Zeremi 2 - A SƐB-SÕW

A Ɩsɩrayɛl zawr'ɩ a ʋ Naaŋmɩn bɛr, ɛ́ tuur ŋmɩn-yoru na bɛ tɛr pɛr a

¹ A Sore tɩ ƴɛ̀r'ɩ a ɩ̃ zie à ŋá:

² «Cen tɩ ƴɛ̀r à ŋá a Zerizalɛm tẽw nɩbɛ zie: À ŋá n'a a Sore yere: Ɩ̃ cãà na bãwnɩ a lɛ fʋ na tɩ ŋmɛ̃ a koro za a. Fʋ na tɩ ɩ a pɔwsɩrale a, fʋ tɩ tu m'a. Fʋ na tɩ ɩ a ɩ̃ ƴãw-nɩ-yúor a, fʋ tɩ nɔnɛ mɛ̃ na! Fʋ tɩ tuur mɛ̃ nɩ a wɛja-kpalɛ pʋɔ, tẽsɔw zu bom za na bɛ bule a.

³ Ɩsɩrayɛl i, mãa yõ tɩ so b mɛ̃ a bʋ̃-dieri bʋ̃-dan a. Bɛlɩ dem za na mɩ́ tɩ tʋɔr fʋ a, mãa nɩ bɛl mɩ́ tɩ nɛbɛ! Faa mɩ́ tɩ páw bɛ nɩ daadaalɛ. À à ŋá n'a a Sore yel.

⁴ Nyɩ bɛr wõ a Sore ƴɛ̀rʋ, a nyɩɩm Zakɔb bʋʋrɛ, Ɩsɩrayɛl dɔwlʋ za nɩbɛ ɛ.

⁵ À ŋá n'a a Sore yere: Bʋ̃ʋ n'ʋ a nyɩ sãàkʋm-kore nyɛ̃ a ɩ̃ zie a bɛ sɛw, bɛ pɩl? Bɛ zɔ na tu bʋ̃-zawlɛ pùor mɩ̀ lɩɛbɩ bʋ̃-zawlɛ.

⁶ Bɛ bɛ yel bɛ tʋɔra: “Nyɩnɛ n'a a Sore be, ʋl na ír tɩ yi n a Eziptɩ tẽw, ʋl na tɛr tɩ tɔl'ɩ a wɛja-kpalɛ pʋɔ, zi-faa na ɩ gbʋlãkowe tɛwr a, zie na ko ɛ́ liw a, zie nɩr za na bɛ tɔlɛ a, zie nɩr za na bɛ kpɩɛr a?”

⁷ Ɩ̃ ɩ na nyɩ kpɛ tɩ-wɔnɩ tẽw a tẽsɔw na pʋ̃ɔ́ a pʋɔ, kɛ́ nyɩ tɩ tʋ̃ɔ́ íre tɔnɛ a ʋ bʋ̃-kʋ́ɔrɩ nɩ a ʋ na-bome pʋɔ. Ɛcɛ nyɩ na wa kpɛ a ʋ pʋɔ a, nyɩ dɛw nɩ a ɩ̃ tẽw bɛr, ɛ́ ɩ a ɩ̃ zi-sóra lɩɛbɩ zi-faa faa.

⁸ A bàwr-maalbɛ bɛ sowri kɛ́: “Nyɩnɛ n'a a Sore be ɩ?” A Wulu bãw-bãw-karɩ bɛ bãw mɛ̃ ɩ. A nɩ-bɛrɛ gaar'ɩ a ɩ̃ zu, a ƴɛ̀r-manbɛ ƴɛ̀r'ɩ a ŋmɩn Báàl yúor ƴãw, bɛ zɔ na tu bʋ̃-zawlɛ pùor.

⁹ Lɛ so ɩ̃ na cãà tɛr'ɩ nyɩ ƴɛ̀rʋ ɛ́ tɛr'ɩ a nyɩ bibiir mɩ̀ bibiir ƴɛ̀rʋ. A Sore n'ʋ yel.

¹⁰ Nyɩ cen a Gɩrɛkɩ mɩnɛ kʋ̃ɔ-kpɛ̃ɛ-sɔgɔ-ten pʋɔ tɩ jɩ́r nyɛ̃. Nyɩ tõ nɩbɛ a Arabʋ mɩnɛ tẽw Kedaar bɛ tɩ sowri vla bãw. Nyɩ na nyɛ̃ na bɛlɛ wa ɩrɛ a be mɛ̃ a lɛ nyɩ na ɩrɛ a ka a!

¹¹ Nɩ-bʋʋrɛ mɩ́ lɩɛr'ɩ a bɛ ŋmɩmɛ ɛ? Ŋmɩmɛ bɛ n'a mɩ̀ ɛ! A ɩ̃ nɩbɛ bɛl a, bɛ de m'a tɛw nɩ ŋmɩmɛ na kʋ̃ tʋ̃ɔ́ ɩ bom za a, mãa na ɩ a bɛ dɛpaalʋ a.

¹² Salom zu dem i, a yel ŋa a, ʋ ɓãa nyɩ nʋɔr, ʋ ƴãw nyɩ damnʋ, ɛ́ a ʋ faalʋ gbini nyɩ! A mãa, a Sore, mãa n'ʋ yel.

¹³ A ɩ̃ nɩbɛ sãw nɩ gb'a ayi: bɛ zawrɩ mɛ̃ na bɛr, a mãa na ɩ a nyɔ-vʋʋrʋ kʋ̃ɔ bul-nʋɔr a, ɛ́ tuw sa-bie-kʋ̃ɔ-bɔwrɩ, bɔw-wɛrɩ na bɛ ganɛ kʋ̃ɔ a.»

A Sore zawr-bɛrʋ waar'ɩ nɩ kpɩɛrʋ nɩ tuo

¹⁴ «A Ɩsɩrayɛl lɩɛb'ɩ gbãgbaa, bɩɩ ʋ taa dɔw a gbãgbaalʋ pʋɔ ɔ? Ʋ̃ʋ'hʋ̃. Ɛ́ bʋ̃ʋ n'ʋ so a nɩ-bʋʋr-yoru ɩrɛ ʋ mɛ̃ zɛbr-nɩ-nyɔwra a?

¹⁵ Bɛ ùore na mɛ̃ gben a, bɛ ŋmɛrɛ nɩ kɔkɛɛ a ʋ ƴãw. Bɛ sãw nɩ a tẽw za bɛr pelẽpelẽ. Bɛ nyɩw nɩ a ʋ tẽ-bɛrɛ bɛr, nɩr bɛ cãà kpɩɛr a pʋɔ ɩ.

¹⁶ A Mɛmfisɩ nɩ a Dafine ten dem tɛɛ za fɔrɛ nɩ a ʋ zu.

¹⁷ Ɩsɩrayɛl i, à á ŋá za bɛ ta b fʋ na tɩ zawrɩ a Sore fʋ Naaŋmɩn bɛr, a lɛn daar ʋ na tɩ tɛr fʋ cere nɩ a sɔ́r zu a ɩ?

¹⁸ Ɛ́ ƴɛrɛŋa a, bʋnʋ ƴãw n'a fʋ na cen a Eziptɩ tẽw kɛ́ fʋ tɩ nyũ a Nɩl kʋ̃ɔ? Bʋnʋ ƴãw n'a fʋ na cen a Asiiri tẽw kɛ́ fʋ tɩ nyũ a Efaratɩ kʋ̃ɔ?

¹⁹ A fʋ ɩ-faa, ʋ dɔwrɩ fʋ! A fʋ pùor-lɛbrʋ ɩ-ɩrɩ, a kpãà fʋ! Lɛ n'a fʋ na nyɛ̃ ɛ́ bãw yel ŋa: a mãa, a Sore fʋ Naaŋmɩn zawr-bɛrʋ sɩrɩ na kpɛ faa ɛ́ buore! Sɩza n'a, fʋ bɛ cãà màwr a ɩ̃ niŋé ɩ. A Sore, a kpɛnʋ-za-sob'ʋ yel.»

A Ɩsɩrayɛl ɩ na mɛ̃ pɔw na bɛ be a ʋ sɩr yõ ƴãw a

²⁰ «Koro za n'a fʋ gáarɛ a ɩ̃ zu. Fʋ ɩ na a baarɩ mãa nɩ a fʋ̃ʋ cara pʋɔ, ɛ́ fʋ yel: “Ɩ̃ bɛ cãà bɔbr k'ɩ̃ɩ ɩ gbãgbaa ɩ.” Bʋ̃ʋ n'ʋ vɛ̃, tãle za zu, tɩ-zimpiri za pile, fʋ mɩ́ gã na mɛ̃ pɔw-yɛm a.

²¹ Ɛcɛ, mãa a, ɩ̃ tɩ sɛl fʋ na mɛ̃ divɛ̃ tɩ-bʋʋrɛ na vɩɛl vɩɛl a, mɛ̃ tɩ-mɩŋa a. Ŋmɩŋmɩn n'a fʋ wa lɩɛbɩ divɛ̃ tɩ-yɛrɛ, a wɔmɛ na bɛ vɩɛl towtow a?

²² Fʋ̃ʋ saa na so kʋ̃ɔ nɩ zɩ̃ɛ a, fʋ̃ʋ saa na so kʋ̃ɔ nɩ sɩfan-yaga yaga a, a fʋ faalʋ dɛwr na cãà na be a ɩ̃ niŋé, a Sore Naaŋmɩn n'ʋ yel.

²³ Ŋmɩŋmɩn za n'a fʋ sʋ̃ɔmɩ yere: “Ɩ̃ bɛ dɛw ɩ̃ tʋɔra ɩ, ɩ̃ bɛ tu a Báàl mɩnɛ ɩ”! Jɩ́r a lɛ fʋ na ɩrɛ a bà-fʋɔla pʋɔ a. Sàw a lɛ fʋ na ɩ a. Fʋ ŋmɛ̃ na mɛ̃ nyɔ̃wmɛ-nyãw-pɔl na mɩ́ zɔ tɩ sãá ka, zɔ tɩ sãá ka a.

²⁴ Fʋ ŋmɛ̃ na mɛ̃ bõw-nyãw-gaara na mili a wɛja-kpalɛ ziir a. A bʋ̃-daar vʋla wa tɛr ʋ a, ʋ mɩ́ fõwne nɩ a sɛsɛb. A bʋ̃-daar vʋla wa ìr ʋ a, ãa n'ʋ na tʋ̃ɔ́ nyɔw ʋ? A bòn-daar na bɔbr ʋ a kʋ̃ tʋ̃ɔ́ bàlɛ a tʋɔra ɩ. A bʋ̃-daar vʋla wa dɛ tɛrɛ ʋ wa báarɛ a, a mɩ́ nyɛ̃ ʋ na.

²⁵ “Maal ɩrɛ, Ɩsɩrayɛl i! Fʋ na ƴãw nɩ a fʋ gbɛ́ɛ bàalʋ ɛ́ a fʋ kɔkɔr ko.” Ɛcɛ fʋ sɔw na: “Nyɩ ta dɩ tuo bàlɛ nyɩ tʋɔra ɩ! Ɩ̃ nɔnɛ nɩ a ŋmɩn-sãanbɛ ɛ́ bɔbr k'ɩ̃ɩ tu a!”

²⁶ Mɛ̃ a lɛ vĩ na mɩ́ nyɔw nyãnyuwe bɛ na ùr nyɔw a, lɛ n'a a Ɩsɩrayɛl nɩbɛ mɩ́ na nyɛ̃ vĩ, a bɛl, a bɛ na-mɩnɛ, a bɛ tõ-tõ-bi-bɛrɛ, a bɛ bàwr-maalbɛ nɩ a bɛ naaŋmɩn-ƴɛ̀r-manbɛ.

²⁷ Nyɩ mɩ́ yel'ɩ dàa tɩɩb: “Fʋ̃ʋ n'ɩ a ɩ̃ sãà!” ɛ́ yel kʋsɩɛr tɩɩb: “Fʋ̃ʋ n'ʋ dɔw mɛ̃.” Nyɩ bɛr'ɩ a ɩ jɩ́rʋ ɛ́ lɩɛbɩ zikur cɔw mɛ̃. Ɛcɛ, a kpɩɛrʋ dɛ wa páwr nyɩ a, nyɩ na yere nɩ a ɩ̃ zie: “Ìr! Faa tɩ!”

²⁸ Ɛcɛ, ɩ̃ na sɔw nyɩ na: “A nyɩ ŋmɩmɛ nyɩ na maalɩ a wa?” A ìr, alɛ na na tʋ̃ɔ́ faa nyɩ a lɛn daar nyɩ nãà wa be a kpɩɛrʋ pʋɔ a! Bʋ̃ʋ n'ʋ vɛ̃, Zuda nɩbɛ ɛ, a nyɩ ŋmɩmɛ yãwmɛ na mɛ̃ a nyɩ tẽ-bɛrɛ a!”

*

²⁹ A mãa, a Sore, ɩ̃ sowre na: Bʋ̃ʋ n'ʋ so nyɩ tɛr'ɩ mɛ̃ ƴɛ̀rʋ? A nyɩɩm za, nyɩ gaar'ɩ a ɩ̃ zu.

³⁰ Zawla lɛ n'a ɩ̃ ŋmɛ nyɩ. Nyɩ bɛ sàw de a kpãàfʋ ɛ. Nyɩ nɩ̃ɛ na kʋ a nyɩ naaŋmɩn-ƴɛ̀r-manbɛ mɛ̃ gben na kpɛ po-tuo a.

³¹ —A nyɩɩm, dɩ̃a nɩbɛ ɛ, nyɩ ƴãw tobr vla a Sore ƴɛ̀rʋ ƴãw!— Ɩsɩrayɛl nɩbɛ ɛ, ɩ̃ lɩɛb'ɩ wɛja-kpalɛ a nyɩ zie bɩɩ tẽw a zie na sɔb kʋralɛ a? Bʋ̃ʋ n'ʋ so a ɩ̃ nɩbɛ yel: “Be tɩ na bɔbr a n'a tɩ cere, tɩ kʋ̃ lɛb wa a fʋ zie ɩ?”

³² Pɔwsɩrale na tʋ̃ɔ́ na yiiri a ʋ dɛpaal-bome bɛr ɩ? Pɔw na maalɩ kul-taa a na tʋ̃ɔ́ na yiiri a ʋ kul-taa kparʋ kpàwr bɛr ɩ? Ɛcɛ a ɩ̃ nɩbɛ yiiri mɛ̃ na bɛr koro kãw za.

³³ Nyɛ̃ fʋ na bãw na-ɩ-lɛ a nɔ̃wfʋ pùor zɔ-tub ƴãw a! Ɛ́ a al ƴãw a, fʋ tɛr'a tɩ mili nɩ a nɩr kʋb.

³⁴ A nan dem nɩ a nɩbɛ na bɛ tɛr sãwna a zɩ̃ɩ be n a fʋ kparɩ nɛ́ɛ ƴãw. Ɛcɛ fʋ bɛ ùr nyɔw bɛ bɛ bɔbr a fʋ pan kárʋ ɛ! Ɛ́ à á ŋá za pʋɔ a,

³⁵ fʋ yel'a: “Ɩ̃ ɩ n nɩr na bɛ tɛr sãwna a. A bɛ tɛr à ŋá ɩ, a Sore kʋ̃ cãà nyɛ̃ nɩ mɛ̃ suur ɛ!” Ɛcɛ mãa a, ɩ̃ na maal'ɩ fʋ nɩ ƴɛ̀rʋ, bʋ̃ʋ n'ʋ vɛ̃, fʋ yel'a: “Ɩ̃ bɛ maalɩ faa ɩ.”

*

³⁶ Nyɛ̃ lɩɛrʋ fʋ na mɩ́ lɩɛrɩ a fʋ kpɛ-ta-tɔ mɔlɛ lɛ a! Ɛcɛ fʋ nyɛ̃ nɩ vĩ a Eziptɩ tẽw mɛ̃ a lɛ fʋ na tɩ nyɛ̃ a vĩ a Asiiri tẽw a.

³⁷ Fʋ mɩ̀ na yi n a tẽw ŋa pʋɔ tuo nuru zũú, bʋ̃ʋ n'ʋ vɛ̃, a mãa Sore a, ɩ̃ bɛ nɔnɛ a tɩɛfʋ ŋa bʋʋrɛ fʋ na bɔbr a ɩ. À ŋá bɛ n'a a yele na ɩ vla a fʋ zie ɩ.»