Zeremi 18 - A SƐB-SÕW

A yawra nɩ a yawr-mɩɛrɛ

¹ A Sore tɩ ƴɛ̀r'ɩ a Zeremi zie yel ʋ à ŋá:

² «Zeremi i, ìr a ƴɛrɛŋa siw a yawr-mɩɛrɛ zie. Be n'a ɩ̃ na tɩ ɩ fʋ wõ a ɩ̃ ƴɛ̀rʋ.»

³ Lɛ n'a ɩ̃ tɩ siw a yawr-mɩɛrɛ zie, ɛ́ tɩ nyɛ̃ ʋ tone nɩ a ʋ bome bʋ̃-mɩɛra.

⁴ A lale ʋ na tɩ mɩɛr a tɩ nyɩ́r a, mɛ̃ a lɛ a na mɩ́ ta yaw-mɩɛrɛ za na tɛr a yawra a ʋ nũú a. Lɛ n'a a yawr-mɩɛrɛ tɩ lɛb maalɩ bʋ̃-yũo mɛ̃ a lɛ ʋ na bɔbr a.

⁵ A lɛ n'a a Sore tɩ ƴɛ̀r a ɩ̃ zie à ŋá:

⁶ «Ɩsɩrayɛl nɩbɛ ɛ, ɩ̃ kʋ̃ tʋ̃ɔ́ ɩ a nyɩ zie mɛ̃ a yawr-mɩɛrɛ ŋa a bɩɩ? A mãa Sore n'ʋ yere. Nyɩ be n a ɩ̃ nuru pʋɔ mɛ̃ a lɛ a yawra na be a yawr-mɩɛrɛ nuru pʋɔ a.

⁷ A mɩnɛ kãw, ɩ̃ mɩ́ ƴɛ̀rɛ nɩ vʋ̃ɔ-bɛrʋ, da-lɔbrʋ nɩ sãw-bɛrʋ ƴɛ̀rʋ nɩ-bʋʋrɛ kãw bɩɩ naalʋ-tẽw kãw ƴãw.

⁸ Ɛcɛ a bʋʋrɛ bɛ ŋa wa lɩɛbɩ a bɛ ɩb, bɛr a faa na ɩ ɩ̃ ƴɛ̀r a, ɩ̃ mɩ̀ lɛb'a bɛr a faa ɩ̃ na tɩ tɩɛr k'ɩ̃ɩ maalɩ bɛ a.

⁹ A mɩnɛ kãw, ɩ̃ mɩ́ ƴɛ̀rɛ nɩ mɛb nɩ sɛlʋ ƴɛ̀rʋ nɩ-bʋʋr-yoru kãw bɩɩ naalʋ-tẽw kãw ƴãw.

¹⁰ Ɛcɛ a nɩ-bʋʋrɛ bɛ ŋa bɛ wa bɛr wõ mɛ̃, ɛ́ maalɩ a lɛ na bɛ vɩɛl a ɩ̃ zie a, ɩ̃ mɩ́ lɛb'a bɛr a vla ɩ̃ na tɩ yel k'ɩ̃ɩ na maalɩ bɛ na a.

¹¹ Ƴɛrɛŋa a, Zeremi i, ƴɛ̀r a Zuda nɩbɛ nɩ a bɛlɩ dem na kpɩɛr a Zerizalɛm a zie à ŋá: “À ŋá n'a a Sore yere: ɩ̃ cɔbrɛ nɩ kpɩɛrʋ a nyɩ ƴãw, ɩ̃ tɩɛrɛ nɩ yele a nyɩ ƴãw. A nyɩ kãw za, ʋ mɩ́ bɛr a ʋ ɩ-faa. Sɩza, nyɩ lɩɛbɩ a nyɩ vʋʋrʋ nɩ a nyɩ ɩb.”»

¹² Ɛcɛ bɛ na sɔw na: «Fʋ bàlɛ nɩ fʋ tʋɔra! Tɩ na ɩ n a lɛ tɩ na yel a, tɩ na tuur'ɩ a tɩ tɩɛr-faar.»

A Ɩsɩrayɛl yiir'ɩ a ʋ Sore bɛr

¹³ A lɛ pʋɔ a, à ŋá n'a a Sore yere: «Nyɩ sowri a nɩ-bʋʋr-yoru za pʋɔ nyɛ̃: nyɩ dãw na wõ a yele á ŋá taabɛ ɛ? A Ɩsɩrayɛl sɩrɩ na ɩ ɩ-faa na bɛ maal'ɩ wob a.

¹⁴ A sa-pupure bɛ mɩ́ pàw a Libã tan pie nɩr na bɛ kpɩɛr a kʋralɛ ɩ? A fʋɔlɩ kʋ̃ɔ na mɩ́ zɔrɛ siwr ɓaarɓaar a na tʋ̃ɔ́ na ŋmãa bɩɩ? Ʋ̃ʋ'hʋ̃!

¹⁵ Ɛcɛ a ɩ̃ nɩ-bʋʋrɛ yiiri mɛ̃ na bɛr. Bɛ maalɛ nɩ bagɛ kʋ̀rɛ ŋmɩmɛ na bɛ ɩ ŋmɩmɛ a. A ŋmɩmɛ á ŋá ƴãw na bɛ ŋmɩɛr gbɛ́ɛ a sɔ́r zu. A ƴãw na bɛ bɛr a sɔ́r bɛ na tuur a koro za a, ɛ́ cere sɔrle na bɛ puo a zu.

¹⁶ A ɩ̃ nɩ-bʋʋrɛ ɩ n a bɛ tẽw ʋ lɩɛbɩ zie na sãw ʋ za a, ƴãw a nɩbɛ lɔbr pʋl-vʋ̃ɔ cɛlsɩ kʋralɛ. A mɩ́ dam'ɩ a sɔr-tɔlbɛ bɛ viire zuru.

¹⁷ A dɔ̃ sob wa tarɛ a, ɩ̃ na diw nɩ a ɩ̃ nɩ-bʋʋrɛ yaarɩ, mɛ̃ a lɛ a saa-pɛrɩ́ sɛsɛb na mɩ́ de a uuru cen nɩ a. A bɛ kpɩɛrʋ bibir a, ɩ̃ na wul bɛ nɩ a ɩ̃ kpaar, ʋ kʋ̃ ɩ a ɩ̃ niwn ɛ.»

Bʋ-taa na bʋ a Zeremi kʋb ƴãw a, nɩ a puoru ʋ na puori a

¹⁸ A dɔ̃ dem bɛ mɩnɛ tɩ yel'a: «Nyɩ wa tɩ wa cɔbrɩ cɔbrʋ a Zeremi ƴãw. Tɩ na cãà na páwr a Naaŋmɩn wulu a bàwr-maalbɛ zie, a yã a yã-bãwnbɛ zie, a Naaŋmɩn ƴɛ̀rʋ a ʋ ƴɛ̀r-manbɛ zie. Nyɩ wa tɩ ƴɛ̀r sãw a ʋ yúor, tɩ ta cɛlɛ a ʋ ƴɛ̀rʋ kãw za ƴãw ɛ.»

¹⁹ Ɛcɛ fʋ̃ʋ a, Sore e, wul kɛ́ fʋ cɛlɛ nɩ a ɩ̃ yele zie. Bɛr wõ a bɛlɩ dem na yere k'ɩ̃ɩ sãw na a ƴɛ̀rʋ.

²⁰ Bɛ mɩ́ maal'ɩ faa yáa nɩ vla a? Bɛl a, bɛ tuw nɩ bɔw kɛ́ bɛ ɩ ɩ̃ lo. Ɛcɛ, lɛb tɩɛrɩ ɩ̃ na tɩ àr a fʋ niŋé k'ɩ̃ɩ ƴɛ̀r a bɛ vla ƴãw, ɩ a fʋ suur ʋ zãá nɩ bɛ a.

²¹ A na ɩ lɛ a, ɩ kɛ̀ kɔ̃ lo a bɛ bibiir zu, a zɛbr-sɔ-kpɛ̃ɛ, ʋ kʋ bɛ fɔ̃w fɔ̃w. A bɛ pɔwbɛ, bɛ ta cãà tɛr a bɛ bibiir ɛ, bɛ lɩɛbɩ pɔw-kɔbɛ. Jɛ̀lmɛ̃ bàalʋ, ʋ kʋ a bɛ sɩrbɛ! A pɔlbili, bɛ kpi a zɛbr zie!

²² Bɛ wone kpɩɛrʋ gɔmɛ a bɛ yie pʋɔ, a lɛn daar fʋ nãà wa bɛr nɩbɛ na yãwmɛ ɛ́ tɛr zɛbr bome bɛ ùr wa a bɛ ƴãw a! Bʋ̃ʋ n'ʋ vɛ̃, bɛ tuw nɩ bɔw kɛ́ bɛ nyɔw nɩ mɛ̃, bɛ sɔwl'ɩ bɛrɩ a ɩ̃ gbɛ́ɛ ƴãw.

²³ Ɛ́ a fʋ̃ʋ, Sore e, fʋ bãw nɩ a bɛ nɩ-kʋ yele al za bɛ na cɔbrɛ a ɩ̃ ƴãw a. Ta dɩ a bɛ yel-bier suur ɛ, ta ír a bɛ sãwna bɛr ɛ. Bɛ lo a fʋ niŋé! Ɩ ɩb kãw a bɛ ƴãw a fʋ suur daar!