Zeremi 19 - A SƐB-SÕW

A duwle a Zeremi na ŋmɛr bɛr a yele

¹ À ŋá n'a a Sore tɩ yel a Zeremi: «Cen tɩ dà yawra duwle a yawr-mɩɛrɛ zie. Al pùorí, kaa ír nɩ-kore a nɩbɛ pʋɔ nɩ a bàwr-maalbɛ pʋɔ.

² Tu a Kʋseli dɩ̃dɔr ƴãw yi cen a Hinom fʋɔla pʋɔ. A be a, fʋ na tɩ hier'ɩ a ʋlɩ bom nɛ ɩ̃ na na yel kʋ̀ b a.

³ Fʋ na tɩ yel'a: A nyɩɩm Zuda tẽw na-mɩnɛ nɩ a nyɩɩm na kpɩɛr a Zerizalɛm a, nyɩ bɛrɛ wone a Sore ƴɛ̀rʋ. À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: Ɩ̃ na ɩ na kɛ̀ dɔwrʋ na ɩ dɔwrʋ a páw a tẽw ŋa, kɛ̀ pʋl-vʋ̃ɔ mɩ́ nyɔw nɩr na na wone bɛ ƴɛ̀rɛ a ʋ ƴɛ̀rʋ a.

⁴ Bʋ̃ʋ n'ʋ vɛ̃, a Zuda tẽw nɩbɛ zawrɩ mɛ̃ na bɛr, bɛ ɩ na bɛ bɛ lɛb cãà bãw a zie ŋa ɩ. Bɛ nyɩw nɩ tɩ-suur-zɔ̃-na-nyùur-vla-vla-a a zie ŋa pʋɔ kʋ̀ ŋmɩn-yoru. A bɛl mɩŋa, a bɛ sãàkʋm-kore nɩ a Zuda na-mɩnɛ bɛ tɩ bãw a ŋmɩmɛ á ŋá ɩ. Bɛ ɩ na kɛ̀ nɩbɛ na bɛ tɛr sãwna a zɩ̃ɩ cir pàw a zie ŋa.

⁵ Bɛ cɔbr'ɩ zi-tuo a ŋmɩn Báàl ƴãw, kɛ́ bɛ mɩ́ nyɩw a bɛ bidɛbr maal'ɩ bàwr kʋ̀ ʋ. Ɛcɛ, ɩ̃ bɛ tɩ ƴãw nʋɔr à á ŋá ƴãw ɛ, ɩ̃ bɛ dãw ƴɛ̀r a ƴɛ̀rʋ ɛ, ɩ̃ bɛ dãw tɛr a tɩɛrʋ ɛ.»

⁶ «Alɛ n'a so, bibir na vɩɛ na, a Sore n'ʋ yere, bɛ kʋ̃ cãà bʋɔlɛ a zie ŋa kɛ́ “Tafɛtɩ” bɩɩ “Bɛn-Hinom fʋɔla” ɩ, ɛcɛ bɛ na mɩ́ yel'a kɛ́ “Kʋ-vãvɩrɩ-taa fʋɔla”.

⁷ A zie ŋa tɛɛ za pʋɔ a, ɩ̃ na sãw nɩ a lɛ za a Zuda tẽw nɩ a Zerizalɛm tẽw nɩbɛ na cɔbrɩ a bɛr. Ɩ̃ na ɩ na a bɛ nɩbɛ kpi a zɛbr pʋɔ a bɛ dɔ̃ dem niŋé. A bɛlɩ dem na bɔbr a bɛ kũu a nɛbɛ ɩ̃ na ɩ n bɛ a lɛ. Ɩ̃ na kʋ̀ n a bɛ kũuni a sidume nɩ a gbõgbo-cili a dɩ a.

⁸ Ɩ̃ na ɩ na a Zerizalɛm tẽ-kpɛ̃ɛ lɩɛbɩ zie bɛ nãà mɩ́ wa nyɛ̃ ŋmɩɛr pʋl-vʋ̃ɔ cɛlsɩ a. Nɔ-ɓãan na mɩ́ nyɔw nɩ a bɛlɩ dem za na tɔlɛ a be a, ɛ́ bɛ na mɩ́ ŋmɩɛr'ɩ pʋl-vʋ̃ɔ cɛlsɩ a yel-sãwnɩ á ŋá za bɛ na nyɛ̃ a zũú.

⁹ Dɔ̃ dem na bɔbr a bɛ kũu a, na wa na wa ŋmãa jil a tẽ-kpɛ̃ɛ zɛb'ɩ ʋ. Kpɩɛrʋ nɩ wʋ̀ʋr na tɛr'ɩ a tẽw dem, ƴãw bɛ 'wɔbr a bɛ bibiir ƴã-gã-nɛnɛ, ɛ́ 'wɔbr taa.

¹⁰ A pùorí a, fʋ na ŋmɛr'ɩ a duwle a nɩbɛ bɛl na bɩɛlɛ fʋ a niŋé

¹¹ ɛ́ yel bɛ à ŋá: À ŋá n'a a Sore, a kpɛnʋ-za-sob yere: ɩ̃ na ŋmɛr'ɩ a nɩ-bʋʋrɛ bɛ ŋa nɩ a tẽ-kpɛ̃ɛ ŋa bɛr mɛ̃ a lɛ bɛ na mɩ́ ŋmɛr yawra duwle bɛr ʋ bɛ lɛb tɛr maal-ƴãwfʋ a. A na ɩ n a baarʋ. A ziir na bɛ ka be a zi-yoru a, bɛ na ũùne nɩ a kũuni a Tafɛtɩ tɛɛ za.

¹² Ɩ̃ na ɩ na a tẽ-kpɛ̃ɛ ŋa nɩ a ʋ nɩbɛ bɛ ŋmɛ̃ taa nɩ a Tafɛtɩ, a Sore n'ʋ yel.

¹³ A Zerizalɛm yie za nɩ a Zuda na-mɩnɛ yie za na tɛr'ɩ dɛwr mɛ̃ a Tafɛtɩ zie a. Bʋ̃ʋ n'ʋ vɛ̃, a yie á ŋá za gàrɛ zuru n'a a nɩbɛ mɩ́ nyɩw tɩ-suur-zɔ̃-na-nyùur-vla-vla-a kʋ̀ a salom zu ŋmar-bie za, ɛ́ kʋ̀ divɛ̃ de-kʋ̀b bome ŋmɩn-yoru.»

¹⁴ A Zeremi tɩ yi n a Tafɛtɩ be a Sore na tɩ tõ ʋ ʋ tɩ ƴɛ̀r a naaŋmɩn-ƴɛ̀r-manɛ ƴɛ̀rʋ a lɛb wa, wa àr a Sore Yir davʋra pʋɔ ɛ́ yel a nɩbɛ za zie à ŋá:

¹⁵ «À ŋá n'a a Sore, a kpɛnʋ-za-sob, a Ɩsɩrayɛl Naaŋmɩn, yere: “Ɩ̃ na ɩ na a dɔwrʋ al ɩ̃ na tɩ yel a tẽ-kpɛ̃ɛ ŋa ƴãw a, a wa a ʋl nɩ a ʋ tẽli-kpɔwlɩ ƴãw. Bʋ̃ʋ n'ʋ vɛ̃, a tẽw dem ɩ n zu-kpɛn dem, bɛ zawr'ɩ a ɩ̃ ƴɛ̀rʋ bɛr-wob.”»