Zeremi 22 - A SƐB-SÕW

¹ À ŋá n'a a Sore tɩ yel a Zeremi: «Siw a Zuda tẽw nãà yir. A be a, tɩ ƴɛ̀r a ƴɛ̀rʋ ŋa.

² Fʋ na tɩ yel'a: “A fʋ̃ʋ, Zuda tẽw nãà, na zɩ̃ a Daviir naalʋ-dà-kɔw zu a, a fʋ̃ʋ, a fʋ tõ-tõ-bi-bɛrɛ nɩ a fʋ nɩbɛ za na tuur a dɩ̃dɛɛ á ŋá ƴãw kpɩɛr a, nyɩ wone a Sore ƴɛ̀rʋ.”

³ À ŋá n'a a Sore yere: nyɩ ɩrɛ a lɛ-na-tu-sɔr-a, ɛ́ tuur a mɩnʋ. Nyɩ ta dɔwrɛ ɛ́ ta ɩrɛ a kpɩɛr a nʋʋrɩ, a bi-kpebe nɩ a pɔw-kɔbɛ ɩ. Nyɩ ta cãà kʋrɛ nɩbɛ na bɛ tɛr sãwna a, a zie ŋa pʋɔ ɩ.

⁴ Nyɩmɛ wa sɩrɩ ɩrɛ à à ŋá a, na-mɩnɛ na be n be kʋralɛ zɩnɛ a Daviir naalʋ-dà-kɔw zu, ɛ́ mɩ́ zɔm wur bɩɩ kpɛ zɛbr-torko pʋɔ cɔlɛ nɩ. Bɛ na cãà na tuur a dɩ̃dɛɛ á ŋá ƴãw kpɩɛr, a bɛl, a bɛ tõ-tõ-bi-bɛrɛ nɩ a nɩbɛ.

⁵ Ɛcɛ nyɩmɛ bɛ wa bɛrɛ wone a ƴɛ̀rʋ á ŋá a, à ŋá n'a a mãa, a Sore, yere: ɩ̃ pɔrɛ nɩ nɩ a mãa mɩŋa, a yir ŋa na lo na lɩɛbɩ kʋsɛbɛ na gbõ taa a.»

⁶ A Zuda tẽw nãà yir ƴãw a, à ŋá n'a a Sore yere: «Ɩ̃ na saa nyɛ b fʋ vɩɛl man Galaadɩ tẽw tuwr a, bɩɩ ɩ mɛ̃ a Libã tẽw tan nyʋɔr a, ɩ̃ bɛ bʋ́nɛ nɩ na ɩ fʋ lɩɛbɩ a wɛja-kpalɛ ɩ, tẽ-kpɛ̃ɛ nɩr za na bɛ kpɩɛr a ɩ.

⁷ Ɩ̃ cɔbrɛ nɩ nɩbɛ na na ŋmɛr fʋ bɛr a, ŋa za tɛr'ɩ a ʋ tõ-tõ-bome. Bɛ na cɛ n a fʋ sɛɛdɩr tɩɩr dàar kpul-vɩɛlɩ ŋma lɔb a ƴãw vũumí.»

⁸ A lɛn daar a nɩ-bʋʋr-yoru nɩbɛ nãà mɩ́ wa tɔlɛ pɩɛlɛ a tẽ-kpɛ̃ɛ ŋa a, bɛ na mɩ́ sowre nɩ taa: «Bʋ̃ʋ n'ʋ so a Sore ɩ a tẽ-kpɛ̃ɛ ŋa à ŋá?»

⁹ Bɛ na mɩ́ sɔw bɛ na: «Bɛ na zawrɩ a Sore bɛ Naaŋmɩn wõ-taa bɛr, ɛ́ gbĩ dume gũu tɩ tɔ tẽw ŋmɩn-yoru niŋé maalɩ a a n'a so.»

Bɛ nɩ̃ɛ kone a nãà Salum

¹⁰ Zuda tẽw dem i, nyɩ ta kone a sob nɛ na kpi a ɩ, a nãà Zozɩasɩ, nyɩ ta kone ʋ ɛ. Nyɩ nɩ̃ɛ kone a sob nɛ na cere a, a nãà Salum. Bʋ̃ʋ n'ʋ vɛ̃, ʋ kʋ̃ lɛb wa ɩ, ʋ kʋ̃ lɛb nyɛ̃ a ʋ tẽ-dɔwra ɩ.

¹¹ À ŋá n'a a Sore yere a Salum ƴãw, a Zuda tẽw nãà, na tɩ lɩɛrɩ a ʋ sãà Zozɩasɩ, ɛ́ bɛ cãà a ka a: «Ʋ kʋ̃ lɛb wa ɩ.

¹² Ʋ na tɩ kpi n a be bɛ na diw ʋ cen nɩ a, ʋ kʋ̃ lɛb nyɛ̃ a tẽw ŋa ɩ.»

A ƴɛ̀rʋ a Sore na ƴɛ̀r càar'ɩ a Yoyakim a

¹³ «Baw-bio páw fʋ na, Yoyakim i! Fʋ ƴãw na bɛ mɩɛr yir kʋ̀rɛ fʋ ɛ́ a bɛ tuur a yel-mɩnʋ ɛ. Fʋ mɩɛr'ɩ bɔwpɩɩr dɔwlɛ ɛ́ a lɛ-na-tu-sɔr a nɩbɛ ƴãw a, fʋ bɛ cɛlɛ be ɩ. Fʋ ƴãw na a nɩbɛ tone zawla, ɛ́ fʋ bɛ yarɛ bɛ ɩ.

¹⁴ Fʋ yere na: “Ɩ̃ na ɩ na bɛ mɛ nãà yir-kpɛ̃ɛ kʋ̀ m na tɛr bɔwpɩ-bɛrɛ bɛrɛ a.” Fʋ puo nɩ tokoro vɛɛ, ɛ́ pàw a dacine nɩ sɛɛdɩr tɩɩr dàar fʋ na bʋl'ɩ bʋ̃-zɩɛ a.

¹⁵ Fʋ nɔ̃w bɔbr'a kɛ́ fʋ wul fʋ na ɩ nãà, a sɛɛdɩr tɩɛ dàa fʋ na kaa ír kɛ́ fʋ wul'ɩ fʋ tʋɔra a bɩɩ? A fʋ sãà bɛ tɩ dɩrɛ ɛ́ nyúur bɩɩ? Ɛcɛ ʋ tɩ ɩrɛ nɩ a lɛ-na-tu-sɔr-a, ɛ́ tuur a mɩnʋ. Ɛ́ a yele za tɩ cere nɩ vla a ʋ zie.

¹⁶ Ʋ mɩ́ tɩ de nɩ a bãbàal nɩ a nã́w sob yele ƴãw a ʋ nuru pʋɔ, ɛ́ a yele za tɩ cere vla. Sob nɛ na ɩrɛ à à ŋá a wul'a k'ʋʋ bãw mɛ̃ na. A Sore n'ʋ yel.

¹⁷ Ɛcɛ a fʋ̃ʋ a, a fʋ mɩŋa tɔnɛ tɛwr'a fʋ jɩ́rɛ, nɩbɛ na bɛ sãw a kʋb tɛwr'a fʋ bɔbr, nɩ po-to-fãw-ɩb a nɩbɛ zie.»

¹⁸ A na ɩ à ŋá a, à ŋá n'a a Sore yere a Zozɩasɩ bidɛb, Yoyakim, na ɩ a Zuda tẽw nãà a ƴãw: «A ʋ kũu daar a, bɛ kʋ̃ kõ lãwnɩ yel: “'Woi, ɩ̃ yɛb i! 'Woi, ɩ̃ yeepuule e!” Bɛ kʋ̃ kõ lãwnɩ yel: “'Woi, ɩ̃ Zu-sob i! 'Woi, ɩ̃ Nãà a!”

¹⁹ Bɛ na ũù ʋ na mɛ̃ bõw a. Bɛ na vu n a ʋ kũu tɩ lɔb bɛr zãá nɩ a Zerizalɛm tẽw dɩ̃dɛɛ.»

A Zerizalɛm vĩ nɩ a ʋ yo-sãwna

²⁰ «Zerizalɛm i, do a Libã tãw zu tɩ lɔbr cɛlsɩ, ɩ bɛ wõ a fʋ kɔkɔr a Basan tã-sɛr zu. Lɔbr cɛlsɩ a Avarim tan zu, a fʋ sɛnbɛ za na bɛ cãà be a ƴãw.

²¹ Ɩ̃ tɩ ƴɛ̀r'ɩ a fʋ zie a lɛn daar bom za na bɛ tɩ damnɛ fʋ a, ɛcɛ fʋ tɩ sɔw na: “Ɩ̃ bɛ bɔbr k'ɩ̃ɩ wõ bom za ɩ.” À ŋá n'a fʋ ɩ a fʋ pɔ̀lʋ daar za, fʋ bɛ dãw bɛr wõ a ɩ̃ ƴɛ̀rʋ ɛ!

²² Sɛsɛb de nɩ a fʋ nɩ-bɛrɛ za cen nɩ, bɛ diw nɩ a fʋ nɩ-nɔnɩ cen nɩ tẽ-yũo. A fʋ̃ʋ a, a fʋ yúor na sãw na, vĩ na nyɔw fʋ nɩ a faa al za fʋ na maalɩ a zũú.

²³ Fʋ̃ʋ na kpɩɛr a Libã tuw pʋɔ, ɛ́ tɛr a cow a sɛɛdɩr tɩɩr zu a, fʋ na kõ n a lɛn daar a 'wɔbrʋ wa ùr lo a fʋ zu a, a lɛn daar fʋ na na wone tuo mɛ̃ pɔw na dɔwr a!»

A Sore ƴɛ̀rʋ ʋ na ƴɛ̀r càar'ɩ a nãà Yoyakim bidɛb Konɩahu a

²⁴ «Nyɛ̃ a ʋlɩ bom fʋ na na tɩ yel kʋ̀ a Yoyakim bidɛb nɩ a Zuda tẽw nãà Konɩahu a: “A Sore yere na: Ɩ̃ pɔrɛ nɩ nɩ a ɩ̃ nyɔ-vʋʋrʋ à ŋá: Fʋ̃ʋ mɩ̀ saa tɩ ɩ ŋmaarʋ-bʋ̃-ƴãwna a ɩ̃ dʋrʋ nũú a, ɩ̃ nãà for fʋ nɩ a ɩ̃ nobirí.

²⁵ Ɩ̃ dier fʋ na ƴãwnɛ a bɛlɩ dem na bɔbr a fʋ kʋb a nuru pʋɔ, a nɩbɛ bɛl dɛ̃bɩ̃ɛ fʋ na zɔrɛ yaga za a, a Babɩlɔn tẽw nãà Nabikodonozɔɔr nɩ a ʋ zɛbr-nɩbɛ nuru pʋɔ.

²⁶ Ɩ̃ na diw nɩ a fʋ̃ʋ nɩ a fʋ mã na dɔw fʋ a, cen nɩ tẽ-yũo pʋɔ, be nyɩ na bɛ dɔw a, ɛ́ be n'a nyɩ na tɩ kpi.

²⁷ Nyɩ na bɔbr'a nɩ a nyɩ fãw za kɛ́ nyɩ lɛb wa a nyɩ tẽw, ɛcɛ nyɩ kʋ̃ lɛb wa ɩ.”»

²⁸ Nɩbɛ sowre na: «La-ŋmɛrnyɛ̃ na bɛ tɛr yel-ɩra a nɔ̃w n'ɩ a dɛb ŋa, a Konɩahu? Laa bɛ na bɛ cãà bɔbr a a? Bʋ̃ʋ n'ʋ so bɛ diw ʋlɛ nɩ a ʋ bibiir cen nɩ tẽ-yũo bɛ na bɛ bãw a?»

²⁹ 'Woi, ɩ̃ tẽw i, ɩ̃ tẽw i, bɛr wõ a Sore ƴɛ̀rʋ!

³⁰ À ŋá n'a a Sore yere: «Nyɩ sɛb a Konɩahu ƴãw à ŋá: A nɩr ŋa bɛ tɛr bibiir ɛ, nɩ-guura n'ʋ. A ʋ bibiir za pʋɔ a, been kãw za kʋ̃ páw a nãà Daviir naalʋ-dà-kɔw zɩ̃ ɛ́ dɩ nɩ-kpɛ̃ɛnʋ a Zuda zu ɛ.»