Zeremi 26 - A SƐB-SÕW

Bɛ bɔbr'ɩ a Zeremi kʋb

¹ A Zozɩasɩ bidɛb, Yoyakim, na ɩ a Zuda tẽw nãà a naalʋ-dɩb tib daar a, a Sore tɩ ƴɛ̀r'ɩ a ʋ ƴɛ̀rʋ kʋ̀ a Zeremi yel:

² «À ŋá n'a a mãa, a Sore, yere: Cen tɩ àr a Ŋmɩn-yir-kpɛ̃ɛ davʋra pʋɔ. Ƴɛ̀r a ƴɛ̀rʋ ŋa kʋ̀ a bɛlɩ dem za na mɩ́ yi a Zuda tẽ-bɛrɛ za pʋɔ wa puori a Sore yir ŋa pʋɔ a. Ƴɛ̀r a ƴɛ̀rʋ al za ɩ̃ na na yel kɛ́ fʋ ƴɛ̀r kʋ̀ bɛ a. Taa íre ƴɛ̀r-bir-been bɛrɛ ɩ.

³ Kapaw bɛ na bɛr'a wõ ɛ́ ŋa za mɩ́ bɛr a ʋ nyɔ-vʋʋr-faa. Ɩ̃ bɔbr'a k'ɩ̃ɩ ƴãw bɛ dɔwrʋ a faa bɛ na maalɛ a zũú. Ɛcɛ bɛlɛ wa bɛr wõ a, ɩ̃ na lɩɛb'ɩ a ɩ̃ tɩ́ɛrʋ.

⁴ A lɛ pʋɔ a, fʋ na yel'a: À ŋá n'a a Sore yere: “Nyɩ bɛrɛ wone a ɩ̃ ƴɛ̀rʋ. Nyɩ tuur a wulu ɩ̃ na kʋ̀ nyɩ a.

⁵ Nyɩ bɛrɛ wone a ɩ̃ tõ-tõ-biir na ɩ a ɩ̃ ƴɛ̀r-manbɛ a ƴɛ̀rʋ. Ɩ̃ ƴãw nɩ nũu tõ bɛ a nyɩ zie, ɛcɛ nyɩ bɛ bɛr wõ a bɛ ƴɛ̀rʋ ɛ.

⁶ Nyɩmɛ bɛ wa bɛrɛ wone a, ɩ̃ na ŋmɛr'ɩ a Ŋmɩn-yir-kpɛ̃ɛ ŋa bɛr mɛ̃ a lɛ ɩ̃ na ŋmɛr a Silo tẽw Ŋmɩn-yir-kpɛ̃ɛ bɛr a. Ɛ́ a tẽw zu nɩ-bʋʋrɛ za sɔgɔ a, ɩ̃ na ɩ na a Zerizalɛm ɩ a tẽw bɛ na na mɩ́ ŋmɛ ƴãw man nɩ a.”»

⁷ A bàwr-maalbɛ, a naaŋmɩn-ƴɛ̀r-manbɛ nɩ a nɩbɛ za tɩ wõ n a Zeremi na ƴɛ̀r a ƴɛ̀rʋ á ŋá a Ŋmɩn-yir-kpɛ̃ɛ davʋra pʋɔ a.

⁸ A Zeremi na tɩ ƴɛ̀r a ƴɛ̀rʋ, a Sore na tɩ ƴãw a nʋɔr kʋ̀ ʋ k'ʋʋ ƴɛ̀r kʋ̀ a nɩbɛ a, wa baarɩ a, a bàwr-maalbɛ, a naaŋmɩn-ƴɛ̀r-manbɛ nɩ a nɩbɛ za tɩ nyɔw ʋ na ɛ́ yere: «Fʋ sɛwnɩ nɩ kũu!»

⁹ Fʋ sʋ̃ɔm'a ƴɛ̀rɛ a Sore yúor ƴãw yel à ŋá: «Bɛ na ŋmɛr'ɩ a Ŋmɩn-yir-kpɛ̃ɛ ŋa bɛr mɛ̃ a Silo tẽw dem a! Bɛ na ŋmɛr'ɩ a Zerizalɛm tẽw bɛr, ʋ kʋ̃ cãà tɛr nɩr ɛ!» A bɛlɩ dem za na tɩ be a Ŋmɩn-yir-kpɛ̃ɛ pʋɔ a tɩ gbõ n taa a Zeremi ƴãw.

¹⁰ A Zuda tẽw tõ-tõ-bi-bɛrɛ na wa wõ a yele a, bɛ yi n a nãà yir do a Ŋmɩn-yir-kpɛ̃ɛ́ tɩ zɩ̃ a ƴɛ̀rʋ-dɩb ƴãw, a Ŋmɩn-yir-kpɛ̃ɛ dɩ̃dɔ-Paala ƴãw.

¹¹ A bàwr-maalbɛ nɩ a naaŋmɩn-ƴɛ̀r-manbɛ tɩ yel'ɩ a tẽw nɩ-bɛrɛ nɩ a nɩbɛ za zie: «A nɩr ŋa sɛwnɩ nɩ kũu! Bʋ̃ʋ n'ʋ vɛ̃, ʋ ƴɛ̀r'ɩ a tẽ-kpɛ̃ɛ ŋa sãwfʋ ƴɛ̀rʋ. Nyɩ mɩŋa za wõ a na!»

¹² Ɛcɛ a Zeremi tɩ yel'ɩ a tẽw tõ-tõ-bi-bɛrɛ nɩ a nɩbɛ za zie: «A Sore n'ʋ tõ m k'ɩ̃ɩ wa ƴɛ̀r a Ŋmɩn-yir-kpɛ̃ɛ ŋa ƴãw nɩ a tẽ-kpɛ̃ɛ ŋa ƴãw à á ŋá za nyɩ na wõ a.

¹³ Ƴɛrɛŋa a, nyɩ cere cenu ɛ́ ɩrɛ ɩb na sɛw taa nɩ a. Nyɩ bɛrɛ wone a lɛ a Sore nyɩ Naaŋmɩn na yere a, ʋʋ na lɛb'a bɛr a kpɩɛrʋ ʋ na tɩ yel k'ʋʋ na ƴãw nyɩ na a.

¹⁴ Mãa ƴãw a, ɩ̃ be n a nyɩ nuru pʋɔ, nyɩ ɩ m mɛ̃ a lɛ na pɛlɩ a nyɩ pʋɔ a, mɛ̃ a lɛ nyɩ na nyɛ̃ a sɛw a.

¹⁵ Ɛcɛ, nyɩ bãwnɩ a vla, nyɩmɛ wa kʋ m a, a nyɩɩm, a tẽ-kpɛ̃ɛ ŋa nɩ a ʋ nɩbɛ za a, nyɩ na ɩ n sãwna dem, nyɩ na kʋ nɩr na bɛ tɛr sãwna a zũú. Bʋ̃ʋ n'ʋ vɛ̃, a Sore n'ʋ sɩrɩ tõ m k'ɩ̃ɩ wa ɩ nyɩ wõ a ƴɛ̀rʋ á ŋá za.»

¹⁶ A lɛ n'a a tẽw tõ-tõ-bi-bɛrɛ nɩ a nɩbɛ za tɩ yel a bàwr-maalbɛ nɩ a naaŋmɩn-ƴɛ̀r-manbɛ: «A nɩr ŋa bɛ sɛwnɩ kũu ɛ, bʋ̃ʋ n'ʋ vɛ̃, a Sore tɩ Naaŋmɩn yúor ƴãw n'a ʋ sɩrɩ ƴɛ̀r a tɩ zie.»

¹⁷ Al pùorí, a nɩ-kore lãw nɩbɛ bɛ mɩnɛ tɩ ìr'a yel a lãw nɩbɛ za:

¹⁸ «A Zuda tẽw nãà Ezekɩasɩ daar a, naaŋmɩn-ƴɛ̀r-manɛ kãw tɩ be n be dɩ kɛ́ Mise ɛ́ yi Moresɛtɩ. Ʋ tɩ yel'a kʋ̀ a Zuda tẽw nɩbɛ: À ŋá n'a a Sore, a kpɛnʋ-za-sob, yere: “A Sɩyɔ̃ na lɩɛb'ɩ púo bɛ na kɔ a, a Zerizalɛm tẽw yie na lo na gbõ taa, ɛ́ a Ŋmɩn-yir-kpɛ̃ɛ tãw lɩɛbɩ kár.”

¹⁹ A Zuda tẽw nãà Ezekɩasɩ nɩ a ʋ nɩbɛ tɩ kʋ n a Mise bɩɩ? Bɛ nɩ̃ɛ bɛ tɩ tɛr ƴãwfʋ a Sore zie, ɛ́ bɔbr kɛ́ bɛ ɩrɛ a pɛlɩ a ʋ pʋɔ ɩ? Lɛ n'a a Sore tɩ lɛb bɛr a kpɩɛrʋ ʋ na tɩ yel a bɛ ƴãw a. Ɛcɛ a tɩɩm a, tɩmɛ wa ƴãw a nɩr ŋa a kũu dɔwrʋ a, tɩmɛ nɛbɛ na mal tɩ mɩŋa yaga za.»

A nãà Yoyakim ƴãw na bɛ kʋ a naaŋmɩn-ƴɛ̀r-manɛ Uuriyahu

²⁰ A ʋlɩ daar nɛ a, naaŋmɩn-ƴɛ̀r-manɛ kãw mɩ̀ tɩ be n be ƴɛ̀rɛ a Sore yúor ƴãw: Semayahu bidɛb, Uuriyahu, na yi Kɩrɩyatɩ-Yeyarim a tɩ n'ʋ. Ʋ tɩ ƴɛ̀r'ɩ a Zerizalɛm tẽw nɩ a Zuda nɩbɛ ƴãw a Sore yúor ƴãw mɛ̃ a lɛ tɔr za a Zeremi na tɩ ƴɛ̀r a.

²¹ A nãà Yoyakim, a ʋ sojarɩ nɩ-bɛrɛ nɩ a ʋ tõ-tõ-bi-bɛrɛ tɩ wõ n a lɛ a Uuriyahu na yel a. Lɛ n'a a nãà tɩ bɔbr a ʋ kʋb. A Uuriyahu tɩ wõ a na zɔ cen Eziptɩ tẽw.

²² A nãà Yoyakim tɩ tõ n Akɩbɔɔr bidɛb, Ɛlnatan, nɩ nɩbɛ bɛ-mɩnɛ a Eziptɩ tẽw.

²³ Bɛ tɩ tɛr'ɩ a Uuriyahu a Eziptɩ tẽw lɛb wa n wa kʋ̀ a nãà. A Yoyakim tɩ ƴãw na bɛ kʋ ʋ, ɛ́ lɔb a ʋ kũu ƴãw bɔw-lãw pʋɔ.

²⁴ Ɛcɛ Safan bidɛb, Ahikam, tɩ piw nɩ a Zeremi tɛr. A ʋl zũú a, a Zeremi bɛ tɩ lo a tẽw nɩbɛ na tɩ bɔbr a ʋ kʋb a nuru pʋɔ ɩ.