Zeremi 28 - A SƐB-SÕW

A Zeremi nɩ a naaŋmɩn-ƴɛ̀r-manɛ Hananɩa yele

¹ A ʋlɩ yũon-been nɛ, a pɛr lɛ k'aa Zuda tẽw nãà, Sedesɩasɩ, naalʋ-dɩb yome anaar sob daar, a cuwr anũu sob bibir kãw, a naaŋmɩn-ƴɛ̀r-manɛ Hananɩa na ɩ Azuur bidɛb, ɛ́ yi Gabaɔ̃ a, tɩ be n a Ŋmɩn-yir-kpɛ̃ɛ pʋɔ. Ʋ tɩ ƴɛ̀r'ɩ a Zeremi zie, a bàwr-maalbɛ nɩ a nɩbɛ za niŋé. Ʋ tɩ yel'a:

² «À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn yere: “Ɩ̃ na sãw nɩ a Babɩlɔn tẽw nãà fãw ʋ na dĩ nɩ nyɩ mɛ̃ na-kʋ́ɔra-dàa a bɛr.

³ Yome ayi ƴãw gbagbagba, ɩ̃ na ɩ na bɛ lɛb wa n a ka, a Ŋmɩn-yir-kpɛ̃ɛ bome za a Babɩlɔn tẽw nãà, Nabikodonozɔɔr, na de a ka cen nɩ a Babɩlɔn tẽw a.

⁴ Ɩ̃ mɩ̀ na tɛr'ɩ a Yoyakim bidɛb, Yekonɩa, na ɩ a Zuda tẽw nãà a, lãwnɩ a bɛlɩ dem za bɛ na diw a Zuda tẽw cen nɩ a Babɩlɔn a, lɛb wa n —a Sore n'ʋ yel—, sɩza, ɩ̃ na sãw nɩ a Babɩlɔn tẽw nãà fãw ʋ na dĩ nɩ nyɩ mɛ̃ na-kʋ́ɔra-dàa a bɛr.”»

⁵ A naaŋmɩn-ƴɛ̀r-manɛ Zeremi tɩ sɔw nɩ a naaŋmɩn-ƴɛ̀r-manɛ Hananɩa, a bàwr-maalbɛ nɩ a nɩbɛ za na tɩ be a Ŋmɩn-yir-kpɛ̃ɛ pʋɔ a niŋé yel:

⁶ «Amɛn! A Sore, ʋ ɩ a lɛ! A Sore, ʋ tu a fʋ naaŋmɩn-ƴɛ̀r-manɛ ƴɛ̀rʋ fʋ na ƴɛ̀r a pùor, ʋ ɩ a Ŋmɩn-yir-kpɛ̃ɛ bome yi a Babɩlɔn lɛb wa a ka, lãwnɩ a nɩbɛ za bɛ na diw cen nɩ a be a!

⁷ Ɛcɛ bɛr wõ a lɛ ɩ̃ na yere kʋ̀rɛ fʋ, a fʋ̃ʋ nɩ a nɩbɛ za a.

⁸ A naaŋmɩn-ƴɛ̀r-manbɛ bɛl na de niwn tõ a bɛ tome a mãa nɩ a fʋ̃ʋ ƴãw, a koro kãw za a, bɛ tɩ ƴɛ̀r'ɩ a bɛ ƴɛ̀rʋ kʋ̀ tẽ-yaga nɩ naalʋ-tẽ-bɛrɛ. Zɛbr, kpɩɛrʋ nɩ jɛ̀lmɛ̃ bàalʋ yele n'a bɛ tɩ yel kʋ̀ a.

⁹ Ɛcɛ naaŋmɩn-ƴɛ̀r-manɛ wa ƴɛ̀rɛ a ɩ ƴã-ɓaarʋ n'a waar a, ŋmɩŋmɩn n'a bɛ na tʋ̃ɔ́ sɩrɩ bãw k'aa Sore n'ʋ tõ ʋ? Bɛ na bãw na, a lɛn daar a ʋ ƴɛ̀rʋ wa tu a.»

¹⁰ Lɛ n'a a naaŋmɩn-ƴɛ̀r-manɛ Hananɩa tɩ de a na-kʋ́ɔra-dàa a naaŋmɩn-ƴɛ̀r-manɛ Zeremi nyũumɩ́ kar bɛr.

¹¹ Al pùorí, ʋ yel a nɩbɛ za niŋé: «À ŋá n'a a Sore yere: Yome ayi ƴãw gbagbagba, ɩ̃ na sãw nɩ a Babɩlɔn tẽw nãà, Nabikodonozɔɔr, nɩ-kpɛ̃ɛnʋ, ʋ na dĩ nɩ a nɩ-bʋʋrɛ za mɛ̃ na-kʋ́ɔra-dàa a bɛr.» Lɛ n'a a naaŋmɩn-ƴɛ̀r-manɛ Zeremi tɩ tɔl cen.

¹² A naaŋmɩn-ƴɛ̀r-manɛ Hananɩa na tɩ kar a na-kʋ́ɔra-dàa a Zeremi nyũumɩ́ bɛr baarɩ a, a Sore tɩ ƴɛ̀r'ɩ a Zeremi zie à ŋá:

¹³ «Cen tɩ yel a Hananɩa: à ŋá n'a a Sore yere: “Fʋ na kar na-kʋ́ɔra-dàa na ɩ dàa bɛr a, a na fɛr'a fʋ lɩɛr'ʋ nɩ na-kʋ́ɔra-dàa na ɩ kure a.”»

¹⁴ Bʋ̃ʋ n'ʋ vɛ̃, à ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: “Nĩi nyuru dàa na ɩ kure a n'ʋ ɩ̃ na dĩ nɩ a nɩ-bʋʋr-yoru bɛ ŋa za, kɛ́ bɛ tʋ̃ɔ́ tone a Babɩlɔn tẽw nãà, Nabikodonozɔɔr, tome. Bɛ na tone nɩ a ʋ tome. Ɩ̃ na de nɩ a wɛ-dʋn tɛɛ za ƴãw a ʋ nuru pʋɔ.”

¹⁵ Lɛ n'a a naaŋmɩn-ƴɛ̀r-manɛ Zeremi tɩ cãà lɛb yel a naaŋmɩn-ƴɛ̀r-manɛ Hananɩa: «Wone, Hananɩa a: A Sore bɛ to b ɛ, fʋ̃ʋ n'ʋ ɩrɛ a nɩbɛ bɛ ŋa bɛ̀lɛ bɛ tʋɔra.

¹⁶ A lɛ pʋɔ a, à ŋá n'a a Sore yere: “Ɩ̃ na ír fʋ nɩ a tẽw zu. Fʋ na kpi n a yũona, fʋ na ƴɛ̀r ƴãw a nɩbɛ bɛ gáarɩ a Sore zie a ƴãw.”»

¹⁷ A naaŋmɩn-ƴɛ̀r-manɛ Hananɩa tɩ kpi n a ʋlɩ yũon nɛ a cuwr ayopõi sob daar.