-gamɛ na lɩɛb'ɩ sidume nɩ gbõgbo-cili bʋ̃-dɩrɩ.

²¹ Ɩ̃ mɩ̀ na de nɩ a Zuda tẽw nãà, Sedesɩasɩ, nɩ a ʋ tõ-tõ-bi-bɛrɛ ƴãw a bɛ dɔ̃ dem nuru pʋɔ, a bɛl na bɔbr a bɛ kʋb a nuru pʋɔ, a Babɩlɔn tẽw nãà nuru pʋɔ. A zɛbr-nɩbɛ bɛ ŋa saa ìre kɛ́ bɛrɛ nyɩ a ƴɛrɛŋa a,

²² ɩ̃ na ƴãw nɩ nʋɔr kʋ̀ bɛ, kɛ̀ bɛ lɛb wa wa zɛb'ɩ a tẽ-kpɛ̃ɛ ŋa, zɛb de ʋ, ɛ́ nyɩw ʋ bɛr. Ɩ̃ na ɩ n a Zuda tẽ-bɛrɛ a lɩɛbɩ wɛja-kpalɛ, nɩr na bɛ kpɩɛr a», a Sore n'ʋ yel.