Zeremi 20 - A SƐB-SÕW

Pasehuur 'lẽ nɩ a Zeremi dàa ƴãw

¹ Ɩmɛɛr bidɛb, Pasehuur, na tɩ ɩ a Ŋmɩn-yir-kpɛ̃ɛ gùrbɛ nɩ-kpɛ̃ɛ a, tɩ wõ n a ƴɛ̀rʋ al za a Zeremi na tɩ ƴɛ̀r a Sore yúor ƴãw a.

² Lɛ n'a ʋ tɩ ɓa a naaŋmɩn-ƴɛ̀r-manɛ, a Zeremi, ɛ́ ƴãw bɛ 'lẽ ʋ ƴãw dàa ƴãw, a Bɛ̃zamɛ dɩ̃dɔ-kpɛ̃ɛ ƴãw, a be bɛ na mɩ́ tuur kpɩɛr a Ŋmɩn-yir-kpɛ̃ɛ pʋɔ a.

³ A dãw-bio daarɩ́, a Pasehuur tɩ ƴãw na bɛ cɛ̀r a Zeremi a dàa ƴãw. Lɛ n'a a Zeremi tɩ yel ʋ: «A Sore kʋ̃ cãà bʋɔlɛ fʋ Pasehuur ɛ, ʋ na bʋɔlɛ fʋ nɩ “Pʋl-vʋ̃ɔ-a-ziir-za”.

⁴ Bʋ̃ʋ n'ʋ vɛ̃, à ŋá n'a a Sore yere: “Dɩ̃a na ta a, ɩ̃ na ɩ na fʋ lɩɛbɩ pʋl-vʋ̃ɔ bom, a fʋ̃ʋ tɛɛ za ƴãw nɩ a fʋ bárɩ ƴãw. A bɛl a, a bɛ dɔ̃ dem zɛbr-sɔ-kpɛ̃ɛ na kʋ bɛ na, ɛ́ a fʋ̃ʋ a, fʋ na nyɛ̃ nɩ a bɛ kũu. Ɩ̃ na ƴãw nɩ a Zuda tẽw nɩbɛ a Babɩlɔn tẽw dem nãà nuru pʋɔ. Ʋ na tɛr bɛ na cen nɩ a Babɩlɔn tẽw bɩɩ ʋ na ƴãw na bɛ kʋ bɛ.

⁵ A tẽ-kpɛ̃ɛ ŋa naalʋ za, a alɩ bome nɛ ʋ na páw a ʋ tome pʋɔ, a ʋ bʋ̃-vɩɛlɩ vɩɛlɩ za, a Zuda tẽw na-mɩnɛ na-bome za a, ɩ̃ na de a na ƴãw a bɛ dɔ̃ dem nuru pʋɔ. Bɛ na zá a na, wob a cen nɩ a Babɩlɔn tẽw.

⁶ Ɛ́ a fʋ̃ʋ, Pasehuur i, fʋ na cen nɩ gbãgbaalʋ pʋɔ, fʋ̃ʋ nɩ a bɛlɩ dem za na lãw kpɩɛr'ɩ fʋ a. Fʋ̃ʋ wa ta a Babɩlɔn a, fʋ na kpi na, ɛ́ a be n'a bɛ na ũù fʋ, fʋ̃ʋ nɩ a fʋ bárɩ bɛl za zie fʋ na tɩ ɩ naaŋmɩn-ƴɛ̀r-man-ziri sob a.”»

A Zeremi zɛbr'ɩ a Naaŋmɩn zie

⁷ Sore e, fʋ bɛlɩ mɛ̃ na, ɩ̃ɩ bɛr fʋ bɛlɩ mɛ̃ nyɔw. Fãw n'a fʋ ɩ n mɛ̃, tʋ̃ɔ́ mɛ̃. A nɩbɛ ɩrɛ mɛ̃ na laar bibie za, bɛ za kpɔwrɛ mɛ̃ na.

⁸ Kʋralɛ alɛ wa fɛr k'ɩ̃ɩ ƴɛ̀r a, a mɩ́ fɛr'a k'ɩ̃ɩ cɩɩrɛ yere: «Po-to-fãw-ɩb nɩ sãw-bɛrʋ!» A Sore ƴɛ̀rʋ zũú a, a nɩbɛ tʋʋr mɛ̃ na ɛ́ ɩrɛ mɛ̃ laar bibie za.

⁹ Mãa wa yel: «Ɩ̃ bɛ lɛb tɩ́ɛrɛ a Sore yele ɩ, ɩ̃ kʋ̃ lɛb ƴɛ̀r a ʋ yúor ƴãw a», a lɛn daar a, a mɩ́ ɩ na mɛ̃ vũu na dɩrɛ a ɩ̃ pʋ̃ɔmɩ za a. Ɩ̃ mɩ́ bàl'ɩ ɩ̃ tʋɔra k'ɩ̃ɩ tʋ̃ɔ́ ʋ tɛr, ɛcɛ ɩ̃ bɛ mɩ́ tʋ̃ɔ́ ɩ.

¹⁰ Ɩ̃ wone nɩ nɩ-yaga na sãwnɛ a ɩ̃ yúor a. Bɛ bʋɔlɛ mɛ̃ nɩ «Pʋl-vʋ̃ɔ-a-ziir-za!» Bɛ mɩnɛ yere na: «Nyɩ wo a ʋ sãwna!» A ŋmaarɛ sɔwr: «Ʋ̃ʋ, tɩ wo a ʋ sãwna!» A ɩ̃ bárɩ tɛɛ za jɩɛrɛ nɩ a ɩ̃ loba. Bɛ yere na: «Kapaw ʋ na ɩ na tɩ bɛ̀lɩ nyɔw ʋ. Tɩ na tɛr'ɩ fãw zuo ʋ, ɛ́ tɩ na yáa nɩ a tɩ san a ʋ zu.»

¹¹ Ɛcɛ a Sore lãw nɩ mɛ̃ na mɛ̃ zɛbr-nɩr na kpɛmɛ a. A bɛlɩ dem za na dɔwrɛ mɛ̃ a na lo na, bɛ kʋ̃ tʋ̃ɔ́ ɩ a lɛ bɛ na tɩ́ɛrɛ a ɩ. Vĩ na nyɔw bɛ na, bɛ na gúu a. A na ɩ bɛ nɩ vĩ kʋralɛ, ɛ́ nɩr za kʋ̃ yiiri ʋ bɛr ɛ.

¹² Sore kpɛnʋ-za-sob i, fʋ mɩ́ nyɛ̃ nɩ a nɩr na tu b a bãw. Fʋ bãw nɩ a tɩ bʋ̃-bɔbrɩ nɩ a tɩ tɩɛrʋ. Fʋ̃ʋ n'ʋ ɩ̃ de a ɩ̃ yele kʋ̀. Wul mɛ̃ a lɛ fʋ na na yáa a san kʋ̀ m a.

¹³ Nyɩ yiele a Sore ƴãw! Nyɩ danɛ a Sore! Bʋ̃ʋ n'ʋ vɛ̃, ʋ faa nɩ a nã́w sob a ɩ-fa-maalbɛ nuru pʋɔ.

*

¹⁴ Ŋmɛ-ƴãw, ʋ páw a ɩ̃ dɔwfʋ bibir! A bibir ʋl a ɩ̃ mã na dɔw mɛ̃ a, ʋ ta nyɛ̃ maalʋ ɛ!

¹⁵ Ŋmɛ-ƴãw, ʋ páw a nɩr ʋl na tɩ yel a ɩ̃ sãà: «Bɛ dɔw nɩ bidɛb kʋ̀ b!», a ɩ ʋ nʋ̃ɔ̀ yaga za a!

¹⁶ A nɩr ŋa, ʋ ŋmɛ̃ taa nɩ a tẽ-bɛrɛ a Sore na sãw bɛr a baarɩ a. A biɓaara a, ʋ mɩ́ wone kon cɛlsɩ, ɛ́ a mʋ̃tɔ̃-tuo ʋ wone zɛbr cɛlsɩ!

¹⁷ Ɛ́ a Naaŋmɩn a, bʋ̃ʋ n'ʋ ɩ ʋ bɛ ɩ ɩ̃ kpi a ɩ̃ mã puori? A ɩ̃ mã nãá lɩɛb'ɩ a ɩ̃ yaa, ʋ nãá tɛr mɛ̃ nɩ a ʋ puori kʋralɛ.

¹⁸ Bʋ̃ʋ n'ʋ so ɩ̃ yi a ɩ̃ mã puori, alɛ wa ɩ k'ɩ̃ɩ nyɛrɛ wʋ̀ʋr nɩ kpɩɛrʋ, ɛ́ wa kpi n vĩ a?