Zeremi 24 - A SƐB-SÕW

A kãkamɛ peli ayi

¹ A Sore tɩ ɩ na ɩ̃ nyɛ̃ kãkamɛ bɛ na bin nɩ peli ayi a Ŋmɩn-yir-kpɛ̃ɛ niŋé a. A Babɩlɔn tẽw nãà Nabikodonozɔɔr na tɩ nyɔw a Yoyakim bidɛb, Yekonɩa, na ɩ a Zuda nãà a nɩ a ʋ tõ-tõ-bi-bɛrɛ, a nuru tõ-tonbɛ nɩ a kure bʋ̃-maalbɛ cen nɩ a Babɩlɔn tẽw a pùorí tɩ n'a.

² A pèlé kãw kãkamɛ tɩ vɩɛl'ɩ yaga yaga, vɩɛl mɛ̃ a kãkamɛ bɛ na mɩ́ de niwn pɔr a. A pèlé ƴen sob kãkamɛ tɩ sãw nɩ a za bɛ tɛr dɩb ɛ.

³ Lɛ n'a a Sore tɩ yel mɛ̃: «Zeremi i, bʋ̃ʋ n'ʋ fʋ nyɛ̃?» Ɩ̃ tɩ sɔw: «Kãkamɛ n'a ɩ̃ nyɛ̃: a mɩnɛ vɩɛl'ɩ yaga za, ɛ́ a mɩnɛ sãw bɛ tɛr dɩb ɛ.»

⁴ Lɛ n'a a Sore tɩ ƴɛ̀r a ɩ̃ zie à ŋá:

⁵ À ŋá n'a a mãa Sore, a Ɩsɩrayɛl Naaŋmɩn, yere: Nʋ̃ɔ̀ ɩrɛ nɩ a kãkã-vɩɛlɩ á ŋá jɩ́rʋ ƴãw. Lɛ n'a ɩ̃ jɩ́rɛ a Zuda tẽw dem bɛ na ír a bɛ tẽw a nɩ nɔ̃wfʋ, a bɛl ɩ̃ na diw a ka tɩ sãá nɩ a Babɩlɔn tẽw a.

⁶ Ɩ̃ jɩ́rɛ bɛ na nɩ nɔ̃wfʋ, ɩ̃ɩ na lɛb'a tɛr bɛ wa n a tẽw ŋa pʋɔ. Ɩ̃ na lɛb'a mɛ bɛ, ɩ̃ kʋ̃ lɛb da bɛ lɔb ɛ. Ɩ̃ na lɛb'a sɛl bɛ, ɩ̃ bɛ lɛb vɔnɛ bɛ bɛrɛ ɩ.

⁷ Ɩ̃ na kʋ̀ bɛ nɩ yã na na sõw bɛ bɛ bãw mɛ̃ a. Sɩza, mãa n'ɩ a Sore, bɛ na lɩɛb'ɩ a ɩ̃ nɩbɛ, ɩ̃ɩ ɩ a bɛ Naaŋmɩn. Bɛ na lɛb'a wa a ɩ̃ zie nɩ a bɛ pʋɔ za.

⁸ «Ɛcɛ, à ŋá n'a ɩ̃ yere a Zuda tẽw nãà Sedesɩasɩ, a ʋ tõ-tõ-bi-bɛrɛ, a Zerizalɛm nɩbɛ na cɛ a, a bɛlɩ dem za na cãà be a tẽw ŋa pʋɔ a, nɩ a bɛl na cen tɩ kpɩɛr a Eziptɩ tẽw a ƴãw: Ɩ̃ na ɩ bɛ na mɛ̃ a lɛ bɛ na mɩ́ ɩ a kãkamɛ na sãw zuo bɛ tɛr dɩb a.

⁹ À ŋá n'a a tẽ-daa naalʋ-ten za na mɩ́ nyɛ̃ bɛ a bɛ pʋ̀lá vʋ̃ɔ. A ziir al za ɩ̃ na na diw bɛ yaarɩ a, bɛlɛ wa bɔbr kɛ́ bɛ ƴãw nɩr vĩ, ɩ nɩr la, tʋ nɩr bɩɩ ŋmɛ ƴãw nɩr a, bɛlɛ nɛbɛ bɛ na mɩ́ de man nɩ.

¹⁰ Ɩ̃ na bɛr'ɩ a zɛbr, a kɔ̃ nɩ a jɛ̀lmɛ̃ bàalʋ a waar a bɛ zu ɛ́ gù bɛ tɩ bɔr a tẽw ʋl ɩ̃ na kʋ̀ a bɛl nɩ a bɛ sãàkʋm-kore a pʋɔ.»