Zeremi 32 - A SƐB-SÕW

A Zeremi dà n púo Anatɔtɩ

¹ A Zuda tẽw nãà Sedesɩasɩ naalʋ-dɩb yome pie sob, na tɩ ɩ a Babɩlɔn tẽw nãà, Nabikodonozɔɔr, naalʋ-dɩb yome pie nɩ ani sob a, a Sore tɩ ƴɛ̀r'ɩ a ʋ ƴɛ̀rʋ kʋ̀ a Zeremi.

² A lɛn daar a, a Babɩlɔn tẽw nãà zɛbr-nɩbɛ tɩ piw nɩ a Zerizalɛm. A naaŋmɩn-ƴɛ̀r-manɛ Zeremi ʋl a, bɛ tɩ ƴãw ʋ nɩ gaso pʋɔ a Zuda tẽw nãà yir, a soja-zi-gùrbɛ davʋra pʋɔ.

³ A Sedesɩasɩ tɩ ƴãw na bɛ pàw ʋ a be, bʋ̃ʋ n'ʋ vɛ̃, ʋ tɩ yere na k'aa Zeremi sãw na, ʋ na yel a Sore ƴɛ̀rʋ ŋa a: «Ɩ̃ na de nɩ a Zerizalɛm ƴãw a Babɩlɔn tẽw nãà nuru pʋɔ, ʋ na zɛb'a de ʋ.

⁴ A Zuda tẽw nãà Sedesɩasɩ tɛɛ za bɛ cɩ̃ɛnɛ a Babɩlɔn tẽw dem zie ɩ, bʋ̃ʋ n'ʋ vɛ̃, ɩ̃ na de ʋ na ƴãw a Babɩlɔn tẽw nãà nuru pʋɔ. A na fɛr'a a ʋl mɩŋa cen a Nabikodonozɔɔr niŋé, bɛ tɩ tori taa, ʋʋ sɔw a ʋ ƴɛ̀rʋ.

⁵ A Sore yere na: bɛ na tɛr'ɩ a Sedesɩasɩ cen nɩ a Babɩlɔn, ʋ tɩ be a be ɛ́ gù ɩ̃ wa kaa a ʋ zie. A Sore n'ʋ yel. Nyɩmɛ saa na cãà zɛbr'ɩ a Babɩlɔn tẽw dem a, ɛ́ nyɩ kʋ̃ tʋ̃ɔ́ towtow ɛ.»

⁶ A Zeremi manʋ ʋ na manɩ a n'ɩ ŋa: «A Sore ƴɛ̀r'ɩ a ʋ ƴɛ̀rʋ kʋ̀ m yel:

⁷ “A fʋ yɛb Hanameyɛl, a Salum bidɛb, na wa n a fʋ zie wa yel fʋ: Dà a ɩ̃ púo na be a Anatɔtɩ a. Bʋ̃ʋ n'ʋ vɛ̃, fʋ̃ʋ n'ɩ a ɩ̃ nɩr na pɩɛlɩ mɛ̃ zuo bɛ za a, fʋ̃ʋ n'ʋ tɛr sɔ́r na lɛb ya de ʋ, so ʋ.”»

⁸ Mɛ̃ a lɛ a Sore na yel a, a ɩ̃ yɛb Hanameyɛl tɩ wa na wa páw mɛ̃ a soja-zi-gùrbɛ davʋra pʋɔ, yel mɛ̃: «Dà a ɩ̃ púo na be a Anatɔtɩ, a Bɛ̃zamɛ tẽw pʋɔ a. Bʋ̃ʋ n'ʋ vɛ̃, fʋ̃ʋ n'ɩ a ɩ̃ nɩr na pɩɛlɩ mɛ̃ zuo bɛ za a. A na ɩ lɛ a, fʋ̃ʋ n'ʋ tɛr sɔ́r na ya de ʋ, ɛ́ so ʋ.» Lɛ n'a ɩ̃ tɩ bãw k'aa Sore n'ʋ ƴɛ̀r a ɩ̃ zie.

⁹ Lɛ n'a ɩ̃ tɩ dà a ɩ̃ yɛb Hanameyɛl púo na be a Anatɔtɩ a, ɛ́ ya ʋ a libie: salm-pla libie pie nɩ a ayopõi.

¹⁰ Ɩ̃ tɩ maal'ɩ a púo dab sɛbr a ɩ ayi. Ɩ̃ tɩ pàw nɩ a kãw dãsɩɛ dem niŋé, ɛ́ ƴãw a ɩ̃ ŋmaarʋ-bʋ̃-ƴãwna bãwfʋ, ɛ́ ker a libie bʋ̃-kera zu.

¹¹ Al pùorí, ɩ̃ tɩ de nɩ a púo dab sɛbɛ ʋl na pàw mɛ̃ a lɛ a nɛ́ɛ na ƴãw a, nɩ a ʋl na bɛ pàw a,

¹² kʋ̀ a za ayi Barukɩ na ɩ Neriya bidɛb nɩ Maaseya yãw a. A ɩ̃ yɛb Hanameyɛl nɩ a dãsɩɛ dem bɛl na tɩ ƴãw a bɛ ŋmaarʋ-bʋ̃-ƴãwna bãwfʋ a púo dab sɛbɛ zu a, tɩ be n be, lãwnɩ a Zuda tẽw nɩbɛ bɛl za na tɩ be a soja-zi-gùre davʋra pʋɔ a.

¹³ Lɛ n'a ɩ̃ tɩ yel à ŋá kʋ̀ a Barukɩ, a bɛ za niŋé:

¹⁴ À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: “De a púo dab sɛbr a za ayi, a ʋl na pàw a, nɩ a ʋl na bɛ pàw a, ƴãw a yawra duwle pʋɔ, a tʋ̃ɔ́ maal bin vla cɛlɩ.”

¹⁵ «À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: “A tẽw ŋa pʋɔ a, a nɩbɛ na lɛb'a dàar yie, póru nɩ divɛ̃ tɩɩr póru.”»

A Zeremi puoru

¹⁶ Ɩ̃ na tɩ kʋ̀ a Neriya bidɛb, Barukɩ, a púo dab sɛbɛ baar'a, ɩ̃ tɩ puor'ɩ a Sore à ŋá:

¹⁷ «'Woi, Sore Naaŋmɩn i, fʋ̃ʋ n'ʋ ír a salom nɩ a tẽw nɩ a fʋ fãw-kpɛ̃ɛ, nɩ a fʋ kpɛnʋ. Bom za bɛ kpɛmɛ zuo a fʋ zie ɩ.

¹⁸ Fʋ mɩ́ wul'ɩ nɔ̃wfʋ a nɩbɛ na dɔw lɩɛrɩ taa tɩ ta gb'aa túr (1 000) a. Ɛcɛ sãà mɩnɛ wa sãw a, fʋ mɩ́ ɩ na a bɛ bibiir ya a bɛ sãwna san. Fʋ̃ʋ n'ɩ a Naaŋmɩn na ɩ kpɛ̃ɛ ɛ́ kpɛmɛ a, a fʋ yúor'ɩ a Sore, a kpɛnʋ-za-sob.

¹⁹ Fʋ mɩ́ tɩɛr'ɩ yel-bɛrɛ maalʋ, ɛ́ maalɩ a nɩ kpɛnʋ. Fʋ mɩ́ maal'a jɩ́rɛ a nɩsaalbɛ ɩ-ɩrɩ, ɛ́ mɩ́ ya ŋa za man nɩ a ʋ cenu, man nɩ a ʋ ɩ-ɩrɩ.

²⁰ A Eziptɩ tẽw a koro za a, fʋ tɩ maal'ɩ yel-bɛ-dãw-nyɛrɩ na ɩ nɔ-ɓãan a. Ɛ́ a dɩ̃a mɩ̀ a, a Ɩsɩrayɛl nɩbɛ sɔgɔ nɩ a nɩsaalbɛ za sɔgɔ a, fʋ wule nɩ sob nɛ na nɛ b a, mɛ̃ a lɛ a na sãá a ƴɛrɛŋa a.

²¹ Yel-bɛ-dãw-nyɛrɩ na ɩ nɔ-ɓãan a, a fʋ fãw-kpɛ̃ɛ nɩ a fʋ kpɛnʋ na bɛ tɛr dɩ̃ɛnʋ a, alɛ n'a fʋ ɩ n a fʋ nɩ-bʋʋrɛ Ɩsɩrayɛl yi a Eziptɩ tẽw.

²² Fʋ tɩ pɔ na yel a tɩ sãàkʋm-kore kɛ́ fʋ na kʋ̀ bɛ nɩ a tẽw ŋa, bʋ̀rʋ nɩ sɩwr na gbɔlɛ a, ɛ́ fʋ ɩ n a lɛ.

²³ Bɛ kpɛ n a tẽw pʋɔ, so ʋ. Ɛcɛ bɛ bɛ bɛr wõ a fʋ ƴɛ̀rʋ ɛ, bɛ bɛ tu a fʋ wulu ɛ, bɛ bɛ ɩ a lɛ fʋ na yel a ɩ. Lɛ so fʋ bɛr a kpɩɛrʋ á ŋá za na tarɛ a dɩ̃a a, a wa.

²⁴ A Babɩlɔn tẽw dem'ɩ bɛ ŋa tone a tẽ-kpɛ̃ɛ zɛb-deb tome, tawr pɩɛlɛ nɩ ʋ. Bɛ na zɛb'a de ʋ. Ɩ̃ na tʋ̃ɔ́ na yel k'ʋʋ lo n a bɛ nuru pʋɔ baarɩ. Bɛ bɔbr'a kɛ́ bɛ tʋ̃ɔ́ ʋ nɩ a zɛbr bome, a kɔ̃ nɩ a jɛ̀lmɛ̃ bàalʋ. Fʋ mɩŋa za nyɛ̃ a na, a lɛ fʋ na yel a ta na.

²⁵ Sɩza, a Zerizalɛm n'ɩ ŋan na lo a Babɩlɔn tẽw dem nuru pʋɔ a. Ɛcɛ, Sore Naaŋmɩn i, bʋ̃ʋ n'ʋ so fʋ yel mɛ̃ k'ɩ̃ɩ dà a púo ŋa ɛ́ ya a libie dãsɩɛ dem niŋé?»

A Sore sɔw nɩ a Zeremi

²⁶ A lɛ n'a a Sore tɩ ƴɛ̀r a Zeremi zie à ŋá:

²⁷ A mãa, a Sore a, mãa n'ɩ bʋ̃-vʋʋrɩ za Naaŋmɩn. Bom be n be kpɛmɛ zuo a ɩ̃ zie e?

²⁸ A lɛ zũú a, a mãa, a Sore, ɩ̃ yere na: ɩ̃ na ƴãw nɩ a tẽ-kpɛ̃ɛ ŋa a Babɩlɔn tẽw nãà, Nabikodonozɔɔr, nɩ a ʋ zɛbr-nɩbɛ nuru pʋɔ. Ʋ na zɛb'a de ʋ.

²⁹ A Babɩlɔn tẽw dem na zɛbr'ɩ a tẽ-kpɛ̃ɛ ŋa a, na kpɛ n a ʋ pʋɔ, ɛ́ bɛ na sãw ʋ na bɛr, ɛ́ nyɩw ʋ bɛr. Baa zuo a za, bɛ na nyɩw nɩ a yie al pʋɔ a nɩbɛ na tɩ nyɩw parfɛ̃ a Báàl ƴãw, ɛ́ tɩr divɛ̃ de-kʋ̀b bom kʋ̀ ŋmɩn-sãanbɛ a gàrɛ zu, ɩ a ɩ̃ suur ìr a, bɛ na nyɩw a na bɛr.

³⁰ A mãa, a Sore, ɩ̃ yere na: a Ɩsɩrayɛl nɩbɛ za nɩ a Zuda tẽw dem a, a bɛ pɔ̀lʋ̀ daar za n'a bɛ ɩ a ʋlɩ bom nɛ na bɛ pɛlɩ a ɩ̃ pʋɔ a. Sɩza, a ɩ̃ suur tɛwr'a a Ɩsɩrayɛl nɩbɛ ɩ ʋ ìr nɩ a bɛ ɩ-ɩrɩ.

³¹ A Zerizalɛm tẽ-kpɛ̃ɛ ŋa ɩ n a ɩ̃ su-yãyaar ʋ ìr, a na tĩ a lɛn daar bɛ na mɛ ʋ wa tɩ tɔ a dɩ̃a a. Alɛ n'a so ɩ̃ bɛ lɛb bɔbr k'ɩ̃ɩ nyɛ̃ ʋ a ɩ̃ niŋé ɩ.

³² A Ɩsɩrayɛl nɩbɛ nɩ a Zuda tẽw dem maal'ɩ faa yaga, ƴãw a ɩ̃ suur ìr. Bɛ maal'ɩ faa, a bɛl, a bɛ na-mɩnɛ, a bɛ nɩ-bɛrɛ, a bɛ bàwr-maalbɛ, a bɛ naaŋmɩn-ƴɛ̀r-manbɛ, a Zerizalɛm nɩbɛ nɩ a Zuda tẽw nɩbɛ na cɛ a.

³³ Bɛ nãá lɩɛbɩ niwn cɔw mɛ̃ a, bɛ bɛr'a ɛ́ lɩɛbɩ kpaar cɔw mɛ̃. Ɛcɛ ɩ̃ ƴãw nɩ nũu wul bɛ, ɛ́ bɛ bɛ bɛr wõ ɩ, bɛ bɛ de a wulu ɛ.

³⁴ Bɛ ƴãw nɩ a bɛ tɩb-faar faar a yir ɩ̃ na so a pʋɔ, ɩ ʋ tɛr dɛwr.

³⁵ Bɛ cɔbr'ɩ maalʋ-ziir a ŋmɩn Báàl ƴãw a Hinom bà-fʋɔla pʋɔ, kɛ́ bɛ tʋ̃ɔ́ mɩ́ nyɩw a bɛ bidɛbr nɩ a bɛ pɔwyaar kʋ̀ a ŋmɩn Molɛkɩ. Ɩ̃ bɛ dãw yel a lɛ kʋ̀ bɛ towtow ɛ, ɩ̃ mɩ̀ bɛ dãw tɛr a tɩɛrʋ ɛ. Ɛ́ bɛ na ɩ a ɩb na maal kpɛ faa à ŋá a, bɛ taw nɩ a Zuda nɩbɛ ƴãw a faa pʋɔ.

³⁶ «A na ɩ à ŋá a, ƴɛrɛŋa a, a mãa, a Sore, a Ɩsɩrayɛl Naaŋmɩn, ɩ̃ yere nɩ a tẽ-kpɛ̃ɛ ŋa ƴãw, a ʋl nyɩ na yel k'ʋʋ lo n a Babɩlɔn tẽw nãà nuru pʋɔ, a zɛbr, a kɔ̃ nɩ a jɛ̀lmɛ̃ bàalʋ zũú a.

³⁷ Ɩ̃ tɩ nyɛ̃ nɩ nɩ a ʋ nɩbɛ suur faa faa. Lɛ n'a ɩ̃ tɩ diw bɛ yaarɩ ziir za, tẽ-yaga pʋɔ. Ɛcɛ, ɩ̃ na lɛb'a ɓã bɛ taa, ɩ̃ na lɛb'a tɛr bɛ wa n a ka, wa ɩ bɛ ɓãa ƴãw kpɩɛr.

³⁸ Bɛ na lɛb'a ɩ a ɩ̃ nɩbɛ, ɩ̃ɩ ɩ a bɛ Naaŋmɩn.

³⁹ Ɩ̃ na kʋ̀ bɛ nɩ soci-been nɩ ɩb na ɩ been a, bɛ tʋ̃ɔ́ ƴãwnɛ mɛ̃ kʋralɛ. A lɛ pʋɔ a, nʋ̃ɔ̀ na ɩrɛ bɛ na, a bɛl nɩ a bɛ bibiir a bɛ pùorí.

⁴⁰ Ɩ̃ na maal'ɩ bɛ nɩ wõ-taa na be kʋralɛ a. Ɩ̃ kʋ̃ lɛb pùor ɛ́ bɛr bɛ towtow ɛ, ɩ̃ na tuur bɛ nɩ kʋralɛ, maalɛ bɛ vla. À ŋá n'a bɛ na ƴãwnɛ mɛ̃ yaga za, ɛ́ bɛ kʋ̃ lɛb taw zãá nɩ mɛ̃ towtow ɛ.

⁴¹ A ɩ̃ nʋ̃ɔ̀ n'ɩ ɩ̃ na na paalɩ bɛ nɩ yel-vɩɛlɩ a. Nɩ yel-mɩŋa, ɩ̃ na ɩ na bɛ tɛ nyɩgɛ a tẽw ŋa pʋɔ. Ɩ̃ na ɩ n a lɛ nɩ a ɩ̃ socir za, nɩ a ɩ̃ sɩ́ɛ za.»

⁴² Nyɛ̃ a lɛ a Sore na cãà lɛb yere a: «Mɛ̃ a lɛ ɩ̃ na ɩ a kpɩɛrʋ kpɛ̃ɛ ŋa wa a Zuda tẽw nɩbɛ zu a, lɛ mɩ̀ n'a ɩ̃ na ɩ a nʋ̃ɔ̀ al za ɩ̃ na ƴɛ̀r a bɛ ƴãw a, wa a bɛ zu.

⁴³ Nyɩ yere na: “A tẽw ŋa lo n a Babɩlɔn tẽw dem nuru pʋɔ. Ƴɛrɛŋa a, wɛja-kpalɛ nɩbɛ nɩ dʋn na bɛ kpɩɛr a n'ʋ”. Ɛcɛ a tẽw ŋa pʋɔ a, bɛ na lɛb'a dàar póru.

⁴⁴ Yel-mɩŋa, a Bɛ̃zamɛ tẽw pʋɔ, a ziir za na viiri koli a Zerizalɛm a pʋɔ, a Zuda tẽ-bɛrɛ pʋɔ, a Ho-Peyi, a Ba-Peyi nɩ a Negɛɛvʋ tẽ-bɛrɛ pʋɔ a, bɛ na lɛb'a dàar póru. Lɛ n'a a nɩbɛ na mɩ́ maalɩ a bʋ̃-da-sɛbr, bɛ na mɩ́ ƴãw ŋmaarʋ-bʋ̃-ƴãwna bãwfʋ a sɛbr zu, bɛ na mɩ́ bʋɔlɩ dãsɩɛ dem. Bʋ̃ʋ n'ʋ vɛ̃, ɩ̃ na lɛb'a maalɩ a tẽw ŋa nɩbɛ yele ƴãw.» À à ŋá na a Sore yel.