Zeremi 25 - A SƐB-SÕW

Naaŋmɩn-ƴɛ̀r-manɛ tome na tõ yome lɩzɛr'ɩ ata a

¹ A Sore tɩ ƴɛ̀r'ɩ ƴɛ̀rʋ na càarɩ a Zuda tẽw nɩbɛ za a kʋ̀ a Zeremi. A tɩ ɩ n a Zozɩasɩ bidɛb Yoyakim na ɩ Zuda tẽw nãà naalʋ-dɩb yome anaar sob daar, ɛ́ ɩ a Babɩlɔn tẽw nãà Nabikodonozɔɔr naalʋ-dɩb yũon-dãw-niwn sob.

² A naaŋmɩn-ƴɛ̀r-manɛ Zeremi tɩ yel'ɩ a Zuda tẽw dem za nɩ a bɛlɩ dem na kpɩɛr a Zerizalɛm a:

³ «A Amɔ̃ bidɛb Zozɩasɩ na ɩ a Zuda tẽw nãà a naalʋ-dɩb yome pie nɩ ata daar za n'a, a pɛr lɛ kɛ́ yome lɩzɛr'ɩ ata, a Sore ƴɛ̀r a ɩ̃ zie, ɩ̃ɩ ƴɛ̀rɛ a ʋ ƴɛ̀rʋ kʋ̀rɛ nyɩ bɛ tɛr bàlʋ daar ɛ, ɛ́ nyɩ bɛ bɛr wõ ɩ.

⁴ A Sore bɛ tɩ bàl a ʋ tõ-tõ-biir, a naaŋmɩn-ƴɛ̀r-manbɛ, tob a nyɩ zie ɩ. Ɛcɛ, nyɩ bɛ ƴãw tobr bɛr wõ ɩ.

⁵ Ʋ yel nyɩ na: “A nyɩ kãw za, ʋ lɩɛbɩ a ʋ ɩb na bɛ vɩɛl a, ʋ bɛr a ʋ ɩ-faar! Lɛ n'a nyɩ na kpɩɛr a tẽw ŋa a Sore na kʋ̀ nyɩ, a nyɩɩm nɩ a nyɩ sãàkʋm-kore a koro kãw za nɩ kʋralɛ a.

⁶ Nyɩ ta zɔrɛ tuur ŋmɩn-yoru kɛ́ nyɩ maalɛ a, ɛ́ gbine dume mɩ́ gũu tɩ tɔ tẽw a niŋé ɩ. Nyɩ ta ɩ a ɩ̃ suur ìr a nyɩ nuru bʋ̃-maalɩ ƴãw ɛ, ɩ̃ɩ kʋ̃ maalɩ nyɩ faa kãw za ɩ.

⁷ Ɛcɛ nyɩ bɛ bɛr wõ m ɛ, a Sore n'ʋ yere. A nyɩ faa ƴãw a, nyɩ nɩ̃ɛ na tɩ ɩ a ɩ̃ suur ìr a nyɩ nuru bʋ̃-maalɩ ƴãw.”

⁸ A lɛ pʋɔ a, à ŋá n'a a Sore, a kpɛnʋ-za-sob, yere: “Nyɩ na faa bɛ bɛr wõ a lɛ ɩ na yere a,

⁹ ɩ̃ na tõ na bɛ tɩ bʋɔlɩ a Saa-pɛrɩ́-gʋba-lowr nɩbɛ za, lãwnɩ a ɩ̃ tõ-tõ-bie, a Nabikodonozɔɔr, a Babɩlɔn tẽw nãà. Ɩ̃ na ɩ na bɛ wa a tẽw ŋa nɩ a ʋ nɩbɛ nɩ a tẽ-kpɔwlɩ za na viiri koli ʋ a ƴãw. Ɩ̃ na kʋ nyɩ na pàw pɛr, a bɛl nɩ a nyɩɩm, ɩ̃ɩ na ɩ n a tẽw ŋa yie lɩɛbɩ deboru gã kʋralɛ, bɛ mɩ́ nyɛ̃ ŋmɩɛr pʋl-vʋ̃ɔ cɛlsɩ.

¹⁰ Ɩ̃ na ɩ na a cuwr gɔmɛ, a nʋ̃ɔ̀ cɛlsɩ, a dɛb-sãan nɩ a pɔw-sãan yielu baarɩ a nyɩ zie. Ɩ̃ na ɩ na a nɩɛr gɔmɛ bɔr, ɛ́ ɩ a fɩ̃tɩlɛ kpiiri.

¹¹ A tẽw ŋa za na lɩɛbɩ debuo, zie na sãw ʋ za a, ɛ́ a nɩ-bʋʋrɛ bɛ ŋa za na tone nɩ a Babɩlɔn tẽw nãà tome tɩ ta n yome lɩz'a ata nɩ pie.”

¹² A Sore yere na: “A yome lɩz'a ata nɩ pie wa tɔ a, ɩ̃ na sowr'ɩ a Babɩlɔn tẽw nãà nɩ a ʋ nɩbɛ bom a bɛ ɩ-faar ƴãw. Ɩ̃ na ìr'ɩ a bɛ tẽw ƴãw, ɩ ʋ lɩɛbɩ tẽ-kpalɛ.

¹³ Ɩ̃ na ɩ na a kpɩɛrʋ al ɩ̃ na tɩ ƴɛ̀r càar'ɩ a tẽw ŋa a, a wa a ʋ zu. A al za na sɛb a sɛbɛ ŋa pʋɔ a, a al za a naaŋmɩn-ƴɛ̀r-manɛ Zeremi na tɩ ƴɛ̀r càar'ɩ a nɩ-bʋʋr-yoru a.

¹⁴ Bʋ̃ʋ n'ʋ vɛ̃, a bɛl mɩ̀ a, nɩ-bʋʋr-yoru na yãwmɛ a, nɩ na-mɩnɛ na kpɛmɛ a na tʋ̃ɔ́ bɛ na. À ŋá n'a ɩ̃ na ɩ bɛ ya a bɛ ɩ-ɩrɩ nɩ a faa al za bɛ na maalɩ a san.”»

A ZEREMI YERE NƖ A NƖ-BƲƲR-YORU 25:15—35:19 A ƴɛ̀rʋ-dɩb koli-nyúura

¹⁵ Nyɛ̃ a lɛ a Sore, a Ɩsɩrayɛl Naaŋmɩn na tɩ ƴɛ̀r a ɩ̃ zie a: «De a divɛ̃ koli-nyúura ŋa na paalɩ a ɩ̃ suur a, a ɩ̃ nũú, kʋ̀ a nɩ-bʋʋrɛ bɛl za zie ɩ̃ na tone fʋ a, bɛ nyũ.

¹⁶ Bɛ na nyũ na, bɛ na dẽdere na, bɛ na dam'ɩ zuru, bɛlɛ wa nyɛ̃ a alɩ bome nɛ za ɩ̃ na na sãw a bɛ sɔgɔ a!»

¹⁷ Lɛ n'a ɩ̃ tɩ de a koli-nyúura a Sore nũú kʋ̀ a nɩ-bʋʋrɛ bɛl za zie a Sore na tɩ tõ m a, bɛ nyũ.

¹⁸ Ɩ̃ tɩ tĩ nɩ nɩ a Zerizalɛm nɩ a Zuda tẽ-bɛrɛ, a na-mɩnɛ nɩ a bɛ tõ-tõ-bi-bɛrɛ. Ɩ̃ tɩ ɩ na a tẽ-bɛrɛ á ŋá lɩɛbɩ deboru, zie na kpɛ faa bɛ mɩ́ nyɛ̃ ŋmɛ pʋl-vʋ̃ɔ cɛlsɩ, ɛ́ a ŋmɛ-ƴãw pʋɔ bɛ mɩ́ de a man nɩ a. Alɛ n'a ɩrɛ a dɩ̃a.

¹⁹ Al pùorí a, a nɩ-bʋʋr-yoru n'a tɩ cɛ: - A Eziptɩ tẽw nãà, a Faarawɔ̃, a ʋ tõ-tõ-biir, a ʋ tõ-tõ-bi-bɛrɛ, nɩ a ʋ nɩbɛ za,

²⁰ de nɩ a nɩ-bʋʋr-tɛɛtɛɛ za na kpɩɛr a Eziptɩ a, - a Usɩ tẽw na-mɩnɛ, - a Filisɩtɛ̃ mɩnɛ na-mɩnɛ: a bɛl na be a Asɩkalon, a Gaza, a Ekiron nɩ a Asɩdɔdɩ tẽw na cɛ a,

²¹ - a Edɔm, Mowab nɩ Amɔ̃ ten dem,

²² - a Tɩ́ɩ̀r, Sɩdɔ̃ nɩ a tẽw na be a kʋ̃ɔ-kpɛ̃ɛ gãwn a na-mɩnɛ za,

²³ - a Dedan, Tema, Buuzɩ ten dem, nɩ a nɩbɛ bɛl na mɩ́ põ a bɛ tacɩ-kɔblʋ a,

²⁴ - a Arabʋ mɩnɛ na-mɩnɛ nɩ a nɩ-bʋʋr-tɛɛtɛɛ za na kpɩɛr a wɛja-kpalɛ pʋɔ a,

²⁵ - a Zimiri nɩ Elam ten na-mɩnɛ za, nɩ a Mɛdɩ mɩnɛ na-mɩnɛ za,

²⁶ - a saa-pɛrɩ́-gʋba-lowr na-mɩnɛ za, a bɛl na pɩɛlɩ nɩ a bɛl na zãá a. A tɩ fɛr'a k'aa tẽ-daa naalʋ-ten al za na be a tẽw zu ziir za a, nyũ a koli-nyúura ŋa pʋɔ tu taa, ɛ́ a Sesakɩ tẽw nãà nyũ a bɛ za pùorí.

²⁷ A Sore tɩ ƴãw na ɩ̃ yel bɛ: «À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: Nyɩ nyúur, nyɩ kuole, nyɩ tire, nyɩ lore taa lɛbr ìre ɩ, nyɩ na na nyɛ̃ a alɩ bome nɛ za ɩ̃ na na sãw a nyɩ sɔgɔ a.»

²⁸ Ʋ tɩ yel'a ƴãw pʋɔ: «Bɛlɛ wa zawrɩ na de a koli-nyúura fʋ na tùre bɛ a, nɩ a ʋ nyub a, fʋ na yel bɛ na: À ŋá n'a a Sore, a kpɛnʋ-za-sob, yere: nyɩ na cãà na nyũ ʋ.

²⁹ Bʋ̃ʋ n'ʋ vɛ̃, a tẽ-kpɛ̃ɛ ɩ̃ na so a n'ʋ ɩ̃ tine nɩ a kpɩɛrʋ ɩ̃ na na ɩ a wa a, ɛ́ nyɩɩm kʋ̃ pʋɔ ɩ? Aɩ, ɩ̃ bɛ bɛrɛ nyɩ ɛ. Ɩ̃ bɛrɛ nɩ a zɛbr a waar a tẽ-daa nɩbɛ za zu. A mãa Sore, a kpɛnʋ-za-sob'ʋ yel.»

³⁰ A Sore tɩ cãà na yel mɛ̃: «Yel a yel ŋa kʋ̀ bɛ a ɩ̃ yúor ƴãw, yel ƴãw pʋɔ: A saa-zu za a, a Sore tanɛ na. Ʋ be n a yir ʋ na so a pʋɔ, ɛ́ ŋmɛrɛ kɔkɛɛ. Ʋ tanɛ nɩ a ʋ zi-sóra. Ʋ ŋmɩɛr'ɩ cɛlsɩ càarɛ nɩ a tẽw dem za, mɛ̃ a bɛlɩ dem na mɩ́ nɛbr a divɛ̃ tɩ-wɔmɛ íre a divɛ̃ a.

³¹ A gɔmɛ ʋ na ɩrɛ a ta n a tẽw baarʋ zie. A Sore dɩrɛ nɩ nɩ a nɩ-bʋʋrɛ ƴɛ̀rʋ, ʋ bʋɔlɛ nɩ a nɩsaalbɛ za a ʋ ƴɛ̀rʋ-dɩb zie. A sãwna dem a, ʋ bɛrɛ bɛ na kʋ̀rɛ a zɛbr-sɔ-kpɛ̃ɛ, ʋlɛ n'ʋ yere.»

³² À ŋá n'a a Sore, a kpɛnʋ-za-sob, yere: «A kpɩɛrʋ yi n bʋʋrɛ bɛ ŋa zie tɩ sãá bʋʋrɛ bɛ ŋa zie. A saa-sɛsɛb-kpɛ̃ɛ cɛrɛ nɩ a tẽw baarʋ zie.»

³³ A Sore zũú a, a kũuni na yi n a tẽw lõbowr ŋa tɩ sãá lõbowr ŋa. A yele á ŋá wa ta a, nɩr kʋ̃ kõ a kũuni bɛ ŋa ɩ, nɩr kʋ̃ wob a bɛ ƴã-gamɛ ɩ, nɩr kʋ̃ ũù bɛ ɩ. Bɛ na lɩɛbɩ tẽsɔw pʋɔrʋ.

³⁴ Nyɩ kone lãw-mʋɔlɛ, nyɩ lɔbr cɛlsɩ, nyɩɩm nɩbɛ nɩ-bɛrɛ ɛ, nyɩ bile tẽsɔw, nyɩɩm dʋn dem i. Bʋ̃ʋ n'ʋ vɛ̃, a nyɩ kɔkɛɛ ŋmab daar ta na. Nyɩ na lo na ŋmɛr mɛ̃ la-vla vla a.

³⁵ Sɔwlʋ zie bɛ ka be a nɩ-bɛrɛ ƴãw ɛ, a dʋ̃-cɩ̃ɩnbɛ kʋ̃ tʋ̃ɔ́ zɔ cɩ̃ɛ ɩ.

³⁶ Ɩ̃ wone nɩ a bɛ cɛlsɩ, ɩ̃ wone nɩ a bɛ kpɩɛrʋ kon. Bʋ̃ʋ n'ʋ vɛ̃, a Sore sãwnɛ nɩ a dʋn mʋ̃ɔ 'wɔbrʋ zie bɛrɛ.

³⁷ A dʋn mʋ̃ɔ 'wɔbrʋ ziir na vɩɛl vɩɛl a ɩ n cɩ̃ɩ, a Sore su-tʋlʋ kpãkpã zũú.

³⁸ A gbẽw yi n a ʋ tuw pʋɔ. A bɛ tẽw lɩɛb'ɩ wɛja-kpalɛ, a zɛbr na zɛbr bɛ bãw nɩbaalʋ a ƴãw, nɩ a Sore su-tʋlʋ kpãkpã zũú.